YOHANET 16

1At Yesùt en wene atì'nogo yogoisasikesik he, hobuk aike mel yogoisasike:

“Hit hina'la pùk arìk,

At ninabìt, ìlùk, an nebe kobologo herakhaninogo ìlùk, wene atì obogat yogohisìkì lagì o. 2Apùnì nen o sapan egare'ma nen hit hineki lisogo wulakhikogoinat o. Nen, hobuk it apùnì hit hinoasugun mene inebe lopok ina'la nen he,

Ala hesik hano inoato, ìlùk, ugun mene weregat o. 3It en atì'nogo hagathinabugun atì re, an nopase neperak ninebe inokot atì nenat hagathinabugun o. 4Atì'nogo hagathinapa halok he, hina'la nen,

Wene yì, at en alebat yogonisasike a'nogo, arat haga'ninabì'lùgì yì, ìlùk hina'la ebesuageip en ìlùk, wene atì obogat yogohisìgì o,” ìlùk yogoisasike.

Yesùt en, “Ala Areagùn nen tì'nogo hagathinapì logogin,” ìlùk yogoisasike wene

At Yesùt en wene atì'nogo yogoisasikesik he, hobuk aike mel yogoisasike:

“An hit ninom yoma welago atì nen he, wene yì obogat hit hinayoko hìkì logolìk yogohisìgì'lek welagagi meneat he, 5hobuk, at an nebe lakhani wagaike mene a'nogo oba legein meneat he, hit aike nen,

Noe. Hat o koma legein, ìlùk noba hinok wo'nììkì lagep motok lek o. 6An nen wene yogohisìgì ati nen, hit hina'la motok weak aga meneat he, 7an nen wene ebe pak hogo yogohisak o. An legein lek logoilepma re, at hit lebethisìkì logogin mene atì hinoba we'lep lek meneat he, an legein atì nen, at atì an nen hinoba lakhei wesigin o. Halok he, an legein atì nen, hit hesik hano motok asigin, ìlùk eberogoat yogohisìgì o. 8At atì ebe wìrìk he, it apùnì kweangma mene nen hagatarek mene hesik hukalogo yogoisìkì logolìk,

Hit hina'la ebetì lagep atì re, weak hagatarek mene hesik mel, higit hagatì logousak mene hesik mel, Ala nen ùkùm inoba hìgìk, kotìk, ikerek mene hesik mel, hina'la kolo ebetì lagep o, ìlùk wene hukalogo yogoisa wesigin. 9At wìrìk,

Hit en hinetaùken at Yesùt oba hìpìrethìgì'lek welagasep atì kolo, ìlùk hukalogo yogoisa wesigin. 10Nen, aike re, an nopase were'ma laganem, hit hineileken neogoin motok lek atì nen, at lebethisìkì logogin mene atì wìrìk he, wene higit hogo hagatì logousak mene hesik hukalogo yogohisa wesiginat. 11Nen, aike re, Ala nen apùnì kweangma mene inoe kain a'nogo ùkùm oba hìlìk mabenethesikomo werek atì nen, at lebethisìkì logogin mene atì wìrìk he, Ala nen ùkùm inoba hìgìk, kotìk, ikerek atì hesik hukalogo yogoisa wesiginat o. 12An nen wene apigat yogohisasak meneat he, hit wanusak hinepema mea aga o. 13Atì'nogo meneat he, Ala Areagùn, ebe wene ikerek mene atì wìrìk he, kwe inokotma inelu mene nen yakùlisagarek atì hak, ebe wene obogat hùthoageip en ìlùk yakùlhisìkì logogin o. Atì'nogo yakùlhisìkì logogin atì re, wene at a'la nen kagalogo ìkì logogin lek o. We, at asuk holherek mene nek ìkì logolìk he, hobuk haga'lasigin mene yogohisìkì logoginat o. 14An nane yakùlhisìgìrek mene atì, at an wanìk he, hit yakùlhisìkì logogin atì, an agauge'napì logogin o. 15Yì mene tì mene nopase mene obogat he, an mene atì nen he, Ala Areagùn atì an nane wanìk, hit yakùlhisìkì logogin ìlùk yogohisìgì atì o,” ìlùk yogoisasike.

Yesùt en, “Hina'la weak arì'mo nen hobuk hai hakogoin o,” ìlùk yogoisasike wene

16At Yesùt en wene atì'nogo yogoisasikesik, aike mel yogoisasike:

“Nineki hamùlùgat logopik en he, an nebe hineileken neogoin lek o. Atì'nogo hineileken nììgì'lek hineki hamùlùgat aike logopik en, hobuk hineileken neogoin o,” ìlùk yogoisasikomo inasuk holhukwasik he, 17at agoromì ane wanhì lagaukwa mene amanogo he'nakìt en, it-it ìkì logolìk he, mel isukwa:

“At en he,

Nineki hamùlùgat logopik en he, an nebe hineileken neogoin lek o. Atì'nogo hineileken nììgì'lek hineki hamùlùgat aike logopik en, hobuk hineileken neogoin o, ìgìk,

An nopase oba legein, ìgìk, ike atì, wene ebe nìkì'nogo mene hesik ike akegep.

