LAKSASIKE 13

Parenapat Saùlùt eperak inebe weteberogo hisìlìk laksasukwa wene

1Ala againapùrì o Atiokia atogotì lagaukwa mene amanogo, it aike nen Ala ane yogoisìgìk, it aike nen yakùlisìgìk, ìkì lagaukwa mene inebe ap aike Parenapat atì, aike Simeon etage Ebemuli ìkì lagaukwa mene atì, aike Lùkìùt o Kirene mene atì, aike Menahem, Herotet kain gubernur agaiyak eperak apine kalinapukwa mene atì, aike Saùlùt atì, welagaukwa. 2Logolìk he, ineki aike ba Ala againapùrì inom ninoe Etagepogot awe a'ma kìlìk, sùpùrùk nìkì'lek, at hogorato were'ma, Ala Areagùn nen yogoisìkì logolìk,

“Parenapat Saùlùt eperak en an hesik hagatì logouagalùk, inayoko hìgìma atì nen he, it inebe weteberogo an hesik hanino o,” ìlùk yogoisasike. 3Yogoisasikomo re, sùpùrùk nìkì'lek sapan ìkì lagaukwasik en, ineki it Parenapat Saùlùt eperak inùkùloak sebelogo laksa wagaukwa.

Saùlùt Parenapat eperak en, it apùnì o Siperùt mene hano wene yogoisa wagaukwa wene

4It Parenapat Saùlùt eperak Ala Areagùn nen laksa wagaikomo re, o Seleukia pi wagaukwa. Pi wìrìk he, o Seleukia atoma nen he, imakwe so ba o Siperùt i ekenma wagaukwa. 5Wagaukwasik, o Salamit wìrìk he, apùnì Yahuri mene o sapan ìkì lagaukwa bakwe kìlìk, Ala ane yogoisìlìk nìkì lagaukwa. Yogoisìlìk niko kolek, at etage Yohanet ìgìk, Marekùt ìgìk ìkì lagaukwa mene a'nogo nen leberisìkì lagaike. 6O Siperùt ekenma atoma, o sili lopok nìkì lagaukwasik en, hobuk o etage Papot wagaukwa. Wagaukwasik he, ap Yahuri mene aike etage Pareyesùt atì, ebe wesagùn logolìk he, Ala ane salek okawerek ane meneat yogoisìkì lagaike mene were'ma wagaukwa. 7O Siperùt ekenma atoma, ap kain gubemur etaùken kagauksek mene etage Seregìùt Paùlùt welagaikeat. At gubernur atì, at wesagùn atì agaiyak. Logolìk, at Seregìùt en he,

“An Ala ane nasuk holusak walok,” ìlùk, Parenapat Saùlùt eperagat inayoko hesike. 8Atì'nogo inayoko hesike meneat he, ap wesagùn Pareyesùt atì, it apùnì Yunani mane inane ba etage Elimat ìkì lagaukwa mene atì nen he, ap kain gubernur atì wene wìlìk etaùken Yesùt oba hìpìretheinogo ìlùk, Parenapat Saùlùt eperak inane sebeligìlùk isike. 9Atì'nogo sebeligìlùk ikenem, at Saùlùt, etage aike Paùlùt a'nogo nen he, Ala Areagùn a'la peserek logolìk eileken Pareyesùt oba lùrogo hìkì logolìk he, 10mel yogosike:

“Hat hebe Ibilit aput o. Apùnì lalinapìk, nongorinapìk, iko motok logolìk, yì mene tì mene higit hagasuogolùk ikenem he, hat en legetsagalùk hagato motok welagen yì rì! Ninoe Etagepogot en, apùnì telninabigìlùk kwe higit hogo yakhinasike mene, hat en kamo ìgì'lek kolotheigìlùk iko motok welagen atì nahalok. 11Lakhan! Atì'nogo hagatì lagen atì nen, ninoe Etagepogot en ùkùm hoba hikomo welagen o. Atì re, hat hebe yogotak elama hesik ya heileken mùm arìk he, mo atì heileken lakhìgì'lek logogin o,” ìlùk yogoto kolek aremnogoat, eileken ohena hake salogo mùm agaike. Mùm agaikesik he,

“Sa nen neki hagasogo wo'narek legein he,” ìlùk apùnì ekihak heraginabìk lagaike. 12Atì'nogo haga'lagaikomo, ap kain a'nogo eileken hasikesik he,

“Wene ninoe Etagepogot ane atì nayùk e,” ìlùk hogorarìk he, wene atì eberogoat ìlùk wanhike.

