Markus 12
12
“Ap amberek anggur yabu anggorlem welaguka,” yiluk oba lisogo yogisasike wene
(Matius 21:33-46; Lukas 20:9-19)
1At Yesus nen wene esigit diluk yogisasikesik yabunggane wene omanggi oba lisogo men yogisasike,
“Ap omanggi eyabumo anggur ai yakike. Yakikesik leget palkik, enggen sagalogo ambusu perelko dogumo agat kulelkik, inilenggen dogumo nggayo mberlakik, kagakike. Kagakikesik it amberek elalma ake anggorlem dogowagaluk ʼbiyalok ebe o werlekma etoma lagike. 2Lagikesik werek nggorlek, enggen yikonem mbaligogi paga kagat lasi wagikemo, at eyabu indewerek mende etnogo nen it ap anggorlem dogowagaluk ʼbiyasike mende yomenogo nen anggur enggen omanggi mbalogo wogosuwagaluk, anduwanengge omanggi inoba laʼbi wagike. 3Laʼbi wagikemo, it ap yomenogo inoba wagike mende, ebe ndugi warogo enggen mbalikidek werlegat iyogoba laʼbisuka. 4Laʼbisukama lagikemo, yabunggane anduwanengge omanggi inoba laʼbi wagikemo wagike mende, it nen enggarli warogo ndugi unggulowak nggagik-nggagokogo wakuka. 5Esigit diluk kagakukama, yabunggane anduwanengge omanggi laʼbi wagikeat. Wagikemo ebe mondogat wakuka. Wakukama yabunggane at anduwanengge amberek inebe dogalegat it ap yomenogo inoba laʼbiya wagikemo wago laguka mende, it nen, pelakngge ndugi warogo ʼbiyigik, pelakngge inebe mondok inakik, kagako laguka. 6Esigit diluk taʼbokogonat inakukama at eyabu indewerek mende etnogo aʼbut endainggen kunik mende omanggi arligat kagat lagikemo, at nen,
An naĘĽbut yiat inoba laĘĽbumo, it nen alon palogo keyagi warogo waganugun o, yiluk ambasikesik, ebe yabunggane inoba laĘĽbi wagikeat. 7LaĘĽbi wagikemo wagonem, it ap yabu anggorlem welaguka mende yomenogo nen, it-it yisi dogolik men yisuka,
Ap eti ombae obalikmo yabu indewerek asigin mende etnogo ebe waga ali. Kalok, yabu yi nirat indewerek asuwok nen, ebe wasuwok o, yiluk yisukasik, 8ebe pagogo wakukasik werek anggur yabumo nen leget sikmangge wula ĘĽbiyasuka. 9Esigit diluk kagakuka eti paga, ap nggok eyabu indewerek mende eti ninggit diluk kagasigin ambegep. At ebe witluk men kagasigin. It ap eti inebe mondogat warogo ĘĽbiyalok inobalikmo yabu anggur yabu etnogo anggorlem dogowagaluk ap ninat mende mendiyaginat o. 10Kit nen Allah wene kolal yigit diluk mbalogo ĘĽbisukama endaga wenakidek werek nogo? It nen,
It ap tukang o nggit mende paligogi mende nen, o ebe palko dogolik,
Nggit yi weyak, yiluk togot diyasuka mende eti ebe kerlagaat kagat lagama o.
11Esigit diluk kagat laga eti ninombae Allah Endaganggok nenat kagake o, yiluk ninilenggen kogosik nen,
Iya! yiluk pogorarigogi, (Mzm. 118:22-23)
yiluk kolal mbalogo ʼbisuka mende eti endaga wenarigogi dek nogo? Wenarigogiat o,” yiluk yogisasike. 12Esigit diluk yogisasikemo, it nen men yisuka,
“Wene oba lisogo yeke eti, nit pasigat yokniseke kigi,” yiluk didisuka. Didisukasik Yesus ebe pakawogoluk kagakuka mende, akoni dogalegat yomenogo inayuk nen togot diyalok ngginggil wakuka.
