Deuteronomio 32

1“Makau kisang yadakah, yulbauki kidika;

sau dakah yulki balna kidika.

2“Sumalki yulni balna kidika laih sihm was lauwa kapat bukna karang,

yang yulbautayang kidika laih sihm yalawas kapat karang,

sihm dibasta balna minitna yakat was buiwa kapat,

sihrsihr minityakat was tahwa kapat.

3“Dawan ayangni kidika yulnayang karang:

¡Mapapangki nuhni kidika amanglatanauh!

4Witing kuduh mayang matakit dakyang;

warkni balna kidika laih barangni ki,

di balna yamwa kidika laih la kat ki.

Witing laih Papang rahm ki,

witing yakat laih la kat awas kidika diski;

¡witing laih la kat ki dawak bik rahm ki!

5“Muih dudutni,

Papang yakat dutni yulna kidika,

dudutni walanibis balna awas atnin kidika:#32.5 Papang yakat...awas atnin kidika: kaput kapat ulna ki. Hibru kau laih puksani.

6¿kaput Dawan yakat minitlauta kalatamanah?

Tawan tapdadas dawak sins tuhni dis,

¿witing awasyah Papangma, mamuhna kidika?

¡Witing yaklau mamuhna dawak sangmaka bik mana!

7“Mamakpa kidika dangmatyak wirlawa talah,

ma balna bayakna yakat kultah;

Papangma yakat kalyultang mayulwang,

dawak muihbararak balna yakat bik diyultang mayuyulwang:

8Ma as kat makau sakkidika yaklau

muih balna kidika dawak nisan balna kidika bik wayahyakna dai,

dawak tawan balna sauni kiwi watwa kidika āwi dana dai.#Ap.w 17:26.

Kaunah Israel muihni balna kidika laih dikulwi dakana dai,

9bahang Dawan dini pahni kidika laih, witing muihni balna kidika,

Jacob tawanni kidika ki.

10Kuma kauhnimak walang yakat kalpakna dai,

wing wauhwi sau buhni yamna yakat;

tingni kau wakaihwi duwi, disumalna dai

dawak maintalna dai sihm witing walanibis yal dibin as kapat.

11Sihm yakal as ūni minityak bahlwa witkidika kapat

dawak walanibis balna yakat kulninna dulauwi witingna bik yaklauwi bahlna atninna,

Dawan bik kaput witing lawani balna kidika ririhna dai

dawak duwi asang balna yakat diduwi kiuna dai.#Ex 19:4.

12“Dawan manah tanitna kana dai, muih ūk laih disdai;

¡dawan dauh as bik ilpnina kawas dai!

13Diduwi kiuna dai minit bayakna atninna

sauni asangni malaluihni balna yakat,

di dahnin pāni balna yakat di minik balna kidika kau dibayahna dai,

kipala balna kidika kaupak amak diawakat didina dai

dawak di dadasni kidika kaupak disala diana dai;

14tuninaruh balna kidika kaupak tāwas dawak tāwas yaklana bik duduna dai,

dawak sīp kurih as laihna yayamni balna kidika kakasna dai,

Basán sīpni ahalmuk dawak kutsni ahalmuk balna kidika bik kakasna dai;

plawar minik yayamni kidika kakasna dai

dawak wain dawi wain minik wasni palni kidika bik didina dai.

15“Kaunah Jesurún#32.15 Jesurún Israel yakat ayangni ūk pakna. Sinsni lani kidika laih dauh ki. laih salana dai,#Dt 33:5,26; Is 44:2. dawak kalni wauhna dai

(uba palni salana kat salani kidika yaringni dai),

dawak Papangni kalyamna muihni kidika ruhmwi dana dai;

tanit dakyang dawak kallaihwi yakyang yakat dutni kalyamna dai.

16Papang kulnin daukalnin kidika uhusna dai

wayani dauh dudutni balna yakat ayangni tanit nuhni yamwi;

17spirit dudutni balna yakat sakripais yayamna dai,#1 Kor 10:20.

dawan dauh balna muhnilau kau amanglalawas dai kidika yakat;

dawan dauh balna wisam uiwi kakana kidika yakat,

papangnina balna wat as bik prinias yayamwas dai kidika yakat.

