Deuteronomio 33
33
Moses yaklau Israel sulani balna yakat blis diyamna
1Moses baisa dauwas tanitkauh, Papang alni, Israel muihni balna yakat blis diyamna dai 2aput yamwīnah:
“Dawan laih Sayan kaupak kaiwi;
Seir kaupak yaringni mayana.
Parán asangni balna kaupak yaringni kalana
dawak Meriba-cades#33.2 Meriba-cades: ūk yakat laih aput wirlalawi dawak witing karak laih holi muihni balna mahni, kaunah adika laih rahm palni awaski. kaupak kiwi;
tingnipal niningyakat lā kuhnipau kidika duaiwi mayawi.#33.2 Lā kuhnipau kidika duaiwi mayawi: kaput kapat ulna ki. Hibru kau laih puksani.
3Dawan laih witing tawanni kidika dalani talwi,
witing dini kakalwa balna kidika witing tingni dinityakat āwi duwi;
witingna laih kalni dinityakat bubukwi
dawak witing ais yamnin yulwa kidika yayamwi.
4Moses yaklau lā kidika mayana
dipahni as kapat Jacob tawanni kaupak,
5dawak Jesurún yakat laih king sakdai#Dt 32:15; Is 44:2.
tawan tanituna balna kidika kalududuhna mani kat,
Israel sulani balna kidika kalbahahana mani kat.”
6Rubén niningkauh laih aput yulna dai:#33.6 Rubén niningkauh laih aput yulna dai: kaput kapat ulna ki. Adika yulni laih hibru wauhnitaya yakat kalahwas ki.
“¡Rubén laih sangka ki! ¡Dauwas kawang,
witing ahalni balna kidika bulah karang bik!”
7Judá yulni laih aput yulna dai:
“Dawan, Judá yulni kidika dakah;
man lawa yamtang man tawanma karak kalududuhwang.
Parasma karak tanit daktah;#33.7 Parasma karak tanit daktah: kaput kapat ulna ki. Hibru kau laih parasni kidika aitani duwa karang.
witing niningkauh yaklalauwa balna kidika niningyakat ilpni āwah.”
8Leví niningkauh laih aput yulna dai:
“Dawan, man dima balna ki, Tumim kidika dawak Urim kidika bik;#Ex 28:30.
man dima balna dawak muih al man yakat barangni kidika bik dini,#33.8 Dawan, man dima balna...barangni kidika bik dini: wirlana ūk yakat laih kaput yulwi, grik ulna yakat: Dawan Leví yakat kalatah man dima balna Tumim dawak Urim kidika bik; muih al as man yakat barangni kidika.
Masá yakat wauhnin ānaman dai kidika,#Ex 17:7.
Meriba wasni yakat witing karak kalbaunaman dai kidika,#Ex 17:7; Nm 20:13.
9papangni balna yakat aput diyulwadai kidika: ‘Wat as bik talasyang’,
dawak wirahni balna yakat laih aput diyulwadai kidika: ‘Amangninalatasyang’,
dawak walanibis balna yakat laih aput diyulwadai kidika: ‘Wais balnapa amanglatasyang.’
Witingna laih man yulma kidika kat yayamwi,
man pramamis yakat barang kakana.#Ex 32:25-29.
10Jacob yakat dawak Israel yakat bik sumamalwi,
lāma balna yakat;
sakripais busnin pāni man dima yakat dawak muhmat yakat bik lalakwi,
busnin dini walapni yamni kidika dawak minitdis kalanin dini didauh balna kidika bik.
11Dawan man lawa witingna muihnina ihiwa kidika blis diyamtah,
dawak warknina kidika yamni tala dutah.
Witingna niningnakauh yaklalauwa balna dangnina kidika bistah,
dawak man yakat dutni makukulwa balna kidika watwi yaklauninna awaski.”
12Benjamín niningkauh laih aput yulna dai:
“Dawan dalani talwa muihni kidika laih alasna yalahwi;
makau sakkidika yaklau ban kaput tingni dinityak āwi duna karang.
¡Tanitdakwa dinityak yalahna karang!”