It Paùlùt lak o Pìsìrìa kota Atiokia sili atoma wagaukwa wene

13At Paùlùt lak o Papot atoma nen he, i so ba o propinsi Papilia kota etage Perega atoma wagaukwa. Wagaukwasik he, at etage Yohanet ìgìk, Marekùt ìgìk egarek mene a'nogo, it atoma heraksalùk he, hobuk apotkwe o Yerusalem lagaike. 14Lagaikomo nen, it amanogo o Perega atoma nen he, o Pìsìrìa tokwe kota Atiokia atoma lagai wagaukwa. Lagai wìrìk he, ineki Ala hesik welegat logolìk, o apùnì Yahuri mene sapan ìkì lagaukwa ba kìlìk, hù'lagaukwa. 15Hù'lagaukwasik were'ma re, it apùnì atoma mene nen, wene Ala nen ninasuk wasike wene a'nogo etage salhìk, wene it ap Ala ane yogoisìkì lagaukwa mene nen helal wanhukwa mene etage salhìk, isukwasik he, inogogì kaintek en Paùlùt lak yogoisìkì logolìk:

“Nagaiya'lak. Apùnì yoma inetatùken wurik asuak en he, hit en wene aike werek halok he, yogonisoageip ìlùk hinayoko hogo o,” ìlùk isukwama, 16at Paùlùt ebe melarìk he, wene yogoisagalùk eki map isike. Eki map ìlìk he,

“Hit apùnì Isirael mene mel, etakwe mene Ala ane hologo hagatì lagep mene mel, nerùgì nagaiya'lak. Wene igin atì hinasuk holino o. 17Nit apùnì Isirael mene yoma ninopase Ala nen, ninopalak inebe wenaginabìk he, inayoko hesike. Inayoko hesikomo, it o Mesit atoma inebe ap pogat were'ma re, at en inebe seik-peik hogo apik hagarinapike. Atì'nogo hagarinapikesik he, at eki omame ba wogisek wùlìbi wagaike atì. 18Wogisek wùlìbi wagaikomo, it o leimo apùnì inebe le'ma atoma mo lagagìk pìgìk iko kolek, 40 tahun logolìk, inoabùt kolo hagatì lagaukwa meneat he, at epe morogoat hagisek welagaike. 19Hagisek welagaikesik he, o Kana'an wogisek ki wagaikesik, apùnì inùkùl etage 7 nen, inebe motogat inoarìk he, it inakweang mene nit ninopalak esewerek asuagalùk wogisasike. 20Atì re, atì'nogo hagarinabìk waga kolek he, mo lagagìk pìgìk iko kolek 450 tahun hake welagaukwasik en wogisasike atì. Wogisasikesik en, hobuk he, ap aike nen inanema wanhìk, wene yogoisìgìk, ìkì logouagalùk, menhisìlìk waga lagaikesik hùlì, ap Samuel Ala ane yogoisìkì lagaike mene a'nogo menhesikomo welagaike.

21“Hùlì atì hùlì nen he, it apùnì amanogo nen he,

Ninoe kain etagepogot aike menhousak walok, ìlùk Ala kìno yogosukwama re, at en he, Saùl, ap Kise ùkùl etage Penyamin mene aput, menhìlìk wogisasike. Wogisasikomo, at ebe mo lagagìk, pìgìk, iko kolek 40 tahun kainat welagaike. 22#1Sam.13:14, Mzm.89:20=TB 89:21 Were'ma re, Ala nen at Saùl pelakhìlìk he, obùlù'mo at Taùt etagepogot logouagalùk, menhìlìk wogisasikeat. Wogisasikesik, wene at hesik abok ìkì logolìk he,

Isaì aput Taùt yì re, an netaùken hutik mene, an na'la walok akìgìrek mene hagasuagalùk yogotenem he, obogat elok hagatì logousak hìgì atì nen he, wokhisìgì o, ìlùk yogoisasike. 23Nen aike re, alebat at Ala nen he,

Hit apùnì Isirael mene telhinabuagalùk, at Taùt en tagokwe mene aike wokhisegein, ìlùk wene warisasike atì hagat, ebe Yesùt menhìlìk wogisasike atì. 24At Yesùt ebe hobuk wìrìk, yabu oan hagatì'lek werek kolek he, elokoma Yohanet tak wagaikesik, apùnì Isirael mene mel yogoisìkì lagaike:

Hit weak hagatì lagep mene hukalogo heraksìlìk hinoabùt hebelini o. Hebelumo re, an nen ima pelakhinabigin o, ìlùk inebe obogat yogoisìkì lagaike. 25Yogoisìkì lagaikesik, at en hagasusak mene arat hagatì lagaikesik, wùrep oba hagasigìlùk he, mel yogoisasike:

Hit en an sa akìkì lagep. Hit en serogo welagep atì, ebe an lek o. Hina'la eberek logoino. At ebe an nopolik wesigin o. Waganem he, an nebe yekerek. Kain he, arat o. At esok sepatu laberek mene atì, an nen hikalusak mea o, ìlùk yogoisasike.

