Markus 13
13
“Allah ago palek akoni nen mondok miyalugun o,” yiluk yogisasike wene
(Matius 24:1-2; Lukas 21:5-6)
1Wene esigit diluk yogisalok, at Yesus Allah ago palekma nen dukisikemo, at agoromi ane waganggo laguka mende yomenogo omanggi nen men yogokike,
“Iya! Newe, nayuk o. O nggit pano mende paga o pano mondok palek etoma lakan!” yiluk pogorakike. 2Pogorakonem, at Yesus nen men yogokike,
“O yiluk-muluk palek etoma lakaligogon a? Nggit oba sapmbalmbal palek etoma omanggi togot digidek mondogat miyak-dambukogo laʼbiyagun o,” yiluk yogokike.
“Alebagik esigit diluk weyak kagat kinabugun,” yiluk yogisasike wene
(Matius 24:3-14; Lukas 21:7-19)
3Wene esigit diluk yogisasi lagikesik nen, at Yesus agoromi inom Allah ago palek i aik yomangge togot diluk i aik ilibagangge wundalkukasik, ndom Zaitun unggul oba dagiluk inebe korek laguka. Korek lagukasik, Petrus inom, Yakobus inom, Yohanes inom, Andreas inom, Yesus inom inarligat dogolik, at oba wene omanggi kinok wagangguka. 4Kinok waganggo dogolik, men yogokuka,
“Ninewe. Wene yoknisegen etnogo, ngginem nen kagat lasigin. Ebe kagat lasigiluk kagako nggorlek, nggi mende ndak kagat lagonem nit ninendainggen engget lasugun. Wene dikogo yoknisan o,” yiluk kinok wagangguka. 5Kinok waganggukama, at Yesus nen men yogisasike,
“Akoni nen nuket dinagunogo yiluk, kinobabut kwalogo dogoni o. 6Akoni inebe dogalegat nen inendaga an nendaga mende salogo nen men yilik wisugun,
At wisigin yisuka etnogo an nebe wagi yiat o, yiluk inane eberogonat salek akoni dogalegat nukerinabi wisugun. 7Esigit diluk kagat lago nggorlek, wim nggagal diluk korogat akonem inane kinasuk kolkik, walegat akonem inabok kolkik, kagakonem, kinendainggen aborlok yugup o. Esigit diluk kagat lasigin mende, o ilugun kurli paga kagat lasigin mende eti awanat o. 8Yi akoni ndi akoni inunggulowak endaga dombok wim nggagalkik, ap inendaganggok inagoromi inapma mende dombok wim nggagalkik, kagasugun. Wim nggagalkonem, yi ai ndi ai yugul luk-lagakigik, kimbiri no agik, kagat lasigin mende, eti kumi ineyagi endaginabuwogoluk kenet warigogi eti kak, alebagik kugun o. 9Esigit diluk kasi dogolik, kit, kinobabut kwalogo dogono o. Akoni amberek nen, kininggi kerle warogo ap nggokndek nen kinendema waganuwagaluk inoba wokisek lagik, o akoni Yahudi mende sembayan yiligogoma nen ndugi kinakik, kagasugun o. Esigit diluk kagako dogolik,
It yi Yesus agoromi, yiluk, it ap pemerintah nggokndek inom, inendaganggok inom, nen wene kinoba ʼbuwagaluk inelokoma mendinagumo, pano eti pagaat, an kagakonem kinilenggen niyaligogi mende ʼbukakogo yogisagun. 10Mende, wene pano wene yi, yi ap ndi ap inunggulowak endaga dombok yogisilik lago kalok, ilugun kurli paga arat kagat lasigin o. 11Kit kininggi kerle warogo wene inoba ʼbigik, nggokik, kagarigogoma wokisek lagonem kit nen,
An nen wene onggo ninggit diluk yigin, yiluk kinendainggen pikup o. Wene onggo kit nen kinakla nggagalogo yugun ʼbuk. Allah Agurengge nen,
Yigit diluk yini o, yiluk etinem yokisagin mendeat yogisano o. 12Nen, agarlak omanggi nen, enggaerek agarlak wasuwagaluk wolok lagik, ombae nen, aʼbut wasuwagaluk wolok lagik, inaʼburi nen, inagoya inombae inasuwagaluk inabok mbalkik, kagasugunat o. 13Nen, akoni taʼbokogonat nen an nendaga yiluk,
Kit, at agoromi, yiluk kinebe inaʼit mondok kiyagun o. Mende, ta nen endainggen sebekogo obakanini kambuk yiluk dogogin kalok, o ilugun kurli paga Allah nen ndiligin o,” yiluk yogisasike.
