LAKSASIKE 5
5
At Ananiat Sapira eperak en weak hagasukwa wene
1At Parenapat en atì'nogo hei wagaike meneat he, ap aike etage Ananiat. Agwe Sapira eperak en inakweang aike ese were'ma it aike inoba oko uang wanhukwa. 2Wanhukwasik he, Ananiat atì agwe eperak en he,
“Tì'nogo hagasuok,” ìlùk isukwa mene agwe a'nogo eluat werek kolek he, agùn nen uang amanogo o'moko inokawerek hesik hakalùk he, o'moko nek it ap Yesùt en inebe weteberogo inayoko hìlìk laksasike mene amanogo ineki ba hei wagaike. 3Hei wagaikomo, at Peterùt en he,
“Ananiat. Ibilit en ha'la kagalhomo Ala Areagùn lalogo kweang oko o'moko mìkìlogo hokawerek hesik hakalùk wagen atì nahalok. 4Kweang atì hat en it aike inoba oko wanhì'lek werek kolek, hat hakweang meneat. Ma re, it aike wogisegenma oko haga mene atì hat meneat o. Meneat he, ha'la nen atì'nogo kagalogo hagaten atì nahalok. Hane hapeliagat lìbìlogo egen atì, nit apùnì yogonisegen hùk. At Ala at yogoten o,” ìlùk yogosike. 5Ati'nogo yogotenem, wene atì, at Ananiat asuk holhikesik he, abusak tukwak hogo lagaikesik ebe wa'lagaike. Wa'lagaikomo re, it apùnì inebe logolegat wene haga'lagaike mene atì, inasuk holhukwasik inayùk apik agaike. 6Atì'nogo wa'lagaikomo, it ap elege mene kìlìk he, ebe warek a'nogo su ìkìlogo wolok wùlùpukwasik, kweang hìbìlogo sali lagaukwa. 7Warek wolok wùlùpukwama, 3 jam hake hamùlùgat were'ma nen, Ananiat agwe wene haga'lagaike a'nogo okot welagaikesik wonogat kisike. 8Kisikomo, at Peterùt en he,
“Kweang hit mene atì oko re, yì baat wokhisaga nogo a? Sekek hogo yogonom,” ìlùk yogosikomo, at en he,
“Ì o. Atì baat wo'nisaga,” ìlùk yogosike. 9Atì'nogo yogosikomo, at Peterùt en he,
“Hit hagùn heperagat, wene
Yì'nogo hagasuok, ìlùk egesip en ninopase Etagepogot Ala Areagùn oabùt paluogolùk hagatep atì nahalok. Ap hat hagùn ebe warek kweangma sali lagaikasik, hat atì'nogoat wokharek wùlùbuogolùk olilu kwe ba inesok ane wagaika arì,” ìlùk yogosike.
10Atì'nogo yogoto kolek aremnogoat Sapira a'nogo abusagat Peterùt era'lu tukwak hogo lagaikesik ebe wa'lagaike. Wa'lagaikesik were'ma, it ap elege manogo kisukwasik, ineileken hìlìk he, ebe warek wolok agùn warek sali lagaukwa ba era'lu sali lagaukwa. 11Wene atì'nogo haga'lagaikomo re, it Ala againapùrì mene obogat mel, nen it apùnì aike inasuk holhukwa mene obogat mel, inayùk apik agaike.
Yesùt agoromì nen hagasusak lek mene elalinat hagarinapì lagaukwa wene
12It ap Yesùt en inebe weteberogo inayoko hìlìk laksasike mene amanogo apùnì logolegat inom logolìk he, wene apùnì nen hùthoagalùk hagasusak lek mene elalinat hagarinapì lagaukwa. Hagarinapì logolìk, it Ala againapùrì inebe obogat inetaùken omakeat logolìk, inebe Ala awì wùrì'mo selepon etage Salomo aseleponma atogotì lagaukwa. 13Atogotenem he, it apùnì logolek amanogo nen hogorinapì lagaukwa. Atì'nogo meneat he, it apùnì welek mene nen it inoba ku inayùgat welagaukwa. 14Werek kolek he, it Ala againapùrì haga'lagaukwa mene were'ma re, it aike ap lek, hìmì lek, ina'la nen he,
“Ninoe Etagepogot eberogoat,” ìlùk inetaùken at oba hìpìrethìlìk, it inom lapuk hogo inebe motok apik aga lagaukwa. 15Atì'nogo aga lagaukwama re, it apùnì ou wanhì lagaukwa mene, he'nakìt e talek oba hisìgìk, he'nakìt lit talek oba hisìgìk, ìlìk he, Peterùt waganem apùnak inoba higit aga halok se asuagalùk, ebekalem hisa waga lagaukwa. 16Atì'nogo hagato kolek he, it apùnì aike inaua Yerusalem esakokwe mene a'loma nen waga logolìk, it aike ou wanhì lagaukwa mene mel, mokareke inoabùt weak mene ina'la kìlìk were'ma sìnì'nùk aga lagaukwa mene mel, wogisek inoba waga lagaukwaat. Wogisek waganem he, inebe obogat hano hagarinapì lagaukwa.
