LUKAT 2

Yesùt ta'lagaike wene

(Mat.1:18-25)

1Atem higit he, ap kain Kaisat Agùtùt atì nen apùnì o yì awì tì awì inetage helal wanuagalùk wene yoko wulaksasike. 2Inetage emakumagìk helal wanhukwa atì, ap etage Kirebìut atì, o propinsi Sìrìa atoma kain gubemur werek kolek wanhukwa. 3Atì'nogo inetage helal wanuagalùk he, apùnì inawì sili lopok kìlìk lagaukwa. 4-5Nen, at Yùsùp hogo re, Taùt en tagokwe mene nogo nen he, o Kalilea tokwe kota etage Nasaret atì nen he, o Yurea ap Taùt ta'lagaike ba, o kota etage Pe'lehem pigìlùk, at Maria eperak lopolek welagaukwa a'nogo eak a'ma were'ma eperagat inetage helal wanuagalùk pisukwa. 6Pisukwasik atoma were'ma eak a'nogo takasak higit agaikomo, 7eak makusa abat takasike. Takalìk he, o apùnì ap pok mene nogo egarek oba motok peserek en he, su kain mene ba ìkìlogo, sang wam apùrùk nikerek oba ebe hesukwa.

It ap wam topa wam konho were'ma, malaikat inoba pi wagaukwa wene

8Atem higit he, o Pe'lehem era'lukwe atoma, it ap wam konho welagaikarek mene aike hùako inako konho welagaukwa. 9Atì'nogo were'ma aremnogo, ninopase Etagepogot agot malaikat pogot oba nen yoko pelaksa wagarek mene aike ka nen heat wagaikesik inera'lu melaganem he, ninopase Etagepogot hogoratarek mene apopok inoba yarogo hisasikomo, it inayùk motok apik agaukwa. 10Inayùk agaukwama re, at malaikat a'nogo nen he, mel yogoisasike:

“Hinayùk agùp o. Lakhani, hano wene apùnì obogat ina'la hai apik hakogoin mene, yogohisa wagì o. 11Yogotak telhinabigin mene kain Etagepogot Karìsùt a'nogo o ap Taùt awì sili welagaike ba a'nogo ta'lagasik werek o. 12Ebe enagat hineileken hìlìk huthoageip en he, omalik ketago mene su kain mene ba ìkìlogo e sang wam apùrùk nikerek oba hagasik werek a'naga ha logoin o,” yogoisasike. 13Atì'nogo yogoisiko kolek aremnogoat he, malaikat pogot oba nen yoko pelaksa wagarek mene inebe motok apik ka nen heat weinam agaukwasik he, at malaikat aike a'nogo inomat Ala hogoratì logolìk mel isukwa:

14“It pokwe pogot oba welagaikarek mene nen,

ninopase Ala atìat hogoratì logouak o.

Nen, it apùnì kweangma yoma inebe Ala oba

lìok ikerek mene inetaùken hapuk hogo

logouak o,”

ìlùk isukwa. 15Atì'nogo yogoisìlìk he, it amanogo hisalùk inapotkwe pogot oba lagaiko kolek he, it ap wam konho welagaikarek mene amanogo it-it ìkì logolìk he,

“Tì'nogo haga'lagama o, ìlùk ninopase Etagepogot en yogonisike atì, o Pe'lehem ha lùok o,” ìlùk isukwasik, 16hepok-hepok lagaukwa re, Maria Yùsùp eperak omalik ketago a'nogo sang wam apùrùk nikerek oba weinhìlìk were'ma ha lagaukwa. 17Ha lagaukwasik ineileken hìkì logolìk he, wene omalik a'nogo hesik malaikat en Yogoisasukwa mene amanogo pìlìngìrogo yogoisasukwa. 18Atì'nogo yogoisasukwama, it apùnì atoma inasuk holhukwa mene obogat en, mel isukwa:

“Egi! Nayùk e,” ìlùk hogorasukwa. 19Meneat he, at he Maria a'nogo nek he, wene isukwa mene amanogo etaùkenma wanhikesik he, wenesùgì ebetì lagaike. 20Nen, it ap wam konho welagaikarek mene amanogo ineileken halùk hobuk impotkm waga logolìk he,

“Wene malaikat en yogonisaga a'nogo higit hogoat haga'lagama nineileken hìgìk, ninasuk holhìk, ogo o,” ìlùk, Ala hogoratìk, hai watìk, ìlik wagaukwa.

