Markus 11
11
Yesus pogorako nggorlek o Yerusalem unggisike wene
(Matius 21:1-11; Lukas 19:28-40; Yohanes 12:12-19)
1Esigit diluk lagukasik, at Yesus agoromi ane waganggo laguka mende yomenogo inom, o kota Yerusalem ungguwogoluk korokogo asi dagasukasik, ndom Zaitun apma o unggul omanggi endaga Betfage, omanggi endaga Betania etoma mot-mot asi dagasukasik, at Yesus agoromi ane waganggo laguka mende yomenogo inebe mbere wene warogo alebagik laĘĽbiyasike. 2Esigit diluk laĘĽbiyasi dogolik,
“O unggul kinelokoma eli lani o. Arat lalok kalok, awan unggisi dogolik wam keledai eyak mende akoni ambot oba yasukogo wogisek lagidek mende nggombi yirlelek werekma kinilenggen kugun etnaga. Nen, arat kinilenggen kalok kalok, nggombi yirlelek eti piyalogo wolok witno. 3Esigit diluk nggombi piyalkonem, it akoni etoma mende omanggi nen,
Keledai nggombi piyaligogi eti nenaluk, yiluk wenemuk mbalko kalok, men yogisano,
Ninewe Endaganggok etnogo nen keledai yi mende dek nen wolok luwogoluk piyaligogi. At nen keledai yi suguluk ibat-ibat laʼbi wisigin o, yiluk yogisano,” yiluk wene warogo laʼbiyasike. 4Laʼbiyasikemo laguka mende keledai yisike etnogo eyak mende omanggi o omanggi kolagarlem palekma kolak uma unggiligogoma, kolak eragalilu, ambe nggombi yirlelek werekma ʼbika lagukasik nggombi piyalkuka. 5Piyalkonem it akoni etoma mendek welaguka mende nen, men yogisasuka,
“Wam keledai eyak mende yi nenaluk nggombi piyalaligogi,” yiluk wenemuk mbalkonem, 6it nen, at Yesus nen,
“Wene esigit diluk yogisano,” yiluk yisike kagat, yogisasukama, it nen,
“E o,” yiluk togot diyasuka. 7Togot diyasukama, wam keledai eyak mende etnogo Yesus oba wolok wagukasik iniyom sikmangge yugu mende nonggorlogo keledai ambot oba ndalogo ʼbisukama Yesus ebe keledai ambot oba yasuk lagike. 8Ambot oba yasuk lagukesik lagonem it akoni dogalegat yomenogo pelakngge iniyom sikmangge yugu mende nonggorlogo kolagarlemngge ndalogo ʼbilik lagik, it pelakngge nen ongga yabulangge mende mbalogo kolagarlemngge ndalogo ʼbilik lagik, kagakuka. 9Esigit diluk ʼbilik lago dogolik, at Yesus ebe ndumo diluk, it amberek alep, it amberek yabunggane, lago dogolik inane nggokogo men yilik laguka,
“Newe wa! Wa! Wa!” yiluk yu kak, “Hosana!” yilik lago dogolik,
“Ninombae Endaganggok Allah nen laʼbagi wagama wagan yi, at nenat panot kabuwak o. (Mzm. 118:25-26)
10Paganeat ninakomba Daud apma welaguka kak, Allah nen ninewe yi apma ʼbinaniluk panot ninabuwak o. Allah nggok mbogot oba dogoligogo mende, ninombae wa!” yu kak,
“Hosana!” yiluk amitmit luk-luk yilik yilik, 11o Yerusalem unggisuka. Unggisukasik, at Yesus ebe Allah ago palekma unggisikesik yi mende ndi mende taʼbokogonat ilenggen mbenako nggorlek, o arat ki agikemo, agoromi inebe 12 paga yomenogo inom o Betania duki waguka.
Yesus nen o ara erlo omanggi alem ĘĽbisike wene
(Matius 21:18-19)
12O Betania duki wagikesik noge yiluk, kubulukngge unggisi dogolik, Yesus kimbiri abu agike. 13Kimbiri abu agikemo, o ara erlo omanggi engga mirli werekma ilenggen walegat nen lakasike. Ilenggen lakalok,
“Enggen yugu a? Dek a,” yiluk, ʼbika lagike mende, o eta paga, o ara enggen yikidekma nogo nen, enggaat mirli werekma ʼbika lagike mende, enggen omanggi yikidek. Enggaat mirli werekma ʼbika lagikesik, 14men yogokike,
“Kat o yi, kurli yogondak nen lok-logat yabunggane kenggen akoni amberek nen nonggo dogogun mondok dek. Yikup,” yiluk yogokonem it agoromi ane waganggo laguka mende yomenogo inasuk kolkuka.