“Uang pemerintah inake nggino yisinem wogisausak a? Dek a,” yiluk kinok Yesus oba wagangguka wene
(Matius 22:15-22; Lukas 20:20-26)
13Yabunggane it ap nggokndek yomenogo nen, Yesus inilenggen waganogo ane yigin oba wene oba ĘĽbuwogoluk, it nen it ap Farisi mende amberek inom, it ap Herodes werekmangge mende amberek inom, it nen Yesus endema waganuwagaluk oba laĘĽbiya waguka. 14LaĘĽbiya wagukama wagukasik, men yogokuka,
“Newe. Kat kobabut wene eberogonat dombok yisi dogolik, akoni inelokonggen obaat ʼbiriyalok, amberek kelokoma ʼbiyigik, amberek komborlikngge ʼbiyigik, kagarigogon dek. Inebe kayuk degat dogolik, Allah akla nen,
Akoni esigit diluk kagako dogowak, yiluk ambaligogo mende eberogonat dombok yanggul nisiligogon eti nit ninilu o. Eti paga, nit Yahudi mende kagarigogi ndak-ndagat, uang pemerintah inake endaganggok Kaisar wogususak erlok a? Erlok dek a. Wogoko doguwok a? Togot disi doguwok a,” yiluk kinok waganggukama, 15at Yesus nen,
“It ap yi an nuket danuwogoluk inane ʼbindokogo yokneka,” yiluk inaren enggagat mbalkikesik nen, men yogisasike,
“An naren mbaluwogoluk yegep eti nenaluk. Uang perak yabu ininggi omanggi pasik kagakonem ininggi onggo wogisiligogi etnogo mende omanggi nilenggen kak nen, wagani lani o,” yiluk yogisasikemo, 16wolok wagukama, at Yesus nen men yogisasike,
“Yi ta ebe kagarek oba endaga kolal mbalek werek kegep,” yiluk yogisasikemo it nen,
“Eti Kaisarat o,” yiluk yogokukama, 17at Yesus nen men yogisasike,
“Kaisar mende kalok, Kaisarat wogokik, Allah mende kalok, Allah at wogokik, kagako dogoni o,” yiluk yogisasikemo it nen,
“Iya! Ninayuk o,” yiluk pogorakuka.
Ap Saduki mende nen, akoni watlatluk nen iniluk asugun pasik Yesus oba kinok wagangguka wene
(Matius 22:23-33; Lukas 20:27-40)
18Yabunggane, it ap Saduki mende nen,
“Akoni watlatluk iniluk asugun dek,” yiluk yiligogi mende amberek Yesus oba waguka. Wagukasik at oba kinok waganggo dogolik men yogokuka,
19“Newe. At Musa nen men yanggul nisasike,
Ap omanggi aĘĽburi endaginakidekma age soge ĘĽbiluk ebe watlago kalok, obalikmo aĘĽbut omanggi endasuwagaluk kwe soge eti ap eti agorat waganusak o, (Ul. 25:5-6)
yiluk, yanggul nisasikesik, kolal mbalogo ʼbisikemo werek o. 20Esigit diluk yisike mende werekma, ap inebe 7 paga inombae omanggiat nen endago welaguka. Dogolik, inewe mangguya mende eti age waganggikesik, aʼburi endaginakidekma watlagike. 21Watlagikemo agot omborlik mende eti nen kwe soge eti waganggikesik aʼburi endaginakidekma watlagikeat. Watlagikemo yabunggane inagot inomborlik mende eti nen esigit dilugat kagakike. 22Esigit diluk it ap inebe 7 paga inaʼburi endaginakidekma watlarik arlek wagukama, yabungga ebe yabungga, kwe eti ebe watlagikeat. 23Eti paga, it ap inebe 7 paga eti kwe omanggiat mende eti waganik wagukasikmo, yabunggane Allah nen akoni warek mende inilugurinakonem it eti iniluk ago dogolik, kwe eti ta kak age asigin ambegen,” yiluk Yesus oba kinok waganggukama, 24at nen men yogisasike,
“Kit, Allah wene kolal mbalek eti inom, Allah obatne eti inom, kinonggodek dogolik, kinane nggorlo yegep o. 25Akoni warek mende Allah nen inilugurinabilukmo nen, kumi waganggik, it amberek yigisigik, kagako dogogun mondok dek o. It malaikat mbogot oba mende dogoligogi eti kagat dogogun o. 26Akoni watlatlukmo Allah nen inilugurinabigin, yiluk wene Musa nen kolal mbalkike mende etnogo endaga wenakidek werek nogo? At Musa o ʼberoat erloma lagikesikmo, Allah nen men yogokike,
Abraham inom, Ishak inom, Yakub inom, inombae Allah anat o, (Kel. 3:6)
yiluk yogokikemo kolal mbalkike mende etnogo endaga wenakidek werek nogo? Endaga wenarigogiat o. 27At Allah, akoni warek mende inombae ʼbuk. Iniluk mende inombae o. Esigit diluk mende, kit kinane nggorlo mondok yegep o,” yiluk yogisasike.
