Josué 7
7
Acán dutni yamna
1Kaunah Judá sulani balna paskaupak as dai, ayangni laih Acán, witing kidika Carmi walanbis dai dawak Zabdi mani, kaput bik laih Zara buhni dai, bahang witing daukalmuknin dini balna yakna dai kidika duduna, bahang kidika yulni Israel balna bitik yakat dutni dikulna dai, Dawan muhni tani yakat, kat witing yaklauwi di balna daukalmuknin atnadai kidika duna yulni. Kidika bahang Dawan kulnin daukalna kidika dahlna witingna niningna yakat.
Dutni yamna yulni wah kalana: Hai nining yakat sip awas kalahna
2Josué Jericó kaupak ahal buas sihna dai Hai yakat, bahang kidika laih Betel kaupak ma kilwa nining yakat sakdai, Bet-avén yaihnit yakat; dipakna dai kidika sauni pīsni kidika lakwi talna atnin. Witingna uiwi Hai kidika lakwi tatalna dai, 3dawak nawatwi aiwi Josué yak kalyuyulna: “Tawan muihni balna bitik uiwi Hai niningkauh kalbaunin laih dini awaski, muih ahal tausin bu awaskat tausin bās kidika manah sip ki tawan nuhni kidika kawi dunin.”
4Kaput laih, muih ahal tausin bās kilwi uina Hai nining yak kalbaunin. Kaunah Hai muihni balna yaklau minitna bayayakwak kikirana dai; 5kaput laih muih ahal 36 dadauna dai Israel balna kidika, dawak ūk balna kidika, dawak ūk balna kidika tawan dūrni kaupak ū paknin kinipala yayakwa pāni kat uiwi duwi aina, dawak launi yaklakkiwa yak tuswi dadakna. Kidika yulni muih balna kulninna bukna dawak bik yamaduduna.
6Josué dawak Israel muihni bararak balna karak asnina biswi dawak sau yahamni tunanina yak uhuhna, dalani wawauhwa kidika sainni; kidika usnit yak Dawan lani baksni kidika muhnit tani yak sau kat bubukna masan kat. 7Dawak Josué yulwa dai:
—¡Alakaih Dawan! ¿Ais yamta adika tawanni kalatang kat Jordán wasni kidika dakyaklalana yah? ¿Ais yangna adi amorreo balna tingnina yak yanaātang kat yana imukninna? ¡Baisa yamni kitdai Jordán nakas yakauh watnamayang kat! 8¡Alakaih Dawan! ¿Waralaih ais yulnik sip yah, Israel balna kidika waihninala nining kaupak sip awas dawi kikirana yulni? 9Cananeo muihni balna dawak kidika sauni pīsni yak muih ūk yalalahwa balna kidi amanglawarang kat ais kalahna balna kidika, dawak aslah kalpakwi maikalbauna karang, kaput laih as bik malawas karang, mayulki bik disna karang. Bahang, ¿kaput laih ais karang yah man ayangma nuhni kidika?
10Dawak Dawan yaklauwi nangnitlana:
—Lawah. ¿Sau yakat ais yamta sakmahn? 11Israel balna kidi dutni yayamna, yang witingna karak pramis yamna yang dai kidika daukalna. Di balna daukalmuknin dai kidika duduna;#Dt 13:16; Jos 6:17-19. malwi duduna, witingna amanglalawa dai kaunah dutni yayamwa kidika, dawak dinina pas yakat āwi mamalna. 12Kidika bahang Israel balna witingna sip awas karang waihnila nining yakat. Witingna kirinin ki waihninala balna niningna kaupak, kat waralaih witingna silp daukalmuknin yakat wiryaklalana. Dawak manna sirihni daukalmuktas awanamakat, yang yulnayang kaput, baisa manna karak awas awaki. 13Man lawah dawak tawan muihni balna kidika yulta uduhta. Di yultah witingna ridi kakalwang yahan mani yang muhki tani akat aina atnin, kat yang kuduh Israel balna Daninawan dawi Papangnina, aput yultayang kidika: ‘Man Israel, di balna daukalmuknin dini dai kidika dunaman, bahang man daukalmuktas awama kat, dawak bik man kaupak naikau yakpamtas man kat, man sip waihmala balna niningna yakat lawas awama.’ 14Yahan mani manna bitik yang muhki akat aiwanama, dawak angdika tawan yaktik yulki kat, kidika tawanni laih sulani balna kidika duaiwarang, dawak angdika sulani yaktik yulki kat, kidika sulani yaklauwi ahal yapak kat duaiwarang. 15Angdika muihni, daukalmuknin dini balna dai kidika duna karang kat, witing ūnipas kau walanibis balna dawak di duwa balna kidika bitik laih libitwi kuhkau busna karang, kat di dutni as yamna bahang Israel pasyakat, Dawan pranimis kat yamwas dana bahang.