Yesùt en laksasike mene amanogo it apùnì aike nen, yì aik tì aik hagarinapì lagaukwa wene
17-18Atì'nogo hagarinapenem, elùgùn oba re, it ap Ala esewerek mene inoe kain mene agoromì inebe obogat inom, it atì re, apùnì Saluki mene inane wanhì lagaukwa mene nen, it Yesùt en inebe weteberogo laksasike mene amanogo atì'nogo hagatenem inoba ua palhì lagaukwa. Atì'nogo ua palhì lagaukwasik, inebe haksìlìk he, o apùnì ineki hele warogo hisagarek oba hisasukwa. 19Hisasukwama, were'ma re, malaikat ninoe Etagepogot en yoko pelaksa wagarek mene amanogo aike hùako pi wagaikesik he, o apùnì ineki hele warek hisagarek oba, kwe yagarek mene hua'lapuk hìlìk inebe wogisek wùlìbi wagaike. 20Wogisek wùlìbi wagaikesik, at en yogoisìkì logolìk he,
“Hit hinebe Ala awì wùrì'mo lano o. Lìlìk atoma kìlìk metek logolìk he, wene hano wene hinebe hineluk logolìk ket hùnogoat hagatì logousak wene atì obogat yogoisa lano,” ìlùk yogoisasike. 21Atì'nogo yogoisasikomo re, inasuk holìlùk, o we iko kolek, Ala awì wùrì'mo kìlìk wene yakùlisìkì lagaukwa. Atì'nogo yakùlisiko kolek he, it ap Ala esewerek mene inoe kain a'nogo agoromì inom en ap inalùgetek Isirael mene wene ero pìlìngìtì lagaukwa mene obogat, inayoko hesukwasik inebe atogothìlìk, inagoromì aike nen he, it Yesùt en inayoko hìlìk laksasike mene ineki hele warek hisasukwa mene a'nogo wogisek wesuagalùk, o hisasukwa ba a'nogo laksasukwa. 22Atì'nogo laksasukwama, it a'nogo lagaukwa re, it ap Yesùt en inayoko hìlìk laksasike mene a'nogo ineki hele warek hisagarek oba inebe le'ma. Inebe lek en inapotkwe wagaukwasik he, it ap amanogo mel yogoisasukwa:
23“O apùnì ineki hele warek hisagarek oba'nogo, kwe ning hogo yagarek werek kolek, hele warek mene inebe wùlìbinogo ìlùk, ap kwe ba kagalek welagaikarek mene amanogo inebe were'ma lago. Lagosik, ninebe kogo re, ouma it ap a'nogo inebe le'ma,” ìlùk yogoisasukwa. 24Yogoisasukwama re, it ap Ala awì wùrìk serogo welagaukwa mene amanogo mel, Ala esewerek inogogì kaintek amanogo inom en he,
“It ap Yesùt en inayoko hìlìk laksasike mene a'nogo nìkì'nogo haga'lagaikama nen ega,” ìlùk inoake palagaikesik.
“Hobuk nìkì'nogo haga'lasigin he,” ìlùk inalabut hisike. 25Atì'nogo inalabut hìto were'ma, ap aike wagaikesik he,
“Ap sanì. Hit ap ineki hele warogo hisegep a'nogo re, Ala awì wùrì'mo metek logolìk, apùnì apigat wene yakùlisìlì'lùgì o,” ìlùk yogoisasike. 26Atì'nogo yogoisìkì lagaikomo re, at ap kain Ala awì serogo welagaike mene a'nogo agoromì inom lagaukwasik he, it ap Yesùt en inayoko hìlìk laksasike mene amanogo wogisek wagaukwa. Mene re, wogisek wesuogolùk ina'la nen he,
“Apùnì logolegat en Yesùt agoromì elele waganogo nit helep oba ninoasinogo,” ìlùk inayùk en inane keirogo wogisek wagì'lek. We, lìok hogo wogisek wagaukwa. 27Wogisek wagaukwasik, ap wene ero pìlìngìtì lagaukwa mene amanogo ina'la tùlem menogo hisasukwa. Atì'nogo hisìlìk he, at ap Ala esewerek inoe kain a'nogo nen he, wene mel yogoisasike:
28“Hit en up atì etage palogo nen wene yakùlisagùp o, ìlùk nit en hinasuk hanorogo wato a'nogo meneat he, hit en wene atì wìak hogo yakùlisìkì lagepma re, apùnì o Yerusalem mene yoma obogat inelu aga atì re, at ap atì wata atì, ùkùm nit ninoba houogolùk ìkì lagep hìgì,” ìlùk yogoisasukwa. 29Atì'nogo yogoisìkì lagaukwama, it Peterùt lak, Yesùt en inayoko hìlìk laksasike mene amanogo nen he,
“Nit he, apùnì mene inane hologo hagatì'lek, Ala ane atìat hologo hagasusak o. 30Hit en Yesùt ebe hakhegesip e ba menogo hìlìk watep a'nogo, at Ala ninopalak en awe a'ma kìlìk hogoratì lagaukwa mene a'nogo nenat apotkwe eluguthikomo werek o. 31Eluguthikomo werek atì, apùnì Isirael mene weak hagarì'lùgì mene atì heraksìlìk inoabùt hebelasumo re, Ala nen it weak hagatarek mene atì sagalogo legetsagalùk, Yesùt ebe eluguthikesik he, at ebe ninoe Etagepogot logolìk telninapì logouagalùk era'lu menhikomo werek atì. 32Atì'nogo hagate ìlùk nit nineileken tùkùm hogo hogosik en,
Eberogoat, ìlùk yogohisìkì lago. Apùnì Ala ane hologo hagatorek mene hùgì, at Areagùn wo'nisikerek atì ninom enat wene atì yogohisìkì lago,” ìlùk yogoisasike.
