Deuteronomio 31
31
Josué, Moses pāni yakat kana kidika
(Nm 27:12-23)
1Moses watwi Israel muihni balna bitik karak yulbauwi aput diyulna dai:
2“Yang laih kurih 120 dutayang, dawak paraski disyang pa ūk ūk yakat likatnik. Baisa kidika minityakat Dawan yaklau yayulna yang laih Jordán wasni kidika daklawas awaki ki.#Nm 20:12. 3Kaunah Papangmana Dawan kidika laih manna tamanatuna duwarang ki, dawak manna yawanama yakat adika nisan balna daukalmukwarang ki, witingna saunina kidika manna duna atnamna yulni. Josué laih manna tamatna yakat kiwarang ki, tatuna kapat, Dawan yaklau yulna kaput. 4Dawan yaklau adika nisan balna akat sihm amorreo balna kingnina Sehón dawak Og witingna saunina kauna daukalmukna kaput diyamna karang.#Nm 21:21-35. 5Dawak Dawan yaklau yamwakat adika nisan balna manna tingmana yakat bubukwarang mani, manna yakat ais yamnin manayulnayang kidika bitik yamtanama witingna yakat. 6Kulnamna dadasni dawak bik barangni awanauh; witingna karak kalpaktanama mani yamadunin awas ki, dawak bik muihsak daunamna awaski, kat manna Papangmana Dawan laih manna karak ki dawak manadawas karang ki dawak bik manaruhmwi dawas karang ki.”
7Usnit kat Moses yaklau Josué yakat kalyulwakat kiwak Israel balna muhnina yakat aput kalyulna:
“Kulnam dadasni dutah dawak bik barangni awah, kat man lawa adika muihni balna duyawama ki Dawan yaklau manna muihmanabararak balna yakat pramis yamna dai kidika sau manana atnin, dawak man lawa yamtangkat sau kidika duduna karang ki. 8Dawan witing palni man tamatyakat kiwarang ki, dawak bik man karak karang ki; maruhmwi dawas karang ki dawak bik tamat dakwarang ki;#Jos 1:5; Hib 13:5. kaput bahang, yamaduwinih dawak bik bapuh atnah.”
Tras dawak diswa kurihni yakat lā yulwi talnin kidika
9Moses witing adika lāni ulwi dana dai, dawak libait sumalniyang balna tingnina yakat āwi dana dai Dawan lani baksni duwi uiwa dai kidika yakat, dawak Israel muihnibararak balna bitik yakat diana dai, 10adika dini balna bik yamnin karuk:
“Kurih tiaskaubu laihwa bitik kau, tras dawak diswa kurihni kiwi kawa yakat,#Dt 15:1. pan ting kau ū labanni yayamwa mani alasnina kidika,#Dt 16:13-15. 11Israel muihni balna bitik Papangma Dawan muhni yakat kalududuhwarang mani witing pa as walwi yakna kidika yakat, adika lāni yulwi talna karang witingna bitik muhnina yakat.#2 Re 23:2; Neh 8:1-8. 12Tawan muihni balna bitik kalududuhna karang, muih ahal dawak yayal balna bik, dawak walabis balna dawak pa ūk muihni balna tawanmana nunuhni balna yakat yalalahwa kidika balna bik, lā yulni kidika dakana atninna dawak Papangnina Dawan yakat rispik yamna atninna, dawak lā wauhnitaya yakat ais yulwa kidika bitik lan kalahna atninna. 13Kaput laih manna walamanabis balna kidika, kidika lāni di as bik amanglalawas kidika, dakaninna sip karang dawak Papangnina Dawan yakat rispik yayamwarang sangninaka bitik yakat manna sau as dutanama kidika yakat Jordán wasni daklawa.”
Dawan yaklau Moses las sumalna kidika
14Usnit kat Dawan yaklau Moses yakat aput kalyulna:
“Talah, daunam mani kidika uman uliswi; kaput bahang Josué yakat kalyultang kaiwang, dawak manna albupak kalpaknin ūni labanni yakat yawanauh, yang lawik manayulna atnik ais yamnamna kidika.”
