LAKSASIKE 12
12
Ala againapùrì yì aik tì aik hùkorogo hagarinapì lagaukwa wene
1Atì'nogo hagatì lagaukwa atem sat he, ap etagepogot Herotet en Ala againapùrì mene aike weagarinabigìlùk isike. 2Atì'nogo isikesik, at Yohanet oe Yakobùt wasuagalùk agoromì yogoisasikomo karok oba ebe motok wasukwa. 3Atì'nogo wasukwama, at Herotet a'la nen he,
“An atì'nogo hagatì lagì atì ba, it ap Yahuri mene ina'la hai motok hakaga o,” ìlùk, hobuk Peterùt eki hele wasuagalùk agoromì yogoisasikomo, pesta horotì hìtì'lek mene niko kolek, at eki hele wasukwaat. 4Atì'nogo wasukwasik he, o apùnì ineki hele warek hisagarek oba hei lagaukwa. Hei lìlìk he, ap tentara mene inebe 16 logolìk he, alep inebe 4 en serogo welagìk, hobuk inebe 4 enat serogo welagìk, ìkì logouagalùk inayoko hìlìk he, at Herotet a'la nen mel akasike:
“Pesta etage Paskah, nogoin a'nogo nalùk he, Peterùt waganogo apùnì ineilhanem ùkùm oba hìlìk wasuok en, eki hele waregat logouak o,” ìlùk a'la akasike. 5At Peterùt eki hele warogo kelakhìlìk werek kolek he, it Ala againapùrì nen sapan at hesik kamo ìgì'lek hutik-hutigat inetaùken oba nenat motok ìkì lagaukwa.
Ala nen PeterĂąt eki hele hikalogo wulakhesike wene
6Sapan atì'nogo iko kolek he, at Herotet en hùen hak Peterùt ebe waganogo apùnì ineki ba heigìlùk a'la akasikesik, oan werek kolek he, o atì sat hùako, ap tentara mene amanogo, it inebe aike kwe ba kagalek werek kolek, inebe pìre aike Peterùt eki he'na he'na hele homago nogo iko kolek, it abel he'na he'na logolìk hele elùgùn ineki ba kelogo welagaukwa. 7Atì'nogo were'ma re, malaikat ninoe Etagepogot en yoko pelaksa wagarek mene amanogo aike ka nen heat atoma mel aganem he, o hùlù sekele'ma a'nogo motok lìa agaike. Atì'nogo lìa agaikomo, at malaikat a'nogo nen he, Peterùt eluk asuagalùk abeleken oba eki nen temùgùthìkì logolìk, mel yogosike:
“Hepok melame,” ìlùk yogosikomo melaganem he, posie omaken a'nogo eki ba nen kopok hogo pisike. 8Pisikomo re, at malaikat a'nogo nen he, mel yogosike:
“Pagaluk ìtìk, hesok sepatu labetìk, in o,” ìlùk yogosike. Atì'nogo yogosikomo labesikomo re, at malaikat a'nogo nen he,
“Su etakwe mene laberogo re, nopolik eme o,” ìlùk yogosikomo, 9opoligat wùlìpike. Wùlìpì logolìk, at malaikat a'nogo nen eberogoat hagasike meneat he, at Peterùt oake Palek logolìk he,
“Nabìkakan hìkì lagì he a,” ìlùk a'la akasike. 10Ap tentara mene inebe eilem ta'ma kagalek welagaukwa mene amanogo werek kolek, inera'lukwe wùlìbìk he, kwe etakwe o silimo wùlùparek oba ebe posie omaken oba hagarekkwe wùlùbuogolùk ikenem he, kwe abusagat hù'lagaikomo, wùlùpukwa. Wùlìbìk, kwe ebekwe laga logolìk, at malaikat a'nogo Peterùt hebùlùk ka lagaike heat nalagaike.
