Josué 5
5
Gilgal yakat ū labanni papakna kidika
1Amorreo kingni balna bitik Jordán kaupak ma kilwa niningkauh yakat bangdai kidika, dawak cananeo kingni balna laih Mediterráneo kumani ulah yakat bangdai kidika, witingna dakakana dai Dawan yaklau Jordán wasni kidika buhni manah yamwakat Israel muihni balna dadakna dai kidika, dawak uba palni yamaduduna dai dawak bik Israel muihni balna niningna yakat kalbauninna kukulwas dai.
2Kidika mani Dawan yaklau Josué yakat kalyulna: “Kipala kau kuhbil buas yamtah, dawak watta Israel muihni balna yakat Papang sainni diatah.”
3Josué laih kuhbil balna kidika yamna dai, dawak Israel ahalni balna yakat Papang sainni kidika diana dai Aralot#5.3 Hibru kau laih, Aralot tanka laih muih supahni unitak. asangni yakat. 4Papang sainni diana dai kat muih ahal balna bitik kalbaunin sip balna dai kidika Egipto kaupak kalalahna mani kat ta yakat uman dadauna dai, kauhmak wanilang yakat. 5Dawak Egipto kaupak kalalahna muihni balna bitik laih Papang sainni duduna dai kaunah, kauhmak wanilang, ta bamak yakat batahndadana balna kidika laih baisa duduwas dai. 6Israel muihni balna laih kauhmak wanilang yakat kurih 40 awaihna dai bahang, Egipto kaupak muih ahal kalbaunin sīp balna kalalahna dai kidika laih uman dadauna dai. Kidika ahalni balna laih Dawan yakat yulni dakakawas dai, kidika yulni witing yaklau pramis diyamna dai witingna muihnina bararak balna yakat sau dianin yulna kidika talwas atninna, sau as tāwas dawi amak karak sihm was kapat kikira kidika.#Nm 14:28-35. 7Kidika yulni Josué yaklau kidika ahalni balna walaninabis balna yakat Papang sainni diana dai, yuldarangkat, Dawan yaklau witingna panina yakat ana dai kidika balna, kidika balna laih muhnilau kau Papang sainni duduwas dai kat ta bamak yakat bangdai kidika yulni.#Gn 17:9-14. 8Bitik kau Papang sainni duduna mani kat, ū labanni yakat watwi yakururupdana dai yamni kakalna kat. 9Bahang Dawan yaklau Josué yakat kalyulna: “Adika Papang sainni adika karak Egipto muihni balna asalnina kidika witingna kaupak yaknayang.” Kidika yulni, kidika pāni ayangni kidika ban Gilgal duwi.#5.9 Hibru kau laih, Gilgal dawak yulni kidika tanka laih awaihwinah yaknin yulni yulwa kidika kapat parah yulwi.
10Israel muihni balna laih Gilgal yakat watwi ūnina labanni papakna dai, dawak waiku tatuna ma 14 ma ulahu yakat, insal kaiwi bayakna#Ex 12:1-13. kasnin alasnina kidika yayamna dai Jericó sauni langni balna yakat. 11Sihm kidika mani plawar pupuhnin dini dis busna kidika dawak plawar minik bukulna kakasna dai, kaunah kidika payahwak laih uman sau kaupak di minik balna kalahwa dai kidika kakasna dai. 12Kidika mani kaupak maná dis danadai,#Ex 16:35. kaput laih Israel muihni balna kidika kurihni yakat Canaán sauni kaupak di minik balna kalahwa dai kidika kaupak kakasna dai.
Josué dawak Dawan kalbauyang muihni balna duwa dai kidika taninatuna karak
13Ma as kat, Josué witing Jericó yaihnit yakat sakkauna talna dai, witing tanit yakat muih al as tingni yakat isparah duwa sakkat. Josué laih yaihnit yakat kiwi kalyulwi dakana dai:
—¿Man kidika yangna kaupak manh, kidik awaskat yangna nikingnakauh yaklalauwa balna kidika kaupak manh?
14Muih al kidika yaklau nangnitlana:
—As kaupak bik awasyang. Yang laih Dawan kalbauyang muihni balna duwa kidika taninatuna awana aiwayang.
Bahang Josué laih abukwi sapani kau sau kat sukwi, dawi kalyulwi dakana:
—¿Yang Dakiwan kidika yaklau witing dini yamyang akat ais yulni kalsihwih?
15Dawan kalbauyang muihni balna duwa taninatuna kidika yaklau nangnitlana:
—Susma kidika yaktah, kat sakman kidika pāni laih holi ki.
Dawak Josué laih rahm yulni dakana dai.
Currently Selected:
Josué 5: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
