LAKSASIKE 1

Yesùt en, “Ala nen Areagùn hinoba pelakhei wesigin,” ìlùk wene warisasike wene

1Teopilùt noe. An nen emakum wene helal waganogo hoba lakhei wagagi atì, at Yesùt en yì mene tì mene hagatìk, yì wene tì wene yakùlisìgìk, ìkì lagaike wene ero ba hùlì nen, 2at opase nen ebe pogot oba lìakesike atì hùlì, helal waganogo lakhei wagagi atì. At ebe pogot oba oan lìakhìgì'lek werek kolek, at agoromì inebe weteberogo inayoko hìlìk laksagalùk isike mene amanogo Ala Areagùn omame ba inasuk wasike. 3Yesùt ebe wa'lagaikesik en eluk a'lùk, eki 40 hari inom logolik he, at ebe sekek hogo hùthoagalùk yì mene tì mene elalin logolegat hagatì lagaike. Atì'nogo hagatì logolìk, at en he,

“An nebe yì. Ineileken tùkùm hogo neoak o,” ìlùk hobugalep inelokoma melarìk ìnùgisìgìk, Ala awe a'ma welagaikarek wene yogoisìgìk, ìkì lagaike. 4-5Ineki aike sapùl at agoromì inom omakìma atogorek logolìk he, mel yogoisasike:

“Yohanet en ima pelaginapì lagaike meneat he, hit hineki logolegat welagì'le'ma, Ala nen ima pelakhinabu hak, Areagùn hinoba pelakhei wesigin atì re, hinebe o Yerusalem yoma nen pùgùlhùpp. An nopase nen he,

It wogisegein, ìlùk wene wathisasike mene atì, an nen alebat abok yogohisasigiat atì. Halok he, serogo logoino,” ìlùk wene warisasike.

Yesùt ebe Ala nen pogot oba lìakhesike wene

6At Yesùt en wene atì'nogo yogoisasikesik, at agoromì inom atogorek logolìk he, agoromì nen at oba hinok mel wanhukwa:

“Noe. Holoat yì apùnì tì apùnì nit Yahuri mene ninoe kain awe a'ma welagaukwa atì hak, hobuk atì'nogo logogun mene, yogotak ya baat hisegein a? Oan a,” ìlùk yogosukwa, 7Yogosukwama re, at en mel yogoisasike:

“Wene egep atì, an nopase esewerek en akasike higit hogoat haga'lasigin atì nen he, hit en he,

Hùlì tì hùlì ba logopik haga'lasigin, ìlùk hinelurogo logousak mea o. 8Atì'nogo meneat he, Ala Areagùn hinoba pi waga halok, hinomame asigin. Hinomame arìk he, o kota Yerusalem en, propinsi Yurea nen, Samaria nen, hùlì o yì awì tì awì esako esako a'lomaat laga logolìk, an yì mene tì mene hagarìk nikenem hineileken neegep mene a'nogo, an hesik yogoisìlìk laga logoino o,” ìlùk yogoisasike.

9Wene atì'nogo arat yogoisasikomo, Ala nen at ebe pogot oba lìakhikenem, ineileken werek kolegat ohena nen salhikomo re, ineileken hobuk hìgì'lek. 10Hìgì'lek logolìk, at Yesùt ebe lìakhiko kolek ineileken pogot oba higit lìabek were'ma aremnogoat, ap inebe pìre inasu kut mene laberek mene inera'lu melasi pi wagaukwa. 11Melasi pi wìrìk he, mel yogoisasukwa:

“Hit apùnì o Kalilea tokwe mene yì sanì. Hineileken pogot oba lìagasogo welagep atì nenahalok. At Yesùt hit yoma hikalùk he, Ala nen pogot oba lìakhikenem hineileken werek kolegat, lagaike atì hak, hobuk atì'nogoat pi wesigin o,” ìlùk yogoisa pi wagaukwa.

