LAKSASIKE 15

O Yerusalem en wene hùkoat palhukwa wene

1Ap aike o Yurea nen o Atiokia wagaukwasik he, Ala againapùrì atoma mene wene mel ìlùk yakùlisasukwa;

“Hit he, wene Musa nen,

Yì'nogo, tì'nogo hagatì logousak ìlùk yogonisasike wene atì higit hogo re, hinogat hinekalìma mene palhinapì'lek halok he, hinebe Ala nen telhinabusak lek o,” ìlùk yakùlisasukwa. 2Wene atì'nogo yakùlisasukwama, at Paùlùt Parenapat eperak en it ap atì mel yogoisasukwa:

“Hit en egep atì motok kolo egep o,” ìlùk, inom wene palhìk, serep agìk, apigat isukwa. Wene atì'nogo serep agaukwama re, it atoma mene nen he, Paùlùt Parenapat eperak, it aike inomat o Yerusalem lìlìk he, it ap Yesùt en inebe weteberogo inayoko hìlìk laksasike mene amanogo mel, it ap Ala againapùrì hagisek welagaukwa mene mel, inom en wene atì hesik haluagalùk laksùogolùk isukwa. 3It Ala againapùrì nen atì'nogo isukwasik laksasukwama re, o atoma nen he, Penisia nen, Samaria nen, laga logolìk he, mel yogoisìlìk lagaukwa:

“It apùnì etakwe mene inoabùt hebelarìk inelokwe Ala wogotama o,” ìlùk yogoisìlìk laganem, it Ala againapùrì atoma mene ina'la hai hùkoat hakasukwa. 4It a'nogo o Yerusalem lagaukwama re, it ap Yesùt en inebe weteberogo inayoko hìlìk laksasike mene amanogo mel, it ap Ala againapùrì hagisek welagaukwa mene mel, it Ala againapùrì aike atoma inebe atogotì lagaukwa mene mel, inom en, hai warogo woginapukwa. Woginapukwama, it en he,

“Nit Ala ninom en yì'nogo hagato, tì'nogo hagato,” ìlùk wene pìlìngìrogo yogoisasukwa. 5Yogoisikenem, it ap Parisi mene Yesùt ane eberogoat ìlùk wanhukwa mene aike melarìk he, mel yogoisasukwa:

“Apùnì etakwe mene Yesùt ane wanha mene atì re, inogat inekalìma mene palinapìk, wene Ala nen Musa ayoko hìlìk ninasuk wasike wene a'nogo hesogo welagìk, ìkì logousak o,” ìlùk yogoisasukwa. 6Yogoisasukwama re, it ap Yesùt en inebe weteberogo inayoko hìlìk laksasike mene amanogo mel, it ap Ala againapùrì serisek welagaukwa mene amanogo mel, wene atì haluogolùk atogosukwa. 7Atì'nogo atogosukwasik, wene it aike nen ìgìk, it aike nen ìgìk, hùkoat ìkì lagaukwasik, at Peterùt melarìk he, mel yogoisasike:

“Ap sanì. Nagaiya'lak. It apùnì etakwe mene nen wene hano wene inasuk holhìk, ina'la nen eberogoat ìlùk hùthìgìk, uagalùk, an hageat hit ninom were'ma, it atì yogoisa loagalùk Ala nen wena'nabìk nayoko hesike atì, hinelu o. 8At Ala apùnì ninetaùken elu mene a'nogo nenat,

Yì an nagainapùrì o, ìlùk Areagùn nit wo'nisasike atì hagat it atì wogisasikeat. 9It hùnogoat hagarinapìk, nit hùnogoat haga'ninapìk, ìgì'lek o. We, it en Yesùt ane eberogoat ìlùk wanhukwama re, at en ina'lakwe horinapike atì. 10Ala nen atì'nogo hagato kolegat he, hit en at oabùt paluogolùk ìkì lagep atì nenahalok. Wene atì ekin apik en he, ninopalak wanusak mea welagaukwa. Nen, nit en wanusak mea logolìgat he, hobuk it Yesùt ane wanha mene atì wanuagalùk egep atì nenahalok. 11At ninoe Etagepogot Yesùt oabùt hano nen he, ninetaùken at oba hìpìrethikenem, nit telninapìk, it telinapìk, ninom higit hogoat telninaperek atì,” ìlùk yogoisasike.

