LAKSASIKE 2
2
Ala nen Areagùn pogot oba nen inoba pelakhei wagaike wene
1Apùnì Yahuri mene Pesta Paskah nìkì lagaukwasik ineki 50 hari welagaukwasik, hari Pentakosta logolìk, it apùnì inetaùken Yesùt oba hìpìrìk welagaukwa mene inebe obogat omakìma atogorek were'ma, 2aremnogoat, sogoi uare'ma hunha waga logolìk ane ikerek atì hak, Ala nen pogot oba nen pelakhei wagaikomo re, it apùnì ouma hùrek welagaukwa mene amanogo obogat ane inasuk holhukwa. 3Inasuk holhukwasik ineileken hìthasukwa re, etu amulok yeke ameli hake heta melangata lagìk, heta melangata lagìk, ikerek atì hak, inebe lopok inoba labok ikenem ineileken hasukwa. 4Ineileken atì'nogo hiko kolek, Ala Areagùn it obogat ina'la peserogo kisike. Kìlìk he, Ala Areagùn nen,
“At atì ane tì'nogo ìkì logouak,” ìlùk akasike higit hogoat, it apùnì aike inane ba uagalùk yakùlisiko kolek elalinat ìkì lagaukwa atì.
5O atì sat he, apùnì Yahuri mene Ala ane hologo hagatì lagaukwa mene hùgì, o yì awì tì awì obogat en Yerusalem atogosi wagaukwasik welagaukwa. 6Were'ma re, ane wu isike a'nogo inasuk holìlùk apùnì inebe apigat atogosi wagaukwa. Atogosi wagaukwasik were'ma, it Yesùt agoromì amanogo nen it apùnì o yì awì tì awì nen wagaukwa mene amanogo inane ba lopok ikenem, inasuk holhukwasik ina'maken lagaike.
7Ina'maken lagaikesik hogoratì logolìk he,
“It wene yogonisìlì'lùgì mene yoma inebe obogat he, inaua o Kalilea mene lek nogo? Kalilea meneat o. 8Meneat he, nìkì'nogo haga'lagama nen nit apùnì ninaua a'loma ninane ba lopok ikenem ninasuk holhì lago akegep. 9Nit ninebe re, ninaua o Paretìa mene mel, Merìa mene mel, Elam mene mel, Mesopotamia mene mel, Yurea mene mel, Kapatokia mene mel, Potùt mene mel, Asia mene mel, 10Perìgìa mene mel, Papilia mene mel, Mesit mene mel, o Lìbìa Kirene higit a'loma mene mel, o Ùrùm a'loma lagosik ninebe o kùlùk negenat welagosik wago mene mel, ninom welago yì. 11Nit he'nakìt ebe Yahuri mene, nen it he'nakìt welek mene Yahuri mene ninoba ki wìrìk Ala ane wanhukwasik ninom welagoat. Nen, apùnì o Kereta mene mel, Arap mene mel ninom were'ma, it yì nen Ala omame ba elalinat hagaterek mene yogonisikenem, ninokawerek ninane ba lopok ninasuk holhì lago yì,” ìlùk, 12inoake palarìk it-it hogoratì logolìk he,
“Atì haga'laga atì re, ebe nìkì'nogo mene he,” ìlùk isukwa. 13Meneat he, it aike nen he,
“Lek o. It yoma anggur eken amusu nekasik en lùgùlùgì palhasik ìlì'lùgì o,” ìlùk inaeto aga lagaukwa.
Ala ane Peterùt en yogoisasike wene
14Inane atì'nogo iko kolek he, at Peterùt a'nogo Yesùt agoromì inebe 11 nen amanogo inomat logolìk, siak hogo melagaike. Melagaikesik ane pak hogo mel yogoisasike:
“Hit Yahuri mene mel, hit aike yogotak ya o Yerusalem welagep mene obogat mel, nerùgì nagaiya'lak. An wene igin yì hinelu usuak en he, hinasuk holino o. 15Yogotak o ohealek jam 9 agama welago yì. Ma re, jam atì hake ba anggur eken amusu nìlìk lùgùlùgì palharek lek atì nen he, hit en,
It yì re, angur eken amusu nekasik en lùgùlùgì palhasik ìlì'lùgì, ìlùk akìkì lagep atì re, le'maat o. 16We, at Yoel Ala ane yogoisìkì lagaike mene Ala nen yogosikomo isike hagat haga'laga o. 17#Yl.2:28-32 At en he, mel isike:
At Ala nen ìkì logolìk he,
O wùrep oba an Nareagùn atì, hùkorogoat apùnì obogat inoba pelakhei wesigin o.
Pelakhei waganem he, hinagainapùrì elege yekerùgì mel, hìmì hìlìmìkìrùgì mel, it en an nane apùnì yogoisìgìk,
hinagoromì elege nen inabìkakan hìgìk,
hinopaselak yamanùgwì nen inabì hìgìk, ìkì logogun o.
