Proverbios 27
27
1Yahan mani dini kidika alasna duwinih,
bahang man amanglatasman yahan mani
ais kaiwarang kidika.#St g 4:13-16.
2Datang muih yaklau ayangma nuhni yayamwang;
yamni awaski man alas ayangma nuhni yamna atnam.
3Kipala dawak kauhmak balna kidika laih tikikini ki,
kaunah tapdadas kulnin daukalna
kidika kauh baisa tikini ki.
4Kulnin daukalnin kidika laih dutni ki,
dawak bik daukalwi,
kaunah minit annin lani balna kidika
laih sip laihwatdas ki.
5Baisa yamni ki barangni yaklauwi bilna atnin
malni kau dalani talnin karak dawakat.
6Baisa yamni kalkulnin sipki yamni
kaltalwa muihni yaklau dakwa kidika yakat
niningkauh yaklauwa muihni yaklau
umwa kidika karak dawakat.
7Angdika muihni kalbuhng kidika laih,
amak kidika kat bik dutni talwi;
yuh dauwa muihni kidika laih, di tapahlni
kidika kat bik damni kapat dakawi.
8Di lawani kat ūni kaupak
naikau kiwa awaihwa kidika
sihm kapat ki angdika muihni batahnna
pāni kaupak naikau likkidika laih.
9Isning kidika alasna yamna atnin kat,
walapni kahnin dini yayamni kidika;
solni kidika damni yamna atnin kat,
kaltalyang yamni yulni as karak.#27.9 Damni yamna...kaltalyang yamni yulni as karak: wirlana kidik yamni kapat ki. Hibru kau laih amangladaski.
10Man kaltalyang yamni dutaman kidika
ruhmwi dawinih
papangma karak kaltalyang yamni
muihni balna kidika bik.
Man pātma balna karak kiwinih
wirahma al ūni yakat.
Baisa yamni ki man ūma yaihnit muihni balna
yakat yawana atnam
wirahma naikau kidika karak dawakat.
11Yang walakibis, sins duyang awah,
dawak yang alaskina yamna awama;
kaput laih nangnitnalana awaki dutni
yayuyulwarang muihni balna yakat.
12Isningpuk muihni kidika laih yamadangni
kidika talwi dawak tanitdakwi;
isningpuk awas kidika laih ban tanit yakat kiwi
dawak dalani kidika wauhwi.#Pro 22:3.
13Angdika muihni kat taldas muihni as
di tras yakwakat ilpni kawarang kat,
asnina balna kidika dakyaktah.#Pro 6:1-5; 20:16.
14Kaltalyang yamni yakat sarahwi
kalparasna atnin pukpapus kat,
kidika laih sihm witing niningyakat
dutni kalyamnin kapat ki.
15Muih yal as kulnin dutni kidika kapat ki
was lauwa mani laihwatwas lauwa kidika.#Pro 19:13.
16Laihwatnin lani kidika laih
wing kidika laihwatnin lani ki
kidik awaskat matingki yakat disala kidika
duna atnin.#27.16 Laihwatnin...disala kidika duna atnin: wirlana yamni kapat ki. Hibru kau laih amangladaski.
17Ayan kidika laih ayan karak baini kalwi
dawak muih al kidika muih al ūk karak.
18Ani panan maintalwa kidika laih ani minik kaswi;
angdika muihni daniwan dini balna maintalwa kidika
laih risnipik lani balna duwi.
19Mamuhki kidika was yakat lāih talda kapat,
sihm kaput bik muih balna
dauninna kidika lāih tatalwi.
20Daunin, sau ū dawak muih
tumnin lani duwa kidika laih
kidika manah isninglak awas ki.
21Gol dawak lalah balna kidika,
kuh yaklau di buswi talwi;#Pro 17:3.
muih kidika laih ayangni nuhni yamnin
balna kidika yaklau kallaihwi tatalwi.
22Tapdadas muihni kidika laih
sip tapani dadasni kidika dawaski
wauhta dawak minit lakta wat wat wauhma karang bik.
23Sīpma balna kidika yamni maintalah,
sīpma balna kidika yulni kulta kalbautah,
24bahang rits balna dawak kraun balna karang bik
ban kaput awaski.
25Sihrsihr balna kidika kalahwi
sangni kakalwarang mani kat,
dawak dibasta balna kidika asang balna
kaupak dakwarang mani kat,
26sīpma balna kaupak unitak kidika duta prak āwama,
sīpma binina kaupak lalah duta sau bakanta duma
27dawak kutsma balna kaupak tāwas minit bayak duma
man dawak walamabis balna kauna dina atnamna
dawak man warkma kalahyang balna kidika kauna.
Currently Selected:
Proverbios 27: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998