Proverbios 28
28
1Dutni muihni kidika laih kiri muih as bik
uiwas karang bik,#Lv 26:17.
kaunah la kat muihni balna kidika laih yamni
kaldakakawi sihm layan kapat.
2Sau kidika dutni kat, kabamint kayang balna
kidika laih baisa mahni kalwi,
kaunah tunan duyang yamni kidika laih
di balna kidika pini yamwas ki.
3Dutni muihni yaklau muih miniknakunni
balna yakat taihwa kidika laih
sihm was parasni lauwi di minik balna
daukalwa kapat ki.
4Lā kaupak naikau kalalahwa kidika laih
dutni muihni kidika ayangni nuhni yayamwi;
rahm lā kat yayamwa kidika laih witing
niningkauh yaklalauwi.
5Dutni muihni balna kidika laih
la kat kidika amanglalawas ki,
kaunah Dawan yakat uiwa balna kidika laih
bitik amanglalawi.
6Baisa yamni ki mamikunni atnin
dawak bik yamni atnin
di duyang atnin dawak di dutni kulnin
kidika karak dawakat.#Pro 19:1.
7Papang lāni kidika kat yamwa kidika laih
walabis as sinsni yamni ki,
kaunah di kasyang muihni kidika laih
witing papangni asalni.
8Tunan minit yakwi rits balna
ududuhwa kidika laih,#Ex 22:25; Lv 25:35-38; Dt 15:7-11; 23:19-20.
muih miniknakunni balna yakat dalani
didakawa kidika yulni uduhwi.
9Angdika muihni Papang lani kidika
yakat dakawas kidika laih,
Papang bik kidika muihni minit yulwa balna
kidika bik dakawas karang ki.
10Angdika muihni yaklau muih yayamni balna
yakat ta dutni yakat diduwi kiwa kidika laih,
witing silp laihnin dini malni kau
āna kidika yakat bukna karang;
kaunah yayamni muihni balna kidika laih
di yamni kidika duduna karang.
11Di duyang muihni kidika laih sins nuhni
duyang kaldakawi,
kaunah muih minikunni dawak sinsni yamni
kidika laih sipki kawi talna atnin.
12La kat balna kidika minit bayayakwa kat,
kasnin alasnina nuhni yayamwi;
dutni muihni balna minit bayayakwa mani kat,
muih balna kidika laih yakmamaldi.#Pro 28:28.
13Angdika muihni dutni kidika talwas kapat kidika
laih tanit yakat yamni kiwas karang;
kaunah angdika muihni lāih yakwi yulwi dawa kidika
laih dutni kidika dawak disna karang.
14Angdika muihni Dawan yakat rispik yamwa
kidika laih alasna ki;
kaunah angdika muihni tunan dadasni kidika
laih dutni yakat bukna karang.
15Layan ihwa kapat kidik awaskat
dangkatakalbas yuh dauwa kapat as
sihm kapat ki muih dutni as tawan minikunni
yakat kabamint kāwa kidika laih.
16Kabamint kayang muihni sins dis kidika
laih taihnin lani kidika baisa mahwi;
kaunah angdika muihni tumnin lani dis
kidika laih sangnika naini duna karang.
17Angdika muihni muih as īna kidika laih
sau ū yakat watwas kawi kiuna karang:
¡muih as bik sip laihwatwas ki!
18Angdika muihni yamni kidika laih
laihwi yakna karang,
kaunah tunan dutni muihni kidika laih
dutni yakat bukna karang.#28.18 Dutni yakat bukna karang: tiksni yamni kapat ki. Hibru kau laih yulwi as minit yakat.
19Angdika muihni witing di dahwa pāni yakat
di dahwa kidika laih,
kasnin dini kidika minitbayak duwi;
wark kalalahwas muihni balna karak likkidika laih,
sutni kalwatwa kidika laih minikunni lani kidika.
20Angdika muihni yamni talna muihni kidika laih,
ayangni nuhni yamna karang;
angdika muihni rits balna dukih kalawa kidika laih,
wah duwas laih watwas karang.
21Muih balna yakat satuk satuk talnin kidika
yamni awaski;
plawar busna bahna as minit kat bik
dutni yamnin sipki.
22Angdika muihni di dukih palni kalawa kidika
laih sirihni palni ki di duyang kalna atnin yulni,
dawak amanglawas ki witing minityakat
minikunni lani kaiwarang kidika.
23Ma balna bayakwa kidika karak,
baisa yamni talwi
dutni yulwa muihni kidika dawak
ayangni nuhni yamwa kidika karak dawakat.
24Di dutni yamyang karak kaltalyang
yamni kidika laih
papangni balna dinina malwi usnit kat
dutni yamtasyang ta kidika ki.
25Angdika muihni di dukih palni kalawa kidika
laih kalbaunin yamwi;
kaunah angdika muihni Dawan yakat yamni
kulwa kidika laih, barakwi.
26Tapdadas muihni manah laih witing silp
kulnin lani balna kidika yakat yamni talwi;
angdika muihni sins lani karuk di balna yamwa kidika
laih yamni laihwi yakna karang.
27Angdika muihni muih minikunni yakat ilp
kalawa kidika laih, di as bik dis awas karang;
kaunah angdika muihni ilp kalanin yulwas
kidika laih, la nuhni palni kaltuhna karang.
28Dudutni muihni balna minit bayayakwa kat,
muih balna kidika laih yakmamaldi;
manina witni kiwi kāwa mani kat, la kat
muihni balna kidika yaklau taihwi duduwi.#Pro 28:12.
Currently Selected:
Proverbios 28: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998