Matius 19
19
“Ap inagugi waganek mende monogo togot diyausak mondok dek o,” yiluk yogisasike wene
(Markus 10:1-12)
1At Yesus nen wene etnogo arat yogisasikesik nen, o Galilea togot diluk, i Yordan aik ilibagangge o Yudea etoma wusasike. 2Wusasinem akoni dogalegat omborlik wusasukama at nen o etoma u pano kagarinakike.
3U pano kagarinako nggorlek, it ap Farisi mende amberek wagukasik nen, Yesus aren mbaluwogoluk men yogokuka,
“Ap nen, kwe waganek mende eti, wene nggok mende, ʼbugurlagat mende, oba ʼbisi dogolik,
Naʼit, yiluk monogo togot diyausak erlok a? Erlok dek a,” yiluk yogokukama, 4at Yesus nen,
“Erlo paga Allah nen winamet diyasi dogolik,
Ap walkigik, kwe walkigik, winamet diyasike, (Kej. 1:27; 5:2)
yiluk wene kolal mbalek etnogo endaga wenakidek werek nogo? 5Esigit diluk winamet diyasikesikmo wene men yogisasike,
Ap nen agoya ombae togot diyalok age imbisak pano dambulik dogolik inebe mbere mende, omanggiat asugun o,” (Kej. 2:24)
6yiluk yogisasike eti paga, inebe mbere ʼbuk, omanggiat agakasik werek o. At Allah nenat esigit diluk imbisak dambulogo ʼbiyasikemo akoni nen, perelusak mondok dek o,” yiluk yogisasike. 7Esigit diluk yogisasikemo it nen,
“At Musa nen,
Ap omanggi nen kwe waganek mende togot diyagaluk kalok,
Kwe yi kebe naĘĽit. Togot dagagi o, yiluk, kolal mbalogo inggimo wogotluk, erlok togot diyausagat o, (Ul. 24:1-4)
yiluk yisike eti ninggit diluk nen yisike,” yiluk yogokuka. 8Esigit diluk yogokukama, at Yesus nen,
“Dek o. Wene esigit diluk yogisasike eti, kit kinakla mondok mbuk dogolik yokisasinem kinasuk kolusak mondok erlok dek eti paga,
Kinagugi waganek mende monogo togot diyausagat o, yiluk yogisasike o. Esigit diluk mende, erlo paga Allah nen walkasi dogolik esigit diluk mondok yisike dek o. 9Eti paga, wene omanggi yi yokisak. Ap ta nen age waganek mende ap omanggi nen yogot paʼbiyigidekmaat, monogo togot diyalok kwe ninat mende omanggi waganggo kalok, yogorat kagasugun o,” yiluk esigit diluk yogisasikemo, 10at Yesus ane waganggo laguka mende yomenogo nen,
“Ap nen kumi woginakidek, kumi nen ap woginakidek, dogumo pano kigi,” yiluk yogokukama, 11at nen,
“Esigit diluk mende, wene yigin yi, akoni taʼbokogonat inake erlok dek o. It Allah nen inobabut esigit diluk wogisasike mende, didugun o. 12It ap amberek, inagoya lak inakla nen inowarlinggen dek endak latluk, kumi woginakidek mondok dogoligogi o. Nen, amberek akoni nen inowarlinggen woginakonem inagugi woginakidek weregat o. Nen, amberek nombae nggok mbogot oba mende apma ʼbiyiligogoma, at ake kagako doguwogoluk ineramenat inagugi woginakidek dogoligogi o. Wene yigi eti erlok waganusak kalok, waganini o,” yiluk yogisasike.
Elege ʼbugurlakndek eti noba witnek,” yiluk yogisasike wene
(Markus 10:13-16; Lukas 18:15-17)
13At Yesus nen esigit diluk yogisasikesik werekma, it akoni amberek nen inaĘĽburi at nen inggi inunggulowak sebelogo sembayan inoba ĘĽbuwagaluk oba wogisek wagukama, at agoromi ane waganggo laguka mende yomenogo nen mberisasuka. 14Mberisasuka mende, at Yesus nen,
“Akoni elegerlak yi kak kagat lasugun kalok, nombae nggok mbogot oba mende nen apma ʼbiyiligogoma etoma indewerek asugun eti paga, it elege ʼbugurlakndek etoma an noba witnek. Wenemuk mbalko ʼbuk o,” yiluk yogisasike. 15Esigit diluk yogisasikesik, inggi inunggulowak sebel diluk etoma nen o werlekma lagike.
