LUKAT 4

Ibilit en Yesùt a'la kagaligìlùk oba waga lagaike wene

(Mat.4:1-11; Mrk.1:12-13)

1At Yesùt i Yoretan ima pikenem, Ala Areagùn a'la peserogo kisikomo wùlìbi wagaikesik laganem, at Ala Areagùn nen ebe wolok he, o leimo apùnì le'ma atoma lagaike. 2Lagaikesik atoma were'ma eki 40 hari Ibilit en a'la kagaligìlùk oba wago welagaike. Wago werek kolek, eki 40 hari atem sùpùrùk motok nìkì'lek welagaikesi'mo nogo nen he, sùpùrùk motok nele agaikomo, 3hobuk at Ibilit oba wagaikesik he, mel yogosike:

“Hat eberogoat Ala aput halok he, helep aroma sùpùrùk horoti mene haga'lasuak en yogosin o,” ìlùk yogosikomo, 4#Ul.8:3 at Yesùt en he, mel yogosike:

“Ala nen he

Apùnì sùpùrùk enek nìkì logolìk, ineluk motok welagaikarek lek o,

ilak isikomo helal waganogo hesukwama werek o,” ìlùk yogosike. 5Atì'nogo yogosikomo, hobuk Ibilit en Yesùt wolok he, pokwe hei lagasikesik he, atoma nen o kweangma yì awì tì awì kaintek inetagepogot welagaikarek obakwe obogat yegek hogo weinamethìlìk omake hesik eileken lakhoagalùk yakùlesike. 6Yakùletì logolìk, mel yogosike:

“Kaintek inetagepogot welagaikare'ma inane hologo logolìk hogorinaparek atì obogat an ese logouagalùk wo'nesukwama re, an na'la nen ebethìlìk en,

Ap ti wogosigiìn, ìlùk wogisìgìresì'mo re, 7hat heitep awì yagasogo nawe a'ma ki wìrìk hogo'nabigin halok he, obogat hat ese logoinogolùk wokhesigin o,” ìlùk yogosikomo, 8#Ul.6:13 at Yesùt en he, mel yogosike:

“Ala nen ìkì logolìk he,

Hinopase Ala Netagepogot anat hineitep awì yagasogo nawe a'ma ki wìrìk hogo'napi logolìk he, an hesik enek hagatì logoino o,

ìlùk isikomo helal waganogo hesukwama werek o,” ìlùk, atì'nogo yogosikomo re, 9-11#Mzm.91:11-12 hobuk Ibilit en Yesùt wolok he, o Yerusalem lagaikesik he, Yesùt ebe o Ala awì tùm uan-aban wùrì'mo oba wolok lagalìk he, mel yogosike:

“At Ala nen,

An nagoromì malaikat yoko pelaksa wagìrek

mene amanogo nen setharek logouagalùk

inayoko hegein o,

ìlùk isikomo werek. Nen, aike mel isikomo werek:

Hat hesok helep oba temuk hogo waranogo

ìlùk he, it malaikat atì ineki talek oba

wokhabugun o,

ìlùk helal waganek weregat akìgì. Halok he, hat eberogoat Ala aput halok he, ya nen pok harogo maroma pin,” ìlùk yogosikomo, 12#Ul.6:16 at Yesùt en he, mel yogosike:

“Ala nen ìkì logolìk he,

Hit en, an hesik,

Ninopane Etagepogot anini werek a? Lek a, ìlùk,

noabùt palusak motok lek o,

ìlùk isikomo halal waganogo hesukwama werek,” ìlùk yogosike. 13Atì'nogo yogosikomo, at Ibilit en Yesùt oabùt paligìlùk yì walhìgìk, tì walhìgìk, ìlìk mea agaikomo re, hobuk yogotenem elok asigin he a, ìlùk, heraksalùk wo'lakasike.

Yesùt apotkwe o Kalilea lagai wagaike wene

(Mat.4:12-17; Mrk.1:14-15)

14At Ibilit a'nogo arat wo'lakasikomo nen he, at Yesùt Ala Areagùn omamerogo a'la werek kolek, apotkwe o Kalilea tokwe lagai wagaike. Lagai wagaikomo re, at abok o atoma motok sak-pak isike. 15Atì'nogo sak-pak iko kolek, at ebe atoma logolìk, o sapan egarek obakwe kìlìk wene yakùlisikenem apùnì atoma mene obogat en hogoratì lagaukwa.