Acán yakat wah kalana
16Payahwa kat mapiris palni, Josué yaklau sihna tawan balna tunina aslah yuyulwa kidika bitik uina atnin. Dawak Dawan yaklau niningkana dai Judá sulani balna yak. 17Kaput laih Josué yamwadai Judá sulani balna kidika Papang muhni yakat duwi kiuna, dawak Zara sulani balna kidika yakwadai. Dawak Zara balna paskaupak, Zabdi walanbis balna yakna. 18Dawak Zabdi walanibis balna paskau alnina balna kidik, as kalahwi yaihnit yakat uina, kaput laih Acán kidika yakna Carmi walanbis kidika laih Zabdi mani, dawak buhni, bahang kidika laih Judá tawanni balna tunina aslah yuyulwa kidika kaupak dai.
19Kaput dawak Josué yaklau Acán yak kalyulna:
—Yang walakibis, risnipik kalatah dawak ayangni nuhni yamtah Israel balna Daninawan dawi Papangni yakat, kaput laih ais yamna man kidi yayultah; ¡niking kauh malwinih!
20Dawak Acán biri nangnitlana:
—Rahm kidika laih, yang yultayang Israel Daninawan dawi Papangnina niningyakat dutni yamnayang. Adika kuduh yang yamnayang kidika: 21Jericó yakat, di balna dunamayang balna bitik pasyakat, yang talnayang Babilonia asnina yaksihni as, dawak talnayang, lalah dadasni andat bu dawak gol panan as, tikini kilo as minit kau papusbah praisni as duwadai. Kidika dini balna dukih yana, bahang dunayang, bahang dini balna kidika laih ūki dinit yak nunayang, lalahni balna kidika laih pasyakau anayang.
22Kidika usnit yak Josué yaklauwi muih ahal buas yakwi Acán ūni labanni yak sihna, witingna yayakwadai ais balna malna bangdai kidi bitik, lalah kidika laih dinit palni yak āna dai. 23Dawak witingna duwi uina Josué dawak Israel balna muhnina yak bik, kidika dini balna kidi Dawan yak duwi uiwadai. 24Usnit kat Acán kidika duwi uina Acor sauni langni yakat, dawak lalahni balna, asnina, golni, walanibis ahal dawak yayal, wark tuniruh balna, biriniku, sīpni balna, ūni labanni, dawak witing di duwa balna bitik duwi uina.
25Josué yaklauwi kalyulna:
—¿Ais yamta adika dini dutni yangna mikitna yakat duaina manh? Dawan yaklauwi yamwak man mamatyak bukna karangki yangna kau dutni duaina man kidika yulni.
Kaput yulwi dawi, Israel balna bitik kau Acán yak kipala kau barhwi ihina walanibis balna bitik, dawak usnit yak kuh kau busna. 26Kidika usnit kat witingna minitna yak kipala mahni palni mumukna, bahang kidika pāni warmani kat banki. Kidika yulni warmani kat ayangni duwi Acor#7.26 Hibru kau laih, Acor tanka laih wauhnin dini as. sauni langni, kaput laih Dawan annin kidika lungna dai Israel niningkauh.
Currently Selected:
Josué 7: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