11Nalagaikomo, at Peterùt oabùt hebelarìk he, a'la mel akasike:
“Ì. At Herotet omame ba ha'narek were'ma, it apùnì Yahuri mene obogat en he,
Tì'nogo hagasugun, ìlùk nabok palho kolegat, malaikat ninoe Etagepogot en eberogoat yoko pelakhei wagama hele hikalnape hìgì,” ìlùk hùthasike. 12Atì'nogo hùthalùk he, he Maria ap etage Yohanet ìgìk, Marekùt ìgìk, egarek mene atì agosa aua atoma apùnì inebe logolegat atogosukwasik he, sapan ikenem lagaike. 13Lìlìk, kwe ba papagathikenem, it amanogo nen he,
“Sa nen papagathìlì'logo,” ìlùk helekerek inatitigeke mene etage Orote atì ha wùlìbi wagaike. 14Eileken ha wùlìbi wagaikesik, Peterùt ane enagat hùthìlìk, a'la hai en, kwe hùthìgì'legat heraksalùk humusek kisikesik he,
“Peterùt kwe ba wagasik werek o,” ìlùk yogoisasike. 15Atì'nogo yogoisasikomo, it en he,
“Eige. Hele yì lùgùlùgì palhen hìgì,” ìlùk yogosukwama, at en he,
“Lek o. Eberogoat,” ìlùk ane keirogoat isike. Atì'nogo isikomo, it en he,
“Halok he, atì malaikat Ala nen yoko pelaksa wagarek mene amanogo, aike Peterùt hesik pelakhei waga mene he a,” ìlùk isukwa. 16Atì'nogo iko kolek, at Peterùt ebe kwe ba logolìk, eki kwe papagathiko motok kamo isike. Papagathiko motok kamo isikomo re, it amanogo nen kwe hùrogo ineileken wulakhasukwa re, Peterùt were'ma hasukwasik, hogorasukwa. 17Hogoratenem, at en he,
“Hinane ùgùp o,” ìlùk eki map isike. Eki map ìlìk he,
“Neki hele warek were'ma, ninoe Etagepogot en hikalogo wulakhani wagama wagì o,” ìlùk wene pìlìngìrogo yogoisasike. Atì'nogo yogoisasikesik,
“Yakobùt mel, nerùgì nagaiya'lak Ala againapùrì aike inom, wene yì yogoisa lano o,” ìlùk yogoisalùk he, at ebe o ninmo lagaike.
18Atì'nogo wùlìpikomo, nogo ìlùk hùenkwe ohealegat, it ap tentara Peterùt kagalek welagaukwa mene amanogo nen he,
“Peterùt a'nogo ebe ka laga,” ìlùk inane hùkoat sagalhukwa. 19Inane atì'nogo sagalhukwama, at kain Herotet a'nogo nen Peterùt ebe herasuagalùk ap aike yogoisasikomo herasukwa mene, ebe legat en he, it ap tentara kagalek welagaukwa mene amanogo inanema wokhìlìk he, inebe motok inoasuagalùk agoromì aike inayoko hesike. Inayoko hesikomo inebe inoasukwama re, at ebe o Yurea nen he, kota Kaisarea lagai wagaikesik welagaike.
At Herotet ebe wa'lagaike wene
20O atoma logolìk, it apùnì o Tìrùt mel, Siron mel, mene hesik he, at Herotet a'nogo a'mage apik lagasike. A'mage apik lagasikomo, it obogat inebe lapuk hogo nen he,
“O nit were'ma yoma re, sùpùrùk ap kain Herotet were'ma nen oko palogo hano wanhoresi'mo,” ìlùk ap etage Pelasìtùt, Herotet atitigeke logolìk yì mene tì mene at aua mene eki ba welagaike mene atì oba lagaukwasik, it werekwe asuagalùk, at tak a'la kagalhukwa. At tak a'la kagalhukwasik he, hobuk Herotet inom lapuluogolùk oba kisukwasik yogosukwa. 21Yogosukwama re, at Herotet en he,
“Nineki tì ba nen lapulugun,” ìlùk wene warisasike. Wene warisasike ba higit agaikomo, at en su ap kaintek labetarek mene labesikesik, wene elùgùn watì logolìk alakwe e talek oba hùrek welagaike ba hù'lagaikesik, inasuk wasigìlùk wene ero wulakhesike. 22-23Atì'nogo wulakhesikesik inasuk watenem, it apùnì logolek amanogo nen he,
“Ap yì re, ane apùnì inane hake ìlì'logo lek. At he, we, walhobak welagarek mene ane hake ìlì'logo,” ìlùk hogorasukwa. Atì'nogo hogorasukwama aremnogoat malaikat ninoe Etagepogot en yoko pelaksa wagarek mene amanogo aike pi wagaikesik,
“At Ala at hogoratì'lek okawerek hogorakike atì,” ìlùk Herotet ebe wasikomo, wako a'la kalagaikesik ebe motok wa'lagaike.
24Atì'nogo haga'lagaikomo re, Ala aneat wìak isikesik, hùko agaike. 25Ati'nogo hùko aga kolek he, it Parenapat Saùlùt eperak en, apùnì Yerusalem mene arat leberisalùk he, inapotkwe wesuogolùk, ap etage Yohanet ìgìk, Marekùt ìgìk ìkì lagaukwa mene atì wolok wagaukwa.
Currently Selected:
LAKSASIKE 12: LAIDNI
Highlight
Share
Copy

Want to have your highlights saved across all your devices? Sign up or sign in