Salmos 17
17
La barangni yamnin yulni kidika, yulwi minit yulwi
Devid minit yulna.
1Dawan, yang yulki barangni kidika daka,
dawak yultayang kidika daka,
mikit yultayang kidika yadakah,
kat alas yulyang tinpas kaupak kalahwas bahang.
2¡Man munah kaiwang laki yamnin kidika,
kat man laih amanglataman bahang la barangni kidika!
3Man kulnik yakat awanaman;
pukta yakat aiwanaman tahata yatalnam,
man yalaihta talnaman kuhpau karak,#Job 7:18; Sal 26:2; 139:23.
dawak dutni as bik yaktasman.
Yulnin dini-awas kidika yultasyang,
4muih ūk balna yayamwa kapat;
kalbilwi kalbaunin tani kaupak naikau alahwanayang,
man lāma balna anaman yakat.
5Man tama yakat barangni yawanayang;
kidika balna kaupak datik alahwasyang.
6Papang, yang yulki balna kidika man yakat mayultayang,
kat man lawa birita nangkitlataman bahang;
yadakah, yulki balna kidika dakah.
7Lāih yakta nikingkatah dalani lani dutaman kidika,
man lawa waihnila balna kaupak laihta yaktaman,
nanitna daknin wawalwa kidika, man parasma nuhni yakat.
8Main yatala, muih yal bin as kau mamakpa talaman kapat,
man lawama dinitkau sanni yakat yahata nakitdakta#Dt 32:10-11; Sal 61:4; 91:4.
9muih dudutni balna mababauwa kidika kaupak,
¡waihla dudutni balna ya-awaihwi dadakwa kidika kaupak!
10Witingna manah kapat kaldakakawi, dawak yulnina bik kaput yuyulwi;
11lapaktayang kidika yaihkit yakat yauiwi aiwi,
tahahawi sans as kalahwak sau yakat yalahna atnin.
12Layan kapatki, layan anyang kapat
tahahawi laihna atnin tipisninamak kau.
13Lawah, Dawan, ¡witingna niningna yakat lawah!
¡Diyamtangkat limbabahwang!
Ismaparah kau, waihla balna kaupak yalaihta yakta;
14man parasma kau, Dawan, witingna kaupak yalaihta yakta;
¡adika sauni kaupak ruhmta yakta,
kat sau adika laih witingna dinina tingmak bahang!
Datangkat sau dini yayamni kidika duyang kakalwang,#17.14 Man parasma kau...duyang kakalwang: kaput wirlana kidika yamni kapat ki. Hibru kau laih amangladaski.
walaninabis balna kidika di kaswi banina tutwang,
dawak walanibis walaninabis balna kau bik kaput karang.
15Kauna yang laih, rahm kidika,
isinglak dawarang mamuhki biri kaltaldarang kat,#Rib 22:4.
¡sahmuhting kat man muhma tani yakat awaki kat!
Currently Selected:
Salmos 17: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