“Mondok weyak kugun,” yiluk yogisasike wene
(Matius 24:15-28; Lukas 21:20-24)
14Wene esigit diluk yogisasikesik, omanggi men yogisasike,
“Kit nen kolal mbalek yi, endaga wenako dogolik, panorogo didisi dogoni o. Akoni nen inalilo mende kagakonem agorlerogo lo lugun mende o dogusak dekma melago kalok, akoni o Yudea agum mende etoma lo ndom obangge daguwak o. (Dan. 9:27, 11:31, 12:11)
15Lo daguwogoluk kalok, akoni amberek o warlengge paga dagiluk werekma, suguluk wusa witluk nen, inamende yi mende ndi mende uma werek mende wagani unggigidek mbiyokogo daguwak o. 16Nen, it amberek wen andomangge nen, kimbiri nggamangge nen, suguluk uma iniyom wagani wagidek lo mbiyokogonat daguwak o. 17Esigit diluk dagasi dogolik, it kumi ineyagi inaburla mende inom, ineyagi ngget endago mende inirlak awan niligogi mende eti inom, weyak kugun eti iya! Inaʼbuwa o. 18Kit lo dagagun eti o weyak oba launogo yiluk, sembayan yisi dogoni o. 19O etinem weyagat asigin eti ebe-alep Allah nen yi mende ndi mende winamet disike eti kurli nen logat, o yogondak ya kurli, weyak nggok eti negen omanggi kagat lagidek mende, omanggi pasik etiat kagat latluk yabunggane omanggi kagat lasigin mondok dek o. 20Weyak kagat lasigin eti ninombae Allah Endaganggok nen,
Kurli yi kurli arat o, yiluk yigidek togot dilepma, akoni taʼbokogonat ndil inakidek weyagat atlep. Mende, akoni Allah nen miginakike mende, it inakeat,
Yogo. Weyak arat kegep o, yiluk kurli wasigin werek o. 21Nen, weyak esigit diluk kagat lago nggorlek, it amberek nen,
Kristus etnogo yi waga yi ʼbikani, yigik, it amberek nen,
Kristus etnogo eli waga eli lakani, yigik, yisinem kit kinakla nen eberogonat yiluk ambagup o. 22It akoni amberek inenggalat yisi dogolik,
Kristus etnogo nebe anat o, yigik, nen, it amberek nen,
Allah wene yokisaligogo mende anat o, yigik, yi wisugun o. Witluk nen,
Akoni Allah nen miginakike mende yomenogo nuket diyausak a? Dek a, yiluk nuket diyawogoluk, inane eberogonat ambawagaluk kagasusak dek mende elalin mende kagarik wisugun o. 23Wene eti awan kagat lagidek werek nggorlek kusumbi ndak yokisigi eti kinobabut kwalogo dogoni o,” yiluk yogisasike.
