LAKSASIKE 14
14
Paùlùt Parenapat eperak o Ikonìùm logolìk hagatì lagaukwa wene
1It Paùlùt Parenapat eperak o Ikonìùm atoma logolìk, o apùnì Yahuri mene sapan ìkì lagaukwa ba kìlìk he, wene atì'nogoat yogoisasukwama, inebe logolegat, Yahuri mene lek, Yunani mene lek, wene atì eberogoat ìlùk wanhukwa. 2Wanhukwama, it apùnì Yahuri mene he'na nen, wene atì inasuk holìk, eberogoat ìlùk ina'la akìgì'lek mene nen he, it apùnì etakwe mene Ala againapùrì inabìt asuagalùk ina'la kagalhì lagaukwa. 3Ina'la atì'nogo kagalho kolegat he, at Paùlùt Parenapat eperak ineki logolegat o atoma inayù'lek hogoat logolìk he, wene ninoe Etagepogot hagatì lagaike wene atì yogoisìkì lagaukwa. Yogoisìkì logolìk, Ala oabùt hano nen wo'nisikerek wene atì,
“Eberogoat,” ìlùk hùthoagalùk yogoisikenem, it en hagasusak lek mene elalinat hagarinapì logouagalùk, Ala nen inomamerinapì lagaike. 4Atì'nogo hagatì lagaukwa meneat he, it apùnì o kota atoma mene inebe logolegat mìkìlogo re, it o'moko apùnì Yahuri mene werekwe agìk, it o'moko it ap Yesùt en inebe weteberogo inayoko hìlìk laksasike mene amanogo werekwe agìk, isukwa. 5Atì'nogo mìkìlhìlìk he, it apùnì etakwe mene lek, Yahuri inogogì kaintek inom lek, inom arìk he,
“Paùlùt lak yì aik tì aik hagarinabìk, inebe helep en motok inoasuok,” ìlùk inabok palhukwa. 6Inabok palhukwama, it inelu arìk he, hese pùgùlogo, o Likaonia tokwe atom a Lisitera ho, Terebe ho, o era'lukwe atoma aike ho, pi lagaukwa. 7Pi lagaukwasik he, wene hano wene yakùlisìkì lagaukwaat.
Paùlùt Parenapat eperak o Lisitera logolìk hagasukwa wene
8O Lisitera atoma ap aike agosa a'la nen ta'laga logolìk esok wùt warek ta'lagaikesik esok etawì lek en kwe lagì'lek hùrek motogat welagaike. 9Hùrek logolìk Paùlùt en wene yogoisikenem asuk hologo were'ma, at Paùlùt en eileken oba lùrogo hìkì logolìk, a'la nen he,
“Ap arì a'la nen he,
Eberogoat haga'nabigin, ìlùk akikesik werek hìgì,” ìlùk a'la akasike. 10Atì'nogo akasikesik, ane hùkorogoat yogotì logolìk he,
“Hebe higit hogo melame o,” ìlùk yogosikomo re, siak hogo melagaikesik kwe lagìk, wagìk, isike. 11At Paùlùt en atì'nogo hagasikomo re, it apùnì logolek amanogo ineileken hasukwasik he, it apùnì o Likaonia mene inane ba mel isukwa:
“Ap yì inebe walhobak meneat he, apùnì hake haga'larìk en, alì'luk hogo ninoba pi wagaika yì,” ìlùk inane amì'mìt hùkorogo sup isukwa. 12Inane atì'nogo sup isukwasik he, Parenapat etage Seùt salhìk, nen, wene Paùlùt en ìkì lagaike atì nen, at etage Heremet salhìk, isukwa. Atì'nogo salinapukwa atì re, it en he,
“Nit mene walhobak,” ìlùk oba hìpìrìk logolìk hogoratì lagaukwa mene inetage mene salinapukwa atì. 13Atì'nogo salinapukwasik he, ap Seùt esewerek asukwan awì o kota atoma esakoma wùrìk welagaike mene nen, wam sapi kulok mene mel, e eken elokoken hano mene mel, wolok, o kota atoma kagarek oba kwe ape palek oba wagaike. Wagaikesik he, apùnì apik amanogo inom en, Paùlùt Parenapat eperak warisùogolùk isukwa. 14Warisùogolùk ikenem, it Paùlùt Parenapat eperak Yesùt en inayoko hìlìk laksasike mene amanogo inasuk holhukwasik he, kamo uagalùk, inokawerek en inasu etakwe mene libi'-labak hogo laksalùk he, apùnì logolek atogorek were'ma inoba humusek lagaukwa. Lìlìk he, inane hùkorogoat yogoisìkì logolìk,
15“Ap sanì. Hit nìkì'nogo hagatì lagep. Nerùgì nagaiya'lak. Nit ninebe re, hit hake apùnì meneat. Mene re, hit en yì mene tì mene tùlemat mene hagatì lagep mene atì heraksìlìk he, hinoabùt hebelarìk, hinelokwe Ala eluk motok welagarek mene atì wogosuageip en ìlùk wene yogohisa wago mene o. At Ala atì re, pogot mel, kweang mel, i laut hùko yekelek mel, yì mene tì mene pogot oba, kweangma, ima welagarek mene mel, walhasike mene o. 16Holoat ninapulak en pìkìt ninopaselak ta'larìik waga lagaukwa atem sat he, Ala nen he,
Yì apùnì tì apùnì inùkùl etage lopok en inawesa lopok oba hìpìrìk logolìk hogorakìkì logonìk he, ìlùk heraksìkì lagaike. 17Atì'nogo meneat he, it apùnì nen at ebe hùthoagalùk, yì mene tì mene aike elalhì'lek lì'mathesikomo welagarek hùk. We, at hano nek hagatì logolìk, ninapùrùk ninalabut ning hogo nìkìk, nina'la hai hakìgìk, ìkì logouagalùk, at en moso pogot oba nen pelakhei wagìk, nokorek mene atì nasak higit asi waganem hùkorogoat wo'nisìgìk, ikerek atì,” ìlùk inasuk wasike. 18Inasuk atì'nogo wasike meneat, it apùnì logolek amanogo nen wam arat warisùogolùk isukwasi'mo nogo nen he, inetaùken nìkì'nogo sebelu heat haga'lagaike meneat he, wene Paùlùt lak en atì'nogo isukwa ba, warisìgì'lek kamo isukwa.