Yesùt etage salhukwa wene

21Atì'nogo wagaukwama welagaukwasik en, nogo ineki 7 nen ìluk hùenkwe re, omalik a'nogo ogat ekalìma mene palusak obaat palhuwasik he, ebe oan agosa a'ma agì'lek werek kolek malaikat en isukwa higit hogoat he, etage Yesùt salhukwa.

Yesùt ketago ba ebe Ala wogosukwa wene

22Etage arat salhukwasik he, Ala nen hageat Musa yogosikomo, at en ìkì logolìk he,

“Hìmì ineagwì taginabìk he, nogo ineki atì'nogo ìlùk en kwe wùlùbusak o,” ìlùk isike mene higit hogoat, nogo atì'nogo ìlùk he, omalik ketago a'nogo ninopase Etagepogot wogosuogolùk wolok o Yerusalem wagaukwa. 23#Kel.13:2,12 Atì'nogo wolok wagaukwa atì re, ninopase Etagepogot en alebat ninasuk wasike wene a'nogo ba ìkì logolìk he, mel isike:

“Omalik makusa mene ap halok he, an hinopase hesik hanusak,”

ìlùk isike. 24#Im.12:8 Nen,

“Sùe abilang hake atì mene ap aike a? He aike a? Ì a, at he, sùe pel hake atì pìre halok a, an hinopase Netagepogot hesik wa'nesusak o,”

ìlùk isike a'nogo higit hogo wogosuogolùk wolok wagaukwa.

25Ati sat ap o Yerusalem mene aike etage Simeon. At oabùt he, hano, Ala ayùk hogo logolìk, motok higit hogo hagatì lagaike. Atì'nogo hagatì logolìk, apùnì Isirael mene ina'la hanorinabi wesigin mene atì serogo were'ma, Ala Areagùn oba louk isikomo welagaike. 26Atì'nogo oba louk i wagaikesik, mel yogosike:

“Hat hebe wa'lagì'lek werek kolek, ap kain aike ninopase Etagepogot en menhìlìk lakhei wesigin isike a'nogo waganem heileken halùk en wa'lasigin o,” ìlùk, abok yogosikesik he, 27at Simeon a'nogo Ala Areagùn oba motok logolìk, Ala awì wùrì'mo kìlìk were'ma, Yesùt agosa opase eperak Ala nen isike mene helal waganek welagaike mene higit hogoat hagasuogolùk he, Yesùt tago a'nogo wolok kisukwa. 28Kisukwama, Yesùt tago a'nogo Simeon agoumo wanhikesik he, Ala etage hogoratì logolìk mel isike:

29-32“Nopase a. Apùnì yì awì tì awì inebe obogat ineileken hoagalùk, telinabigin mene arat lakhei wagenma hìgì. At en he, it etakwe mene hoba wesuagalùk lìarinapìk, hat hagainapùrì Isirael mene hogorinabuagalùk lìarogo welagìk, igin mene neileken arat hìgì. Halok he, hat en yogoneten higit hogoat, yogotak an hatitigeke netaùken hapuk hogo yoma heraksalùk hoba wesik en wo'nabumo hano o,” ìlùk, Ala hogorasike. 33Omalik atì abok atì'nogo isikomo re, agosa mel, opase mel, inasuk holhukwasik he,

“Egi!” ìlùk, hogorasukwa. 34Nen, at Simeon a'nogo nen,

“Ala nen hanothinabuak,” ìlùk, ane agauk hogo yogoisìlìk he, omalik a'nogo agosa Maria yogorik he, mel isike:

“Ala nen he, yekerek yì ba, it ap Isirael mene inebe logolegat, aike menhisìgìk, aike pelakhisìgìk, hagasuagalùk menhesike o. At yì apùnì obogat hùthoagalùk menhesike meneat he, it apùnì obogat en,

Ninabìt o, ìlùk ìlì'lùgì a'nogo, 35ina'la akìlì'lùgì mene atì enagat asigin o. Nen, hat hogo re, karok ekat mago mene nen hetaùkenma taluk hogo hoasu hagat, ha'la motok weak asigin o,” ìlùk yogosike.