12Atì'nogo yogoisasikomo, it apùnì logolek amanogo inane ìgì'lek kamo isukwa. Atì'nogo kamo isukwama, Parenapat Paùlùt eperak en wene yogoisìkì logolìk he,

“It apùnì etakwe mene wene yogoisikenem hùthoagalùk, nit en elalinat hagarinabìk nìkì lagosik wago atì, ebe re, Ala nenat hagarinapì laga o,” ìlùk pìlìngìrogo yogoisiko kolek, inasuk hologo welagaukwa. 13Wene arat yogoisasukwama re, at Yakobùt en mel yogoisasike:

“Ap sanì. Nagaiya'lak. An wene igin yì hinasuk holini. 14Ala nen it apùnì etakwe mene inoba eberìk he, mel isike:

It aike an nagainapùrì asuagalùk woginabigin o, ìlùk woginapike mene hesik, at Simon nen yogonisike atì. 15Atì'nogo yogonisike atìl re, it ap Ala ane yogoisìkì lagaukwa mene amanogo nen isukwa higit hogoat yogonisike o. It en mel ìlùk helal wanhukwa:

16-17 # Ams.9:11-12 Ninopase Etagepogot en he,

Apùnì ato atì obogat mel, it apùnì etakwe mene,

an nagainapùrì ìlùk nokawerek netage palogo wenaginapigi mene atì obogat mel, inom lapuk hogo inopase Netagepogot an nebeat hera'nabuagalùk, an nokawerek hobuk wesigin o. Wìrìk he, o sa'nok ikenem hobuk ket wùtarek atì hak, Taùt lak inetage lek aga atì, inetage weregethegein o. Mesalaga mene atì, an nen hobuk abolo'lek motok wùrogo hìgìk, kerethìgìk, igin o, ìlùk, at ninopase Etagepogot atì'nogo obogat hagaterek mene nen

18atì'nogo ninelu asuagalùk hageat yogonisasikomo,

helal waganogo hesukwa atì. 19Atì nen he, an na'la re, it apùnì etakwe mene inoabùt hebelarìk, inelokwe Ala wogorì'lùgì mene atì re, ina'la weagathousak lek akìkì lagì. 20We, nit en he, wene mel ìlùk helal waganogo inoba lakhouok. Tùgì hareken oba hìpìrìk logolìk ako waretarek mene kùrìk nikenem inebe weagathakagarek mene atì nasak lek. Pailak haksasak legat. Nen, yì mene tì mene alokop perelogo warek mene nìkìk, mep nìkìk, usak legat, ìlùk inasuk warogo inoba lakhouok o. 21Wene Ala nen at Musa yogosikomo, at en ninasuk wasike wene a'nogo, hùlì ninapu ninopalak hageat atoma nen o ya ta o apùnì Yahuri mene sapan egarek obakwe, ineki Ala hesik welegat logolìk ninhùp-nanhùp wene atì etage salogo yogoisagarek mene weregat o,” ìlùk at Yakobùt en yogoisasike.

Wene helal waganogo it Ala againapùrì o Atiokia mene inoba lakhei wagaukwa wene

22Wene atì'nogo isukwasik he, it ap Yesùt en inebe weteberogo inayoko hìlìk laksasike mene amanogo mel, it ap Ala againapùrì serisek welagaukwa mene amanogo mel, Ala againapùrì aike atogorek welagaukwa mene obogat mel, inom en wene mel ìlùk palhukwa:

“Ap nit mene aike weteberogo inayoko hìlìk, Paùlùt Parenapat eperak inom o Atiokia loak en he, laksùok o,” ìlùk isukwa. Atì'nogo isukwasik he, it Ala againapùrì aike nen, at Yurat etage aike Parasapat atì ho, Silat atì ho,

“Inoabùt hano,” ìlùk akìkì lagaukwa mene nen, helal waganek atì inekim wolok loagalùk inayoko hesukwa. 23Wene atì ba helal waganogo hìkì logolìk, mel isukwa:

“Nit hinerùgì hinagaiya'lak Yesùt en ninebe weteberogo ninayoko hìlìk lakhina wagaike mene mel, Ala againapùrì serisek welagorek mene mel, ninom en he, hit o Atiokia mene, Sìrìa mene, Kilikia mene, hinebe etakwe meneat he, Ala againapùrì mene ninerùgì ninagaiya'lak, ìlùk hai wathinapo atì o.

