LAKSASIKE 4
4
Peterùt Yohanet eperak ap wene ero pìlìngìtarek mene inoba wogisek lagaukwa wene
1It Peterùt Yohanet eperak en wene atì'nogo apùnì amanogo oan yogoisiko were'ma aremnogoat, it ap Ala esewerek mene mel, Ala awì wùrìk serogo welagaukwa mene inoe kain mene mel, ap Saluki mene mel, inoba wagaukwa. 2Wagaukwasik he, it Peterùt Yohanet eperak en wene apùnì yakulisìkì logolìk,
“Yesùt wa'lagasik eluk aga atì, apùnì wa'lagaikarek mene inelugurinabiginat o,” ìlùk yogoisìkì lagaukwa atì nen, it ap amanogo ina'mage lagasike. 3Ina'mage lagalìk, ineki hele warogo re, o arat hi isikomo, hùenkwe inanema wanuogolùk, o apùnì hele warek hisagarek oba kelaksasukwasik hagisek nogo isukwa. 4Atì'nogo meneat he, it Peterùt Yohanet eperak atì'nogo oan kelaksìgì'lek werek kolek, wene apùnì yogoisasukwama, it wene inasuk holhukwa mene amanogo inebe logolegat en,
“Wene atì eberogoat,” ìlùk wanhukwama re, it alep mene inom, hobuk mene inom, lapuk hogo, ap enek inebe apigat 5.000 hake haga'lagaikeat atì.
5-6Atì'nogo hagasukwasik, ohealek it ap kaintek amanogo mel, inalùgetek amanogo mel, Ala ane helal waganek esewerek mene amanogo mel, atogorogo re, it Ala esewerek mene inoe kain Hanat ho, Kayapat ho, Yohanet ho, Aleksatat ho, Ala esewerek inoe kain mene againapùrì aike ho inom, o Yerusalem atogosukwa. 7Atogosukwasik he, Peterùt Yohanet eperak a'nogo inoba wogisek wagaukwasik inebe tùlem menhisasukwasik he, inanema wanhukwa. Inanema wanhì logolìk he,
“Hit en ap esok wùt warek mene hagatep atì re, nena mene omame ba hagatep. Nen, sa etage palogo hagatep,” ìlùk ìkì lagaukwama re, 8at Peterùt Ala Areagùn a'la peserogo welagaike mene a'nogo nen wene mel yogoisasike:
“Nogogì kainte'lak mel, nopaselak mel, hinalaok. 9Yogotak hit en he,
Ap esok wùt warek mene atì nena mene omame ba hano hagatep nogo, ìlùk ninanema wanhì lagep yì. 10Ma re, wene atì hesik, hit obogat mel, apùnì inùkùl etage Isirael mene aike obogat mel, hinelu asuagalùk wene ero tùkùm hogo yogohisak. At Yesùt Karìsùt aua Nasaret mene hit en e ba menhìlìk watepma Ala nen eluguthike mene a'nogo etage ba ap yì hano agasik hineilhanem metek hano werek yì. 11#Mzm.118:22 Alebat Ala ane ba helal mel ìlùk waganogo hesukwa:
Hit o helep mene wùtì logolìk,
Helep yì weak o, ìlùk hebisegep meneat he, obùleat ya'laga yì,
ìlùk Yesùt hesigat, helal waganogo hesukwa atì. 12At Ala nen, nit apùnì kweangma yoma mene at aike nen telninabuagalùk etage yakùlnisìgì'lek atì nen he, welek mene nen telninabusak mea o. We, at Yesùt en telninabuagalùk, at aligat etage yakùlnisasike atì,” ìlùk yogoisasike.
