Josué 6
6
Jericó yakat kalbauna atnin la yamna kidika
1Jericó kidika muih as bik kanin dawak kalahnin bik sip awasdai, kat tawan nuhni dūrni balna kidika puputna dai Israel muihni balna niningna kaupak nandakna atnin yulni. 2Kaunah Dawan yaklau Josué yakat kalyulna: “Yang lawik Jericó tawanni nuhni kingni kidika kauna dawak yaihnit kau kalbauyang muihni balna duwa kidika kauna bik man tingma yakat anayang. 3Manna Israel muihni kalbauyang balna, ma tiaskauas pasyakat tawan nuhni yaihnit kidika awaihlana as awaihlatanauh ma bitik yakat. 4Aslah kalahnin lani baksni kidika tanit yakat sumalyang balna tiaskaubu uiwarang, witingna muihnina kat kat sīp almuk tamni kau trumpit yamna kidika as as duwi uiwarang, dawak ma tiaskaubu yakat laih sumalyang balna kidika trumpit puhwa bangkat manna laih wat tiaskaubu awaihlatanama. 5Manna dakanangkat trumpit balna kidika tanit yamni pupuhwarang mani kat, parasmana bitik palni sarahtanama, dawak tawan nuhni daklana kidika laih sau yakat bukwarang ki. Bahang manna muihnimana kat barangni yawanama tawan nuhni kidika niningyakat.”
6Bahang Josué yaklau sumalyang balna yakat diyulwak uiwakat aput diyulna: “Aslah kalahnin lani baksni Dawan dini kidika duta yawanauh, dawak manna kaupak muih tiaskaubu la baksni kidika tanit yakat sīp almuk tamni kau trumpit yamna kidika duta yawanauh.” 7Dawak tawan muihni balna yakat laih diyulna: “Yawa tawan nuhni kidika yakat awaihtanauh. Kalbauyang muihni balna kidika laih, Dawan lani baksni kidika tanityakat uiwang.”
8Josué yaklau ais yamnin diyulna dai kidika bitik yayamna dai. Sumalyang balna tiaskaubu kidika laih aslah kalahnin lani baksni Dawan dini kidika tanityakat trumpit balna tiaskaubu kidika puhwinah uina, dawak la baksni kidika laih witingna dangnitna yakat kiuna dai. 9Sumalyang balna laih trumpit balna kidika laihwatwas pupuhwakat Kalbauyang muihni balna kidika laih witingna tanitna yakat uina, dawak dangnit kau kalbauyang balna ūk aiwa kidika laih la baksni kidika dangnit yakat uina dai. 10Kaunah Josué yaklau kalbauyang muihni balna yakat diyulna dai ap lapakna atninna, witing yaklau angkat parasni sarahnin diyulwarang kidika kat.
Jericó tawanni nuhni dakyayakna kidika
11Josué yaklau yamwakat Dawan lani baksni kidika tawan nuhni kidika yaihnit yakat awaihna dai. Usnit kat ūnina labanni yakat nawatwi uiwi payayahna dai. 12Kidika payahwakat, Josué laih mapiris palni yaklauna dawak sumalyang balna laih Dawan lani baksni kidika duduna dai. 13Sumalyang balna tiaskaubu kidika laih Dawan lani baksni kidika tanit yakat watwas lapapakna dai dawak trumninapit balna bik laihwatwas pupuhna dai. Kalbauyang muihni balna kidika laih witingna tanitna yakat uina dai dawak ūk balna kidika laih la baksni kidika dangnit yakat uina dai. Trumpit balna kidika laih laihwatwas pupuhna dai. 14Ma bu yakat watwi tawan nuhni kidika yakat awaihwi dawi ūnina labanni yakat nawatwi uina dai. Dawak kaput manah ma tiaskauas yayamna dai.