Ap aike Yùrat obùlù'mo menhesukwa wene

12Atì'nogo yogoisasukwama, tom Saitun oba atoma nen pi wìrìk he, o kota Yerusalem walegat lek. We, horogat satu kilometer hake ki wagaukwa. 13Ki wagaukwasik, ouma atoma kìlìk he, o hùlùpo welagaukwa ba atomaat lagasukwasik welagaukwa. It atì inebe re, Peterùt ho, Yohanet ho, Yakobùt ho, Atereat ho, Pilipùt Tomat eperak ho, Paretolomeùt Matiùt eperak ho, Alpìùt aput Yakobùt atì ho, Simon,

“O yoma ninawìwerek mene nek logogun,” ìlùk ìkì lagaike mene atì ho, Yakobùt aput Yùrat atì ho, inom welagaukwa. 14It inebe atem mel, Yesùt agosa Maria mel, hìmì aike mel, Yesùt agoromì opolik mene inomat, inebe obogat inetaùken omakeat logolìk he, sapan iko motok welagaukwa.

15Atì sat, Ala againapùrì aike inom inebe 120 hake atogorek logolìk, at Peterùt ina'la mel agaikesik he, wene mel yogoisasike:

16-17“Nerùgì nagaiya'lak. At Yùrat a'nogo re, nit ninom yabu hano hagatì logouagalùk Yesùt en ayoko hìlìk menhesikomo, nit ninom hano welagosik meneat he, holoat wene Ala Areagùn nen at Yùrat hesik isikomo, at Taùt en helal waganogo hesike mene were'ma, at Yùrat en ap en Yesùt ebe hakhouagalùk wogisek waga atì, haga'lasusak obaat haga'laga o,” ìlùk yogoisasike.

18(At Yùrat he, weak hagasike atì hesik, oko wogosukwama re, kweang oko pali lagaike. Pali lagaikesik atoma lìlìk elokwe sogoum warìkì logolìk, alabut sup hogo wùlìpikesik wa'lagaike. 19Atì'nogo wa'lagaikomo, apùnì o Yerusalem welagaukwa mene inebe obogat inasuk holhukwasik he, inelu arìk, kweang atì hesik, nit ninane ba amep pisike ba u hak, it inane ba etage Hakaltama salhukwa.)

20 # Mzm.69:25=TB 69:26, 109:8 Atì'nogoat, at Peterùt en mel yogoisasike:

“Wùnì helal waganek Masimùt a'nogo ba mel isukwa:

O at were'ma awì somong asuak.

Apùnì aike at aua atoma inebe legat logouak o,

ìlùk helal wanhukwa. Nen, aike mel isukwaat:

At ebe etagewerek welagarek mene atì ap aike logouak,

ìlùk isukwa. 21-22Halok he, nit ninom nìkì logouagalùk, ap aike menhouok. Ap menhousak atì re, hùlì at Yohanet ima pelaginapì lagaike atì hùlì nen he, ninoe Etagepogot Yesùt ninom ninhùp-nanhùbat opolik nìkì lagosik, hùlì Yesùt opase nen nit nina'la nen kìgìlogo pogot oba lìakhike atì hùlì, ninom nìkì lago mene halok,

Yesùt eluk aga atì eberogoat. Nineileken hogosik, ìlùk ninom yogoisìlìk nìkì logouagalùk, menhouok o,” ìlùk yogoisasike.

23Yogoisasikomo re, it en he,

“Ap yì menhouok a? Ap yì menhouok a,” ìlùk inebe pìre inetage isukwa. Ap aike etage hìnagan, Yùsùp ìgìk, Parasapat ìgìk, Yùsìtùt salogo ìgìk, ìkì lagaukwa mene. Nen, ap aike Matìat atì. 24-25Inetage isukwasik, Ala ayoko hìkì logolìk he,

“Ninopase. Yùrat hat hane yogoisìlìk nìkì logouagalùk ayoko hesigin meneat he, at en heraksalùk wa'lasusak higit hogoat wa'lagama, obùlù'mo ap inebe pìre yì, hat en ap kì hak ayoko hegen. Hat apùnì inebe obogat inetaùken helu atì. Halok,

Ap ebe yì ayoko hìgì, ìlùk, hat en yakùlnisan o,” ìlùk yogosukwa. 26Atì'nogo isukwasik he,

“Ap yì menhouok a? Yì menhouok a,” ìlùk oageke sa oba higit asigin inetage salogo walhasukwama, Matìat oba higit agaike. Higit agaikomo, it ap Yesùt en inebe weteberogo inayoko hìlìk laksasike mene amanogo inebe 12 mene 11 agaikomo nen, 12 asuagalùk Matìat inom logouagalùk menhesukwa atì.

Currently Selected:

LAKSASIKE 1: LAIDNI

Highlight

Copy