Salmos 18
18
Minit bayakwi unbauna
(2 Sam 22:1-51)
Coro sumalniyang kaupak. Devid Papang warauni witing Saúl dawak waihnila ūk balna tingnina kaupak kal-laihwi yakna kidika yulni kulwi ulna.
1Dawan, man laih yang paraski man;
¡yang dalani matalayang!
2Man laih nakitdakyang man,
dawak yakmaldinik pāni,
yalaihwi yakyang,
yang Papangki,
kipala as yang nakitdakwa kidika,
parasni kau yalaihwi yakwa kidika,
yang maldinik pāni tanit makau kidika.
3Dawan man yakat ayangma nuhni yamnin kidika dīma palni ki,
yang mayultingkat waihkila balna kaupak yalaihta yaktaman.
4Daunin kidika wahni yakat yawiditna dai,
daunin niningyakat yamadunayang.
5Daunin kidika witing wahni kau yapirina;
¡daunin dini dutni kidika pasyakat yang dai!
6Aidayang pasyakat, Dawan kau kalyulnayang dai,
yang Papangki yakat ilp yulnayang,
bahang witing ūni kaupak yadakana,
¡yang sarahtayang kidika witing tapani kat kiwi kana!#Sal 120:1; Jon 2:2.
7Kaput laih sau parasni isihna dai:
asang balna kidika dinitkau balna kidika bitik isihna dai;
Dawan kulnin daukalna kidika kau dulauwi isihna.#Jue 5:4-5; Job 36:30; Sal 29:3-9; 77:16-19; 144:5-8; Hab 3:3-13.
8Nangnitak kaupak wayau manah kalahwi,
dawak tinpas kaupak kuhpau manah kalahwi;
¡tinpas kaupak kuhusmak dahlna manah kalahwi!
9Makau kisang dūrni rina asnina kidika karh'uipamwakat, kaiwi bukna.
¡Witing kalni dinit yakat mukus manahdai!
10Di lawani duwa as minitkau kilwi yaklauwi kiuna wing minit munah.#Sal 68:33; 104:3.
11Yakmaldinin pāni as kapat duna,
dawak ū labanni as kapat bik,
mukus sani balna kal-awaihdakna kidika,
dawak mukusni balna was manah duwadai kidika bik.
12Yaringni lapna dai witing kaiwa kidika kaupak;
mukus kidika kaupak di minik balna kapat uhwadai,
dawak kuh tuturni talna bik.
13Dawan makau sakkidika,
witing dinit alwana kapat kidika yulwak dakana dai makau kisang kidika kaupak;
di minik balna kapat dawak kuh tuturni dahlna bik.
14Sinibang ruhmna dawak alniwana bik lapna
dawak waihkila balna yakat diyamwak pini kikirana.
15Kuma tuhni kidika bitik lāih yakna dai;
sau nuhni adika rahni balna kidika bitik muih miniknapa yakat lāih kalahna dai,
Dawan parasni anwi yulwakat,
wingnita parasni puhna kidika yulni bik.#Ex 15:8; 19:19.
16Papang tingni kidika yuna dai mayakaupak,
dawak witing tingni kau yalaihwi yayakna kuma nuhni paskaupak.
17Yalaihwi yakna waihla pararasni balna kidika kaupak,
bahang kidika balna laih dutni yakukulwadai,
dawak witingna kidika takit pararasni dai.
18Nikingkauh yaklalauna yang mikunni kalnayang kat,
kaunah Dawan yang akat ilp yana:
19pri yayakna;
¡dawak yalaihwi yakna dalani yatalwa dai bahang!
20Dawan yaklauwi mikit kidika yana,
yang kulnik maisihnidis kidika yulni kaput minit dunikdai bahang,
21kat yang laih Dawan tani munah yawanayang bahang;
¡yang laih wat as bik Papangki yakat amangnilatasyang yultasyang dai!
22Yang warmani kat ban lāma balna kidika dutayang;
¡lāma balna kidika wat as bik kultas awasyang dai!
23Witing muhni tani yakat lapaknayang dutni as bik dis;
dutni kidika kaupak naikau alahwanayang.
24Dawan yaklauwi minitlauwi yana
witing muhni tani yakat maisihni disyang bahang.
