Deuteronomio 29
29
Dawan yaklau Moab yakat Israel muihni balna karak pramis yamna
1 # S.b. 29:1-29 kidika laih S.b. 28:69—29:28 kat kidika simh ki hibru kau ulna kidika.Adika pramis yulni balna ki Dawan yaklau Moses yakat kalyulna kidika Israel muihni balna karak yamna atnin Moab sauni yakat, Horeb asangni yakat witingna karak uman pramis yamna dai kidika minityakat. 2Moses yaklau Israel muihni balna bitik yakat uduhwi aput diyulna:
“Manna bitik palni talnamana Dawan yaklau Egipto sauni yakat ais yamna kidika Fero yakat, dini yamyang balna dawak sauni yakat bik, 3dawak manna laih witnis mana kidika wauhnin nunuhni, sain balna dawak taldas dini balna yamna kidika bik. 4Kaunah warmani kat Dawan yaklau amanglanin kidika manawas ki dawak kidika tanka balna bik amanglana atnamna manawas ki.#Rom 11:8. 5Kurih 40 pasyakat yang tamanatuna dunayang kauhmak wanilang yakat, dawak kidika mani balna yakat asmanana dawak susmana balna bik witwasdai. 6Plawar busna kastasmana dawak wain bik ditasmana, dawak dinin dini parasni bik ditasmana, kaput laih manna amanglana atnamna ki Dawan laih manna Papangmana kidika.
7“Adika sauni akat mahaiwi mahana mani kat, Hesbón#Nm 21:21-30. kingni Sehón dawak Basán#Nm 21:31-35. kingni Og kauna kalahwi maikalbabauna dai, kaunah mayang malawi minitna bayaknamayang dai 8dawak saunina kidika dakyakdi dunamayang dai, dawak Rubén, Gad dawak Manasés sulani balna papuswayah yakat bik witingna dinina dianamayang dai.#Nm 32:33. 9Kaput bahang, adika pranimis yulni balna kidika kat yamtanauh dawak bik lan alahwanauh, di balna yamtanama bitik yakat yamni manah atnin yulni.
10“Warmani manna bitik Papangmana Dawan muhni yakat kaluduhna bangmana: sulani balna tanituna, muihbararak, kalbauyang tanituna, Israel ahalni balna bitik, 11walabis, muih yayal dawak manna pasmangna yakat pa ūk kaupak yalalahwa balna kidika bik, kuh daknin pāni kaupak was butnin pāni kat, 12Papang ayangni kau pramis yamna atnin Papangma Dawan yaklau warmani manna karak pramis yamwa kidika yakat. 13Warmani kaupak manna laih witing tawanni mana dawak witing kidika laih manna Papangmana, muhnilau kau pramis diyamna dai kaput, Abraham, Isaac dawak Jacob yakat bik, manna muihmanabararak balna dai yakat. 14Kaunah manna yakat manah laih Dawan yaklau adika pranimis manayamwas ki 15kaunah warmani mayang karak witing muhni yakat dis balna kidika bik. 16Manna yamni amanglatamana mayang Egipto yakat amput yalahnamayang dai kidika dawak matakipas yakat nisan balna karak kalpakdi amput bayaknamayang kidika bik, 17yakat dawan dauh balna talnamayang dawak pan, kipala, lalah dawak gol kau bik wayani dauh balna yayamna kidika bik, kidika muihni balna yaklau ayangni tanit nuhni yayamwa kidika. 18Manna pasmangna yakat dis atnin ki muih ahal dawak yayal bik, walanibis balna dawak sulani balna bik, warmani Mapapangki Dawan yakat ruhmwi dana atninna kidika nisan daniwan dauh balna yakat ayangni tanit nuhni yamwi. Manna kaupak as bik sihm pan rikni tapahlni daunin dini kapat atnin awaski.#H e 12:15.
19“Adika pranimis yulni balna dakanama usnit kat, manna kaupak angdika muihni witing yamni kaldakawi aput kulwarang kat: ‘Di balna bitik yamni yakalahnin ki, yang amput dukih yawa kaput yamki karang bik’, witing yulni di balna bitik daukalwarang ki. 20Dawan laih witing dutni kidika dawak diswas karang ki, kaunah kulnin daukalnin kidika yaklauwarang ki kidika alni minityakat, dawak adika wauhnitaya akat la tuhna yulni balna ulna bitik kidika witing minityakat bukna karang ki, dawak Dawan yaklau witing sulani balna kidika sau kaupak dismukwarang ki. 21Dawan yaklau Israel sulani balna bitik paskaupak yakwarang ki kidika alni, dawak kalyamwakat dutni yakat bukwarang ki, pramis wauhnitaya akat lā balna amput ulna kat kaput. 22Sulani balna baisa aiwi kalalahwas kidika, usnit kat manna sulamana balna aiwarang kidika, pa ūk muihni balna sau naikaupak aiwarang kidika balna bik, adika sauni akat Dawan yaklau wah dawak siknis balna sihwarang kidika tatalwarang ki; 23adika sauni bitik laih suhlpa, kuma dawak sau busyamna manah kat tatalwarang ki. Kidika sauni yakat di dahnin bik sipawas karang ki dawak di as bik minik yakwas karang; kidika yakat dibasta as bik barakwas karang, Sodoma dawak Gomorra,#Gn 19:24-25. Adma dawak Zeboim tawanni nunuhni balna yakat daukalna dai kaput, kidika balna laih Dawan kulnin daukalwi daukalmukna dai.
24“Bahang muih balna bitik aput yulwi dakakawarang: ‘¿Ais yulni Dawan yaklau adika sauni akat kaput yamnayah? ¿Ais yulni kaput kulnin parasni daukalnayah?’ 25Dawak biriwi nangnitlanin kidika laih adika karang: ‘Kat witingna muihninabararak balna Papangnina Dawan yaklau pramis diyamna dai kidika yakat ruhmwi dadana dai kidika yulni, Egipto kaupak diyakna mani, 26dawak dawan dauh ūk balna amanglalawas dawak di as bik diayawas yakat uiwi prinias yamwi muhnitna yakat abubukna kidika yulni. 27Kidika yulni Dawan kulnin daukalna dai adika sauni niningyakat, dawak kidika minityakat adika wauhnitaya akat la tuhna yulni balna ulna kidika bitik dawak bukna dai; 28dawak witingna saunina kaupak kangwi yakna dai kulnin daukalna karak, dawak sau ūk balna yakat sihmukna dai, warmani kalahwa kaput.’
29“Di as as mayang amangladas ki: kidika balna laih Mapapangki Dawan dini balna; kaunah di as as kidika balna laih mayang yakat dawak mawalakibis balna yakat bik yakwi manikingkana ban kaput yamna atnin yulni: adika lāni balna bitik.
Currently Selected:
Deuteronomio 29: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
