LUKAT 12

“Ap Parisi inetaùken pìre atì nen weagathinabinogo nen, hinepe hebelogo logoino,” ilitk yogoisasike wene

(Mat.10:26-27)

1Wene atì'nogo iko kolek, apùnì motok apigat inera'lu atogosi wagaukwama re, inebe motok kerelek-hoporek nogo nen he, it aike nen it aike inesok okut en al lebelogo hìlìk lagaukwa. Atì'nogo haga'lagaikomo, at Yesùt en agoromì ane wanhì lagaukwa mene amanogo wene mel tak yogoisasike:

“Ap Parisi mene inoabùt he, eken sùpùrùk horoti mene hisuagalùk, a'lakwe pelaparek mene atì hùke logolìk he, inogat oba nek hano salek, inetaùken pìre atì nen, weagathinabinogo ìlùk, hinepe hebelogo logoino. 2Mene re, yì mene tì mene sebelek mene atì hukalhìk, hinago werek mene atì inelùrogo sele'mathìgìk, igin enek o. 3Atì'nogo bagasigin atì nen he, hit o mùmmo logolìk ìkì lagep mene atì, o lìa ba ikenem obogat inasuk holugun o. Nen, ouma logolìk hinane sami-samok inasu'mo ìkì lagep mene atì re, o weinamma lagalìk inane hùkorogo yogoisikenem holugunat o,” ìlùk yogoisasike.

“Ala hinayùk hogo logousak,” ìlùk yogoisasike wene

(Mat.10:28-31)

4Atì'nogo yogoisasikesik he, aike mel yogoisasike:

“Nagaiya'lak e! An wene yì hit hesik yogohisak o. Apùnì nen hinebe hinoasugun atì hinayùk agùp. Hinagasabeke nek hinoarìk he, it en hobuk aike weagathinabusak mea atì nen, hinayùk agùp o. 5Meneat he, hit sa hinayùk hogo logousak nogo. An nen yogohisak. At Ala nen hinebe hinoarìk he, hobuk etu ai'mo elok lakhikasak werek atìat hinayùk hogo logoino, ìlùk yogohisìkì lagì atì. 6Mene re, sùe wulue atì oko mìren palharek nogo. Ebe 5 mene oko uang sen motok hamùlùgat pìre mene ba wanharek akìgì. Atì'nogo hagatarek meneat he, at Ala sùe atì omakeat halok aike lì'mathìgì'lek eberek motok welagarek o. 7Nen, hit hinesi hinùkùloa'ma obogat, at Ala nen eki motok wenago welagarek o. At Ala nen sùe wulue apik atì esin hake akikerek hùk. Hinebeat esin motok akikerek o. Atì nen hinayù'lek hogo logoino o,” ìlùk yogoisasike.

Apùnì ineilhanem “Yesùt an noe,” ìlùk inane pak hogo usak wene

(Mat.10:32-33, 12:32, 10:19-20)

8Atì'nogo yogoisasikesik, aike mel yogoisasike:

“Sa nen,

Yesùt atì an noe o, ìlùk apùnì ineilhanem, pak hogo iko halok he, an abat ta'lasi wagagi a'nogo nen hogo re,

At yì an nagot o, ìlùk, it malaikat Ala nen yoko laksa wagarek mene amanogo ineilhanem nane pak hogoat yogoisegein o. 9Meneat he, sa nen,

Yesùt atì an nokot o, ìlùk, apùnì ineilhanem, labelho halok he, an nen hogo re,

At atì an nokorat o, ìlùk, it malaikat pogot oba mene Ala nen yoko laksa wagarek mene amanogo ineilhanem nane pak hogo yogoisegeinat o. 10An abat ta'lasi wagagi a'nogo nabok weak palho halok he, weak hagasugun mene atì inebe lopok Ala nen sagalogo legetsegein meneat he, Ala Areagùn atì abok weak palho halok he, weak hagasugun mene atì Ala nen legetsegein motok lek o. 11Hit hinanema wanuagalùk, apùnì nen it apùnì Yahuri mene sapan egare'ma atoma mel, it ap pemerintah mene ineilhanem atoma mel, it ap inetagepogot ineilhanem mel, wokhisek hika lago halok he, hina'la nen he,

Nit ninogat telogo wene oko kì mene ugun, ìlùk hinalabut hìtùp o. 12Atì sat he, hit en wene oko uagalùk Ala Areagùn nen,

Yi'nogo ini o, ìlùk, hina'la kagalìgìn mene werek o,” ìlùk yogoisasike.