18“Israel damatkahnayah, papangma dawak tamatdakyang yakat;

Papang as sangmaka mana yakat damatkahnamahn.

19Dawak Papang laih kidika talwi kulnin daukalna dai,

dawak walanibis ahal dawak yayal balna yakat bik niningnakauh yaklauna dai;

20dawak aput yulna dai:

‘Manna yakat dangbahki ki,

¡dawak talki ki angkat yawa wattanamapa!

Rahm palni manna laih dutni muihnimana,

walabis balna yamni kulwas atnin kidika.

21Minit atnin#Ex 20:5; 1 Kor 10:22. kidika yakat yauhuswi dawan as dawan awas kidika karak,

daninawan dauh balna karak kulnik daukakalwi;

¡bahang yang lawik diusna awaki tawan as tawan awas kidika yakat,#Rom 10:19.

tawan as amanglanin dukih kalawas kidika yakat kulnin daukalnayang karang!

22Kulnik daukalnin kidika laih sihm kuhpau as kapat dahlna ki,

dawak sau balna paslaluih bik daihni busna karang;

sau kidika laih minik balna kauna busyamna karang,

asang balna rahni yakat kuhpau lakna karang.

23Witingna minitna yakat di dudutni balna bitik kidika laknayang karang,

langkisa balna bitik kidika witingna niningna yakat ruhmnayang karang;

24yuh dawak yamah kau bik dadauwarang;

wing dutni as yaklau didaukalmukna karang;

witingna niningna yakat asangpas dini anyang balna sihnayang karang

dawak bil dudutni bik sihnayang karang.

25Ta nunuhni balna yakat walanibis balna kidika isparah baini kau dauwi bubukna karang,

dawak ū balna yakat laih muihsakdaunin kidika king kakana karang;

muih ahal wawahma dawak yayal sirarau bik dadauna karang,

muihbararak balna dawak muihbinina ta susuwa kauna bik dadauna karang.

26‘Yang laih diruhna atnik kulnayang dai

dawak witingna sinsnina kidika sau kaupak uswi yakna atnin,

27kaunah witingna niningnakauh yaklalauwa balna kidika yaklau sarahni diyuyulwarang kidika wauhnik yultasdanayang dai;

yang nikingkauh yaklalauwa balna ayangnina nuhni yayamwarang kidika yultasdanayang dai

dawak aput yuyulwarang kidika:

Adika laih Dawan yaklau yamwas ki;

mayang maparaski kau yamnamayang.’

28“Israel laih witing lani kidika disna ki;

¡amanglanin lani kidika diski!

29Witingna kidika sins duyang balna kat laih, amanglalawarang ki,

amanglalawarang ki angkat uiwi wawatwarang kidika.

30¿Amput muih aslah yaklau yamwakat muih tausin kikiranayah?

¿Dawak amput muih bu yaklau yayamwakat muih tausin salap kikiranayah?

¡Kat Dawan tanitna dakyang yaklau,

witingna niningnakauh yaklalauwa balna tingnina yakat āna kidika yulni!

31“Mayang manikingkauh yaklalauwa balna kidika laih yamni amanglalawi

tanitna dakyang kidika laih sipawas ki mayang matakit dakyang kidika karak dawakat.

32Witingna laih wain daukakalna balna kidika kapat ki,

Sodoma dawak Gomorra sulani balna,

wain tapapahlni dawak dudutni yayakwa kidika;

33witingna wainnina kidika laih bil puinisin,

¡bil puinisin dutni kidika!

34“Adika dini balna bitik laih kulnik yakat atik dutayang;

sihm lalah baksni as kapat apaktik dutayang,

35angdika mani#Rom 12:19; Hib 10:30. yang lawik biritik yamki kidika mani#32.35 Biritik yamki kidika mani: ulna umani balna yakat laih kaput yulwi. Hibru kau laih biriwi yamnin kidika laih yang diki. dawak witingna dinina kidika diaki mani yakat,

bukwarang mani kidika kiwi kawarang mani yakat.

Witingna daukalninna mani kidika laih uman uliswi,

¡awarnina kidika uman uliswi!’