26“Halok he, hit apùnì Aberaham en tagokwe mane mel, etakwe mene Ala ane hologo hagatì lagep mene yoma hinom welagep mene mel, nerùgì nagaiya'lak. Wene telninabusak wene atì Ala nen nirat ninoba lakhei wagama yì. 27Wene lakhei waga mene atì, it apùnì o Yerusalem mene inogogì kaintek inom enat he, Yesùt ebe hùthìgì'lek. Hùthìgì'lek logolìk, hageat en it ap Ala ane yogoisìkì lagaukwa mene amanogo nen wene halal waganogo hesukwa mene were'ma, sapan ninhùp-nanhùp ìkì logolìk etage salhenem inasuk holharek meneat he, wene ebe hùthìgì'lek. Atì'nogo hùthìgì'lek logolìk, Yesùt ùkùm oba hìlìk ebe wasukwa atì ba, wene hageat isukwa mene atì ebe agaike atì. 28It en he,

Ùkùm ki'nogo oba hìlìk wasuok, ìlùk herasukwa mene, wene oba lek agaike meneat he, at Pilatùt en wasuagalùk wogosukwa atì. 29At Yesùt hesigat,

Tì'nogo hagasugun, ìlùk halal waganogo hesukwa mene atì higit hogo obogat hagasukwasik he, ebe warek e ba nen pelakhei wìrìk he, omoulama kelakhesukwa atì. 30Warek atì'nogo kelakhesukwa meneat he, hobuk Ala nen eluguthesike atì. 31Eluguthesikomo re, it Yesùt inom a Kalilea tokwe nen o Yerusalem pisukwa mene amanogo ineileken hoagalùk inelokoma eki apik oba melaga lagaike. Atì'nogo inelokoma melaga lagaikomo, ineileken hasukwasik, it en he,

Ebe eberogoat nineileken tì'nogo hogo, ìlùk yogotak apùnì Isirael mane yogoisìlì'lùgì atì. 32-33#Mzm.2:7 Ma re, yogotak nit en wene hano wene atì, hit yogohisa wago yì. Ala nen he,

Tì'nogo wokhisegein, ìlùk ninopalak wene warisasike atì ebe re, o yogotak nit it en tagomakwe mene welago ya ba Yesùt at wo'nisasikomo wasukwama wa'lagaikomo re, Ala nen eluguthesike atì. Atì'nogo hagasigìlùk, wene Masimùt nomor 2 ba, mel isike:

Hat an naput o. Hebe yogotak takhapì, ìlùk isikomo re, helal waganogo hesukwa higit hogoat haga'laga o. 34#Yes.55:3 Yesùt ebe wa'lagaikesik were'ma, Ala nen eluguthesikomo re, hobuk wa'larìk hili asigin lek o, ìlùk wene aike mel isike:

Tì'nogo hagathabigin, ìlùk, wene an nokawerek en ìlìk en, hobuk munenigin lek mene eberogoat Taùt waresigi mene atì harat wokhesigin o,

ìlùk yogosike atì. 35#Mzm.16:10 Nen, aike re, at Taùt en Ala mel yogosike:

Hat hokawerek haput hane hologo hagaterek mene atì re, hili arìk, lek asuagalùk heraksegein lek o,

ìlùk yogosike. 36At Taùt atì re, agaiya'lak apìne ta'lagaukwa mene inom logolìk, Ala nen,

Tì'nogo hagasuak, ìlùk a'la akasike higit hogo hagatì lagaikesik en, ebe wa'lagaike atì. Wa'lagaikomo re, opalak warek salinapukwa ba inoba louk hogo salhukwama re, hili arìk, lek akasike atì. 37Atì'nogo meneat he, at Yesùt ebe wa'lagaikesi'mo nen, Ala nen apotkwe eluguthesike mene atì nek he, hili arìk, lek agì'lek o.

