YOHANET 18

At Yesùt ebe hakhei lagaukwa wene

(Mat.26:47-56; Mrk.14:43-50; Luk.22:47-53)

1At Yesùt en sapan atì'nogo arat ìlùk he, at agoromì ane wanhì lagaukwa mene amanogo at ebe inom wùlìbi lagaukwasik, i etage Kiteron aik ìlì bakwe yabu e eken nekarek mene awì yagokwe wùlùpukwasik agoromì inomat atoma kisukwa. 2At Yesùt agoromì ane wanhì lagaukwa mene amanogo ineki hobugalep atoma atogosi laga lagaukwasi'mo nogo nen he, at Yùrat Yesùt wasuagalùk yoko lagaike mene a'nogo yabu atì elu welagaike. 3Atì'nogo elu nogo nen he, it ap Ala esewerek inogogì kaintek mel, it Parisi mene mel en he, inagoromì Ala awì serogo welagaikarek mene inayoko hìlìk laksasukwama, at Yùrat en tentara mene esa logolek aike inom wogisek, sike mel, sìge mel, yì esage tì esage mel, wolok atoma lagaukwa. 4Lagaukwama, at Yesùt en,

“An nebe hobuk yì'nogo haga'nabugun,” ìlùk obogat elu welagaike atì nen, inoba wagaikesik he, mel yogoisasike:

“Hit sa herarìk wagep,” ìlùk yogoisìkì lagaikomo, 5it en he:

“Yesùt awì Nasaret mene a'naga herarìk wago o,” ìlùk yogosukwama, at Yesùt en he,

“Atì nebe anat o,” ìlùk yogoisasike. Atì'nogo iko kolek, at Yùrat Yesùt wasuagalùk yoko lagaike mene a'nogo inera'lu metek welagaike. 6Werek kolek, at Yesùt en he,

“Atì nebe anat o,” ìlùk yogoisikenem, it amanogo mamìng hogo inalakwe hatat laga logolìk he, inalakwe tagauk warìlìk lagaukwa. 7Atì'nogo lago kolek, at Yesùt en hobuk aike inom mel yogoisasike:

“Hit sa herarìk wagep,” ìlùk yogoisasikomo, it en he,

“Yesùt awì Nasaret mene a'naga herarìk wago o,” ìlùk yogosukwama, 8at Yesùt en he, mel yogoisasike:

“Atì nebe anat o, ìlùk hageat yogohisìgì akìgì. Hit anat hera'nabìk wagep halok he, an nagoromì yoma re, loak en hebisani o,” ìlùk yogoisasike. 9Atì'nogo yogoisasike atì re, oan haga'lagì'lek werek kolek alebat, at Yesùt en Ala yogotì logolìk he:

“Ala nopase. Apùnì hat en wo'nesigin mene amanogo aike nalagì'lek o,” ìlùk yogosike mene a'nogo ane ebe asuagalùk atì'nogo yogoisasike atì. 10Atì'nogo yogoisiko kolek, at Simon etage aike Peterùt egarek a'nogo akarok atì sat hesogo were'ma lisogo wanhìkesik he, ap etagepogot Ala esewerek mene atitigeke etage Malìkùt atì wasigìlùk huguthasike re, esako ebekwe sapuk hogo lakhesike. 11Atì'nogo lakhesikomo, at Yesùt en, mel yogosike:

“Peterùt. Hakarok obùlù'mo houa'ma kelakhakan o. Apùnì nen i hinago wogisikenem nekarek atì hak, an nopase nen,

Hat yì aik tì aik hagathabugun o, ìlùk yogonesike mene atì higit hogo haga'nabusak mea akegen? Lek o. Haga'nabusagat o,” ìlùk yogosike.

Yesùt eki hele warogo wolok, ap etage Hanat oba wagaukwa wene

12Wene atì'nogo ìlùk isikomo re, it ap tentara mene esa logolek amanogo inoe kain aike inom mel, nen, it ap Yahuri mene Ala awì serogo welagaikarek mene mel, inom en he, at Yesùt ebe hakhìlìk, eki hele wasukwa. 13Eki hele warogo emakum ap Hanat oba wolok wagaukwa. Ap Hanat atì ebe re, it ap Ala esewerek mene inoe kain tahun atì ba welagaike mene etage Kayapat atì eamal. 14At Kayapat atì ebe re, alebat it ap Yahuri mene yogoisìkì logolìk he,

“We, nit obogat hesik ap omakeagùn aike wa'lasusak atì re, hano o,” ìlùk inasuk wasike mene a'nogo.