“An abat endak lasi wagagi etnogo, yabunggane wisigiluk kagako nggorlek, esigit diluk kagat lasigin,” yiluk yogisasike wene
(Matius 24:29-31; Lukas 21:25-28)
24At Yesus nen esigit diluk yogisasikesik omanggi men yogisasike,
“Weyak nggok kugun eti kalok oba nen
yabunggane o mulinggi amum agik, sut amum agik,
25kusagal mbogot oba nen nggilelogo wusa wagik, it mbogot oba inobatneyak dogoligogi mende eti Allah nen inaborlogot diyigik, kagasigin o. (Yes. 13:10; 34:4; Yl. 2:10, 31; 3:15; Yeh. 32:7; Why. 6:12-13)
26Etinem an abat endak lasi wagagi etnogo nobatnerogonat oisa akla wusa wagonem, akoni inilenggen niyalok, mondok pogot nabugun o. (Dan. 7:13) 27Wusa wago dogolik, it malaikat Allah nen yonggo wusa ʼbiya wirigogo mende yomenogo, akoni Allah nen miginakike mende o wema elomangge, ombo elomangge, elomangge, yomangge, dogoligogi mende nandorinabuwagaluk, yonggo mbogot erlomangge o yi ai ndi ai etoma laʼbiyagin o,” yiluk yogisasike.
Wene o ara oba lisogo yogisasike wene
(Matius 24:32-35; Lukas 21:29-33)
28At Yesus nen esigit diluk yogisasikesik omanggi men yogisasike,
“Wene yi o ara oba lisogo yokisagin yi didini o. O ara eti engga lologo wusalok nen, yabunggane asiʼbat dagigik, engga dabelkik, kagakonem kinilenggen kalok kinakla nen,
Yogo. O arat kibi asigin kigi, yiluk kinakla didiligogi eti kak,
29Esigit diluk kagat lasigin, yiluk yokisigi etnogo ebe kagat lagonem, kinilenggen kalok nen,
Yogo. O ilugun kurli paga kagat lasigin etnogo korok asi waga kigi, yiluk kinakla ambano o. 30Yigit diluk kagat lasigin, ndigit diluk kagat lasigin, yiluk yokisigi eti akoni o yogondak ya werek mende inebe dek agidek awan werek nggorlegat ebe taʼbokogonat kagat lasigin o, yiluk eberogonat yokisigi. 31Mbogot inom, agat inom, eti dek asigin mende, an nane eti dek asigin mondok dek o,” yiluk yogisasike.
“Ngginem kagat lasigin nit taʼbokogonat ninonggodek eti paga, kinobabut kwalogo dogoni o,” yiluk yogisasike wene
(Matius 24:36-44)
32At Yesus nen esigit diluk yogisasikesik wene omanggi men yogisasike,
“Kagat lasigin eti o etinem, jam eti paga kagat lasigin yiluk, nit taʼbokogonat ninonggodegat. It malaikat Allah nen yonggo wusa ʼbiya wirigogo mende yomenogo inonggodegat. Nen, an nebe at Allah aʼburat mende, nonggodegat o. An nombae arligat ilu o. 33Ngginem kagat lasigin kit kinonggodegat eti paga, kinobabut kwalogo suwam panorogo dogoni o. 34Wene yi imbisak ndak-ndak, ap omanggi aguma nen o walegat lagaluk, anduwanengge aguma anggorlem dogowagaluk ʼbiyalok liligogo. Lagaluk, anduwanengge yomenogo ineyabu dombok sumbusogo wogisasi dogolik,
Kat omanggi yi kagako dogono.
Kat omanggi yi kagako dogono.
Kat omanggi nago su kambema suwam dogoligogon mende yi, kilenggen panorogo dogono, yiluk sumbusogo wogisalok liligogoat o. 35Eti kak, kit kinilenggen panorogo dogoni o, yiluk yokisigi eti kinewe Endaganggok ago indewerek mende etnogo suguluk wisigin eti ngginem wisigin. O keyamnggengge wisigin a? Kibanggo enggendurlem wisigin a? Sewe ane yisi nggorlek wisigin a? O wigik wisigin a. Kit kinonggodek. 36O etinem wisigin kinonggodek eti paga, akerak noge yisi nggorlek ʼbikiya wisunogo nen, 37kinobabut kwalogo dogoni o, yiluk kit yokisigi yi akoni inebe taʼbokogonat kinomat yokisigi o,” yiluk yogisasike.
Currently Selected:
Markus 13: DNA
Highlight
Share
Copy
Want to have your highlights saved across all your devices? Sign up or sign in