Ap omanggi ebe elege, amende dogalegat mende Yesus oba wagike wene
(Markus 10:17-31; Lukas 18:18-30)
16At Yesus esigit diluk lagikesik werekma, ap omanggi oba wagikesik men yogokike,
“Guru, Newe. An naberlal-kaberlal kagat nabuwak nen, an nobabut kagako dogusak, pano nggi kak kagako dogusak ambegen,” yiluk yogokikemo, 17at Yesus nen, men yogokike,
“Pano nggi kak kagako dogusak yiluk an yokneken eti ninggit diluk nen. Pano kagarigogo mende eti, At omanggiat werek o. Kat iniluk mondok dogogunmo etoma unggusak warlok kalok, wene Allah nen ninasuk wakike wene eti kasuk kol diluk mot-mot kagako dogono o,” yiluk yogokikemo, 18at ap etnogo nen,
“Wene eti ebe ninggit diluk mende pasik yegen,” yiluk kinok waganggikemo, at Yesus nen,
“Wene eti Allah nen men yisike,
Akoni inebe inasusak dek o. Yogot paĘĽbiyausak dek o. Kininggi abusak waganusak dek o. Kinenggalat inabok mbalusak dek o. (Kel. 20:13-16; Ul. 5:17-20)
19Kinagoya kinombae inalon palinako dogusak o. Kinenggaerek kinebe kinaĘĽbuwarogo werek eti kak, it akoni amberek kinom werek mende eti, inaĘĽbuwarinako dogono o. (Kel. 20:12; Im. 19:18; Ul. 5:16)
yiluk ninasuk wakike wene eti pasik yigi o,” yiluk yogokikemo, 20at elege etnogo nen,
“Wene taʼbokogonat yokneken eti, nasuk kolek dogolik mot-mot kagarigogo mendeat o. Mende, nggi mende kagakidek werek ambegen,” yiluk yogokikemo 21at Yesus nen,
“Kat kebe pano mondok asigiluk kalok, yoma nen lalok kamende yi mende ndi mende etoma taʼbokogonat it amberek inoba onggo wagani lano. Onggo waganogo wokisugun mende eti, it akoni amberek inamende dek ininggi dek mende eti sumbusogo wogisano. Esigit diluk wogisagin kalok, kat mbogot oba mende nggogat indewerek asigin o. Eti paga, asigit diluk arat sumbusogo wogisalok, an nomborlik noko dogonok nen, witno,” yiluk yogokike. 22Esigit diluk yogokikemo, at elege etnogo asuk kolkikesik amende mondok dogalegatma nogo nen, akla weyak atluk lagike. 23Lagikemo at Yesus nen agoromi ane waganggo laguka mende yomenogo men yogisasike,
“Akoni inamende dogalegat mende eti nombae nggok mbogot oba mende nen apma ʼbiyiligogoma etoma ninggit diluk ungguʼbugat o, yiluk eberogonat yokisigi,” yiluk yogisasike. 24Esigit diluk yogisasikesik, at nen,
“Wene eti mendeat yabunggane dagakogo yokisak. Wam unta nggok muluk eti mende, disu elo perlelekma nggolaʼbumo erlok lelokogo unggusak mende, it akoni inamende dogalegat mende eti Allah nen apma ʼbiyiligogoma etoma unggusak mondok erlok dek o,” yiluk yogisasike. 25Esigit diluk yogisasikemo at agoromi ane waganggo laguka mende yomenogo inasuk kolkukasik nen, inayuk weyak agukasik men yogokuka,
“Allah nen akoni sani kak erlok ndilinabusak,” yiluk yogokukama, 26at Yesus nen ilenggen it inoba ʼbiluk nen, men yogisasike,
“Akoni nen kagasusak mondok erlok dek mende, at Allah nen yi mende ndi mende kagasusak erlogat o,” yiluk yogisasike.
27At Yesus nen esigit diluk yogisasikemo, at Petrus nen,
“Nit, kat komborlik noko doguwogoluk yi mende ndi mende taʼbokogonat togot diyalok wagosik noko dogoligogi mende yi, nena mende woknisagin,” yiluk yogokikemo, 28at Yesus nen,
“An nen eberogonat yokisak. Kit an nomborlik noko dogoligogi mende yi, yi mende ndi mende Allah nen yabunggane ngget ninat kagat latlukmo nen, an abat endak lasi wagagi etnogo yabunggane witluk, pogot nako nggorlek, nobalikmo etoma nebe nggok korek werekma, kit neragalilu etoma kinobalik 12 mberlago paga kinebe nggogat korek dogolik, akoni Israel mende inunggulowak endaga 12 paga yomenogo kit nen wene inoba ʼbigik, nggokik, kagako dogogun o. 29Eti paga, an nendaganggok asuwagaluk ta nen ago palek inom, ewe agot inom, irugi inom, agoya ombae inom, aʼburi inom, wen waganek inom, togot diyalok wago kalok, onggo obalikmo Allah nen ininggi 100 paga mondok dogalegat wogokik, naberlal-kaberlal wogokik, kagasigin o. 30Esigit diluk mende, it akoni o yogondakne inendaga werek mende dogalegat, yabunggane inendaga dek asigin. Nen, it amberek yogondak inendaga dek werek mende yabunggane inendaga werek asigin o,” yiluk yogisasike.
Currently Selected:
Matius 19: DNA
Highlight
Share
Copy
Want to have your highlights saved across all your devices? Sign up or sign in