At Peterùt en, “An nebe Yesùt agot hùk,” ìlùk labelhike wene

(Mat.26:69-70; Mrk.14:66-68; Luk.22:55-57)

15-16Atì'nogo wolok wagaukwama, at Simon etage aike Peterùt egarek a'nogo nen, at Yesùt agoromì ane wanhì lagaukwa mene aike eperak Yesùt opolik wagaukwa. Atì'nogo wagaukwasik, at Peterùt enek he, leget abel etakwe kwe ba werek kolek, at Yesùt agot aike atì re, ap Ala esewerek inoe kain a'nogo nen ebe elu nogo nen he, at Yesùt eperak ap kain atì awì silimo kisukwa. Kisukwasik he, at Yesùt agot, ap Ala esewerek mene inoe kain nen ebe elu mene a'nogo, hobuk apotkwe wùlìbi wagaike. Wùlìbi waga logolìk, helekerek kwe ba apùnì wùlùkùgùnem kagalek welagarek mene atì eperak weneane isukwasik he, Peterùt wolok kisike. 17Atì'nogo wolok kikenem, at helekerek kwe ba wùlùkùgùnem kagalek welagarek mene a'nogo nen Peterùt yogotì logolìk:

“Hat he, at yì agoromì ane wìlì'lùgì mene amanogo mene lek nogo? At agoromì meneat o,” ìlùk yogosikomo, at Peterùt en he,

“An he, lek ù,” isike. 18Atì'nogo isikesik werek kolek, o atì sat he, aiyeke apik en he, it inatitigeke mene mel, it ap Ala awì serogo welagaikarek mene mel, etu nokalhesukwasik he, metek logolìk sogoi sakiko were'ma, at Peterùt inoba lagaikesik inomat sogoi sakiko metek welagaukwa.

Ap Ala esewerek mene inoe kain a'nogo nen Yesùt anema wanhike wene

(Mat.26:59-66; Mrk.14:55-64; Luk.22:66-71)

19Atì'nogo sogoi sakiko kolek, ap Ala esewerek mene inoe kain a'nogo nen, at Yesùt oba hinok wokhìkì logolìk he,

“Hat hagoromì hane wìlì'lùgì mene atì sanì. Nen, hat hane yakùlisìkì lagen atì, kì'nogo nogo,” ìlùk oba hinok wokhasikomo, 20at Yesùt en he, mel yogosike:

“An nen apùnì kweangma mene wene yogoisìkì logolìk he, pak hogo nek yogoisìgìrek o. O it apùnì Yahuri mene obogat atogothìlìk sapan egarek obakwe mel, Ala awì wùrì'mo mel, atoma nek yakùlisìgìrek o. Wene hinagasogo aike ìgìrek motok lek meneat he, 21an noba hinok wo'nììkì lagen atì nenahalok. An nen wene yogoisikenem it arat inasuk holharesi'mo re, an nen wene yogoisìkì lagì mene atì, it ineluat werek o. Halok he, it inoba hinok wogisan o,” ìlùk ikenem he, 22ap Ala awì serogo welagaikarek amanogo mene aike ebe atem metek logolìk, at Yesùt tùgì eki tap lapuk hogo watì logolìk he, mel yogosike:

“Ap Ala esewerek mene inoe kain yì nen yogohetenem, hat en wene atì'nogo yogosusak nogo? Mea o,” ìlùk yogotì lagaikomo, 23at Yesùt en he, mel yogosike:

“An nane kolo ìgì halok, wene kolo ìgì mene pak hogo yogonom he! Nane higit ìgì mene hesigat, tùgì noaten atì, nenahalok,” ìlùk yogosikomo, 24hobuk at Hanat en, at Yesùt eki hele homagoat, ap Kayapat ebe ap Ala esewerek mene inoe kain a'nogo oba wolok wesuagalùk lakhei wagaike.

At Peterùt en, “An nebe Yesùt agot hùk,” ìlùk hobuk labelhike wene

(Mat.26:71-75; Mrk.14:69-72; Luk.22:58-62)

25Atì'nogo lakhei wagaikomo wagaukwama, at Simon etage aike Peterùt egarek a'nogo etu nokale'ma aremnogoat sogoi sakiko metek were'ma, it apùnì nen he, mel yogosukwa:

“Hat he, at agoromì ane wìlì'lùgì mene amanogo mene lek nogo? Hat at agoromì meneat o,” ìlùk yogosukwama, at en he,

“An lek ù,” ìlùk labelhike. 26Labelhi lagaikomo re, ap Ala esewerek inoe kain mene a'nogo atitigeke mene aike, at Peterùt en esako sapuk hogo lakhesike a'nogo agaiyak aike nen he,

“Hat he, hebe at hinom yabu e eken awì yagokwe were'ma neileken hììgì akìgì,” ìlùk yogosikomo, 27at Peterùt en he,

“Lek ù,” ìlùk labelhikeat. Atì'nogo labelho kolek aremnogoat sùe ayam ane isike.