Apùnì o Nasaret mene nen, Yesùt ina'la meathesukwa wene

(Mat.13:53-58; Mrk.6:1-6)

16Atì'nogo hogorato kolek, at Yesùt o Nasaret ebe alùge agaike ba lagaike. Lagaikesik, at hagatì lagaike hagat, ineki sabìt oba Ala hesik welegat logolìk, sapan uogolùk o apùnì Yahuri mene sapan egarek oba kisikesik, Ala ane helal waganek mene etage salhì logolìk yakùlisagalùk melagaike. 17Melagaikomo re, ap aike nen Ala ane ap Yesaya nen helal waganogo hesike mene a'nogo Yesùt wogosike. Wogosikomo hùkùlogo eileken hìthasike re, wene mel isike mene helai waganek were'ma etage salogo yakùlisasike:

18 # Yes.61:1-2 “It apùnì inagarok motok lek inelageik mene atì hano wene yì yakùlisìkì logouagalùk menhanhikomo nogo nen he, nopase Etagepogot Areagùn pelakhei wagama an noba louksek werek o. Nen, nayoko hìkì logolìk mel yogonesike:

It apùnì ineki hele homago mene hele hikalinabigin wene inom, ineileken pùk mene hano asuagalùk hagarinabigin wene inom,

yogoisìgìk, it apùnì inawe a'ma negen sebelogo hebisìlì'lùgì mene telogo inalepma hisìgìk,

19ninopase Etagepogot en hano'ninabigin mene arat horok asi waga o, ìlùk yogoisìgìk, ìkì logoino, ìlùk lakhani wagama wagì yi o,”

ìlùk isikomo, helal waganek mene a'nogo etage salhì logolìk yakùlisasike.

20Arat yakùlisìlìk he, helal waganek a'nogo ìkìlogo re, ap esewerek mene a'nogo wogorìk he, ebe hù'lagaike. Hù'lagaikomo, it apùnì obogat sapan uogolùk inom kisukwa mene amanogo ineileken at oba motok lùrogo lakhasukwa. 21Atì'nogo lakhiko were'ma, at Yesùt en he,

“Ala ane helal waganek mene yì ba,

Tì'nogo hagasugun, ìlùk isukwa mene a'nogo yogotak yakùlhisikenem hinasuk holho kolek yaat eperak higit agì o,” ìlùk isikomo, 22it apùnì amanogo nen he, mel isukwa:

“At yì ap Yùsùp aput a'nogo lek nogo? Arat o. Meneat he, at en wane hano motok yakùlnisike atì nayùk e,” ìlùk hogorasukwa. 23Atì'nogo hogorasukwama, at Yesùt en he, mel yogoisasike:

“Apùnì nen, ninhùp-nanhùbat ìkì logolìk,

Hat hebe ap loktet hake aroma re, hoba ou atì hokawerek en hagaran o, ìlùk egarek mene, hit en lagak hogo an yogonesugun hìgì. Atì'nogo yogonerik he,

O Kaperenagùm hagatì lagen mene holhì lago atì hak he, yogotak hokawerek haua yoma atì'nogoat aike hagasin o, ìlùk, yogonesuogolùk ìkì lagep hìgì,” ìlùk atì'nogo yogoisìlìk aike mel yogoisasike:

24“It ap Ala ane yogoisagarek mene atì re, inokawerek inaua atoma inogogì, inagoromì nen agauk hogo woginaparek lek o, ìlùk, eberogoat yogohisìgì. 25Nen, ap Elia welagaike atem higit he, moso wagì'lek 3 tahun agaikesik he, hobuk lagak hogo tugi 6 en holelhikomo re, o atoma ya ta sùpùrùk motok no agaike. Atem higit he, apùnì Isirael mene were'ma hìmì soge apik welagaukwa meneat he, 26Ala nen Elia hìmì soge mene atoma aike isa loagalùk inoba lakhesike hùk. Lek o. We, he soge mene omakeat aike o wele'ma Siron sili etage Sarepat atoma were'ma oba lakhesike o. 27Nen, ap Elisa nen Ala ane yogoisìkì lagaike atem higit he, o apùnì Isirael mene were'ma atoma ou henako hake a'nogo mene apik welagaukwa meneat he, aike hagarinapi lagaike motok lek. We, ap Naman aua Siria mene atìat hagasike o, ìlùk, eberogoat yogohisìgì,” ìlùk atì'nogo yogoisasikomo, 28it Yahuri mene sapan egare'ma welagaukwa mene inasuk holhukwasik he, ina'mage apik lagasukwa. 29Ina'mage apik lagalik, inebe melarìk, at ebe ineki hagasogo eta'ma wulakhìlìk he, o Nasaret era'lu tom oba wusukwa amanogo wolok lagalìk, temuk hogo pile pelaksa lùogolùk isukwa. 30Atì'nogo isukwa meneat he, at Yesùt it amanogo hebisaluk inekele'ma nen kigik hogo wo'lakasike.