18Atì sat he, an natitigeke mene, ap lek, hìmì lek, an Nareagùn hùkorogo inoba pelakhei wesigin o.
Pelakhei waganem he, it en an nane yogoisìkì logogun o.
19Nen, apùnì nen hogoratì logouagalùk, elalin mene pogot oba po yì ba hagatìk,
wene hùthoagalùk kweangma ma yoma hagatìk,
ìkì logolìk,
yì mene tì mene oba, mep mel, etu mel, age etu hule hake mel, hagasigin.
20An hinopase Netagepogot en hùkorogo hagatenem apùnì nen hogo'napo kolek wesigin atì like oan wagì'lek werek kolek he,
o mo elokoken hùnogoat mùm agìk,
tugi elokoken mep agìk, atì tak haga'lasigin o.
21Atì'nogo haga'laga kolek he, hit apùnì nen an hinopase Netagepogot netage palogo nayoko hogoin mene hùgì inebe lopok telinabigin o,
ìlùk Yoel en isike atì.
22Mene re, hit Isirael mene nerùgì nagaiya'lak. An nane igin yì holini. Yesùt aua Nasaret mene a'nogo Ala nen ayoko hesikomo, ninom logolìk, wane hùthoagalùk hagasusak lek mane Ala nen eki omamerogo elalinat hagatì lagaike atì re, ebe Yesùt enat hagatì lagaike. Halok he, Yesùt Ala nen lakhei wagaikomo, ìlùk enagat agaike atì hinelu. 23Mene re, at Ala elu logolìk, a'la nen,
Atì'nogo hagasuak o, ìlùk akasike baat, Yesùt ebe hineki ba hesikomo, hit en ap inoabùt weak mene ineki waganogo, at ebe e ba menogo hìlìk watep atì. 24Watepma, at ebe heinet watì logolìk wa'laga meneat he, apùnì ineki hele warogo hisagare'ma welagaikarek atì hak, at atì'nogo warek motok logousak lek atì nen, ineki hele hikalogo wulaksagarek atì hak, Ala nen eluguthike atì. 25#Mzm.16:8-11 At Yesùt hesik Taùt en mel isike:
An yì mene tì mene nen nabologo'neanogo ìlùk nopase Etagepogot ebe nera'lu were'ma, ninhùp-nanhùp neileken hiko motok welagirek.
26Atì nen, na'la hai hakìgìk, nane ba hogoratìk, ìgìrek. An noasumo nebe warek hobuk hano asigin, ìlùk na'la nen wenesùgì sikip hogo logogin.
27Atì'nogo logogin atì re, an nebe apùnì wa'la'lùk lagaikarek oba atoma motok logouagalùk, hat en herakhanhìk,
An hat haput hetaùken hutik mene nebe yì hili asuagalùk halolothanhìk, igin lek atì nenat o.
28Hat en nineluk logogun atì mene yakùlnetìk, hat hebe neperak motok welago atì nen ina'la hai hakagarek mene na'la peserogo wo'netìk, ìkì lagen o,
ìlùk Taùt en Yesùt hesik isike atì.
29“Mene re, nerùgì nagaiya'lak. At ninopa Taùt abok pak hogo yogohisak. At ebe wa'lagaikomo, nit welago ba yoma kweang palogo salhukwa mene, obùlùk alep welagaikesik yogotak werek atì. 30#Mzm.132:11; 2Sam.7:12-13 At Taùt ebe Ala ane yogoisìkì lagaike mene nogo nen he, Ala nen hopuk palogo wene mel ìlùk waresike mene eluat welagaike:
Hat kain welagatek atì hak logouagalùk, ap hat en tagokwe mene aike hobùlù'mo menhegein o,
ìlùk wene waresike. 31#Mzm.16:10 Atì'nogo wene waresike mene atì ebe oan menhìgì'lek werek kolek, at Taùt Ala nen hagasigin mene elu logolìk he,
Karìsùt wa'lasumo, Ala nen eluguthegein o, ìlùk wene at en mel isike:
Ala nen at ebe apùnì wa'la'lùk lagaikarek oba atoma motok logouagalùk heraksegein lek o. Nen, at ebe hili arìk, lek asuagalùk heraksegein legat o,
ìlùk isike atì. 32Atì'nogo isike higit hogoat, at Yesùt Ala nenat eluguthikomo, nit ya obogat nineileken hogosik nineluat welago atì. 33At ebe Ala nen eluguthikesik, era'lu kain logouagalùk menhikomo werek o. Logolìk, Ala nen,
Nareagùn wokhisegein, ìlùk wene wa'nisasike hagat Yesùt wogotomo, at en hùkorogoat nit ninoba pelakhei wagama re, nit hagatenem hineileken nisìgìk, hinasuk holhìk, ìkì lagep atì. 34-35#Mzm.110:1 Mene re, at Taùt ebe pogot oba lagagì'lek. Meneat he, at en mel isike:
Ninopase Etagepogot en he, an noe Etagepogot yogotì logolìk he,
Apùnì hat haselei mene amanogo, hesok en al lebelogo hisanok en, an nen oan hoba hisa wagì'lek werek kolek, hat an nera'lu neki ebekwe hebe kain logoinok, ìlùk at Ala nen yogosike,
ìlùk, at Taùt okawerek en isike atì. 36At Yesùt ebe re, hit en e ba menhìlìk watepma, at Ala nen he,
Hinoe Etagepogot Karìsùt ebe yìat, ìlùk menhike atì. Halok he, hit apùnì Isirael mene obogat en he,
Wene atì eberogoat, ìlùk hinelurogo logoino,” ìlùk yogoisasike.
