YOHANET 17

At Yesùt en agoromì hesik sapan isike wene

1-2At Yesùt en wene atì'nogo yogoisasikesik he, at ot hìok hogo eileken pogot oba lìakhasikesik he, mel isike:

“Nopase. An haga'nabugun a'nogo arat asi waga o. Hat en hageat apùnì aike wo'nesigin mene hùgì inebe lopok an haput en hagarinabumo ineluk motok logouagalùk apùnì obogat neki ba hesigin atì nen he, hat hebe esinethageik en, an haput esinethani me o, nopase. 3It apùnì nen he,

Ala hogorasusak ebe mene aligalegat motok welagarek, ìlùk, hebe inelu agìk, nen an Yesùt Karìsùt lakhani wagaginmo wagagi mene yì nebe inelu agìk, ìlì'lùgì atì re, ineluk motok welagaikarek ero atìat o. 4An nen kweangma yì mene tì mene hagasuagalùk menhanhigin a'nogo yabu ebe arat hagatì lagarìk katok hogo hagatì atì ba nen esinethagagì o. 5Nopase. Kweang oan walhìgì'lek logolìk, neperagat esin welagagu a'nogo mene yogotak hat were'ma atoma esinethanino. 6Apùnì kweangma mene hat en hageat wo'nesigin mene hùgì obogat, hat hebe inelu asuagalùk yakùlisìgì o. It inebe hat mene an wo'nesiginmo nogo nen he, hat hane hologo hagatarek o. 7Yogotak yì mene tì mene obogat hat en wo'nesigin mene atì, it en he,

Ala nenat wogosikomo, ìlùk arat hùthaga o. 8Wene hat en yogonesigin mene amanogo, it arat yogoisigima, arat wanhasik, an hesik ìkì logolìk he,

Ala nen lakhei wagaikomo, at were'ma nen eberogoat wagaike, ìlùk inelu agaikasik he, nebe hùthanha o.

9“An nen sapan ìkì lagì yì re, it apùnì kweangma mene hesik ìkì lagì hùk. We, it hat hagainapùrì mene an wo'nesigin atì nen he, it hesigat sapan ìkì lagì o. 10An mene obogat he, hat meneat o. Nen, hat mene obogat he, an meneat o. It hagarì'lùgì atì ba, an esinethanì'lùgì o. 11Yogotak an he, kweangma yoma aregenma logogin lek o. We, hat hea wesigin meneat he, it enek he, kweangma yoma logogun o. Hat weak hagatì'lek tegelek motok welagatek mene, nopase. Nit neperak ninebe omakeat welagorek a'nogo hak, it atì'nogoat inebe omakeat logouak en he, hat hetage esin mene an salnapigin atì ba, it hagisek logoino o, nopase. 12An it ninom yoma logolìk he, it inebe nalasinogo ìlùk, hat hetage mene an salnapigin a'nogo ba, hagisek were'ma, it aike nalagì'lek o. We,

At atì nalasigin, ìlùk, hat hane isigin mene helal waganogo hesukwa mene a'nogo ebe asuagalùk, nalasusak obaat nalaga o. 13An nebe hat hea wesigin meneat he, yogotak kweangma ya logolìk, an na'la hai hakìgìrek atì hak, it ina'la hai motok hakoagalùk, wene obogat atì yogohetì o. 14Hat hane a'nogo it arat yogoisìgì. Nen, an nebe apùnì kweangma mene yoma inagot lek atì hak, it atì'nogoat inebe apùnì kweangma mene inagoromì lek atì nen he, it apùnì kweangma mene nen inabìrat motok hagarinabì'lùgì o. 15Hat en, it apùnì kweangma mene ina'la nen it enek kìgìlogo woginabinok en ìlùk kìno yogohetì lagì hùk. We, at weak mene a'nogo nen weagarinabigìlùk inoba waganem, hat en serisek logoinok en ìlùk yogohetì lagì o. 16An nebe it apùnì kweangma mene inagot lek atì hak he, it atì'nogoat it apùnì kweangma mene inagoromi hùk. Legat o. 17Hat hane egetek atì re, ebe weneat. Nen, hane ebe wene atì ba, it inebe hat hokawerek hesigat logouak en wenagasogo hisan o. 18Hat en an nebe apùnì kweangma mene inoba lakhani wagagin a'nogo hak, an nen it atì'nogoat apùnì kweangma mene inoba laksigi o. 19It inebe hat hokawerek hesik ebe wene ba wenago logouagalùk he, an it hesik nebe hat hagagìrìk wenago welagì o.

20“Nopase. It atì inaligat hesik enek sapan ìkì lagì hùk. Lek o. It aike hunigat mene, it en wene yakùlisa logoin oba inetaùken an noba hìpìrethogoin mene inomat hesik sapan ìkì lagì o. 21Nopase. An nen kìno yogohetì lagì yì re, mel ìlùk. An nen nopase hat neperak hutik, nen, nopase hat en an neperak hutik, welagorek atì hak, it atì'nogoat inebe obogat omakeat logouagalùk kìno yogohetì lagì o. Atì'nogo were'ma, it apùnì kweangma mene nen ìkì logolìk he,

At he, opase nenat lakhei wagaike atì eberogoat, ìlùk hùthoagalùk, it inebe nit ninom hutigat logouok o. 22Nit ninebe omakeat welagorek atì hak, it atì'nogoat inebe omakeat logouagalùk, an nebe hat en esine'napigin hak, an nen it arat esinethisìgì o. 23It eberogoat inebe omakeat logouak en he, it en an ninom hutik, nen hat en an neperak hutik logouok o. Atì'nogo logogun halok, it apùnì kweangma mene nen ìkì logolìk he,

At he, opase nen lakhei wagaikesik ebe etaùken hutik welagarek atì hak, it inebe at wogosike mene hùgì etaùken hutik welagarek o, ìlùk inelu arìk hùthogoin. 24Ala nopase. Hat en kweang oan walhìgì'lek logolìk, an nebe hetaùken hutik welagagin atì nen he, hogo'napì logouagalùk esine'napigin a'nogo, it hat en hageat wo'nesigin mene amanogo ineileken neoagalùk, o an logoginmo atoma, it ninomat logousak walok o. 25Ala higit hogo nek hagatetek mene, nopase. It apùnì kweangma mene hat hebe inokot meneat he, an enek he, hat nelu o. Nen, it hat en wo'nesigin mene hùgì nek he,

At en lakhei wagaike ìlùk, ineluat o. 26Nopase, hat en an hetawì'napigin a'nogo, it-it atì'nogoat netawì-hetawìrogo logolìk, an nebe it ninom hutik logouogolùk, hat hetage ìlìk hawene yogoisìkì lagarìk aike inom hogo yogoisìkì logoginat o,” ìlùk sapan isike.

Currently Selected:

YOHANET 17: LAIDNI

Highlight

Copy