LUKAT 3

Yohanet en ima pelaginapì lagaike wene

(Mat.3:1-12; Mrk.1:1-8; Yoh.1:19-28)

1Ap kain etagepogot Kaisat Tiperìut atì apùnì Ùrùm 3 mene obogat at eki ba hagisek 15 tahun werek kolek atì hùlìat, ap Potìùt Pilatùt atì ebe gubernur o propinsi Yurea welagaike. Nen, ap Herotet atì ebe kain logolìk, o Kalilea tokwe atoma hagisek welagaike. Nen, ap kain Herotet agot Pilipùt atì ebe kain logolìk he, o Iturea atoma inom, o Terakonitit atoma inom, hagisek welagaike. Nen, ap Lisaniat atì ebe kain logolìk, o Apilene atomaat hagisek wela gaike. 2Inogogì kaintek pemerintah hesik it atem werek kolek, Ala hesik he, ap Hanat Kayapat eperak Ala esewerek mene inogogì kain welagaukwa. Atì'nogo werek kolek, at Yohanet ap Sakaria aput a'nogo o leimo apùnì le'ma atoma were'ma, Ala nen wene aike yogosike. 3Atì'nogo yogosikomo, o Yoretan tokwe atoma ya ta nìkì logolìk, apùnì yogoisìkì logolìk he, mel ìkì lagaike:

“Ùkùm hinoba mene Ala nen sagalogo legetsoagalùk he, hit weak hagatì lagep mene atì heraksìlìk, hinoabùt hebela'ni. Hinoabùt hebelasumo, an nen ima pelakhinapì logogin o,” ìlùk, yogoisìlìk nìkì lagaike. 4#Yes.40:3-5 Atì'nogo yogoisìlìk nìkì lagaike atì re, ap Yesaya, Ala ane yogoisìkì lagaike mene a'nogo nen ìkì logolìk he:

“Ap aike o leimo apùnì le'ma atoma ane wai ìkì logolìk he,

Eiga! Ninoe Etagepogot esok hìlìk wesiginkwe kwe hanorogo tegelhìk, kolo mene higit hogo yatìk, ìkì logoni o, ìlùk waisìlì'logo.

5Tokoma halok, hesak hogo higirethìgìk, tom halok, punu halok, tamulogo higirethìgìk, kwe kolo-alo werek halok, higirethìgìk, sirek-haksek halok, enagasogo hìgìk, ìkì logoni o.

6Atì'nogo hagatep halok, Ala nen apùnì telninabigin mene aike lakhei waganem hineileken hogoin o,”

ìlùk, Yesaya nen helal waganogo hesike mene higit hogoat, at Yohanet an atì'nogo yogoisìlìk nìkì lagaike atì.

7Atì'nogo yogoislìlìk nìkì lagaikomo, it apùnì amanogo motok apik ima pelaginabuagalùk he, Yohanet oba atogosi waga lagaukwa mene mel yogoisìkì lagaike:

“Hit walo nen tagokwe mene yoma sanì! Hit he, Ala a'mage apik lagagin a'nogo hinoba hikenem hese elok logoin ìlùk sa nen yogohisikomo. Mea o. 8Halok he, hina'la ebethìlìk, weak hagatì lagep mene heraksìlìk hinepe eberogoat hebelaga ìlùk enagat asuak en higit hogo hagatì logoino o. Nen, hina'la nen he,

Aberaham atì nit ninopase, ìlùk akagùp o. At Ala nen Aberaham againapùrì negen haga'lasuagalùk helep yì mene elok hagasusagat o, ìlùk yogohisìgì atì. 9E ero lopok eken hano mene ìtì'lek halok, mùkogo etumo laksagalùk posie e omaken oba hangsek motok werek o,” ìlùk yogoisasike. 10Atì'nogo yogoisìkì lagaikomo, it apùnì apik amanogo nen he, mel yogosukwa:

“Halok he, nit ninoabùt kì'nogo hagasusak,” ìlùk yogosukwama, 11at en he, mel yogoisasike:

“Ap sa nen, inasu ùkùlkwe mene pìre werek halok he, at aike asu lek mene aike wogosusak o. Nen, apùrùk werek halok he, atì'nogoat leberisasak o,” ìlùk, yogoisasike. 12Atì'nogo yogoisasikomo re, it ap pemerintah hesik uang kìno ìlìk wanharek mene Yohanet oba wagaukwasik he, mel isukwa:

“Nit hogo re, ima pela'ninabinok en he, noe. Ninoabùt nìkì'nogo hagatì logou,” ìlùk, atì'nogo yogosukwama, 13at Yohanet en he, mel yogoisasike:

“Hit en oko wanhì logolìk, hina'la nen kagalogo aike oba mangorogo wanhì'lek, we,

Yì'nogo wanhì logoino, ìlùk yogohisaga mene atìat higit hogo wanhì logoino,” ìlùk yogoisasike. 14Atì'nogo yogoisasikomo, lt ap tentara mene wagaukwasik he, mel yogosukwa:

“Nit hogo re, ninoabùt nìkì'nogo hagatì logou,” yogosukwama re, at Yohanet en he,

“Apùnì inagarok mene wokhisoagalùk hinane keirogo yogoisìgìk, hinapeliak wene inoba hìlìk inauang helìgìk, usak motok lek o. At he, yabu hagatì lagep higit hogoat, oko gaji wokhisìlì'lùgì atì,

Elogat wo'nisaga, ìlùk hinetaùken yamuk hogoat wanhì logoino o,” ìlùk yogoisasike.