“Ap aike kain eilmo wùlalhak meneat he, oabùt kepù negen hagasike,” ìlùk oba lìrogo yogoisasike wene

13At Yesùt en atì'nogo yogoisikenem, it apùnì apik atogorek welagaukwa mene amanogo omakeat aike nen he, mel yogosike:

“Noe. An noe nen nit ninopase wa'laga logolìk, at amìnìngeke nit neperak hesik hùlùk laga meneat he, nagaiyak aligat agasik werek atì, aike mìkìlogo wo'nesuak en he, yogo'no o,” ìlùk yogosikomo, 14at Yesùt en he, mel yogosike:

“Hinebe tegelogo hikìlìk hinagarok lopok sùpùthikasak atì, an menhanhama akegen?” ìlùk yogosikesik he, 15apùnì apik amanogo mel yogoisasike:

“Apùnì inagarok apik welagarek atì ba ineluk welagaikarek lek o. Yì mene tì mene an mene nek logoilep, ìlùk ina'la akìkì logoinogo ìlùk hinepe hebelogo logoino o,” ìlùk atì'nogo yogoisasikesik he, 16wene aike oba lìrogo mel yogoisasike:

“Ap kain mene aike nen eyabu kweang mulimo hanoma awì yasikomo re, ebe eken apik isikomo, 17at ap a'nogo a'la nen he,

Awì yatì mene ebe eken apik ìte atì, ebe palogo hegein oba obùlùk lek yoma, nìkì'nogo hagasigin, ìlùk, a'la ebetì lagaike. 18A'la ebetì lagaikesik he,

Yì'nogo hagasigin, ìlùk, mel akasike:

O wùrì'mo alep hìkì lagì ba yì mesalogo re, hobuk hùko mene aike wùthìlìk, nagarok mel, yì mene tì mene awì yatì mene eken palogo mel, o atoma motok hìkì logogin. 19Atì'nogo hakìlìk werek kolek he, nokawerek en nasuk warìkì logolìk,

Yogo. Mo lagagìk, pìgìk, iko kolek yì tahun tì tahun hesik nagarok apik elok hogo hakìgìrì'mo hano. Yogotak set walogo logolìk, sùpùrùk nìkìk, eken amusu nìkìk, nìkì logolìk he, na'la hai hakìkì logogin o, ìlùk, nokawerek nasuk warìkì logogin, ìlùk akìkì lagaikomo, 20at Ala nen he,

Ap yì, hetaùken motok lek yì rì! Yogotak hùako yì arat hareagùn selok hogo wulaksa wesigin o. Wulaksa waganem, hagarok motok apik atogorogo hakegen atoma sa ese asigin akegen, ìlùk atì'nogo yogosike. 21Ati hak he, it apùnì Ala eilhanem ebe mene wanhì'lek logolìk, it inokawerek mene nek nomologo hakìlì'lùgì atì, atì eperak hìgìrat o,” ìlùk yogoisasike.