25Dawan, man laih barangniman,
angdika muihni man yakat barangni kidika yakarak,
muhni kat yakwi kalyulwas kidika Papang bik yaklauwi muhni kat yakwi kalyulwas ki,
26kulnin pasyakaupak di rahm manah yulwa kidika,
biri Papang yaklauwi bik kaput kalyamwi,
dawak angdika muihni tanit kau walwi talwa muihni kidika Papang bik kulnin sirihni ki.
27Kulninna praut-awas kidika laihta yaktaman,
kauna witingna manah kapat kaldakakawa kidika balna yakat laih sau yakat laktaman.
28Kaunah Dawan man laih yaringni yataman; yang Papangki,
puksani yakat yang kidika yaringni yatah.
29Man ilpma yatangkat kidika kau waihkila niningyakat lawaki,
dawak witing tawanni daklana kidika minit munah bayakki.
30Papang tani kidika laih barangni ki;
Dawan pranimis kidika rahm kalkulna atnin ki;
¡Papang yaklauwi nanitnadakwi muih yapak witing yakat kulninna awi duwa balna kidika!#Pro 30:5.
31¿Papang kidika kaupak, wais kidika Dawan yah?
¿Angdika papang ūk sipyah matakitdaknin?#Is 44:8.
32Papang yaklauwi paraski yawi,
dawak witing yaklauwi yang yamtayang balna kidika yamni manah yamwi,
33witing yaklauwi kalki lapaktayang balna kidika sirihni yamwi,
sihm sana kapat,#Hab 3:19. witing yaklauwi yāwakat mayakau yalahdayang,
34witing yaklauwi yasumalwi kalbauna atnin,
dawak bik witing yaklauwi paraski yawi las brasni kidika isnik.
35Man nakitdakta yalaihta yaktaman,
dawak tingmapal kau yalaihta dulautaman;
minikun talnin dutaman kidika kau yatang kat diki balna barakwi.
36Yang taki kidika parasni-awas yamnaman,
dawak yang kalki kidika atakting kahrwasdai.
37Waihkila balna kidika uitik yawik laihnayang,
dawak alas nawattik aiwanayang imuknayang usnitkat.
38Tustik dakdak muknayang.
Kaput bahang sip yaklauwas dadana.
¡Kalki dinityakat bubukna!
39Man lawa paraski yanaman dai kalbaunin yakat;
diyamtangkat kulninna anyang balna kidika yang muhki tani yakat abubukna,
40dawak yang muhki tani yakat waihkila balna kidika kikirana.
Kaput laih sipdai īna atnik dutni yakukulwa balna kidika.
41Ilp yuyulwadai, kauna muih as bik ilp diayawasdai;
dawak Dawan yakat kalyuyulna kauna nangnitnalawas dai.
42¡Yang dismuknayang, sihm sau yahamni wing dulauwi dukiwa kapat!
¡Kalki kau ataknayang sihm tapas kau sau atakda kapat!
43Yalaihta yaknaman tawan as dutni kidika tingni kaupak,
dawak yayamna man nisan balna taninatuna atnin,
dawak muih talasyang balna dai kidika diki yayamwi.
44Yadakakawi, bahang mahka laih yultayang yakat yayamwi;
sau ūk muihni balna kidika kulnik alasna yayamwi,
45sau ūk muihni balna kidika muihsak dadauwi,
yakmamalda pāni kaupak diyukwīnah kalalahwi.
46¡Dawan laih sangka ban kaput karang!
¡Yamni ban karang yang nakitdakyang kidika!
¡Dawak nuhni kaldulauna karang Papangki yalaih'yakyang kidika!
47Witing laih Papang as ki bahang dutni yayamna balna yakat biriwi diyamna,
dawak tawan balna kidika taihwi lakna kalki dinit yakat.
48Yang waihkila kulninna daukalna kidika kaupak yalaihwi yakwi,
muih dudutni yang nikingkauh yaklalauna dai kidika.
¡Dawan man, muih ahal anyang balna kaupak yalaihta yaktaman!
49Kidika bahang nisan balna pasyakat ayangma nuhni dulautayang,
dawak man ayangma kau unbautayang.#Rom 15:9.
50Minit bayaknin kidika nuhni kalataman,
man lawa king as anaman kidika yakat;
dawak nining ban kaput yamni kalyamtaman Devid yakat dawak sulani balna yakat bik.
Currently Selected:
Salmos 18: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
