LAKSASIKE 3

Peterùt lak en ap esok wùt warek mene hagasukwa wene

1Ineki aike sapùl ho, jam 3 ba, mo hea i lagalùk iko kolek, Peterùt Yohanet eperak, apùnì Ala awì wùrìmo sapan ìkì lagaukwa hak uogolùk ikenem, inoba lagasukwa. 2Lagasukwa hak he, ap aike agosa a'la nan esok wùt warek motok ta'lagaikesik welagai'ke mene, kwe ape pale'ma etage Enegeke ìlùk ìkì lagaukwa ba atoma hei wagaukwama were'ma hasukwa. Apùnì nen ap atì ineki aike kamo ìgì'lek ninhùp-nanhùbat apùnì aike Ala awì wùrì'mo kikenem he, yì mene tì mane ape kìno weak yogoisìkì logouagalùk, kwa ape pale'ma atoma yerogo hei waga lagaukwa. 3O atì like hesukwama hùrek were'ma re, Peterùt Yohanet eperak Ala awì wùrì'mo kuogolùk ikenem, eileken isìlìk he, it en yì mene tì mene aike wogosuagalùk kìno yogoisasike. 4Kìno yogoisasikomo re, it eperak en ineileken lùrogo hìkì logolìk he, at Peterùt en,

“Heileken la'nisan,” ìlùk yogosike. 5Yogosikomo re, at ap atì a'la nen he,

“It en yì mene tì mene aike wo'nesugun hìgì,” ìlùk eileken inoba welagaike. 6Eileken inoba were'ma re, at Peterùt en mel yogosike:

“Uang emas mel, perak mel, an nekimo motok lek o. We, an werek mene aike wokhesigin. Atì re, hebe mela'lùk kwe nìkì logoinogolùk, Yesùt Karìsùt aua Nasaret mene etage palogo yogohetì,” ìlùk yogosike. 7Atì'nogo yogosikesik he, eki ebekwe hagasogo menhesike. Menhikenem he, ap a'nogo esok wùt ware'ma re, esok agùt inom, akuli inom, aremnogoat omame agaike. 8Omame agaikesik he, siak hogo mel a'lùk, kwe nìkì lagaikesik he, Peterùt Yohanet eperak inom Ala awì wùrì'mo kisukwa. Kìkì logolìk he, ap a'nogo Ala hogoratì logolìk, ya hogoil hìgìk, ta hogoil hìgìk, kisike. 9Atì'nogo kikenem he, apùnì obogat ineileken hasukwa. 10Ineileken hasukwasik he, at ebe enagat hùthasukwasik,

“Ala awì wùrìmo kwe etage Enegeke ape pale'ma olilu kwe ba atem hùrek logolìk he, yì mene tì mene wogotì logouagalùk kìno ikerek mene a'nogo ebe yì. Egi! Nìkì'nogo nen hano aga. Nayùk e,” ìlùk hogorasukwa.

Peterùt en inasuk wasike wene

11Ap a'nogo Peterùt Yohanet eperak inopolik motok nìkì lagaikesik Ala awì wùrì'mo nen wùlìbi wagaukwasik, o selepon etage Salomo aseleponma ìlùk ìkì lagaukwa ba atì wùlìbi waganem he, apùnì obogat en hogorarìk humusek inoba atogosukwa. 12Atogosukwama re, at Peterùt eileken isìlìk he, mel yogoisasike:

“Hit apùnì Isirael mene yì sanì. Ap yì kwe niko yì, nit ninokawerek ninomame ba hagatìk, ninoabùt hano Ala ane hologo hagatì lago ba, hagatìk, ogo salek, hit hogoratìk, hineileken lùrogo nisìgìk, ìkì lagep ama nahalok. 13#Kel.3:15 Ninopase Ala atì, Aberaham mel, Isak mel, Yakùp mel, ninopalak aike mel, inopase Ala atì nenat he, aput Yesùt esinethike atì. Mene re, hit en, it aike nen wasuagalùk ineki ba hegepma re, at Pilatùt en eki hele hikalogo wulakheigìlùk ikenem, hit en he,

