LUKAT 5
5
It ap ikan wanhì lagaukwa mene apùnì woginabìk nìkì logouagalùk emakum inayoko hesiko wene
(Mat.4:18-22; Mrk.1:16-20)
1Ineki aike sapùl he, at Yesùt i Kenesaret yekele'ma atoma metek were'ma re, apùnì motok apik Ala ane inasuk holuogolùk oba atogosi lagaukwa. 2Atogosi laga kolek, it ap ikan wanhì lagaukwa mene aike so pìre mene i aik oba hùlùk he, su yoge su ikan wanhì lagaukwa mene hìkìn katenem eileken isasike. 3Eileken isìlìk he, Yesùt ebe so Simon mene a'la kìlìk he,
“So yì hìgìlogo re, i eken tùlem negen hamùlùgat siok hogo lakhein o,” ìlùk, Simon yogosike. Atì'nogo yogorìk, at ebe so a'la hù'larìk he, apùnì apik amanogo i aik obakwe were'ma wene yakùliisasike. 4Arat yakùlisìlìk he, at Yesùt en Simon mel yogosike:
“Ikan apik wanuageip en he, hinebe i ekenma negen atem lìlìk su yoge su arì pelakhei lani o,” ìlùk yogosikomo, 5at Simon nen he,
“Noe! Yìbako-hùako pelapo motok welago mene re, aike motok wanhì'lek o. Meneat he, hat en yogonetenma nogo nen he, an nen yoge pelabiginat o,” ìlùk, 6atì'nogo yogorìk pelakhesukwa hak he, ikan motok apik a'la kalagaikomo inasu a'nogo lìbìlasigin hake haga'lagaike. 7Atì'nogo haga'lagaikomo, it inagaiya'lak so hùnogoat mene a'la welagaukwa mene nen leberisa wesuagalùk, ineki lamok waisasukwa. Atì'nogo waisasukwama, it a'nogo wagaukwasik he, ikan amanogo titelogo re, so aike a'la kalhìk, aike a'la kalhìk, so pìreat apem hesogothìgìk kalìk lagaukwa meneat he, ikan ekinsek he, so i a'la wule'lak hogo pigìlùk isike. 8Atì'nogo haga'lasigìlùk isikomo, at Simon a'nogo Yesùt eilhanem eitep awì yukuk hogo soma ìlìk he,
“Noe e! An weak hagatìrek mene yì re, yoma hebanìlùk lan o,” ìlùk yogosike. 9Ikan apik wanhukwa atì nen, at Simon agaiya'lak inom inayùk arìk atì'nogo yogosike. 10Ati hak, at Simon agaiya'lak inom hutik mene Sepeteùt againapùrì Yakobùt Yohanet eperak, atì'nogoat inayùk agaikomo re, at Yesùt en Simon mel yogosike:
“Hayùk agùn o. Ikan wanhì lagen atì hak he, hùlì yogotak en he, apùnì woginabìk nìkì logogin o,” ìlùk yogosike. 11Atì'nogo isikomo re, so a'nogo i aik oba hei wìrìk he, yì mene tì mene obogat heraksalùk Yesùt opolik lagaukwa.
Yesùt en ap aike oba henako hake were'ma hagasike wene
(Mat.8:1-4; Mrk.1:40-45)
12Atì'nogo lagaukwasik oba nen, ineki aike sapùl he, Yesùt o sili aike lagaikesik were'ma, ap aike oumo henako hake inayùk mene ebenakwe apik agaikesik logolìk, at en Yesùt eileken hìlìk he, eitep awì yagasogo hai watì logolìk he, mel yogosike:
“Yesùt, noe! Hat en hano haga'nabigin akegen halok he, elok hano haga'nabusagat o,” ìlùk, yogosike. 13Yogosikomo re, at Yesùt en ap a'nogo eki hakìkì logolìk he,
“Hano hagathabigìlùk ìkì lagì. Halok he, hano ame o,” ìlùk, yogoto kolek aremnogoat he, oumo henako hake a'nogo motok lek agaike. 14Lek agaikomo, at Yesùt en he, mel yogosike:
“Hat en he,
Yesùt en atì'nogo haga'nape, ìlùk he, apùnì aike motok yogoisagùn o. We, ap Ala esewerek mene nen eileken heoak en he, oba lìlìk, mel haga'no. At Musa nen ìkì logolìk,
Apùnì inoba hallo arìk, Ala hesik tì'nogo hisasak, ìlùk isike a'nogo higit hogoat,
Noba henako hake a'nogo lek arìk hano agì, ìlùk, Ala hesik aike hisikenem hùtheoak en he, aike hisa lano,” ìlùk asuk warogo lakhesike.