“Hinalabut hìtùp o,” ìlùk yogoisasike wene

(Mat.6:25-34)

22Atì'nogo yogoisìlìk, at agoromì ane wanhì lagaukwa mene amanogo mel yogoisasike:

“An nen atì'nogo yogohisìgì atì nen, hit hina'la nen he:

Nineluk logouogolùk he, ninapùrùk kì mene nogoin. Ninasu kì mene laberogoin, ìlùk, hinalabut hìrogo wenesùgì uan horo ebetì logoinogo ìlùk yogohisìgì. 23Nekarek mene atì abelma meneat he, esin he, hinebe hineluk logousak atìat o. Nen, su labetarek mene atì abelma meneat he, esin he, hinebe atìat o. 24At sùe pokiet hagaterek hùthani. At en he, yì mene tì mene awì yatìk, eken palhìk, ikerek motok lek. Nen, hobuk nasak hesik eken palogo o wùrì'mo hakikerek oba motok lek meneat he, at Ala nen apùrùk wogoterek. Mene re, at Ala nen sùe atì agaugeraterek nogo? Lek o. We, hit hinebeat agaugethinapì logolìk hinapùrùk wokhisegein lek nogo? Wokhisegeinat o. 25Nen, hit aike nen he,

An wa'lasusak higit atì sat he, katok hogo wa'lagì'lek, hamùlùgat aike inom hogo logoile e, ìlùk wenesùgì uan horo ebesigin atì ba heluk aike inom logousak nogo? Mea o. 26Halok he, hit en yì wene tì wene hamùlùgat mene hagasusak mea nen logolìgat he, hùko mene atì hinalabut hìtì lagep atì nenahalok. 27Eken muliken molaken ìterek atì hùthani. Eken atì oan isigìlùk, set kwil-kwal hogo hagatìk, yo negen lalogo su ìtìk, ikerek motok lek meneat he, ap kain Salomo a'nogo helalìke wagane'ma hogoratì lagaukwa atì mea o. Eken atì nek he, eilamùlìt weak atì hani! 28Halok he, eka heleka o leimokwe welagarek mene atì re, yogotak hak, hano welagaresik en, hùen hak he, etumo lolhisagarek meneat he, Ala nen inasu laberisa hak hano mene hagarogo hisikerek atì hak, hit hinebe hesik labethikegein lek nogo? Hinetaùken at oba hìpìrìk logohùk yìi ri! 29Hina'la nen he,

Ninapùrùk mel, ninagei mel, kì mene nogoin, ìlùk, atì meneat esinethìlìk hinalabut hìrogo logogùp o. 30Atì'nogo hagatarek atì obogat he, it apùnì etakwe mene nen atì mene esinethìlìk herarìk negarek meneat he, hit yì nek he, yì mene tì mene lek en hinelageik negen welagasep atì, at hinopase Ala pogot oba mene elu welagarek. 31At Ala awe a'ma kìlìk logogun atì mene esinethogoin halok he, hit yì mene tì mene atì oba louk hogo wokhisegeinat o.”

“Hano mene pogot oba hikoagalùk, lakhakìkì logoino,” yogoisasike wene

(Mat.6:19-21)

32“Halok he, hit Ala againapùrì kìlìk welagasep mene hinebe hamùlùgat mene yì, nagaiya'lak e! Ala nen hit at awe a'ma hikagalùk a'la akikesik werek atì re, hinayùk agùp o. 33Hit hinagarok mene atì oko abarìk he, oko uang abasugun mene amanogo it inagarok lek inelageik mene atì sùpùrisano o. Sùpùrisìlìk he, uang awì momok agarek lek mene waganogo hìlìk, kalogo hìkì logou hak, hinagarok hano motok lek asigin lek mene, it ap ineil agasabu weak mene nen yogot hinasi kìgìk, elugeke nen palhìk, ikerek motok le'ma pogot oba atoma kalogo hikoagalùk lakhakìkì logoino o. 34Hinagarok hinetaùken hutik mene atoma atogorek were'ma, hinetaùken atomaat logogin o,” ìlùk yogoisasike.

