Deuteronomio 30
30
Watwi laihwi dulaunin dawak blis yamnin lani balna kidika
1“Manna yakat manayulnayang balna bitik kidika kaiwarang mani kat, blisin dawak la tuhnin karak walyakta dunamna mananayang kidika, dawak kidika dini balna kulta talnauh Papangmana Dawan yaklau manasihwarang kidika pāni yakat, 2dawak Dawan yakat wirlawanama kat ismangna dawak solma bitik karak, manna dawak walamanabis balna kauna, warmani yang lawik manayultayang kaput, 3Papangmana Dawan yaklau manna suermati kidika wirlana karang dawak mamaknakun manatalna karang. Sau balna paskaupak watwi manauduhna karang muhnilau kau manasihna dai yakaupak, 4dawak manalaihwi pa ūk kau manaduwi uina kidika rani bangawanama karang bik sau pāni naikau balna yakat, kidika kaupak Papangmana Dawan yaklau manayamwakat nawatta aiwanamana karang, dawak kidika pāni kat kiwi manawalna karang. 5Dawan yaklau yamwakat watta nawatta aiwanamana karang muihmanabararak balna yalalahwa dai kidika sauni yakat, dawak watta manna dunamana karang; manayamwakat baraknamana karang dawak walamanabis balna bik mahni palni manana karang muihmanabararak balna yakat diana dai kidika karak dawakat. 6Manna dawak sulamana balna isningna#Dt 10:16; Jr 4:4; Rom 2:25-29. yakat bik pramis sainni kidika taihna karang, manna ismangna dawak solmana bitik karak dalani kaltalnamna yulni, witni kat sangmanaka duna atnamna yulni. 7Papangmana Dawan yaklau manna namangnakauh yaklalauwa balna dawak dutni manakulwi manauhuina balna bitik minitna yakat adika lani tuhna balna bitik kidika lakna karang, 8dawak manna laih Dawan yakat wirlawa yulni kat dakanama, dawak lani balna warmani yamnin manayultayang kidika bitik lan alahwanamana karang. 9Bahang Dawan yaklau yamwakat di balna yamtanama kidika bitik yakat baraktanama, dawak walamanabis balna yakat, turuh sahnin dawak di minik yaknin yakat bik; Papangmana Dawan yaklau manna yakat yamni manayamnin kulwarang, muhnilau kau manna muihmanabararak balna yakat yamni diyamwa dai kaput, 10rahm manna Papangmana Dawan yakat yulni kat daka dawak adika lā wauhnitaya akat la balna ulna yakat laihta yamtanama kat, dawak bik witing yakat ismangna dawak solmana bitik wirlawanama kat.
11“Warmani adika lani manna yakat manatayang kidika laih manna namangna yakat dadasni palni awaski, dawak sip yamtas atnamna dini bik awaski. 12Makau kisang yakat sakawaski, aput yulna atnin: ‘¿Wais sipyah makau kisang yakat kilna atnin mayang mayulki, kaput karak duaiwi manikingkawakat lan malahwana atnin?’ 13Kuma nakas yakat bik sakawaski, aput yulna atnin: ‘¿Wais kuma kidika dakyaklawarang yah mayang mayulki, kaput karak duaiwi manikingkawakat lan malahwana atnin?’ 14Nawatkauh, la kidika laih manna yaihmatna palni yakat sakki; kungmanamak yakat dawak kulnamna yakat bik sakki, laihta yamna atnamna yulni.#Rom 10:6-8.
15“Talnauh, warmani manna yakat manatayang walyakta duna atnamna sangka atnin dawak yamni atnin kidika karak, pis as yakat laih kidika, dawak pis ūk yakat laih daunin kidika dawak dutni kidika karak. 16Warmani yamnin manayultayang kidika kat dakanama kat, dawak Papangmana Dawan yakat dalani kaltala tani balna yakat usnit uitanama kat, dawak lani balna kat laihta yamtanama kat, sangka awanama dawak walamanabis balna bik mahni dutanama, dawak Papangmana Dawan yaklau blis manayamna karang sau as dutanama kidika yakat. 17Kaunah adika dini balna bitik kau dakas data dawan dauh ūk balna yakat usnit uita prinias yamta witingna muhnitna yakat limbabahtanama kat, 18adika minitni manayultayang manna laih sirihni palni dauna awanama, dawak Jordán wasni daklawa sau as dakyakta dutanama kidika yakat ma mahni yalahdas awanama. 19Adika mani makau kisang yakat dawak sau yakat bik witnis ātayang manna namangna yakat, yang lawik mananayang sangka atnin kidika dawak daunin kidika karak walyakta duna atnamna, dawak blisin dawi la tuhna kidika karak bik. Bahang sangka atnin kidika dutanauh, manna dawak sulamana balna bik sangka atnamna yulni; 20Papangmana Dawan yakat dalani kaltalnauh, yulni kat dakanauh dawak witingna yakat barangni awanauh, kat kidika balna ki manna sangmanaka kidika dawak kurih mahni yalahna atnamna Dawan yaklau muihmanabararak balna Abraham,#Gn 12:7. Isaac#Gn 26:3. dawak Jacob#Gn 28:13. yakat dianin pramis yamna dai kidika.”
Currently Selected:
Deuteronomio 30: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