15Asuk warogo lakhesike meneat he, Yesùt en hagasike mene amanogo abok elangarìk lagaukwama, apùnì apik holhukwasik he, it yì ou tì ou inoba werek mene hagarinabuagalùk he, Yesùt oba motok apik atogosi waga lagaukwa. 16Atì'nogo hagato kolek meneat he, at Yesùt sapan ìgìlùk ebe apùnì le'ma leimo atoma laga lagaike.
Yesùt en ap aike eki esok wùt warek mene hagasike wene
(Mat.9:1-8; Mrk.2:1-12)
17Ineki aike sapùl he, at Yesùt wene yakùlisiko were'ma, it ap Parisi mene inom, Ala ane helal waganek mene yakùlisìkì lagaukwa mene inom, inawì o Kalilea tokwe nen, Yurea nen, kota Yerusalem en, oba wagaukwasik inasuk hologo hùtek were'ma, ninopase Etagepogot en apùnì ou weak mene Yesùt en hagarinapì logouagalùk omame wogoto kolek hagarinapì lagaike. 18Atì'nogo hagarinapo were'ma, ap aike eki esok wùt warek motok welagaike mene lit talogo nogo ikerek oba weitek warok kolek yerogo wolok wagaukwasik he, Yesùt ebe ouma were'ma elokoma hei kuogolùk isukwa. 19Atì'nogo hagasuogolùk isukwa mene re, apùnì motok peserek en he, kì'nogo wolok ku heat haga'lagaikomo, ap a'nogo o tùm oba wolok lagalìk he, tùm healogo lit talek nogo ìkì lagaike mene a'nogo ebe talek motogat apùnì apik amanogo inekele'ma tùlem, at Yesùt werek higit hogo elokoma earogo pelakhesukwa. 20Pelakhesukwama, at Yesùt en,
“It atì inetaùken noba hìpìrethagasik en wolok wagaika hìgì,” ìlùk, eileken enagat isìlìk he,
“Naput e! Hat weak hagatì lagen mene re, an nen sagalogo legetsìgì o,” ìlùk yogosike. 21Atì'nogo yogosikomo, it ap Ala ane helal waganek esewerek mene mel, it ap Parisi mene mel, ina'la nen he:
“Nit apùnì weak hagatì lago mene atì, it apùnì aike nen sagalogo legetsasak nogo? We, at Ala aligat en elok sagalogo legetsikerek meneat he, at yì nen Ala a'la meathìlìk etage weagathìlì'logo yì sa akegep,” ìlùk ina'la akasukwa. 22Atì'nogo akasukwama, at Yesùt en, it ina'la akasukwa mene enagat hùrisìlìk he,
“Hit hina'la atì'nogo akìkì lagep atì nenahalok. 23An nen ap yì wene yogosusak he, se hake kì akegep.
Hat weak hagatì lagen mene atì, arat sagalogo legetsìgì, ìlùk yogotì atì se hake mene yogotì akegep a? Ì a, at he,
Hebe melarìk lan o, ìlùk yogosusak se hake akìkì lagep a. Lek o. Hebe melarìk lan, ìlùk yogosumo ekinat o. 24Ekin meneat he, an abat ta'lasi wagagi a'nogo re, kweangma yoma logolìk, apùnì yì weak tì weak hagatarek mene an nenat sagalogo legetsìkì logouagalùk, Ala nen esewerek hanhike mene atì hùthanuageip,” ìlùk yogoisasikesik, ap eki esok wùt werek mene a'nogo mel yogosike:
“Hebe melarìk halit talogo nogo ìkì lagen mene ari helalùk he, haua lan o,” ìlùk yogosike. 25Atì'nogo yogoto kolek aremnogoat, ap a'nogo apùnì amanogo ineilhanem melagaikesik he, alit talogo nogo ìkì lagaike mene a'nogo helalùk Ala hogorarìk hogorarìk aua lagaike. 26Atì'nogo hagasikomo apùnì amanogo inebe obogat inoake palarìk, inayùk apik agaukwasik he, mel isukwa:
“Nineileken yogotak hogo atì, motok hunigat mene hogo. Nayùk e,” ìlùk Ala hogorasukwa.
