Salmos 10
10
Minit yulwi ilp yulna Papang kau#Grik kau ulna kidika Salmo 9 dawi 10 kidika bupak laih aslah libitna ki, kidika bahang Baibil uk yakat numba satuk kalalahwi.
1Dawan, ¿ampadawak man nai kau palni watta manh?
¿Ampadawak maldamanh, kulnin tuhni kaiwa mani yakat?
2Nuhni kaldakanin karak, dutni yamyang kidika
annin nuhni karak, muih miniknakunni balna yakat laihkuhti uiwi kiwi;
kaunah witing alas di laihnin dini āna yakat bukna atnin karang ki.
3Muih dutni kidika, alas dukih kalawa yakat manah kulwi.
Witing manah dunin kulnin yakat sakkidika laih Dawan yakat dauh kaltalwi.
4Muih tapadadas kidika nangnitak dulau dawi yulwi:
“Papang diski. Ais yamtayang kidika muih yayulwi dakanin muihni diski.”#Sal 14:1; 53:1; 73:11.
Kidika yulni manah kulninna yakat sakki. 5Di bitik yamwa kidika yamni manah kalahwi.
Witing nining yakat, man lāma barangni kidika naikau kapat kulwi,
witing minikpa kaupak naikau palni talwi.
Witing waihnila balna niningna kari,
6dawakat kulwi, muih as bik kalyamwak bukwas karang ki,
witing yakat tatalwas karang kapat,
dawak dutni as bik witing yakat kalahwas karang kulwi.
7Witing tinpas kidika, di dutni manah buhngki,
alas yulnin dawi muih kau usnin;#Rom 3:14.
witing yulni balna kalahwa kidika, muih kau taihnin dawi dutni lani manah ki. 8Tawan binina yakat uswi malnikau dawak muih dutni yamwas yakat iwi.
Muih tanit daknin dis yakat minikpa talwa kidika dawas ki:
9sihm layan as, pāni sulihni kau sakkapat,
muih minikunni yakat yakpakdi talwi,
witing yakmaldinin pāni duwa kaupak,
tahawi awarni kaiwak minit yakat bukwi laihnin,
laihwa manikat, witing murwi dukiwi.
10Abukwi, dawi muihni kidika murwi duwaiwi kaluduhwi,
dawak, muih tani daknin dis kidika, witing tipisnimak nanaini yakat bubukwi.
11Muih dutni yamyang kidika kulwi, kidika yamwa bitik Papang dinit kahwi,
muhni putwi dawi di bitik kidika talwas ki kukulwi.
12¡Lawah, Dawan, man tingma kidika dulautah!
¡Muih isningna bukna balna yak damatkahwinih!
13¿Ampadawak, Papangki, muih dutni balna kidika sarahni yayamwarang yah,
witingna kulninna yakat, man lawa la dilaihtas awamaki atwa kidika?
14Man palni talaman, witingna dutnina nuhni duduwa kidika;
¡man talna man, bahang witingna dutnina yayamwa minit kidika diana ki!
Tanit daknin dis balna kidika man yakat maduduwi;
man kuduh warau balna ilpnina.
15¡Dutni yamyang balna tingnina kidika bahta!
¡Witingna dutni yayamna kidika minit dikulta,
dutni yayamna kidika paktangkat bitik minitlalauwang kidika dis kalwarang kat!
¡Paktangkat as bik datang bayaknin awaski!
16Dawan kuduh ban kaput atnin kingni as ki;
¡witingkau kulwas balna yak, witing sauni kaupak yakwi ruhmawarang ki!
17Dawan, man muih miniknakunni minitna yuyulwa kidika di dakaman,
man lawa kulninna alasna di yamta man,
dawak witingna ais yuyulwa kidika di daka man.
18Man lawa warau balna dawi taihna muihni balna,
lanina kidika barangni yamtah:
¡muih al sau kau yamna, kidika watwi yamadangni lani dulaunin awas ki!
Currently Selected:
Salmos 10: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