38“Nerùgì nagaiya'lak. Wene yì hinelurogo logoino o. At Yesùt Ala nen atì'nogo eluguthesike atì ba, hit weak hagatì lagep mene atì, at en sagalogo legetsoagalùk yogohisìkì lago atì. 39Yì weak tì weak hagatenem he, wene Ala nen Musa ayoko hìlìk inasuk wasike wene a'nogo ba, korogo wokhasak mea meneat he, ninebe lopok ninetaùken Yesùt oba hìpìrethoumo nek he, elok korogo wokhasak werek o. 40-41#Hab.1:5 Mene re, it ap Ala ane yogoisìkì lagaukwa mene amanogo nen he, mel isukwa:

Hit o yogotak welagep ya ba re, an nen yì mene tì mene hagatenem, at aike nen sekek hogo yakùlhisikenem he, hit en ebarogoat ìlùk huthìgì'lek logolìk hina'la meathìkì lagep atì lakhani! An nen atì'nogo hagatenem hineileken hìlìk hogoratì logolìk he, hinebe wa'lakogoin atì,

ìlùk Ala nen isikomo halal waganogo hesukwa atì hak, hit hinoba asinogo ìlùk he, wene hinasuk tùkùm hogo holhì logoino o,” ìlùk yogoisasike.

42Wene atì'nogo yogoisalùk wùlùpenem, it apùnì amanogo nen he,

“Sapan hobuk ugun atì ba, wene atì aike inom lagak hogo yogonisasak o,” ìlùk Paùlùt Parenapat eperak yogoisasukwa. 43Yogoisasukwama, it sapan ìkì lagaukwa ba nen wùlùpukwasik laganem he, it apùnì Yahuri mene mel, etakwe mene Ala ane wanhukwasik Yahuri mene negen welagaukwa mene mel, inebe logolegat inopon lagaukwa. Lagaukwama, it Paùlùt Parenapat eperak en he, mel yogoisasukwa:

“Ala oabùt hano nen haga'ninaperek mene atì, hinetaùken tùlem logolìk hagatì logoino o,” ìlùk inasuk wasukwa.

44Atì'nogo isukwama, apùnì inasuk holìlùk he, sapan hobuk ikenem, apùnì o kota atoma welagaukwa mene inebe omakìtek enek kamo iko kolek, inebe obogat ninoe Etagepogot ane inasuk holuogolùk atogosukwa. 45Atogosukwama, it ap Yahuri mane amanogo apùnì logolegat ineileken isasukwasik ua palogo re,

“Wene Paùlùt en ìlì'logo atì hinasuk holusak lek o,” ìlùk wene palhìk, Paùlùt lak wenagisìgìk, isukwa. 46-47#Yes.42:6, 49:6 Atì'nogo isukwa meneat he, it Paùlùt Parenapat aperagat inayù'lek hogoat logolìk he, mel isukwa:

“Ala ane atì hit tak yogohisasak obaat yogohisa wago meneat he, hit hinabìt en heraksegesip, hinokawerek en he,

Nit nabùlal-habùlal haga'ninabusak he, mea o, ìlùk u hagat ìkì lagep atì nen, nit ninoe Etagepogot en ninayoko hìkì logolìk yogonisasike hagat hagasugun. At en:

An nen he, apùnì etakwe mene lìarinapìk, o wùrep oba werek mene telinapìk, igìlùk he, esage kìalek hake, hit hinebe hikìgì o, ìlùk yogonisasike higit hogo, hebek hogoat it apùnì etakwe mene yogoisa logoin o,”

ìlùk yogoisasukwa. 48Atì'nogo yogoisikenem he, it apùnì etakwe mene inasuk holhukwasik, it en he,

“Ninoe Etagepogot en wene atì hano motok isikomo hìgì,” ìlùk hogorasukwasik ina'la hai hakasukwa. Ina'la hai hakìlìk, Ala nen it nabùlal-habùlal hagarinabigìlùk wenaginapike mene hùgì nen,

“Wene atì eberogoat,” ìlùk hùthasukwasik wanhukwa. 49Atì'nogo wanhukwama re, o atoma ninoe Etagepogot ane atì ukalarìk wùlìpike.

50Atì'nogo ukalarìk wùlùpenem he, it apùnì Yahuri mene nen he, hìmì ap etakwe mene inagagwì kaintek Ala ane wanhukwa mene mel, it ap o kota atoma inetagewerek kaintek welagaukwa mene mel, inom en Paùlùt Parenapat eperak mùgisoagalùk ina'la kagalhukwa. Atì'nogo ina'la kagalhukwama re, it en he,

“Hit nit ninaua yoma logousak lek o,” ìlùk mùk hogo wulaksasukwa. 51Wulaksikenem, ina'la eberek logouagalùk, it Paùlùt Parenapat eperak en he,

“Hinoba lopok,” ìlùk inesok alolong hesalogo laksalùk he, o Ikonìùm ki lagaukwa. 52Ki lagaukwama, apùnì o Atiokia atoma mene Yesùt ane wanhukwa mene hùgì Ala Areagùn ina'la peserogo kisikomo ina'la hai apik hakasukwa.

Currently Selected:

LAKSASIKE 13: LAIDNI

Highlight

Copy