Moses dawak Josué karak kalpaknin ūni labanni yakat uina dai, 15dawak kidika yakat Dawan kalahna dai mukus pihni as kau, kidika mukusni laih ū labanni kiwi kawa yakat watna dai. 16Bahang Dawan yaklau Moses yakat aput kalyulna:
“Man laih sirihni palni dauma ki, dawak adika tawanni laih muih ūk balna saunina duduwarang kidika daniwan dauh balna karak daukakalwarang ki; bahang yaruhmwi dawarang ki dawak witing karak pramis yamnayang kidika bik bahpamwarang ki. 17Kaunah kulnik daukalnin kidika laih witingna niningna yakat dahlna karang, dawak diruhmtik daki ki; yang laih witingna yulnina di as kultik kalbautas awaki ki, dawak di dudutni balna dawak kulwi kalbaunin balna bik mahni palni kaiwarang ki witingna yakat, witni kat aput yuyulwarang: ‘¿Mayang Mapapangki laih mayang karak awaskat adika wauhnin wauhda awasyah?’ 18Kaunah kidika mani kiwi kawarang mani kat, yang laih baisa witingna kaupak naikau alahwaki ki, di dudutni balna mahni yayamna kidika yulni dawak dawan dauh ūk balna yakat ayangni tanit nuhni yayamna kidika yulni.
19“Bahang waralaih, adika unbauna ultanauh dawak Israel muihni balna yakat disumaltanauh, witingna unbauna atninna dawak witingna niningna yakat witnis as atnik. 20Kat yang lawik witingna muihninabararak balna yakat pramis diyamnayang sauni yakat diatingkat kakana mani kat, sau as tāwas dawak amak kidika sihm was kapat kikira kidika, dawak kaswi minitna bayakwi salalawarang usnit kat, dawan dauh balna ūk usnitna uiwi ayangnina tanit nuhni yayamwarang ki, dawak yang yakat laih dutni yayamwi prakimis kidika babahwarang ki. 21Kaunah dudutni balna dawak kulwi kalbaunin balna kidika mahni palni aiwarang mani kat, bahang adika unbauna laih witnis as karang witingna niningna yakat, bahang sulanina balna laih isningnakatwi unbabauna karang; kat sau dianik pramis yamnayang kidika yakat diating kakawas tanitkauh, yamni amanglatayang angdika niningkauh kulninna kukulwa kidika.”
22Sihm kidika mani Moses witing kidika unbauna ulna dai, dawak Israel muihni balna yakat disumalna dai.
23Nun walanibis Josué yakat, Dawan yaklau adika dini yamnin kalana dai:#Nm 27:23.
“Kulnam dadasni dutah dawak barangni awah,#Jos 1:6. kat man lawa yamtang kat Israel muihni balna kidika kakawarang ki sau dianik pramis yamnayang yakat, dawak yang laih man yaihmat yakat awaki ki.”
24Moses witing adika lāni balna wauhtaya as kau ulwi dana usnit kat, 25libait muihni balna Dawan lani baksni duwi uinin balna yakat aput diyulna dai:
26“Adika lāni wauhnitaya duta Papangma Dawan lani baksni kidika yaihnit yakat laktanauh, kidika yakat tuskarang witnis as kapat manna namangna yakat. 27Kat yang amanglatayang manna laih tawan as kulnamna dutni ki dawak bik tapdadasmana; dawak warmani yang baisa sangka yang kidika manna pasmangna yakat, Dawan niningkauh lawanamana, ¿yang dauki usnit kat laih ais amput karang? 28Adika pāni akat muihbararak balna bitik dawak sulani balna taninatuna balna bik duaitanauh, yang lawik adika dini balna yulni diyulna atnik dawak kisang dawi sau kidika yakat witnis kapat ānik witingna niningnakauh. 29Kat yang amanglatayang yang dauki usnit kat daukakalwarang ki dawak tanitna yakat uinin tani dianayang kidika kaupak dadawarang ki; dawak bik amanglatayang tanitna yakat dutni kidika kaiwarang ki, Dawan minikpa yakat dutni yayamwa kidika yulni, dawak kidika karak kulnin daukakalwa yulni.”
Moses unbauna kidika
30Bahang Moses witing adika unbauna yulna dai, tatuna kaupak witni kat, Israel muihni balna bitik kalududuhna muhnina yakat:
Currently Selected:
Deuteronomio 31: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