Yesus Allah ago palekma unggisikesik nggarelkike wene
(Matius 21:12-17; Lukas 19:45-48; Yohanes 2:13-22)
15At Yesus agoromi inom o etoma nen o Yerusalem unggisuka. Unggisukasik at Allah ago palekma unggisike kak, it akoni etoma unggiluk dogolik onggo waganggik, mbalkik, kagako laguka mende taĘĽbokogonat sikogo-mukogo sikmangge wula ĘĽbiyigik, it amberek uang meja mberlago paga ĘĽbiluk onggoko laguka mende inom, it amberek o mberlago paga inebe korek dogolik sewe merpati yogik negen mende onggo waganggo laguka mende inom, inago eti abel dagak-mbagakogo mbo laĘĽbigik, kagarik lagike. 16Esigit diluk kagakikesik akoni amberek nen yi mende ndi mende wolok Allah ago palekma o sili obake ĘĽbogokogo lausak dek yiluk wenemuk mbalkike. 17Wenemuk mbalkikesik, it akoni yomenogo inasuk wako dogolik, men yogisasike,
“At Allah nen yisi dogolik,
An nago palek yi pasik akoni nen yisi dogolik, Yi akoni ndi akoni inunggulowak endaga dombok sembayan yisi dogogunmo o, yiluk yisi dogogun, (Yes. 56:7)
yisike mende kolal mbalek werek etnogo dek? Esigit diluk yiluk kolal mbalek werek mende, kit nen, it ap akoni inamende ininggi abusak ndilogo korliligogi mende inago negen palogo ʼbiyiligogi yi!” yiluk inenggarli warogo inasuk wakike. (Yer. 7:11)
18Inasuk wakonem, it ap Allah indewerek ineugi nggokndek inom, Allah wene kolal mbalek indewerek mende inom nen wene eti inasuk kolkukasik nen, Yesus wasuwogoluk abok mbalkuka. Abok mbalkuka eti Yesus nen wene yanggul isasinem akoni dogalegat at ane kolkukasik pogorako laguka eti paga, at ebe inayuk atluk, wasuwogoluk kagakuka. 19Esigit diluk kagako nggorlek, o arat ki agikemo, Yesus agoromi inom o Yerusalem nen duki waguka.
Yesus nen o ara erlo oba lisogo yogisasike wene
(Matius 21:20-22)
20Yesus agoromi inom esigit diluk duki wagukasik noge yiluk kubulukngge kuben kak iniyogoba o ara etnogo erloma mot-mot unggisi dogolik, inilenggen ĘĽbikasuka mende, omanggen inom mondok mbuk agikemo kasuka. 21Kasukasik, Yesus nen o ara yogokike mende etnogo, at Petrus akla ebekikesik men yogokike,
“Newe. O ara alem ʼbegen etnogo arat mbuk agama yi kilenggen ʼbikan o,” yiluk yogokikemo, 22at Yesus nen it men yogisasike,
“Kit, kinendainggen Allah oba panggot diluk dogoni.
23Ta nen endainggen mbere agidek omanggiat dogolik,
An yigin yi ndak-ndagat kagat lasigin, yiluk endainggen Allah oba panggot diluk,
Ndom yi kenokogo i laut yenggelekma mbontogo lan o, yiluk yigin kalok, at yigin mende ndak-ndagat Allah nen kagasigin o, yiluk eberogonat yokisigi. 24Esigit diluk kagarigogo eti paga, kit nen yi mende ndi mende Allah nggino yogoko dogolik, kinakla nen,
Arat woknisekemo, yiluk ambasi kalok wokisaginat o, yiluk yokisigi. 25Kit omanggi melatluk sembayan yisi dogolik, weyak kagarigogi mende ninombae Allah mbogot oba mende nen sagalogo deget duwagaluk, akoni nen kit weyagat kinaka mende kit nen enggen inoba ʼbiluk werek kalok, eti sagalogo togot diyani o. 26[Esigit diluk mende, kit nen enggen inoba ʼbiluk werek mende eti sagalogo deget diyigidek kinakla weyak werek kalok, kit weyak kagarigogi mende eti ninombae Allah mbogot oba mende nen sagalogo deget diyagin degat o,]” yiluk yogisasike.
“Yesus, kat nena mende indewerek agandik kagarigogon,” yiluk kinok wagangguka wene
(Matius 21:23-27; Lukas 20:1-8)
27At Yesus nen wene esigit diluk yogisasikesik nen, yabunggane o Yerusalem unggisuka. Unggisukasik at Yesus Allah ago palekma etnogo o silimongge lagik, wagik, kagakonem, it ap Allah indewerek mende ineugi nggokndek yomenogo inom, Allah wene kolal mbalek indewerek mende yomenogo inom, inarluwendek yomenogo inom, Yesus oba waguka. 28Wagukasik men yogokuka,
“Kat nena mende indewerek agandik, yi kagakik, ndi kagakik, kagarigogon. Nen, ap ta nen,
Yigit diluk kagako dogono, yiluk indewerek dogowagaluk mendagekemo kagarigogon,” yiluk yogokukama, 29at Yesus nen,
“An nen kinok omanggiat waganiginat o. Kinok waganggonem kit nen dikogo yoknoko kalok, an nen, eti mende indewerek agarik kagarigogo o, yiluk, ʼbukakogo yokisaginat o. 30At Yohanes nen akoni ima wusa ʼbiyasi lagike etnogo, Allah mbogot oba mende nen yanggul ikikemo wusa ʼbiyasi lagike a? At te, akoni agat oba mende nen yanggul ikukama wusa ʼbiyasi lagike a. Yoknitni nda!” yiluk yogisasikemo, 31it-it yisi dogolik men yisuka,
“Nit nen, Allah mbogot oba mende nen yanggul ikikemo wusa ʼbiyasi lagike, yiluk yogosumo, at nen,
Kalok, kit nen Yohanes ane eberogonat yiluk didigidek welagigip eti nenaluk, yiluk nit yoknisaunogo,” yisukasik, 32it akoni taʼbokogonat nen,
“Yohanes eti Allah weneat yoknisasi lagike,” yiluk ebe didisi lagukasikmo nogo nen, akoni inayuk nen men yisuka,
“Nit nen,
Akoni nen yanggul ikukama wusa ʼbiyasi lagike, yiluk yogosumo, erlok degat o,” yiluk yisukasik, 33yabunggane Yesus men yogokuka,
“Wene eti nit ninonggodek o,” yiluk yogokukama, at Yesus nen men yogisasike,
“Eti paga, an nen,
Eti mende indewerek agarik kagarigogo, yiluk kit yokisagin degat o,” yiluk yogisasike.
Currently Selected:
Markus 11: DNA
Highlight
Share
Copy
Want to have your highlights saved across all your devices? Sign up or sign in