Yesùt en ap Lewi ayoko hesike wene
(Mat.9:9-13; Mrk.2:13-17)
27Atì'nogo haga'lùk he, at Yesùt o atoma nen wùlìbìk he, kwe laga logolìk eileken yethasike re, ap uang pemerintah hesik kìno ìlìk wanharek mene aike etage Lewi atì, kantor uang kìno ìlìk hìkì lagaike ba hùrek were'ma eileken hasike. Atoma were'ma eileken hìlìk,
“Nopolik eme o,” ìlùk yogosikomo re, 28melarìk, yì mene tì mene obogat heraksalùk he, opolik lagaike. 29Lagaikesik he, at aua Yesùt aganeke apik isasike. Atì'nogo isakhìlìk he, apùnì apik uang pemerintah hesik kìno ìlìk wanhì lagaukwa mene mel, apùnì he'nakìt mel, at inom hù'larìk sùpùrùk omakìma nìkì lagaukwa. 30Atì'nogo niko were'ma, it ap Parisi mene mel, it ap Ala ane helal waganek esewerek mene mel en, at Yesùt agoromì ane wanhì lagaukwa mene amanogo mel yogoisasukwa:
“Hit he, ap uang pemerintah hesik kìno ìlìk wanharek mene mel, it aike weak hagarì'lùgì mene mel, hinom sùpùrùk omakìma nìkì lagep aroma nenahalok,” ìlùk yogoisasukwa. 31Atì'nogo yogoisasukwama, at Yesùt en he,
“It apùnì aike inoba hano mene, loktet lak en ou hagarinabuagalùk inayoko housak nogo? Lek o. We, inoba ou werek halogat, loktet lak inayoko housak o. 32An wagagi atì re, apùnì hano hagatarek mene inayoko heigìlùk wagagi hùk. Lek o. We, apùnì weak hagatarek mene atì heraksìlìk inoabùt hebelasuagalùk, inayoko heigìlùk wagagi o,” ìlùk yogoisasika.
Sapan uogolùk sùpùrùk nìkì'lek welagaikarek wene
(Mat.9:14-17; Mrk.2:18-22)
33Atì'nogo yogoisasikesik oba nen he, it apùnì aike nen Yesùt mel yogusukwa:
“It ap Yohanet agoromì ane wìlì'lùgì mene atì, ineki apik welagì'lek, sapan uogolùk halok he, sùpùrùk nìkì'lek logolìk sapanat iko welagaikarek. Nen, it ap Parisi mene inagoromì inane wìlì'lùgì mene atì re, atì'nogoat hagatarek Meneat he, it ap hat hane wìlì'lùgì mene atì re, we, yùgùnat sùpùrùk nìkìk, eken amusu nìkìk, nìlì'lùgì atì re,” ìlùk yogosukwa. 34Atì'nogo yogusukwama at Yesùt en he, mel yogoisasike:
“Ap aike agwe ìkìki logolìk he, erùgì agaiya'lak inayoko hegein mene inom logolìk,
Hit sùpùrùk nìkì'lek logoni o, ìlùk yogoisasak akegep? Mea o. 35Atì'nogo meneat he, ap atì erùgì agaiya'lak hisalùk ebe wolok logoin oba weregat o. Atì'nogo wolok lamo atem sat enek he, it atì ineki aike sùpùrùk nìkì'lek logogunat o,” ìlùk yogoisasike.
36Atì'nogo yogoisasikesik he, wene aike oba lìrogo mel yogoisasike:
“Apùnì nen, su alep laberì'lùgì mene lìbìlaga halok, su ket mene lìbìlogo hageat mene atì ba labelogo hìkìn katarek lek. Atì'nogo kasugun halok, ket mene lìbìlugun atì nen weak agìk, hageat mene atì ba kasumo eperak higit lek atì nen weak agìk, igin a. 37Ati hak, apùnì nen anggur eken herelogo amusu ket mene isoak wam ogat mene hageat hagarek mene a'la hinatarek lek. Atì'nogo hinasugun halok, amusu ket mene atì nen he, sup hogo yekalogo eken amusu ebe kesalaga logolìk, isoak atì inomat yekalasigin o. 38Halok he, anggur eken amusu ket mene halok he, isoak ket meneat a'la hinasusak o. 39Nen, it apùnì nen he,
Anggur eken amusu hageat mene etuk hano nìkìrek, ìlùk egaresik he, hobuk ket mene na inabìt o,” ìlùk yogoisasike.
Currently Selected:
LUKAT 5: LAIDNI
Highlight
Share
Copy
Want to have your highlights saved across all your devices? Sign up or sign in