13It Peterùt Yohanet eperak inayù'lek logolìk, wene pak hogo atì'nogo yogoisikenem he, it ap amanogo nen hogorinapì logolìk he,
“Ap yì sekola yakùlhì'lek. We, inokot ouma meneat he, Yesùt inom nìkì lagaika mene a'nogo nen hìgì,” ìlùk huthasukwa. 14Hùthasukwasik, ap esok hano hagasukwa mene a'nogo, it Peterùt Yohanet eperak inom metek were'ma, ineileken isìlìk he, it ap amanogo nen wene nìkì'nogo yogoisa heat haga'lagaikomo re, yogoisìgì'lek kamo isukwa. 15-16Kamo isukwasik he, Peterùt Yohanet ap a'nogo inom, o wene ero pìlìngìtarek oba nen wulaksasukwasik, it-it wene ìkì logolìk he,
“Ap inebe pìre arì hesik nìkì'nogo hagarinabuok akegep. It en hagasusak lek mene atì elalinat hagatama re, apùnì o Yerusalem welagaikarek mene obogat inelu agaika atì nen, nit en he,
Atì'nogo hagatì'lek, ninokot, ìlùk labelusak he, mea aga atì. 17Atì'nogo meneat he, wene atì wìak hogo apùnì obogat inasuk holìk lanogo ìlùk he,
Yesùt etage palogo wene hobuk motok yogoisagup o, ìlùk inasuk warogo wene paluok,” ìlùk isukwa. 18Atì'nogo isukwasik en, eperagat waisasukwama, inapotkwe kisukwama re, mel yogoisasukwa:
“Hit en he, Yesùt etage palogo wene apùnì yogoisìgìk, yakulisìgìk, motok ùgùp o,” ìlùk inasuk warogo wenagisasukwa. 19-20Atì'nogo yogoisasukwama re, it Peterùt Yohanet eperak en he,
“Ala eilhanem higit hogo hagasusak he, kì. Hit en,
Tì'nogo hagasusak, ìlùk egep mene atì hologo hagasusak a? At he, Ala nen,
Tì'nogo hagasusak, ikerek mene atì hologo hagasusak a. Hina'la ebe'ni. Nit he, nineileken hìgìk, ninasuk holhìk, ogo mene atì, apùnì aike yogoisìgì'lek kamo usak he, mea atì nen he, yogoisìkì logogunat o,” ìlùk yogoisasukwa. 21Atì'nogo yogoisasukwama, ap a'nogo elalin hagasukwa atì hesik, apùnì obogat en Ala hogoratì lagaukwa atì nen, ùkùm nìkì'nogo inoba hou heat haga'lagaikomo re, inasuk enek hobuk warogo wulaksasukwa. 22Ap esok wùt warek mene elalin hagasukwa atì re, ebe 40 tahun welagaikesi'mo nen, hano hagasukwa atì.
Ala againapùrì nen sapan isukwa wene
23It Peterùt Yohanet eperak a'nogo, ap kaintek amanogo nen ineki hele hikalogo wulaksasukwama re, inerùgì inagaiya'lak Ala againapùrì mene aike amanogo were'ma inoba lagaukwa. Lagaukwasik, mel yogoisasukwa:
“It ap Ala esewetek inogogì kaintek amanogo mel, inalugetek amanogo mel, it en wene yì'nogo yogonisaga,” ìlùk pìlìngìrogo yogoisasukwa. 24Atì'nogo yogoisasukwama inasuk holhukwasik he, inom lapuk hogo inetaùken omakeat logolìk, Ala ayoko hesukwa. Ayoko hìkì logolìk he,
“Ninopase. Nit hat hawe a'ma welago yì. Pogot walhìgìk, kweang walhìgìk, i laut hùko yekelek walhìgìk, yì mene tì mene pogot oba, kweangma, ima welagarek mene aike obogat walhìgìk, hat enat isigin atì. 25#Mzm.2:1-2 Nit ninopa Taùt a'nogo hat en, at ayoko hesiginmo re, Hareagùn a'la logolìk, wene hat en isigin mene at en mel isike:
Yì apùnì ti apùnì etakwe mene ina'mage lagalìk he, inane uarek-puarek wene palha atì nahalok.
Nen, it apùnì inùkùl etage ya mene ta mene wene tùlemat palha atì nahalok.