Ap atì ninabìt o, ìlùk egep a'nogo. 14At he, Ala nen lakhei wagaikomo oabùt higit hogo hagatì laga meneat he, hit en Pilatùt yogotì logolìk,

Ap atì ebe ninabìt o. Ap aike apùnì inoare meneat he, arìat eki hele hikalogo wo'nisan o, ìlùk kìno yogotep akìgì. 15Ninelugu'ninaperek mene ero ebe at meneat he, hit en watepma Ala nen he, ebe eluguthikomo, nit nineileken eberogoat hogosik en yogohisìkì lago o. 16Ap esok wùt warek welaga mene yì nen he,

Yesùt atì eberogoat, ìlùk etage palogo, etaùken at oba hìpìrethike atì ba, ap yì hineileken hegeresipmo re, ebe hinelu mene a'nogoat omame aga yì. Etaùken atì'nogo Yesùt oba hìpìrethike atì ba, hit hineilhanemat motok hanothikomo yì. 17Mene re, nerùgì nagaiya'lak. Hit hinogogì kaintek hinom Yesùt hesik hagatep atì, hinokot logolìk hagatep atì, an nelu o. 18Hageat Ala nen he,

An nen telhinabigin mene Karìsùt hinoba lakhei wesigin atì, ebe yì aik tì aik oba hìlìk wasugunat o, ìlùk wene wa'nisasike mene atì, ebe it ap at ane yogoisìkì lagaukwa mene amanogo inebe obogat en ìkì lagaukwa atì hagat haga'lasuagalùk haga'laga atì. 19-20Atì nen he, hit weak hagatì lagep mene atì, ninopase Etagepogot Ala nen sagalogo legetsìlìk, hinetaùken hesik hineil ekat hogo hagathinabi wagìk, at en he,

Karìsùt hinebe telhinapùkwe hinoba lakhei wesigin, ìlùk wene warisasike a'nogo ebe Yesùt atìat hinoba hobuk lakhei wagìk, uak en he, hinoabùt hebelarìk hinelokwe Ala wago'no o. 21Yogotak ya re, Yesùt ebe pogot oba logousak obaat logogin o. Logopik en, hùlì Ala nen yì mene tì mene obogat agauak hagasigin atì hùlìat pi wesigin o, ìlùk hageat it ap inebe Ala hesik logolìk at ane yogoisìkì lagaukwa mene amanogo nen isukwa hagat haga'lasigin o. 22#Ul.18:15,18-19 At Musa nen he, mel yogoisasike:

Ninopase Etagepogot Ala ane yogohisìkìi logouagalùk, ap hit mene aike an menhanhike atì hak, hobuk menhegein a'naga.

Menhoumo re, at en yì wene tì wene yogohisegein mene atìiat hinasuk motok hanorogo holhì logousak o.

23Sa nen wene at en yogohisegein mene atì, asuk holhì'lek halok he, at Ala nen, at againapùrì inekele'ma nen tegelogo wulaksìlìk weagathegein o,

ìlùk yogoisasike. 24It ap alep Ala ane yogoisìkì lagaukwa mene amanogo, hùlì at Samuel atì hùlì nen he, it hobuk Ala me yogoisìkì lagaukwa mene inomat, inebe obogat en he, wane nit o yogotak ya logolìk hagatì lago mene hesik ìkì lagaukwa. 25#Kej.22:18 Ala nen wene wa'nisasike mene it ap alep at ane yogoisìkì lagaukwa mene amanogo nen yogoisìkì lagaukwa atì, hit hesigat o. Nen, Ala nen nit ninopalak wene warogo woginapike atì, hit hesigat o. At Ala nen Aberaham yogotì logolìk he,

Hat en tagokwe mene atì ba apùnì kweangma mane yoma yì apùnì tì apùnì inùkùl etage lopok hanorinabigin o,

ìlùk wene waresike. 26Ala nen he, wene atì waresike hak, hit weak hagatì lagep mene hinebe lopok hinapotma heraksoagalùk aput ebe hanothinabigin mene hit tak hinoba pelakhei wagaike atì,” ìlùk inasuk wasike.

Currently Selected:

LAKSASIKE 3: LAIDNI

Highlight

Copy