Proverbios 29
29
1Angdika muihni bibilwakat tunan
dutni kalwa kidika laih,
sirihni palni daukalna karang sinika dis.
2La kat balna kidika yaklau taihwi duduwa kat,
muih balna kidika laih alasna kalalahwi;
dudutni balna kidika kabamint kakawa mani kat,
muih balna kidika laih dalani wawauhwi.
3Walabis sins duyang kidika laih papangni
yakat alasna kalyamwi;
la munah kalduwas atnin lani karak likkidika
laih lalah kidika dauh diswi.
4King as la kat yamwa kidika laih,
witing sauni kidika yamni yamwi;
tunan minit daknin manah yamwa kidika laih, daukalwi.
5Angdika muihni witing karak kaltalyang yamni
duwa yakat ayangni nuhni yamwa kidika laih,
rahm kidika laih laihnin dini malni kau awi kalawi.
6Dutni yamyang niningyakat malni kau laihnin dini
kidika laih witing silp dutni balna kidika ki;
kaunah muih yamni kidika laih alasna yalahwi.
7La kat muihni kidika laih muih minikunni
rahmni balna kidika kulwi talwi,
kaunah dutni muihni kidika laih isning kulwas ki.
8Kiri yaklauwi di yamyang balna kidika laih
tawan nuhni as kidika uswi dulalauwi;
sins duyang balna kidika laih kulnin dulauna
balna kidika laihwatwi lan ki.
9Sins duyang muihni as dawak tapdadas muihni as
niningyakat kalbibilwa kidika laih,
kulnin daukalwi, sarahni kalyulwi dawak
di as bik barangni yamwas dawi.
10Muih iyang balna
dawak muih dudutni balna#29.10 muih dudutni balna: tiksni yamni kapat ki. Hibru kau laih yulwi barangni. kidika laih
muih yamni yakat dutni kalkukulwi dauna kat.
11Tapdadas kidika laih kulnin daukalwi
ais yulnin kidika bitik yakwi yulwi,
kaunah sins duwa muihni kidika laih
laihwatwi dispamwi.
12Kabamint kayang muihni yul alas balna
dakawa kidika laih
dini yamyang balna bitik kau dutni diyammukwi.
13Tahna duna muihni kidika dawak taihyang muihni
kidika karak witingna di satuk satuk duduwi:
Dawan yaklau witingna bu yakat miniknapa diana.#Pro 22:2; Mt 5:45.
14King as muih miniknakunni balna yakat
kulnin yamni karak king kāwa kidika laih,
witing tronni kidika laih ban
kaput atnin yamwi dawi.
15Dalani dawak bilna karuk amanglanin ki,
kaunah walanibis dalani talwa kidika laih
nanangni yakat asalni yakwi.
16Dutni yamyang balna kidika mahni kakalwa kat,
dutni lani kidika laih minitbayak kalwi;
kaunah muih yayamni balna kidika laih
kidika muihni balna didiswakat tatalna karang.
17Walamabis yakat barangni kalyamtah dawak
witing yamwakat kulnam alasna yalahma,
dawak ismanglak lani balna kidika
mahni palni mana karang.
18Angdika pāni yakat ta yamni kidika dis laih,
di as bik yamni diski;
¡angdika tawanni Papang lāni kat dakawi
yamwa kidika laih alasna ki!
19Muih dini yamyang yakat yul karak manah
barangni yamdaski,
kat amanglawi kaunah yul dakawas ki.
20Baisa yamni ki tapdadas yakat tahanin kidika#Pro 26:12.
kulwi talwas yulbauwa muihni kidika karak dawakat.
21Angdika muihni witing dini yamyang yakat
baisabin kaupak dalani kaltalwa kidika laih,
witni kat kaidana karang.#29.21 Witni kat kaidana karang: tiksni yamni kapat ki. Hibru kau laih amangladaski.
22Angdika muihni sirihni kulnin daukalwa kidika laih,
kalbaunin yamwi dawak di dudutni manas bik yamwi.
23Angdika muihni witing manah kapat kaldakawa
kidika laih sau yakat kallaknin ki,
kaunah angdika muihni buknin lani duwa kidika
laih rispik kalyamnin ki.#Mt 23:12; Lc 14:11; 18:14.
24Di malyang ilpni yulyang kidika laih
witing silp muihni kidika yakat dutni talwi,
lakaltuhwa kidika dakawa karang bik#29.24 Lakaltuhwa kidika dakawa karang bik: wais kat Papang ayangni kau yakwi yulwa kidika witnis, yulwa kaput watwa dai, alas yulwrang kat, la tuhnin kidika yulni kau manah yulwa dai. Talah Jue 17:2.
witing yulni kidika yulwi yakwas ki.
25Yamadunin kidika laih muih balna niningna yakat
malni kau awi laihnin dini as ki,
kaunah angdika muihni Dawan yakat yamni kalkulwa kidika
laih tingni dinit yakat awi duna karang.
26Muih mahni kidika kabamint kayang
ilpni kidika wawalwi,
kaunah Dawan manah la kat kidika yamwi.
27Muih yayamni kidika laih muih dudutni
balna yakat sip wawauhwaski,
dawak dutni muihni balna kidika laih
muih yayamni balna yakat sip wawauhwaski.
Currently Selected:
Proverbios 29: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998