At Yesùt en ap aike mokareke oabùt weak mene a'la kìlì'mo wulakhesike wene

(Mrk.1:21-28)

31Inekele'ma nen kigik hogo wo'lakìlìk he, o Kalilea tokwe kota etage Kaperenagùm kisike. Kisikesik he, ineki sabìt oba Ala hesik welegat logolìk, wene yakùlisasike. 32Yakùlisìkì logolìk, wene ebe esewerek mene nen egarek hak ikenem en, it amanogo nen he,

“Nayùk e!” ìlùk hogoratì lagaukwa. 33O sapan egarek oba amanogo were'ma, ap aike mokareke oabùt weak mene a'la kisikomo logolìk ane hùkorogo mel yogosike:

34“Yesùt Nasaret mene yì! Hat en nìkì'nogo haga'ninabigìlùk wagen! Nit weaga'ninabigìlùk wagen a? Hat hebe re, Ala okawerek hesik menhagaikesik lakhagei wagama wagen atì, an nen hùthagagì o,” ìlùk ane hùkorogo yogosikomo, 35at Yesùt en wenagatì logolìk he,

“Hane. Ap yì a'la nen henogo wùlìbi lan o,” ìlùk yogosikomo re, mokareke oabùt weak mene a'nogo nen ap a'nogo ebe tukwak hogo apùnì apik amanogo inekele'ma laksìlìk he, ap ebe weagathìgì'lek wùlìpike. 36Atì'nogo wùlùpenem he, apùnì apik amanogo inayùk agaukwasik he, it-it ìkì logolìk mel isukwa:

“At ane ike atì nìkìnik. At en mokareke inoabùt weak mene,

Wùlìbi lani, ìlùk usagat atì eseweregat logolìk, ane omamerogo wenagisikenem wùlùparek atì nayùk e,” ìlùk hogorasukwa. 37Atì'nogo hogorasukwasik, at Yesùt abok pak hogo o ya ta atoma wolok wùlùpukwa.

Yesùt en Simon eamal mel, apùnì he'nakit mel, ou hagarinapìke wene

(Mat.8:14-17; Mrk.1:29-34)

38Abok atì'nogo wolok wùlùpukwama, at Yesùt o sapan egare'ma a'nogo hebùlù he, ap Simon aua lagaike. Lagaikomo, at Simon atì eamal ou oba agaken apik werek en Yesùt en hagasuagalùk he, ayoko hesukwama, 39at en, he a'nogo era'lu lìlìk metek logolìk he,

“Ou yì lek ame o,” ìlùk, yogoto kolek aremnogoat he, ou a'nogo lek agaike. Lek agaikomo, he a'nogo melagaikesik he, it leberisìkì lagaike.

40Leberisiko were'ma, o mo eileken kopok hogo kiko kolek, apùnì nen it aike inoba yì ou tì ou werek mene obogat wogisek Yesùt oba wagaukwama, at en inebe lopok eki hagisìlìk hagarinapike. 41Atì'nogo hagarinapikomo, it he'nakit inebe logolegat, mokareke oabùt weak mene ina'la kìlìk welagaukwa mene nen mel yogosukwa:

“Ala aput harat o,” ìlùk inane ngai ìlìk ìlìk wùlùpukwa meneat he, it ina'la nen he,

“Karìsùt Ala nen, telninabuagalùk menhìlìk lakhei wesigin isike a'nogo ebe yìat o,” ìlùk, inelu nogo nen he, Yesùt en inane legat wùlùbuagalùk wenagisasike.

Yesùt en o sili lopok wene yakùlisìlìk lagaike wene

(Mrk.1:35-39)

42Atì'nogo wenagisasikesik, nogo ìlùk hùen o arat we isikomo re, at Yesùt o apùnì le'ma atoma lagaike. Lagaikomo, apùnì motok apik, at herarik lagaukwasik ebe arat inom api agaukwasik he, wele'ma lanogo ìlùk he, ineki hakhesukwa. 43Hakhesukwama, at Yesùt en he,

“Hano wene Ala awe a'ma hisikerek wene a'nogo o sili he'nakit atoma inomat yakùlisìlìk nìkì logouagalùk lakhani wagaikomo wagagisi'mo re, an o atomaat yakùlisìlìk nìkì logogin o,” ìlùk yogoisasike. 44Atì'nogo yogoisìlìk he, o Yuma tokwe apùnì Yahuri mene sapan egarek obakwe kìlìk, wene atì yakùlisìkì lagaike.

Currently Selected:

LUKAT 4: LAIDNI

Highlight

Copy