“Allah nen ninasuk wakike wene nggok, mbere etaat o,” yiluk yogokike wene
(Matius 22:34-40; Lukas 10:25-28)
28Wene esigit diluk inom yisi nggorlek, it ap Allah wene kolal mbalek indewerek mende yomenogo omanggiat wagikesik asuk kolek welagikesik, akla nen men ambasike,
“It ap yi Yesus oba kinok waganggama at nen wene onggo motogo yogiseke kigi,” yiluk akla ambasikesik men yogokike,
“Newe. Wene Allah nen ninasuk wakike wene etnogo wene ebe nggok, nggi yisike ambegen,” yiluk kinok Yesus oba waganggike. 29Kinok oba waganggikemo, at Yesus nen men yogokike,
“Wene eti nggok ebe, Musa nen men yisike,
Kit ap Yahudi mende yi kinasuk kolini! Ninombae Endaganggok Allah arligat o.
30Eti paga, kinendainggen inom, kinobabut inom, kinakla eberigogi inom, kinobatne inom, omanggiat atluk ninombae Allah Endaganggok ebe etiat kinendainggen kunik dogoni o,
yiluk yogisasike mende, wene nggok, etiat o. 31Nen, wene eti wema paga negen, men yisike,
Kinenggaerek kinebe kinendainggen kunik dogoligogi eti kak, it akoni amberek kinom dogoligogi mende eti kinendainggen kunigat dogoni o, (Im. 19:18)
yiluk wene mbere yisike etaat nggok o. Wene ninasuk wakike mende amberek weregat mende, eragalilu negen arlek o,” yiluk yogokike. 32Yogokikemo, at Allah wene kolal mbalek indewerek mende etnogo nen men yogokike, “E o, newe. Wene panorogo yegen kigi.
At Allah ebe omanggi arligat o. Omanggi inom dek, (Ul. 4:35)
yiluk eberogonat yegen. 33Eti paga, at Allah anggo warogo ebe abirat kali kunggik, yi mende ndi mende at ake ʼbiyigik, kagako dogusak erlok dek negen mende, ninendainggen inom, ninakla eberigogi inom, ninobatne inom, omanggiat atluk, at Allah ebe ninendainggen kunik dogolik, it akoni amberek ninom werek mende ninenggaerek ninebe negen ninendainggen kunik dogusak eti nggogat o,” (Hos. 6:6) yiluk yogokikemo, 34at Yesus akla nen,
“Ap yi endainggen werek mende nen yeke kigi,” yiluk ambasikesik men yogokike,
“Kat, Allah apma korogat unggusak werek kigi,” yiluk yogokikemo it akoni yomenogo nen yabunggane Yesus oba wene kinok waganu inayuk aguka.