37Atì'nogo yogoisasikomo, inasuk holhukwasik, wene atì ba inetaùken abolok isikomo re, it en Peterùt mel, it aike Yesùt en weteberogo inayoko hìlìk laksasike mene aike mel, yogoisìkì logolìk he,
“Nagaiya'lak. Nit ninoabùt nìkì'nogo hagasu,” ìlùk yogoisasukwa. 38Atì'nogo yogoisasukwama, at Peterùt en he,
“Weak hagatì lagep mene atì heraksìlìk hinoabùt hebela'ni o. Atì'nogo hebelasumo re, weak hagatì lagep mene atì, Ala nen sagalogo legetsoagalùk hinebe lopok Yesùt Karìsùt etage palogo ima pelakhinabuak. Atì'nogo hagasumo re, Ala Areagùn atì wokhisegein o. 39At Ala nen,
Nareagùn wokhisegein, ìlùk wene wa'nisasike atì re, hit hinebe mel, hinagainapùrì mel, it aike inaua walegat mene atoma mel, hinebe ninopase Etagepogot Ala nen,
We'ni o, ìlùk wahisìlì'logo mene hùgì, obogat hesik wene hirat wathisasike o,” ìlùk yogoisasike. 40Wene ebe atì'nogo uanat ìkì logolìk he,
“Apùnì inoabùt kolo hagarì'lùgì mene yoma, Ala nen ùkùm inoba hegein mene atì, heraksalùk hinokawerek en telano o,” ìluk inasuk wasike.
41Inasuk atì'nogo wasikomo re, it wene wanhukwa mene hùgì ima pelaginapukwa. Atì like inebe 3.000 hake ima pisukwasik he, hobuk inom lapuk hogo welagaukwa. 42Inom lapuk hogo hanoat logolìk he, it ap Yesùt en weteberogo inayoko hìlìk laksasike mene amanogo nen wene yakùlisikenem hutik-hutigat inasuk holhik, sùpùrùk inom kùrogo nìkìk, sapan inom ìgìk, ìkì lagaukwa.
Ala againapùrì inetaùken Yesùt oba hìpìrethìlìk hagatì lagaukwa wene
43Apùnì nen wene hùthoagalùk, it ap Yesùt en inebe weteberogo inayoko hìlìk laksasike mene amanogo nen hagasusak lek mene elalinat apik hagatenem he, apùnì inebe lopok inayùk aga lagaike. 44It apùnì aike wene ebarogoat ìlùk wanhukwa mene hùgì inom omakeat hano logolìk, inagarok yì mene tì mane hesik,
“Nit ninom omakeat ninagarok mene,” ìlùk lapuk hogo hesogo welagaukwa. 45Atì'nogo logolìk he, it aike nen, inakweang mel, inagarok mel, oko uang wìlìk he, uang atì it Ala againapùrì mene amanogo inebe lopok sùpùrisìkì logolìk, it aike lek mene elok hogoat sùpùrisìkì lagaukwa. 46Atì'nogo hagatì logolìk he, ineki aike kamo ìgì'lek hutik-hutigat Ala awì wùrì'mo atogotìk, ina'la hai hakìkì logolìk, inoabùt isong hogoat inauakwe sùpùrùik inom kùrogo nìkìk, ìkì lagaukwa. 47Atì'nogo hagatì logolìk, it en Ala hogorato were'ma, it apùnì obogat en,
“It hano,” ìlùk hogorinapì lagaukwa. Hogorinapo were'ma re, ninoe Etagepogot an he, eki aike kamo ìgì'legat, apùnì aike telogo Ala againapùrì inom omakeat lapuk hogo hisìkì lagaike.
Currently Selected:
LAKSASIKE 2: LAIDNI
Highlight
Share
Copy
Want to have your highlights saved across all your devices? Sign up or sign in
