Matius 20

“Ap amberek yabu anggur yabu waganggo laguka,” yiluk oba lisogo yogisasike wene

1At Yesus nen yabunggane men yogisasike,

“Nombae nggok mbogot oba mende nen apma ʼbiyiligogoma etoma imbisak ndak-ndak men kak. Ap yabu indewerek mende omanggi yabu anggur yabumo waganuwagaluk ap kweyaginabik kubenat yonggo dukisike. 2Dukisikesik, ap inayonggo ʼbisike mende inom wene men yogisasike,

Kininggi omanggi pasik kagakep kalok, onggo uang ininggi omanggi pasik kagakonem wogisiligogi kagat, kinebe dombok omanggindek wokisagin o, yiluk yogisasikemo, it nen,

Erlok, yiluk yogokukama at eyabula laʼbiyasike. 3Laʼbiyalok nen, o mo wagikemo dukisike jam 9 paga, it ap amberek ninat mende pasar etoma werlegat werekma ilenggen iyasike. 4Iyasikesik,

Warligi yi. Kit, an neyabu anggur yabula etoma kinomat wagani lani o. Waganumo an nen onggo mot-morat wokisagin o, yiluk yogisasike. 5Esigit diluk yogisasikemo it enogo lagukama, ap yabu indewerek etnogo alebagik kagakike kagat, yabunggane esigit dilugat dinggagane jam 12 paga it amberek inayonggo ʼbigik, keyamnggengge jam 3 paga it amberek inayonggo ʼbigik, kagako lagike. 6Yabunggane o ki asigiluk kagako nggorlek jam 5 dukisikesik, it amberek werlegat mendek werekma ilenggen iyalok nen,

Kit kuben nenat yogondak werlegat mendek werek yi nenaluk, yiluk yogisasikemo 7it ap yomenogo nen,

Yabu omanggi waganuwagaluk ninayonggo ʼbigidek eti paga welago o, yiluk yogokuka. Yogokukama, at ap eyabu indewerek etnogo nen,

Kit kinomat an neyabula anggur yabu etoma wagani lani o, yiluk inayonggo ʼbisike. 8Esigit diluk inayonggo ʼbisikemo lagukama, o arat ki agikesikmo, ap eyabu indewerek etnogo nen, it ap yomenogo yabu waganggo nggorlek anggorlem welagike mende omanggi men yogokike,

Ap yabu waganigogi mende yomenogo waisa lan o. Wago kalok, it yabunggane unggega mende eti ndak onggo wogisalok nen, it alebagik unggega mende eti onggo yabunggane wogisanok nen o, yiluk yogokike. 9Esigit diluk yogokikemo, it yabunggane jam 5 paga wagani laguka mende yomenogo ndak wagukama, onggo uang yabu ininggi omanggiat paga kagakonem wogisiligogi etnogo ndak-ndagat omanggindek omanggindek wogisasike. 10Nen, yabunggane, it alebagik wagani laguka mende yomenogo inakla nen,

Nit nggok negen oba dukogo amberek woknisagin o, ambalok waguka mende, onggo uang etnogo mendeat omanggindek omanggindek it alebagik wogisasike kagat, wogisasike. 11Esigit diluk wogisasi nggorlek, it yomenogo uang waganggo dogolik inobabut uwa mbalek kagako dogolik, ap nggok eyabu indewerek mende etnogo men yogokuka,

12It yabunggane wagaka mende yi, satu jam paga ʼbugurlagat kagaka mende, nit alebagik lagosik, mo aik weyakma ninoba aik werek kigik waganggo mende ninom ndak-ndagat woknisegen eti nenaluk, yiluk yogokukama, 13ap eyabu indewerek mende etnogo nen, ap it mende omanggi men yogokike,

Nagarlak o. An nggorlo wokigi dek o. Onggo uang omanggindek wokisagin yigima,

E o, yiluk yegep etnogoat wokisigi o. 14Wokigi mende etiat korlalok lan o. An nendainggen nenat it yabunggane wagani wagaka mende yi kat wokigi kagat, wogisagin o, yiluk 15an nenggaerek namende mendeat kalok, an nendainggen nenat yusak. Esigit diluk erlok dek ambegen a? An ninggi nggogat wogisigi eti nen kat uwa mbaligogon a? yiluk yogokike. 16Esigit diluk yogokike kak, it yabunggane mende eti alep asugun o. Nen, alep mende eti yabunggane asugun o,” yiluk yogisasike.

At Yesus nen, “Nasugun o,” yiluk, inggi mbere paga yogisasikesik nen yabunggane dagakogo yogisasike wene

(Markus 10:32-34; Lukas 18:31-34)

17At Yesus nen esigit diluk yogisasikesik, at ebe o Yerusalem wusagaluk, at ane waganggo laguka mende inebe 12 yomenogo waisasikesik wogisek inarligat kolagarlem wusa wago dogolik men yogisasike,

18“Nagoromi. Nit yogondak, o Yerusalem wusa lago. Arat wusa lalokma, an abat endak lasi wagagi etnogo, ap nen yonggo lalok an nebe it ap Allah indewerek ineugi nggokndek inom, it ap Allah wene kolal mbalek indewerek mende inom, ininggimo ʼbanumo, it nen ap amberek nen nasuwagaluk wene noba ʼbugun o. 19Wene noba ʼbiluk nen, it ap sikmangge mende nen inane aik dagok yoknikik, ndugi laʼbisok ndugi nakik, kagatluk nen nebe o paga mendaniluk nasuwagaluk wogisagun o. Nen, arat nasumo, ninggi mbere warek dogoluk nen, ninggi omanggi yi paga, Allah nen nilugut nabigin o,” yiluk yogisasike.