36“Dawan laih witing tawanni kidika tanitdakna kalahwarang

talwak parasnina dis kalwarang mani yakat;

Dawan laih witing dini yamyang balna yakat miniknakun talna karang#Sal 135:14.

talwak parasnina dis dawak pararasni bik awas kat.

37Bahang witing yaklau aput diyulna karang: ‘¿Angkat bangyah manna damanawan dauh balna,

tamatnadakyang balna kultamana dai kidika,

38sakripais yamtanang salani kakasna dai kidika

wain didina dai diayawa kidika?

¡Yaklauwi ilp mananawang!

¡Aiwi tingnina dinit yakat manaāwi duduwang!

39Yang manah ki Papang;

yang kaupak dawan ūk balna laih diski.

Yang lawik sangnika kalatayang dawak bik daktayang;

yang lawik muihni kidika daktayang dawak bik wattik yamni yamtayang.

¡Muih as bik sip yang paraski kaupak kiri yaklawas ki!

40Makau kisang yakat tingki dulautayang,

dawak yang ban kaput atnik kidika yulni pramis yamtayang

41iskiparah yaringni kidika baini yamki mani,

dawak la kat kidika yamki mani,

yang nikingkauh yaklalauwa balna yakat biritik diyamnayang karang.

¡Yang yakat dutni yakukulwa balna dinina kidika dianayang karang!

42Sikibang balna kidika laih ā kau kahnayang karang,

dawak iskiparah kidika laih witingna yakat ina karang;

¡muihnina yakat didakna balna dawak silak muihni balna bik ānina!

¡Waihla tunan muihni balna dawak basnina nanaini duduwa balna kidika ānina bik!’

43“¡Nisan balna alasna alahwanauh, Papang tawanni muihni balna karak!#Rom 15:10.

¡Witing yaklau biriwi yamna karang dini yamyang balna dadauna kidika yulni,#Rib 19:2.

witing niningkauh yaklalauwa balna yakat biriwi diyamna karang

dawak witing sauni dawak tawanni dutni kidika bik dawak disna karang!”

Moses yakat witni sumalna balna kidika

44-45Moses laih Israel muihni balna bitik muhnina yakat yaklauna dai dawak, Nun walanibis Josué karak aslah, adika unbauna yulna dai tatuna kaupak witni kat. 46Usnit kat Israel muihni balna yakat aput diyulna dai:

“Manna yamni kulta talnauh warmani yang lawik manayulnayang dini balna bitik kidika, dawak walamanabis balna yakat diyultanang lan kalalahwang adika lāni yulni balna kidika. 47Kat manna sirihni laihta yamnamna dini awaski; adika lāni laih manna sangmanaka, dawak kidika karak Jordán wasni nakas kau sau pakkidika yakat ma mahni yalahnamana karang, kidika yakat pamana dutanama kidika yakat.”

Papang yaklauwi kalana Moses witing talna atnin pramis sauni kidika

48Kidika mani Dawan yaklau Moses yakat kiwi aput kalyulna dai:

49“Abarim asangni balna yakat yawah dawak Nebo asangni yakat ilwah, moabita sauni, Jericó muhnityakat sakkidika, dawak kidika kaupak talah Canaán sauni kidika, kidika sauni Israel muihni balna yakat diaki ki witingna dinina. 50Kidika asangni ilwama kidika yakat, daumaki dawak yawa tawanma muihni balna karak kalpakma ki, man wirahma al Aarón Hor asangni yakat dauwi kiwi witing tawanni muihni balna karak kalpakna kaput. 51Manna bu mana kidika laih Israel muihni balna muhnina yakat barangni awasmana dai, Meriba-cades wasni yakat bangdai mani, Zin kauhnimak walang yakat, bahang witingna muhnina yakat rispik yayamtasmana dai. 52Kaput bahang, naikau lakta talma ki Israel muihni balna yakat sau diaki kidika, kaunah kidika yakat āwas awama ki.”#Nm 20:10-13; 27:12-14; Dt 3:23-27.

Currently Selected:

Deuteronomio 32: SUMU

Highlight

Copy