Yesùt eki hele warogo ap Pilatùt wogosi wagaukwa wene

(Mat.27:1-2,11-14; Mrk.15:1-5; Luk.23:1-5)

28Atì'nogo haga'lùk, sùe ane isikomo hùp siak hogo at Yesùt ap Kayapat were'ma nen, o ùkùm inoba hìgìk, kotìk, egare'ma wolok wagaukwa. Wolok wagaukwasik he, Yesùt enek ouma kelakhesukwasik,

“Nit pesta Paskah a'nogo mene nìkì logousa'ma, ninabusak kumo re, nit weak asinogo,” ìlùk he, o ùkùm inoba hìgìk, kotìk, egare'ma atoma kìgì'lek, we, o silimo kamo isukwa. 29O silimo kamo isukwama re, at Pilatùt inoba wùlìbi wagaikesik he, mel yogoisasike:

“Ap sanì. Ap yì ùkùm kì'nogo mene oba hegesip en wolok wagep,” ìlùk yogoisasikomo, 30it en he, mel yogosukwa:

“At yì weak hagatì'lek logoilepma re, hat hoba wolok we'lo legat o,” ìlùk yogosukwama, 31at Pilatùt en he, mel yogoisasike:

“Ap yì wolok lìlìk he, hit en hagatesep higit hogoat hinokawerek en ùkùm oba hìgìk, kotìk, ino o,” ìlùk ogoisasikomo, it ap Yahuri mene nen he, mel yogosukwa:

“Nit ninabusak en ùkùm inoba hìlìk inoasusak mea akìgì,” ìlùk yogosukwa. 32Inane atì'nogo yogosukwa atì re, at Yesùt en wene hageat yogoisìkì logolìk,

“An tì'nogo haga'nabìk noasugun,” ìlùk ìkì lagaike mane a'nogo, it atì'nogo hagasukwama, at ane ebe agaike atì. 33It Yahuri mene nen atì'nogo yogosukwama, at Pilatùt o ùkùm inoba hìgìk, kotìk, egare'ma a'nogo apotkwe kisikesik, at Yesùt ane hakhasikesik he, mel yogosike:

“Apùnì Yahuri mene inoe kain etagepogot a'nogo hat a?” ìlùk yogosikomo, 34at Yesùt en he, mel yogosike:

“Hat en wene an nabok egen atì re, hat ha'la nen kagalogo egen a? At he, it apùnì aike nen yogohetama nen egen a,” ìlùk yogosikomo, 35at Pilatùt en he, mel yogosike:

“Wene yogoneten atì re, an nebe ap Yahuri mene nen yogoneten a? It ap hokawerek hogogì hagoromì mel, ap Ala esewerek inogogì kaintek mel, inom en, hat hebe an wo'neta atì re, hat nìkì'nogo hagatenma,” ìlùk yogosikomo, 36at Yesùt en he, mel yogosike:

“An nen apùnì nawe a'ma hisìgìrek atì re, apùnì kweangma mene nen inawe a'ma hisagarek atì hak hùk. Lek o. We, an nawe a'ma hisìgìrek atì re, kweangma mene logoilepma re, nagoromì nen an nebe it ap Yahuri mene wogisasak lek ìlùk, nebe elele wo'nabuogolùk inom yabilep meneat he, an nawe a'ma hisìgìrek atì kweangma mene lek atì nen he, elele wo'nabugun lek o,” ìlùk yogosikomo, 37at Pilatùt en he,

“Halok he, hat eberogoat kain hetagepogot he a,” ìlùk ìkì lagaikomo, at Yesùt en he, mel yogosike:

“An nebe kain netagepogot hat egen atìat o. Atì hesigat an nen ebe wene abok pak hogo yogoisìkì logoigìlùk nebe kweangma yoma ta'lasi pi wagagi o. Apùnì wene ebe wene atì werekwe asi lagaika mene hùgì inebe lopok an nane inasuk holì'lùgì o,” ìlùk yogotì lagaikomo, 38at Pilatùt en he, “Wene ebe wene atì nena wene nogo,” ìlùk yogosike.

Yemt ebe motok wasuagalùk ùkùm oba hesukwa wene

(Mat.27:15-31; Mrk.15:6-20; Luk.23:13-25)

Wene atì'nogo yogosikesik he, at Pilatùt hobuk ap Yahuri mene inoba wùlìbi wagaikesik he, mel yogoisasike:

“An nen at ùkùm oba hegep mene pìlìngìtì mene re, at weak aike hagatomo hìgì motok lek o. 39Atì'nogo meneat he, hit en pesta Paskah nìkì logolìk, ap hele warek mene aike hele hikalhisoagalùk kìno yogonetenem, hikalhisìgìrek a'nogo nen he, hit ap Yahuri mene hinoe kain etagepogot yì hele hikalhisasak walok a? Hinabìt a,” ìlùk yogoisasikomo, 40it en inane apik sì'lamok-wa'lamok ìkì logolìk he, mel yogosukwa:

“Lek ù. At atì hele hikalusak lek o! We, at Parapat atìat hele hikalnisan o!” ìlùk yogosukwa. At Parapat atì re, oabùt weak ekiabusak wanhì lagaike meneat isukwa atì.

Currently Selected:

YOHANET 18: LAIDNI

Highlight

Copy