Yesùt en, “Hinepe hebelogo logousak,” ìlùk yogoisasike wene

35-36Atì'nogo yogoisasikesik he, hobuk yogoisìkì logolìk he,

“Ap kain mene hìmì ìgìnapenem lìlìk isago nalùk waganem, agoromì atitigeke mene serogo inepe hebelogo were'ma, at apotkwe wìrìk, kwe papagathikenem hepok kwe hùthagarek hak, hit hogo re, hinasu hanorogo ìkogo nen esage kìalogo hìlìk logoino o. 37At kain a'nogo atitigeke mene amanogo inoe serogo were'ma ebe waga logoumo re, ina'la hai apik hakogoin o. Atì'nogo serogo were'ma wesipik he, at inoe a'nogo asu it inasu hake laberogo, at agoromì amanogo isago a'nogo noagalùk inebe omakìma lapuk hogo hùthisìlìk he, at en sùpùrisegein, ìlùk yogohisìgì.

38“Atì'nogo hagasigin atì re, at ebe o hùbeken tùlem wesigin he a? O etawì wekelho kolek wesigin he a. It serogo were'ma hisa waganem, ina'la hai apik hakogoin o.

39“Wene yì hina'la eberek logoino. Ap awì esewerek mene aike a'la akìkì logolìk,

O yogotak hùako re, jam tì ba an naua yoma ap aike yogot wanigìlùk kì wesigin, ìlùk elu logolìk aua kagalek logoilepma re, o pin talogo yogot wani kilep lek. 40Atì hak he, hit hina'la nen he,

At tì sat wesigin, ìlùk akìgì'lek wonogat werek kolek, an abat ta'lasi wagagi a'nogo re, arat wesigin atì, hinebe tegelek logoino o,” ìlùk yogoisasike.

Ap kain nen atitigeke mene oabùt higit halok, kolo halok, hagaterek mene oba lìrogo yogoisasike wene

(Mat.24:45-51)

41At Yesùt en atì'nogo yogoisasikomo at Peterùt en mel yogosike:

“Noe! Wene oba lìrogo yogonisegen atì re, nit hesik enek egen a? At he, apùnì obogat ninom hesik egen a,” ìlùk yogoisikomo, 42at ninoe Etagepogot Yesùt en he, mel yogosike:

“Ap kain mene aike againapùrì serisek logolìk inapùrùk nasak mene wogisasak higit hogo wogisìkì logouagalùk, at atitigeke mene ayoko hikenem a'la kagalek logolìk oabùt oe ane igin mene higit hogo hagaterek atì sa hake akegen. At atì oe atì nen, menhùlùk lagarek o. 43Menhùlùk laganem, atitigeke a'nogo atì'nogo higit hogo hagatenem, at oe a'nogo apotkwe eileken ha waga halok, atitigeke mene a'nogo a'la hai apik hakegein o. 44Atì'nogo hano hagatenem, ha wìrìk, oe a'nogo nen he,

An nagarok yoma heleleng hogo hat heki ba logouak, ìlùk menhegein o, ìlùk eberogoat yogohisìgì. 45Meneat he, at atitigeke mene atì oabùt weak halok he, a'la nen he,

Noe a'nogo hepok wìrì'logo lek atì, logopik en wesigin hìgì, ìlùk, at oe atitigeke mene aike ap lek, hìmì lek, tùgì inoatìk, sùpùrùk mel, anggur amusu mel, oba lagolek nìlìk, wùrep oba, anggur amusu atì nen ebe lùgùlùgì palhìk, ìkì logolìk, at en he,

46Noe a'nogo o tì sat, jam tì ba wesigin, ìlùk motok okot wonogat were'ma oe kain a'nogo ha wìrìk he, atitigeke mene a'nogo ebe tùgì motok warogo re, it apùnì aike inetaùken Ala ba hìpìrethìgì'lek mene hisikerek oba atoma laksegein o.

47“Ap atitigeke mene aike a'la nen he,

An noe nen, Tì'nogo hagarogo hanilep, ìlùk a'la akikerek mene elu logolìgat he, hagarogo hisìgì'lek logogin halok he, ap atì tùgì ou werek wasi wesigin o. 48Meneat he, atitigeke mene aike a'la nen he,

An noe nen,

Tì'nogo hagarogo hanilep, ìlùk a'la akikerek mene okot logolìk atì'nogo hagarogo hisìgì'lek tùgì ou weak wasusak higirat weak hagate halok, tùgì hamùlùk hogo negen wasi wesigin o. Apùnì inebe lopok apigat wogisegein mene atì, okawerek waga logolìk apigat kìno igin o. Nen, yì mene tì mene hùkorogo ineki ba logouagalùk menhisegein mene atì, hobuk,

Hùkorogo wo'ne'ni, ìlùk igin o,” ìlùk yogoisasike.