19Atì'nogo agaikomo were'ma, it apùnì Yahuri mene o Atiokia nen, Ikonìùm en, lìlìk he, apùnì logolek amanogo wene atì heraksìlìk it werekwe asuagalùk ina'la kagalhukwa. Ina'la kagalhukwama, it werekwe agaukwasik, Paùlùt a'nogo ebe helep en wasukwasik en, ebe motogat wato salek, lisogo o kota leget abel etakwe wulaksasukwa. 20Atì'nogo wulaksasukwa meneat he, it apùnì aike Yesùt ane wanhukwasik welagaukwa mene wagaukwasik, era'lu walìngìrogo melasi wagaukwama re, ebe melarìk o kota kisike. Kìlìk nogo ìlùk, hùenkwe Parenapat eperak o Terebe pi lagaukwa.
PaĂąlĂąt Parenapat eperak inapotkwe o Atiokia lagaukwa wene
21O Terebe atoma wene hano wene yogoisikoat logolìk he, apùnì inebe logolegat woginapukwama Yesùt ane wanhukwa. Wanhukwama hisalùk, it Paùlùt Parenapat eperak hobuk inapotkwe o Lisitera nen, Ikonìùm en, pìkìt o Pìsìrìa tokwe o kota Atiokia wùlìbi wagaukwa. 22Alep ki laga logolìk, apùnì Yesùt ane yakùlisìlìk ki lagaukwama wanhukwa mene hobuk inoba ha'larìk wùlìbi waga logolìk, inetaùken ago warisìgìk, inasuk watìk, ìlìk wùlìbi waga logolìk, mel yogoisasukwa:
“Wene eberogoat ìlùk hinetaùken Yesùt oba hìpìrethesigip mene atì, ning hogoat hìpìrìk logoino. Nit hobuk Ala awe a'ma motok logouogolùk he, ninoba yì aik tì aik hìkì logopik enat kugun o,” ìlùk yogoisìlìk wùlìbi wagaukwa. 23Atì'nogo yogoisìlìk wùlìbi waga logolìk he, o ya ta, Ala againapùrì atogotì lagaukwa lopok, inogogì hagisek logouagalùk menhisìlìk he, ineki aike sapan uogolùk sùpùrùk nìkìlek welegat logolìk sapan mel ìkì lagaukwa:
“Yesùt ninoe. Hagainapùrì inetaùken hoba hìpìrìk werek mene yì, hagisek logoinok en ìlùk hat heki ba hogo o,” ìlùk sapan ìlìk wùlìbi wagaukwa. 24Wùlìbi waga logolìk, o Pìsìrìa tokwe nen pìkìt he, o propinsi Papilia pisukwa. 25Pisukwasik, o Papilia atoma o kota Perega wene yogoisalùk he, o kota Atalia pi lagaukwa. 26O Atalia nen he, imakwe so warogo o Atiokia inapotkwe lagaukwa. Atoma nen, atì'nogo hagarìk nìkì logouagalùk hageat it Ala againapùrì nen laksa waga logolìk he,
“Ala oabùt hano a'nogo nen wokhisek loak o,” ìlùk laksa wagaukwama atì'nogo hagarìk nìkì lagaukwasik he, arat haga'lùk inapotkwe hobuk lagaukwa atì. 27O Atiokia lìlìk, Ala againapùrì atogorinabìk he, mel yogoisasukwa:
“Nit Ala ninom en yì'nogo hagato, tì'nogo hagato,” ìlùk wene pìlìngìrogo yogoisìkì logolìk mel yogoisasukwa:
“It apùnì etakwe mene wene atì eberogoat ìlùk wanuagalùk, Ala nen kwe hùthikomo elok wanusak werek o,” ìlùk yogoisasukwa. 28Atì'nogo yogoisasukwasik, apùnì Yesùt ane wanhukwa mene amanogo inom ineki logolegat welagaukwa.
Currently Selected:
LAKSASIKE 14: LAIDNI
Highlight
Share
Copy

Want to have your highlights saved across all your devices? Sign up or sign in