24“Ap nit mene aike hit hinoba wagaikasik he, nit en,

Wene tì'nogo yogoisa lani, ìlùk laksa wagì'lek meneat he, it en hit yogohisìkì logolìk, hina'la weagathinapìk, kolothinapìk, ega o, ìlùk apùnì nen egama ninasuk holho o. 25-27Ninasuk holhosik he, ninebe atogorogo nen wene palho. Wene atì'nogo palhosik, Parenapat Paùlùt eperak inebe ninetawì mene, inebe ninoe Etagepogot Yesùt Karìsùt hesik hisìlìk, inoasuogolùk iko kolegat he, at hesik hagarì'lùgì mene inom hinoba wesuagalùk ap aike Yùrat Silat eperak inayoko hogoma wesugun atì. It wìrìk he, wene helal waganogo hogo atì inape ba nen pìlìngìrogo yogohisoak. 28Nit Ala Areagùn ninom logolìk he, wene mel ìlùk palho atì. Wene ekin mene yogohisasak lek. We, wene yìat hinasuk holusak ago. 29Tùgì hareken oba hìpìrìk logolìk ako waretarek mene atì kùrìk nasak lek. Mep atì nasak legat. Yì mene tì mene alokop perelogo warek mene atì nasak legat. Pailak haksasak legat o, ìlùk wene palho. Atì'nogo hagatì'lek kamo egep halok he, hit hano hagatìi lagep ìlùk ugun atì. Wene atì ba arat yogohisogo. Nerùgì nagaiya'lak,” ìlùk helal waganogo laksa wagaukwa.

30Ati'nogo helal waganogo laksa wagaukwama, o Atiokia arat wagaukwasik he, Ala againapùrì inebe obogat atogorinabìk, wene helal waganek a'nogo wogisasukwa. 31Wogisasukwama, etage salhukwasik he,

“Wene atì ba nina'la hano aga,” ìlùk ina'la hai apik hakasukwa. 32Ina'la hai hakasukwama re, at Yùrat Silat eperak Ala ane yogoisìkì lagaukwa mene nogo nen he, Ala againapùrì amanogo inetaùken sebelhìk, ago warisìgìk, uogolùk he, wene hùkoat yogoisìkì lagaukwa. 33Atì'nogo yogoisiko welagaukwasi'mo nen, it Ala againapùrì o Atiokia mene nen he, it Yùrat Silat eperak hai warogo, it inebe laksa wagaukwa mene amanogo inoba inapotkwe hobuk laksasukwa. [34Mene re, at Silat a'la nen he,

“An kamo igin,” ìlùk o Atiokia kamo isike.] 35It Paùlùt Parenapat eperak hogo re, o Atiokia atoma kamo isukwasik, it apùnì aike logolegat inom atoma logolìk he, wene ninoe Etagepogot ane hano wene atì yogoisìgìk, yakùlisìgìk, ìkì lagaukwa.

Paùlùt Parenapat eperak wene palhì lagaukwasik, inaleketek pùgùlhukwa wene

36O atom ineki aike inom welagaukwasik en he, Paùlùt en Parenapat yogotì logolìk he,

“O ya ta ninoe Etagepogot ane yogoisìlìk lago ba amanogo hobuk lùok. Laga logolìk he, Ala againapùrì ninerùgì ninagaiya'lak amanogo nìkì'nogo werek ìlùk, o sili lopok nineileken isìlìk lùok,” ìlùk yogosike. 37Atì'nogo yogosikomo re, at Parenapat an he, at Yohanet etage aike Marekùt a'nogo wolok lagalùk isike. 38Atì'nogo ikenem, at Paùlùt en he,

“Lek o. Nit Ala hesik ninom hagarìk lùogolùk lagosik en, o Papilia nen apotkwe sùgùlogo waga a'nogo re, hobuk wolok lasak lek o,” ìlùk yogosike. 39Atì'nogo yogosikomo, eperak wene haro weak palhukwasik he, inaleketegat pùgùlhukwa. At Parenapat en he, Marekùt wolok he, imakwe so warogo o Siperùt wagaike. 40Wagaikomo re, at Paùlùt en Silat ayoko hesikesik wesuogolùk ikenem, it Ala againapùrì o Atiokia mene nen he,

“Ninoe Etagepogot oabùt hano a'nogo nen wokhisek loak o,” ìlùk hai warogo laksa wagaukwama wagaukwa. 41It a'nogo waga logolìk he, o propinsi Siria atoma nen pìkìt o propinsi Kilikia Ala againapùrì inetaùken ago warisìlìk wagaukwa.

Currently Selected:

LAKSASIKE 15: LAIDNI

Highlight

Copy