13José niningkauh laih aput yulna dai:
“Dawan yaklau witing sauni kidika blis yamna karang#Gn 49:22-26.
makau kisang kaupak yalawas yamni kidika karak
dawak sau paskau wasni kidika karak bik,
14kurih pasyakat di minik balna yayamni kalahwa kidika karak
dawak waiku balna pasyakat di minik balna yayamni kalahwa kidika karak bik,
15muhnilau kau asangni balna kidika karak,
makau ban kaput atnin yayamni balna kidika karak bik,
16sau yakat di minik balna yayamni kalahwi mahwa kidika karak
dawak kulnin yamni pan wakal pasyakat yalahwa kidika kauna.
Adika dini balna bitik José minityak aiwah,
wirahni balna pasyakat walwi yakna kidika.
17Nuhni yaksihni ki sihm turuh almuk walanibis as kapat,
parasni sihm turuh bul as kapat,
dawak tawan balna bitik yakat tamni kau dipana karang
sau sutni balna kat.
Efraín sulani balna mahni kidika yakat;
Manasés sulani balna milian, milian yakat.”
18Zabulón dawak Isacar niningkauh laih aput yulna dai:
“Zabulón alasna alahwah, alahwanam tani balna kidika yulni,
dawak Isacar man laih, ūma lababanni balna kidika yulni.
19Nisan balna kidika asang yakat diyulwak uiwarang,
dawak kidika yakat sakripais busnin balna kidika bubusna karang;
kuma ritsni balna kidika duwi alasna duduwarang
dawak kauhmak yakat di minit nunuhni balna malni kau bang kidika bik duwi alasna duduna karang.”#Gn 49:13; Jos 19:10-16.
20Gad niningkauh laih aput yulna dai:
“¡Sau nunuhni manawa kidika muihni laih ayangni nuhni yamna karang!
Gad laih sihm layan yal di tahawa kapat tahawi,
dawak tingni balna kidika dawak tunani kidika bik kaswi dakwi.
21Gad laih sau yamni kidika duna dai
sau as yamni kalbauyang taninatuna balna dinina.
Tawan muihni balna taninatuna duwi kana dai,
Dawan yaklau yamnin yulwa kaput yamna dai
dawak Israel yakat la kat kidika yamna dai.”#Nm 32:1-42.
22Dan niningkauh laih aput yulna dai:
“Dan laih layan walanibis as kapat ki
Basán kaupak sutwi.”#Jos 19:47; Jue 18:1-29.
23Neftalí niningkauh laih aput yulna dai:
“Neftalí laih Dawan yaklau yamni kaltalwi,
witing blinisin mahni palni duwi,
¡witing laih lakun daniwan wadah niningkauh sutni nakas kat!”#Jos 19:33-39.
24Aser niningkauh laih aput yulna dai:
“Aser laih ayangni nuhni yamna karang Jacob walanibis balna pasyakat,
dawak wirahni balna bik dalani kaltatalwarang.
Kalni balna kidika disala kau kahna karang;
25dūrni balna kidika ayan dawak bras lākni balna kau duwa karang,
dawak parasni kidika ma mahni duwarang dawak sangnika bik sihm kaput.
26“Jesurún Papangni kidika laih di as karak bik libitnin sipawas ki,
makau kisang balna minityak aras kau kilwi king kawa kidika
man yakat ilp mana atnin yulni.
27Papang ban kaput atnin kidika laih man maldanam pāni,
parasni ban kaput atnin kidika laih man ilpma;
witing yaklau yamwakat man muhma kaupak man namangkauh yaklauwa kidika kirana
dawak man yakat mayulna daukalpamna atnam.
28Israel laih yamni kulwi yalahna karang,
sulani balna kidika laih kulnin aslah lani karak yalalahna karang.
Saunina yakat plawar minik dawak wain bik bangkarang,
dawak makau kisang kaupak was lauwak duduna karang.
29Israel man laih alasna yamni awama,
¿wais kidika malibitnin sipyah?
Dawan witing palni malaihwi yakna;
witing tingni dinityak mahawi maduwi dawak bik ilp mawi,
¡witing kuduh man ismaparah minitbayakyang kidika!
Man namangkauh yaklalauwa balna kidika laih man namangyakat bubukna karang,
dawak witingna manah kapat kaldakakawa kidika laih man lawa taihta dunaman karang.”
Currently Selected:
Deuteronomio 33: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