26It ap inetagepogot kweangma mene yoma melarìk,
kaintek aike inom lapuk hogo atogothìlìk,
ninopase Etagepogot Ala, it en he,
Ebe ninabìt. Aput Karìsùt ayoko hìlìk lakhei wagaike mene atì, ninabìrat. Ninom yabuok, ìlùk atì hesigat hebelogo werek,
ìlùk isiginmo ebe Taùt en isike atì. 27Atì'nogo isigin hagat, at Herotet mel, Potìùt Pilatùt mel, apùnì etakwe mene mel, apùnì Isirael mene mel, Yesùt, hat hokawerek haput nit apùnì telninabuagalùk menhesigin mene a'nogo, wasuogolùk eberogoat o yoma atogosi wagaika atì hesik isigin atì. 28Mene re, wene atì, hat heki omame werek mene nen, ha'la nen he,
Atì'nogo hagasuak, ìlùk akasigin obaat, atì'nogo hagata atì. 29Mene re, ninopase. Nit ninoasuogolùk ìlì'lùgì atì heileken isan o. Nit hagoromì yoma wene hat en isigin mene atì, ninayù'lek hogo yogoisìkì logouagalùk homame wo'nisan o. 30Hat homame wo'nisikenem he, hokawerek haput Yesùt etage ba hat heki baat apùnì ou hagarinapìk, wene hùthoagalùk hagasusak lek mene elalinat hagarinapìk, igin atì, ebe nit en hagarinapì logouagalùk homame wo'nisan o,” ìlùk Ala ayoko hesukwa.
31Atì'nogo Ala ayoko hìkì lagaukwama re, o it atogorek welagaukwa ba atì abolok isike. Abolok ìkì logolìk he, Ala Areagùn inebe obogat ina'la peserogo kisikomo, wene Ala nen isike mene apùnì inayù'legat yogoisìkì lagaukwa.
Ala againapùrì inagarok mene inebe obogat sùpùrogo aga lagaukwa wene
32It wene eberogoat ìlùk wanhukwa mene atì, inebe logolegat he, inetaùken omakeat welagaukwa. Logolìk he, inagarok yì mene tì mene obogat,
“Yì an mene,” ìlùk ìgì'legat he,
“Ninebe obogat ninagarok mene,” ìlùk, ìkì lagaukwa. 33Atì'nogo ìkì logolìk he, it ap Yesùt en inebe weteberogo inayoko hìlìk laksasike mene amanogo nen,
“Ninoe Etagepogot Yesùt eluk agama nineileken arat hogo o,” ìlùk inane motok omamerogo yogoisìkì lagaukwa. Yogoisiko kolek he, Ala oabùt hano a'nogo nen hùkorogo leberisìkì lagaike 34-35Atì'nogo leberisiko kolek he, inakweang esewerek welagaukwa mene inom, inawì wùrìk esewerek welagaukwa mene inom, apùnì welek mene inoba oko uang wanhì lagaukwa. Wanìk he, uang atì it en wolok ap Yesùt en inebe weteberogo inayoko hìlìk laksasike mene amanogo ineki ba hei waga lagaukwa. Hei waganem he, it aike inagarok lek mene inebe lopok elok hogoat sùpùrogo aga lagaukwa. Atì'nogo hagatì lagaukwa atì nen, it aike inelageik agì'legat welagaukwa.
36Atì'nogo hagatì logolìk he, ap aike etage Yùsùp. Ùkùl etage Lewi mene. Ana o etage Siperùt mene, it ap Yesùt en inebe weteberogo inayoko hìlìk laksasike mene amanogo nen, nit ninane ba etage Inetaùkensebele ìlùk u hak, it inane ba etage Parenapat salhukwa. 37Ap atì akweang were'ma re, it aike inoba oko uang wanhikesik he, uang atì wolok, it ap Yesùt en inebe weteberogo inayoko hìlìk laksasike mene amanogo ineki ba hei wagaike.
Currently Selected:
LAKSASIKE 4: LAIDNI
Highlight
Share
Copy
Want to have your highlights saved across all your devices? Sign up or sign in