“At Kristus eti ebe ta ambegep,” yiluk yogisasike wene
(Matius 22:41-46; Lukas 20:41-44)
35Esigit diluk kagakukama, yabunggane at Yesus nen Allah ago palekma wene yanggul isasi dogolik men yogisasike,
“It ap Allah wene kolal mbalek indewerek mende yomenogo nen,
Kristus Allah nen ayonggo ĘĽbiluk laĘĽbi wisigin yisike etnogo, ebe Daud nen endago mende o, yiluk yiligogi eti ninggit diluk kalok yiligogi ambegep. 36At Daud Allah Agurengge akla dogolik, enggaerek nen men yisike,
Allah Endaganggok nen an newe Endaganggok yogoko dogolik,
Akoni kat kasili mende yomenogo kiyok nen al debelogo ĘĽbiyanok nen, an nen awan koba ĘĽbiya wagidek werek nggorlek, kat an neragalilu ninggi ebengge korek dogolik kebe nggok dogonok nen, (Mzm. 110:1)
yiluk Allah nen Kristus yogokike, yiluk Daud nen yisike. 37At Daud enggaerek nen Kristus ebe pasik,
An newe Endaganggok,
yiluk yisike mende, kit nen,
Kristus eti Daud nen endago mende o, yiluk ninggit diluk nen yusak ambegep. Esigit diluk yusak erlok dek o,” yiluk yogisasike. Wene esigit diluk yanggul isasinem it akoni dogalegat yomenogo, at ane kolko dogolik, inakla arlenggen kasi laguka.
“It ap Allah wene kolal mbalek indewerek mende nen weyagat kinabunogo,” yiluk yogisasike wene
(Matius 23:1-36; Lukas 20:45-47)
38Akoni dogalegat yomenogo inakla arlenggen kasi nggorlek, at Yesus nen wene men yogisasike,
“It Allah wene kolal mbalek indewerek mende eti nen weyagat kinabunogo yiluk, kit kinobabut kwalogo dogoni o. It inakla warlok nen kagarigogi yi. Iniyom uwanat mende yikalok pasar onggo waganigogoma etoma akoni nen inane agugurogo keyagi warinabuwagaluk lagik, 39o akoni Yahudi mende sembayan yiligogoma ap nggokndek mende inobalikmo selekmarogo korek lasi unggigik, akoni pesta nggok iyago nonggonem it ap nggokndek korek larigogoma selekmarogo korek lagik, kagako dogu warlok dogoligogi o. 40Esigit diluk dogolik, kumi soge mende inago palek inom, inamende inom, sebelasi dogoligat, akoni nen inasuk kol diluk,
It pano, ambawagaluk sembayan uwan-awan likalok yiligogi eti, esigit diluk kagakidek dogolepma, Allah nen wene ʼbugurlagat inoba ʼbiluk dogolep. Mende, esigit diluk kagarigogi eti paga, wene anggin mende inoba ʼbiluk weyagarinabigin,” yiluk yogisasike.
It akoni ininggiwerek mende inom, kwe soge amende dek mende inom, nen uang Allah ake ĘĽbiyasuka wene
(Lukas 21:1-4)
41Wene esigit diluk yogisasikesik at Yesus ebe korek lagikesik dogolik, peti uang Allah ake akla ĘĽbiyiligogi mende indik pelak werekma, akoni dogalegat nen uang ĘĽbilik lagonem ĘĽbirisek welagike. Akoni ininggiwerek mende dogalegat nen uang dogalegat ĘĽbilik laguka, 42Esigit diluk ĘĽbilik laguka mende, at kwe soge amende dek mende omanggi wagikesik uang sen mende omanggiat ĘĽbu kak mondok ĘĽbugurlakndek mende mbere ĘĽbiluk lagike. 43-44Esigit diluk ĘĽbiluk lagonem at Yesus nen agoromi ane waganggo laguka mende yomenogo waisasikemo wagukama men yogisasike,
“It akoni taʼbokogonat eti inamende dogalegatma mbereat minggirlogo ʼbiyega eti ʼbugurlak negenat o. Mende, at kwe soge amende dek mende etiat, ambiri onggo mbalogo nausak mende taʼbokogonat ʼbiyeke eti arligat, mondok dogalegat negen ʼbiyeke o, yiluk eberogonat yokisigi,” yiluk yogisasike.
Currently Selected:
Markus 12: DNA
Highlight
Share
Copy
Want to have your highlights saved across all your devices? Sign up or sign in