33Atì'nogo yogoisasikomo re, it ina'mage apik lagalìk ap Yesùt en inayoko hìlìk laksasike mene a'nogo inoasuogolùk isukwa. 34Inoasuogolùk isukwa meneat he, ap aike it Parisi mene inawene hesogo logolìk, it inom wene ero pìlìngìtì lagaukwa mene etage Kamaliel. At atì wene Ala nen ninasuk wasike wene a'nogo yakùlisikenem, apùnì obogat en,
“At hano,” ìlùk inane agauk hogo yogotì lagaukwa mene. At atì melagaikesik he, mel yogoisasike:
“Ap ineki hele warek mene yì, elama hesik eta'ma logouak en wulaksani,” ìlùk yogoisasike. 35Atì'nogo yogoisasikomo, wulaksasukwama nen, at en wene mel yogoisasike:
“Hit ap Isirael mene nagaiya'lak. Ap atì nìkì'nogo hagarinabugun akegep. Hina'la hanorogo ebethìlìk en hagasusak o. 36Alebat, ap aike etage Teùrat melagaikesik he,
Kain anat o, ìlùk isikomo, ap logolegat inebe 400 hake at awe a'ma kìlìk opolìk nìkì lagaukwa. Atì'nogo meneat he, at ebe wasukwama, agoromì at awe a'ma kìlìk opolìk nìkì lagaukwa mene atì pùgùlìk-pagalìk isukwama re, at en,
Tì'nogo hagasuok, ìlùk ìkì lagaike wene atì legat agaike. 37Lek agaikomo re, hobuk kaintek pemerintah mene nen apùnì inebe ineki wenaginabuogolùk ikenem he, ap aike aua Kalilea mene, etage Yarat melagaike. Melagaikesik, apùnì logwolegat ina'la kagalhikomo re, at awe a'ma kìlìk opolik nìkì lagaukwaat. Mene re, at ebe wasukwaat. Wasukwama, agoromì awe a'ma kìlìk opolik nìkì lagaukwa mene pùgùlìk-pagalìk isukwaat atì. 38-39Ma re, wene yogotak yì hesik he, an nen wene aike hinasuk wasik. Hit en ap atì yì'nogo tì'nogo aike hagarinapup. Wene it en yakùlisìkì logolìk hagarinabì'lùgì atì, ero apùnì nen halok he, wene atì lek asigin o. Meneat he, wene atì ero Ala at halok he, hit en it mabenerisasak mea asigin o. Atì'nogo mea aganem he, hit en Ala hinom yabusak hake haga'lasinogo nen, hebisani o,” ìlùk inetaùken sebelhike. 40Inetaùken sebelhikomo, it ap Yesùt en inayoko hìlìk laksasike mene amanogo waisasukwama kisukwama re, tùgì inoasukwasik en,
“Yesùt atì etage palogo, wene hobuk atì'nogo yogoisìkì logogùp o,” ìlùk inasuk warogo wulaksasukwa. 41Wulaksasukwama, it ap wene ero pìlìngìtì lagaukwa mene amanogo heraksalùk wùlùpukwasik, it-it ìkì logolìk he,
“Ala nen he,
Hit Yesùt etage hesik apùnì nen,
Hit weak, ìlùk wenakhisamo elok, ìlùk a'la akike higit hogoat wena'nisaga atì hano,” ìlùk ina'la hai hakìlìk wùlùpukwa. 42Wùlùpukwasik, it a'nogo nen Ala awìi wùrì'mo kìgìk, apùnì inauakwe kìgìk, ìkì logolìk,
“Ala nen he,
Ap aike nen apùnì telhinabuagalùk ayoko hìlìk lakhei wesigin, isike a'nogo, ebe Yesùt atìat o,” ìlùk Yesùt en hagasike wene, hano wene a'nogo kamo ìgì'lek hutik-hutigat yakùlisìlìk nìkì lagaukwa.
Currently Selected:
LAKSASIKE 5: LAIDNI
Highlight
Share
Copy
Want to have your highlights saved across all your devices? Sign up or sign in