15Atì'nogo yogoisasikomo, it apùnì amanogo nen ina'la ebetì logolìk he,

“Ala nen ap aike telninabuaglùk menhìlìk lakhei wesigin ìlùk, serogo welago a'nogo, at Yohanet yìat he a?” ìlùk ina'la akiko were'ma re, 16at Yohanet en mel yogoisasike:

“An nebe yekerek nomame lek mene nen, we, ima nek pelakhinapì lagi o. Mene re, at aike kain omame apik mene hobuk wesigin o. At ebe wìrìk he, at en ima pelakhinabu hak, Ala Areagùn inom, etu inom, hinoba pelakhei wesigin o. At ebe kain omame apik atì nen he, esok hele homago mene, an nebe yeherek mene nen hikalusak he, mea o. 17Gandum eken holusak hesik, wabùn oba hurogo lakhegein mene, at esewerek mene ekimo werek atì. Tegelusak oba higit asi waga halok, hano mene halok, tegelogo hikerek oba obùlù'mo hanoma hìgìk, apùpùleke halok tegelogo etu nogolusak le'ma a'nogo ba laksìgìk, igin o,” ìlùk, yogoisasike. 18Hano wene a'nogo apùnì apik yogoisìkì logolìk he, inasuk atì'nogo warìk nìkì lagaike. 19Inasuk atì'nogo warìk nìkì logolìk he, at kain etagepogot Herotet atì nen agot agwe Herotia atì eki abusak wanhìk, weak tì weak apik hagatìk, hagarìk nìkì lagaike mene hesik, at inomat asuk wasikomo re, 20at Herotet a'nogo weak hagarìk waga lagaikesik he, hobuk oba louk hogo, Yohanet ebe eki hele warogo re, o apùnì ineki hele warogo hisagarek oba kelakhesike.

Yesùt ima pelakhesike wene

(Mat.3:13-17; Mrk.1:9-11)

21At Yohanet en apùnì obogat ima pelaginapì logolìk he, at Yesùt ima pelakhesikeat. Ima pelakhesikomo, at Yesùt ebe nen sapan iko kolek he, pogot healogo, 22Ala Areagùn sùe pel hake ali'luk hogo ot oba labok i pi wagaike. Atì'nogo hagasikomo re, pogot oba nen ane mel isike:

“Naput netawì e! Noba lìok ike o,” ìlùk isike.

Yesùt apu opalak ta'larìk wagaukwa wene

(Mat.1:1-17)

23At Yesùt ebe umur 30 tahun agaikesik en, yì mene tì mene hagarìk nìkì logoigìlùk eki hùkasike. Nen, at ebe re, it apùnì nen Yùsùp aput ìlùk akasukwa. Nen, Yùsùp atì re, Eli aput. 24Nen, Eli atì re, Matat aput. Nen, Matat atì re, Lewi aput. Nen, Lewi atì re, Malki aput. Malki atì re, Yanai aput. Yanai atì re, Yùsùp aput. 25Yùsùp atì re, Matika aput. Matika atì re, Amot aput. Amot atì re, Nahum aput. Nahum atì re, Hesili aput. Hesili atì re, Nagai aput. 26Nagai atì re, Mat aput. Mat atì re, Matika aput. Matìka atì re, Simei aput. Simei atì re, Yosek aput. Yosek atì re, Yota aput. 27Yota atì re, Yohanan aput. Yohanan atì re, Eresa aput. Eresa atì re, Serubabel aput. Serubabel atì re, Sealtiel aput. Sealtiel atì re, Neri aput. 28Neri atì re, Malki aput. Malki atì re, Ati aput. Ati atì re, Kosam aput. Kosam atì re, Elmatam aput. Elmatam atì re, Et aput. 29Et atì re, Yesua aput. Yesua atì re, Elieset aput. Elieset atì re, Yorim aput. Yorim atì re, Matat aput. Matat atì re, Lewi aput. 30Lewi atì re, Simeon aput. Simeon atì re, Yehura aput. Yehura atì re, Yùsùp aput. Yùsùp atì re, Yonam aput. Yonam atì re, Eliakim aput. 31Eliakim atì re, Melea aput. Melea atì re, Mina aput. Mina atì re, Matata aput. Matata atì re, Natan aput. Natan atì re, Taùt aput. 32Taùt atì re, Isai aput. Isai atì re, Obet aput. Obet atì re, Poat aput. Poat atì re, Salmon aput. Salmon atì re, Nahason aput. 33Nahason atì re, Aminatap aput. Aminatap atì re, Atmin aput. Atmin atì re, Areni aput. Areni atì re, Heseron aput. Heseron atì re, Peret aput. Peret atì re, Yehura aput. 34Yehura atì re, Yakùp aput, Yakùp atì re, Isak aput. Isak atì re, Aberaham aput. Aberaham atì re, Tera aput. Tera atì re, Nahot aput. 35Nahot atì re, Seruk aput. Seruk atì re, Erehù aput. Erehù atì re, Pelek aput. Pelek atì re, Epet aput. Epet atì re, Salmon aput. 36Salmon atì re, Kenan aput. Kenan atì re, Arapaksat aput. Arapaksat atì re, Sem aput, Sem atì re, Nu aput. Nu atì re, Lamek aput. 37Lamek atì re, Metùsala aput. Metùsala atì re, Henok aput. Henok atì re, Yaret aput. Yaret atì re, Mahalalel aput. Mahalalel atì re, Kenan aput. 38Kenan atì re, Enot aput. Enot atì re, Set aput. Set atì re, Aram aput. Aram atì re, Ala aput.

Currently Selected:

LUKAT 3: LAIDNI

Highlight

Copy