Yakobus Yohanes imbisak, inagoya inom nen Yesus omanggi nggino yogokuka wene

(Markus 10:35-45)

20At Yesus nen esigit diluk yogisasikesik werekma, at Zebedeus age nen eyagi wogisek Yesus oba wagikesik indibagal yunggulogo keyagi wako dogolik,

“Nit omanggi nggino yokisuwogoluk koba wago,” yiluk yogokukama 21at Yesus nen,

“Kat kakla ninggit diluk ambalok nen yegen,” yiluk yogokikemo, at kwe etnogo nen,

“An neyagi mbere ya, akoni taʼbokogonat kat kapma ʼbiyaginmo etoma keragalilu, at omanggi kinggi ebengge, nen omanggi kinggi mbaikngge, nggok dogowagaluk mendiyanok nen yiluk yokigi o,” yiluk yogokike. 22Esigit diluk yogokikemo, at Yesus nen,

“Kit nggino yoknekep eti, wene ebe kinonggodegat dogolik yoknekep o. An yi aik ndi aik kagat nabugun eti kit esigit diluk kagat kinabusak erlok ambegep?” yiluk yu kak,

“An nagi kenago nigin eti, kit erlok nausak ambegep?” yiluk yogisasikemo, it nen,

“Erlok nausagat o,” yiluk yogokuka. 23Esigit diluk yogokukama, at Yesus nen,

“An yi aik ndi aik kagat nabugun eti kak, kit esigit dilugat kagat kinabugun mende, kat omanggi an ninggi ebengge, nen omanggi ninggi mbaikngge ninom nggok doguwogoluk, an nen mendinagusak, erlok dek o. An nombae nen paganeat nen dogowagaluk pulogo ʼbiyasike mendeat ʼbiyagin o,” yiluk yogisasike. 24Esigit diluk yogisasinem, it at agoromi amberek inebe 10 nen inasuk kolkukasik nen, inakla agaga it ap inebe mbere ewe agot imbisak eranogo inoba ʼbisuka. 25Inakla agaga esigit diluk inoba ʼbisukama, at Yesus nen inebe taʼbokogonat nandorluwagaluk waisasikemo nandokukama men yogisasike,

“It akoni sikmangge mende ineugi pemerintah nen mep dagik-dagokogo kagarinakik, nen it ap nggokndek eti nen, inagoromi kagako dogowagaluk, inane kil mondok ʼbal mondok yogisigik, kagarigogi eti kinilu. 26-28Mende, kit nen it kagarigogi eti kak, esigit diluk kagako dogusak mondok dek o. An abat endak lasi wagagi etnogo, kit akoni an nanduwanengge dogolik yi mende ndi mende kagat nako dogobagik nen yiluk wagagi dek o. At te, an nen kit kinanduwanengge dogolik, kit kinebe kerle warek negen werek mende eti, kinebe dogalegat piyal kinabigiluk, anat nasuwagaluk wagagi o. Eti kak, kit omanggi ta nen,

An inewe nggok asigin, ambasi kalok, kinagorat asuwak. Nen, kit omanggi ta nen,

An nendaganggok asigin, yiluk, ambasi kalok, kinanduwanenggeat asuwak o,” yiluk yogisasike.

Ap inebe mbere inilenggen mbuk mende pano kagarinakike wene

(Markus 10:46-52; Lukas 18:35-43)

29Yesus inom esigit diluk kagarik lagukasik o Yeriko nen dukisuka kak, akoni mondok dogalegat inom laguka. 30Lagonem ap inebe mbere inilenggen mbuk mende kolagarlem korek werekma, akoni nen,

“Yesus wirigogo,” yiluk yisukama inasuk kolkukasik, inane nggokogonat, Yesus men yogokuka,

“Daud nen endago mende ninewe a! Ninaʼbuwa niyan o,” yiluk yogokukama, 31it akoni inebe dogalegat yomenogo nen,

“Kinane o,” yiluk mberisasuka. Esigit diluk mberisasuka mende, it yomenogo nen inane yabunggane mondok nggokogo yogoko dogolik,

“Daud nen endago mende ninewe a! Ninaʼbuwa niyan o,” yiluk yogokuka. 32Yogokukama, at Yesus ebe melatluk waisasikemo wagukama, men yogisasike,

“Warligi yi! An nen ninggit diluk kagat kinabuwagaluk yoknekep,” yiluk kinok waganggikemo, 33it nen,

“Ninewe. Nit ninilenggen mbuk yi pano kagat ninabinok nen yiluk yokogo o,” yogokuka. 34Esigit diluk yogokukama at Yesus nen inaʼbuwa kasikesik nen, inggi inilenggen oba sebekogo pagiyasikemo eranogoat pano agukasik nen, Yesus omborlik laguka.

Currently Selected:

Matius 20: DNA

Highlight

Copy