36Nen, o atoma he aike etage Hana. Ap Panùel ùkùl etage Aset mene a'logo, Ala ane yogoisikerek mene welagaike. At agùn wanhìkesik oba nen 7 tahun eperak welagaukwasik, 37soge hesikesik oba nen, at ebe umur 84 tahun motok yaman agaikesik welagaike. Logolìk eki aike sùpùrùk nìkì'lek heang negen hakìlìk Ala awì wùrì'mo atoma likene hùako abìt hìgì'lek sapan iko motok welagaike. 38Atì'nogo iko were'ma, at Yesùt agosa opase inom kìlìk welagaukwa atì sat inoba wagaikesik he, mel isike:

“Ala nopase a,” ìlùk hai wasikesik he, it apùnì o Yerusalem mene ina'la nen, Ala nen hobuk tehlinabigin ìlùk serogo welagaukwa mene obogat yogoislki logolìk,

“Ebe waga yì,” ìlùk, yekerek a'nogo abok yogoisìkì lagaike.

Yesùt wolok o Nasaret wagaukwa wene

39Ninopase Etagepogot en ninasuk wasike mene helal wanhukwa a'nogo higit hogo atì'nogo arat hagasukwasik he, at Yesùt agosa opase inaua i Kalilea ima o kota etage Nasaret a'nogo lagai wagaukwa. 40Lagai wagaukwasik logolìk, yekerek a'nogo alùge aga logolìk, ebe omame agìk, etaùken motok kagalek haga'lagìk, ìkì lagaikomo, Ala nen agaugeratì lagaike.

Yesùt yekerek oba Ala awì wùrì'mo kìlìk hagasike wene

41 Tahun ebe lopok mo lagagìk, pìgìk, iko kolek, Yesùt agosa opase eperak topa wam warogo pesta Paskah isago nùogolùk he, o Yerusalem pìkì lagaukwa. 42Atì'nogo pagaresi'mo nogo nen he, it atoma omalik ta'lagaikare'ma 12 tahun arat hagathùlùk pesta isago nùogolùk atogosi kagaresi'mo nogo nen he, at Yesùt a'nogo 12 tahun arat asi wagaikomo re, isago nùogolùk wolok pisukwa. 43Pisukwasik isago arat nalùk he, Yesùt agosa opase eperagat Yesùt o Yerusalem atoma kamo isikomo it inokorat inapotkwe inaua lagai wagaukwa. 44It agosa opase ina'la nen he,

Yesùt a'nogo apùnì he'nakìt ninom wago mene amanogo inom wìrì'lùgì, akalùk waga lagaukwasik en, nogo uogolùk en ineileken hìthasukwa re, ebe lek en he,

“Oe agot inom werek a? Ì a, at he, agaiya'lak inom werek a,” ìlùk inoba hinok wanhukwa. 45Hinok wanhukwa mene ebe lek en he, hobuk inapotkwe o Yerusalem at herasi pisukwa. 46Pisukwasik, herarìk ineki pìre nìkì lagaukwasik en, hobuk ineki aike nen hìthasukwa re, at ebe Ala awì wùrì'mo kìlìk, it ap Ala ane yakùlisagarek mene inom inekele'ma hùrek logolìk, it amanogo inane ikenem asuk holhìk, it en ikenem at en oko ìgìk, hinok wanhìk, ikenem herasukwa. 47Atì'nogo ìkì logolìk, it en hinok wanhenem, at wene motok elu logolìk oko yogoisasike atì nen he, it ap atogorek welagaukwa mene amanogo obogat ane inasuk holhukwasik he,

“Nayùk e!” ìlùk hogorasukwa. 48Atì'nogo hogoratenem, it at agosa opase eperak en ebe arat herasukwasik he,

“Nayùk e!” ìlùk hogorasukwa. Hogorasukwasik agosa nen he, mel yogosike:

“Neak, hat yì'nogo haga'ninapen nenahalok. Hopase neperak ninalabut hìrìk herakhabìk nìkì lago yì heileken nisan,” ìlùk atì'nogo yogosikomo, 49at Yesùt en he:

“Hit an hera'nabìk nìkì lagep nahalok. An nopase awì wùrì'mo logousak ìlùk hinokot nogo?” ìlùk yogoisasike meneat he, 50it eperak hùthìgì'lek wongothìlìk welagaukwa. 51Atì'nogo ìlùk he, at Yesùt agosa opase inom o Nasaret lagai wagaukwa. Lagai wagaukwasik logolìk, at agosa opase inane hanorogo hologo hagatì lagaike. Nen, agosa re, wene amanogo obogat etaùkenma wanhìkesik eberek motok welagaike. 52Nen, at Yesùt atì'nogo logolìk, ebe alùge agìk, a'la kagalek motok haga'lagìk, iko kolek, opase Ala mel, apùnì mel, at hesik inoba lìok ìkì lagaike.

Currently Selected:

LUKAT 2: LAIDNI

Highlight

Copy