15Ma tiaskaubu yakat laih pukkau yaklauwi tawan nuhni kidika yaihnit yakat lapapakna dai, muhnilau kau yayamna dai kaput, kaunah kidika mani laih wat tiaskaubu awawaihna dai. 16Sumalyang balna yaklau trumpit wat tiaskaubu pupuhna mani kat, Josué yaklau muih balna yakat yamnin diyulna dai: “¡Sarahtanauh! Dawan yaklau tawan nuhni adika manna tingmana yakat ana. 17Tawan nuhni pasyakat di balna bangkidika bitik laih Papang dini yakwi daukalmuknin karangki, kat Dawan yaklau kaput yamnin yulna bahang.#Dt 13:15-16; 20:16-18. Rahab, yal as ahal manas karak kalpakwa muihni kidika dawak witing ūni yakat muih ūk yakmaldana bangkidika sangninaka manah wawatna karang, kat witing yaklau pakwi talnin muihni balna sihdak malmukna dai kidika yulni. 18Manna namangnakauh laih, tawan nuhni kidika pasyakat di balna bangkidika dunamna awaski dawak bik laihnamna awaski kat Dawan yaklau witing dini yakna daukalmukna atnin, kaput awas karang laih manna lawa Israel ūni labanni kidika minityakat latuhtanama dawak dalani wauhnin wahni kidika bik duaita kalatanama. 19Kaunah Gol, lalah dawak bras kau dawi ayan kau di yamna dini balna kidika laih Dawan dini yakwi witing lalahni baksni yakat ana karang.”
20Muih balna kidika laih sararahna dawak trumpit balna kidika laih pupuhna dai. Israel muihni balna laih trumpit balna pupuhwa kidika dakawi parasni sararahna dawak tawan nuhni yaihnit kau daklana kidika laih sau yakat bukna dai.#Hib 11:30. Bahang tawan nuhni kidika niningyakat barangni uikawi dakyayakna dai. 21Usnit kat muih ahal balna, yayal, wawahma dawak muihbararak balna yakat isparah baini kau ihina dai, dawak kidika minityakat turuh ahalmuk wark kalahyang balna, s-ip balna dawak biriku ahalmuk balna kidika bik ihina dai. Bitik palni imumukna dai.
22Josué yaklau pakwi talyang muihni balna bu sau lakwi tatalna dai kidika yakat diyulna: “Yal as ahal manas karak kalpakyang muihni kidika yakat yawa ūni kaupak yaktanauh dini balna bitik karak, manna lawa witing yakat pramis kalyamnamana dai kaput.” 23Witingna laih uikawi Rahab, papangni, nanangni, wirahni ahal balna dawak witing wanaihni balna bitik kau yayakna dai, dawak Israel muihni balna ūnina labanni kaupak naikau duwi uina dai. 24Usnit kat Israel muihni balna yaklau tawan nuhni kidika dawak paskau di balna bangdai kidika bitik busmumukna dai. Lalah, gol dawak bras kau dawi ayan kau yayamna dini balna dai kidika manah yayakna dai, Dawan lalahni baksni kau ahana dai kidika. 25Kaunah Josué yaklau Rahab dawi wanaihni balna sangninaka kidika kauna dana dai, kat Josué yaklau Jericó yakat pakwi talyang muihni balna sihwakat witing yaklau malna dai kidika yulni.#Hib 11:31. Dawak kidika mani kaupak Rahab sulani balna kidika Israel muihni balna pasyakat yalalahwi.
26Usnit kat Josué yaklau adika pranimis yamna dai: “Dawan minikpa yakat la kaltuhna karang angdika muihni yaklau Jericó tawanni nuhni dulautik yamkuhti kulwarang kidika. Witing walanibis barakni kidika minityakat ū rahni sau paskau kana kidika balna kau taihna karang dawak walanibis binkauh kidika minityakat laih dūr balna kidika kau taihna karang.”#6.26 Muih kau duwi sakripais yayamwa dai kidika kapat ki, witingna tawan nuhni as yayamwarang kat ridi kalalahwa dai kidika.,#1 Re 16:34.
27Dawan yaklau Josué yakat ilp kalana dai, dawak Josué ayangni nuhni kidika laih sau bitik yakat ka'yaklana dai.
Currently Selected:
Josué 6: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
