Proverbios 25
25
Salomón watbu yulna sins lani balna
(S.n 25:1—29:27)
1Adika balna bik Salomón kulnin lani balna,
Judá kingni dini yamyang
balna yaklau uhulna:
2Di balna malni yakat dunin kidika laih
Papang alasnina yaksihni ki,
dawak kidika balna yakat kanin kidika
laih king balna risninapik lani.
3Makau kisang maluihni kidika,
sau pasluihni tuhni kidika
dawak king balna kulninna lani kidika laih,
pasyakat kanin bik sip awaski.
4Di maisihni dini balna kidika lalah
yaihnit kaupak naikau yaktah,
dawak lalah kidika laih sutak as yakwarang;
5dutni muihni kidika king warkni
kaupak naikau yaktah,
dawak tronni kidika laih la kat kalwarang.
6King muhni yakat nuhni kaldakawinih,
dawak muih nunuhni dikulna balna
panina kidika bik duwinih;
7baisa yamni ki mayuyulwakat
kidika yakat ilwana atnam,
dawan nunuhni balna muhnina yakat
sau yakat buknam kidika karak dawakat.#Lc 14:8-10.
Man silp mamakpa karak talma kidika
8usnit kat la yayamwa pāni balna yakat duwi kiwinih,
kat witnis muihni ūk kidika alas yulnin sipki
dawak witni kat man ais yamnam pa amanglatas awama.
9Angdika muihni yulma yakwarang
kidika niningyakat tamatdaktah,
kaunah muih ūk dini malni
yakat sakkidika laih yakwinih;
10bahang muih as madakawi asalma yaknin sipki,
dawak man ayangma sau yakat bukwarang
kidika laih sinika dis karang.
11Yul balna yulnin awarni yakat laih
sihm gol mannisana balna lalah
kau lakwi birna kapat ki.
12Sihm ting-ānin dawak alahnin dini
gol yamni kau yamna kidika kapat ki,
sins lani munah bilwakat dakawa muihni kidika.
13Yul yulyang barangni kidika
laih sihwa muihni kidika dini
ma daihni yakat sihm mukus pihni sanni kapat ki,
bahang daniwan yakat kulnin dulauna wisasamni kalawi.
14Mukus dawak wing dawak was lauwas,
kidika laih muih as di kalaki ti
di as bik kalawas kidika ki.
15Kulnin laihwatnin lani kidika laih
kulnin daukalna#25.15 Kulnin daukalna: wirlana kidika yamni kapat ki. Hibru kau yulwi tunan muihni. yakat laihwatwi;
yul balna tani kidika laih parasni dis yamwi.
16Amak yakma kat, mahni minit bayakta diwinih,
kat mahni dima kat tamangyakma.
17Man kaltalyang yamni dutaman muihni
yakat yawa kaltalaman kat, wat wat yamwinih,
matalna manah kalsuhwakat dutni
makulnik awas yulni.
18Mazo, isparah, sibang sutni subabangni,
¡kidika kapat ki angdika muihni kaltalyang yamni
duwa kidika niningyakat yul alas kalyulwa kidika!
19Kaidinin mani yakat malni kau pāt yakat
ayan muihni yakat yamni kaltalna atnin kidika laih
mabarahkimak nakas bahbukna likmayang kapat ki
kidik awaskat ma-anaki as kasna kat di kasda kapat ki.
20Isning kulwi kalbauwa yakat
unbauna atnin kidika laih
pilau#25.20 Pilau: grik kau kaput yulwi. Hibru kau yulwi salitre. yakat wain sapahni utuhnin kapat ki
kidik awaskat sanwa mani yakat prak yaknin kapat ki.
21Man namangkauh yaklauwa muihni kidika
yuh dauwa kat, di kalatang kaswang;
dawak was dikih kalawakat, kalatang diwang;
22kaput kalyamtang yakasaldi muhni daihwarang,
dawak Dawan yaklau minit lauwi mana karang.#Rom 12:20.
23Tingpal niningkauh wing wauhwa
kidika kaupak was lauwi kaiwi,
dawak tuni dutni yulwa kidika
kaupak muhni dutni kidika kaiwi.
24Ū tuna kung yakat yalahnin
kidika kauh baisa yamni ki,
ū nuhni ahni panuhni kat yal
muih dutni as karak yalahnin karak dawakat.#Pro 21:9,19.
25Sihm was sanni kat dinitsuru was dikih kalawa kidika
kapat bubukwi yul yayamni kidika sau naikau balna kaupak.
26Wastuna pauni kalahwa kidika
kapat ki di yamwas muihni kidika
di dutni yamna niningyakat.
27Amak mahni dinin kidika yamni awas ki,
kaunah di dadasni walwi talnin
kidika laih rispik lani as ki.#25.27 Di dadasni walwi...rispik lani as ki: tiksni kidik yamni kapat ki. Hibru kau laih amangladaski.
28Sihm tawan nuhni kat daklawas yamadangni kidika,
kapat ki angdika muihni witing kaliswa
balna yakat amanglawas kidika.
Currently Selected:
Proverbios 25: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
