Proverbios 26
26
1Mukus pihni kidika laih ma daihwa
kidika niningyakat yamni awaski
was lauwa kidika bik yamni awas ki
di mini balna kalahwa kidika niningyakat
dawak tapdadas muihni kidika niningyakat
bik rispik lani kidika yamni awaski.
2Sihm rumsik ta disna kapat kidik
awaskat suhr ūni dis kapat,
la tuhnin lani kidika laih sip
witni kat kiwas karang ki.
3Aras almuk kidika laih dangni bahnin ki,
biriku almuk kidika laih laihwatnin ki
dawak tapdadas muihni kidika laih wisnin ki.
4Angdika muihni tapdadas muihni
yakat nangnitlawas kidika laih,
tapdadas kidika yulni sip bayakwas ki.
5Angdika muihni tapdadas muihni
yakat nangnitlawa kidika laih
amput yamwa kidika yakat yamni talwi.
6Tapdadas muihni yakat yamni kaltalwi
yulni dakanin kidika laih
makalki dakwi trabil walnin dini.
7Muih sakahwa barahnimak balna yamni awas
kidika laih nai kiwas ki
dawak tapdadas muihni kidika laih
proverbios kat bik awaski ti.
8Kipala kidika kiwah yakat sitnin
kidika laih yul rahm awaski
tapdadas balna yakat rispik
diyamnin awas kidika kapat.
9Wasak diyang muihni kidika wakal kalpawa
kidika kat bik dakawas ki,
tapdadas muihni kidika proverbios
kidika yakat bik amanglawas ki.
10Sibang ruhmyang muihni di balna bayakwa
kidika bitik yakat yuwi talwa kidika
kidika laih sihm muih witing ūni yakat
tapdadas muihni yakat wark kalawa kapat ki.#26.10 Sibang ruhmyang...kalawa kapat ki: wirlana kidika yamni kapat ki. Hibru kau laih amangladaski.
11Sul kidika laih witing tining
yakna kidika lamwi kaswi#2 Pi 2:22.
dawak tapdadas muihni kidika laih
baisa tapani dadaswi.
12Baisa yamni ki tapdadas kidika yakat tani tahanin#Pro 29:20.
sins duyang kaldakawa kidika karak dawakat.
13Baskiwah muihni kidika laih yul sat sat
yulwi wark kalahnin awas yulni
ta nuhni yakat laih layan as sakki ti.#Pro 22:13.
14dūr kidika laih insis balna yakat wauhwi
dawak baskiwah muihni kidika laih
krikri yakat piramwi.
15Baskiwah muihni kidika laih di lakwi
kasnin dini yakat tingni uhrawi,
kaunah usnit kat tinpas yakat
duwi kiunin sip awaski.#Pro 19:24.
16Baskiwah muihni kidika laih
baisa sins duyang kaldakawi
muih tiaskaubu nangnitlawi
sip balna kidika karak dawakat.
17Muih kalbibilwa pasyakat kanin kidika laih
sul as tapani yakat laihnin kapat ki.
18Tunan dutni muihni as ruhmwa kidika kapat
kuhpau sinibang daunin dini,
19sihm kapat ki angdika muihni witing karak
kaltalyang yamni yakat alas kalyulwa kidika laih
dawak usnit kat yakisdi kalyulna ta kidika.
20Kuhpau kidika laih kuh dis kat pibukwi,
dawak karinin yulni dis laih
kalbilnin kidika dis kalwi.
21Kuh tuturni yamnin kat, kuhusmak kidika nid ki;
kuhpau yamnin kat, kuh kidika nid ki;
dawak kalbilnin karang kat,
muih usyang muihni kidika nid ki.
22Yulwi karinin yulni balna kidika laih
sihm kasnin dini yudutni kapat ki,
kaunah pasluih yakau daihni ki.#Pro 18:8.
23Sau suba minit yakat lalah kau kahna kidika laih
yul balna yududutni kulnin lani dutni duduwa kidika ki.
24Angdika muihni muih ūk yakat dutni kalkulwa kidika
laih, yulbauwa mani kat witing awas kapat yamwi,
kaunah kulnin pasyakat laih di dudutni
balna yamnin kidika ridi kalahwi.
25Dalani lani karuk yulmabauwakat rahm kalkulnah,
bahang kulnin kidika laih di dudutni manah ki;
26witing dutni kulwa kidika malpamkuh tarang bik,
witing dutni kidika laih muih balna bitik
muhnina yakat lāih kalahna karang ki.
27Angdika muihni pa kudungni as kuhrwa kidika laih,
kidika pasyakat kawi;
angdika muihni kipala as tulwa kidika laih,
sihm kidika kinipala yaklau taihwi.
28Alas yulyang muihni kidika laih
di rahm kidika yakat dutni kulwi,#26.28 Di rahm yakat dutni kulwi: grik kau kaput yulwi. Hibru kau laih amangladaski.
yul yulwas muihni kidika laih
di balna kidika pini lani manah yamwi.
Currently Selected:
Proverbios 26: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