18An neki we, hamùlùgat enek logogin, ìlùk ike atì, ebe nena hesik yogonisike akegep. Nit he, hùthogo motok lek o,” ìlùk isukwa. 19Ati'nogo isukwama, at Yesùt en,

“It yì wene an noba hinok wo'neùogolùk ìlì'lùgì hìgì,” ìlùk enagat hùrisasikesik he, mel yogoisasike:

“Nagaiya'lak. Nineki hamùlùgat logopik en he, an nebe hineileken nììgì'lek logogun o. Nen, hineki hamùlùgat aike logopik en hobuk an nebe hineileken neogoin o, ìlùk yogohisìgì atì hesik hit-hit ìkì lagep a? 20Hobuk hit hina'la nen lì agìk, le agìk, ugun meneat he, it apùnì kweangma mene ina'la hai hakogoin o. Atì'nogo meneat he, hit hina'la weak logogun mene atì, hobuk hano aganem hina'la hai apik hakogoin o, ìlùk eberogoat yogohisìgì. 21He aike eak tasigin higitmo heinet weak hogo wasusak oba apik waterek meneat he, eak a'nogo arat takikeresik he,

Neak arat takìgì, ìlùk a'la hai apik hakìkì logolìk he, heinet weak waterek a'nogo lì'ma agarek o. 22Hit ati'nogo at. Yogotak hina'la weak welagep meneat he, hobuk an ninom apì asugun atì sat, hina'la hai apik hakogoin o. Nen hit hina'la hai atì, it apùnì aike nen legetsogoin motok lek o. 23Hùlì atì hùlì arat asi lìlìk he, hit en wene aike an noba hinok wo'neogoin motok lek o. Halok, an nen wene aike yogohisak:

Hit en yì mene tì mene an netage palogo nopase kìno yogosugun halok he, at en wokhisegeinat o, ìlùk eberogoat yogohisìgì. 24O alebat en hùlì yogotak hùlì, an netage palogo yì mene tì mene aike kìno ìgì'lek welagepma o. Halok he, hina'la hai apik hakoageip en he, at kìno yogotì logoino. Atì'nogo yogotì logoumo, wokhisìkì logoginat o,” ìlùk yogoisasike.

Yesùt en, “Apùnì kweangma mene arat mabenetsìgì,” ìlùk yogoisasike wene

25At Yesùt en wene atì'nogo yogoisasikesik aike mel yogoisasike:

“Wene obogat atì re, oba lìrogo nek yogohisìkì lagì meneat he, hobuk nopase abok ìkì logolìk, oba lìrogo yogohisegein lek o. We, pak hogo nek yogohisegein oba weregat o. 26-27Hit en he,

Yesùt ebe Ala were'ma nen wagaike mene, ìlùk, hùthanhì logolìk, hinetawì'napigip atì nen, nopase nen hit etawìthinaperegat o. Hit hesik an nen nopase kìno yogosigin ìlùk yogohisìkì lagì lek o. We, o atì sat he, hit hinokawerek en an netage palogo nopase kìno yogosugun o. 28An nebe Ala were'ma nen apùnì kweangma mene inoba pi wagagi meneat he, yogotak it kweangma yoma hisalùk nopase oba napotkwe lagagin o,” ìlùk yogoisasikomo, 29at Yesùt agoromì ane wanhì lagaukwa mene amanogo nen he, mel yogosukwa:

“Noe. Yogotak hat en wene oba lìrogo yogonisìgì'lek. We, pak hogo nek yogonisegen o. 30Hat he, apùnì aike nen wene aike hinok wokhììgì'lek halok he, wene ebe hokot hùk o. Hat yì wene tì wene obogat helu nek heogo. Hat hebe eberogoat Ala nen lakhagei wagaikomo wagagin, ìlùk yogotak en hùthagago,” ìlùk yogosukwa. 31Atì'nogo yogosukwama, at Yesùt en he,

“Yogotak en arat hùthanhep a?” ìlùk yogoisasike. 32Atì'nogo yogoisasikesik he, aike mel yogoisasike:

“Hit obogat, pùgùlogo wulakhikamo, an naligat herakhanìlùk hinauakwe lopok pùgùlugun oba oan welago meneat he, yogotak arat asi waga o. Hit atì'nogo pùgùlumo, an nopase neperak logogun atì nen he, naligat logogin lek o, ìlùk eberogoat yogohisìgì,” ìlùk yogoisasikesik, 33aike mel yogoisasike:

“Hit an ninom hutik logolìk, hina'la hapuk hogo logouageip en ìlùk, wene atì obogat yogohisìgì o. Hit apùnì kweangma mene nen yì aik tì aik hagathinapì logogun o. Mene re, apùnì kweangma mene arat mabenetsigima atì re, hinayù'lek hogo logoino,” ìlùk yogoisasike.

Currently Selected:

YOHANET 16: LAIDNI

Highlight

Copy