Yesùt en, “Apùnì inebe omakeat mene inom hek hogo hisagalùk wagagi,” ìlùk yogoisasike wene

(Mat.10:34-36)

49Atì'nogo yogoisìlìk he, hobuk mel yogoisasike:

“An he, o kweangma yoma etu kelaksagalùk wagagisi'mo nogo nen he, etu atì hepok amulok kìala'nìk, ìlùk akìkì lagi. 50Apùnì yoma ima pelaksìlì'lùgì hake, an yì aik tì aik haga'nabugun mene re, oan werek kolek, na'la weak welagì. 51Hit hina'la nen he,

At kweangma yoma wagaike atì re, apùnì kweangma mene yoma lapulogo hinagalùk wagaike, ìlùk akegep a? Lek o. An he, hùlì warogo hisagalùk wagagi, ìlùk yogohisìkì lagì o. 52O yogotak hùlì nen he, ap aike againapùrì inom inebe 5 inaua omakìma mene logolìk, it-it inom hek hogo weak arìk, inebe hìnagan nen he, inebe pìre inabok palhìk, nen inebe pìre nen he, lagak hogo inebe hìnagan aremnogo inabok palhìk, ugun o. 53Inom atì'nogo heksek logolìk he, opase nen aput eperak weak agìk, aput en opase eperak weak agìk, agosa nen eak eperak weak agìk, eak en agosa eperak weak agìk, oan nen he, a'logo eperak weak agìk, a'logo nen he, oan eperak weak agìk, atì'nogo inom weak arìk logoin o,” ìlùk yogoisasike.

O yogotak elokoken haga'laganem hùthasak wene

(Mat.16:2-3)

54Atì'nogo yogoisasikesik he, apùnì apik amanogo wene aike mel yogoisasike:

“O mo korok ikerek higit a'loma nen ohena aike lagai wage halok he,

Ohùk! Moso wesigin, ìlùk egesep hak he, moso arat wagarek. 55Nen, o sogoi i apùt higit a'loma nen wago halok he,

Ohùk. O hìbì lagagin, ìlùk egesep hak he, arat hìbì agarek a. 56Hit hinogat oba nek hano salek hinetaùken pìre yì rì! Kweang pogot elokoken hùthìlìk he,

Atì'nogo haga'lasigin, ìlùk, hinetaùken wekelek logolìk, oabùt enagat palhesep meneat he, o yogotak welago ya ba yì'nogo haga'lasigin, ìlùk, hùthìgì'lek welagep atì nahalok,” ìlùk yogoisasike.

“Wene hinoba hìlì'lùgì mene sagalogo legetheino,” ìlùk yogoisasike wene

(Mat.5:25-26)

57Atì'nogo yogoisasikesik, wene aike mel isike:

“Wene hinokawerek en elùgùn warogo higirethìkì lagep lek nahalok. 58Ap aike nen ùkùm hat hoba hìlìk wene ero pìlìngìtarek mene inoba wokharek lìlìk, it ap atì nen hebe polisi wogisamo, it en he, ineki hele warogo hisagarek oba atoma kelakhagei lanogo nen he, oan ebelakwe laga logolìk atemat heperak wene sagalogo legetheino. 59Nen, sagalogo legethìgì'lek halok he, heki hele warogo kelakhagaumo re, oko katok hogo motogat wogotì'lek halok he, atoma nen wùlìbi wesigin motok lek o, ìlùk yogohisìgì,” ìlùk yogoisasike.

Currently Selected:

LUKAT 12: LAIDNI

Highlight

Copy