Deuteronomio 28
28
Yul dakayang balna yakat blis diyamwa kidika
(Lv 26:3-13; Dt 7:12-24)
1“Rahm man Papangma Dawan yulni kat daka dawak lani balna kidika bik lan alahwama kat warmani yang lawik yamnin mayultayang kidika, Dawan yaklau sau akat tawan balna bitik minitna yakat madana karang ki. 2Kidika minit yakat, adika blinisin#Dt 11:13-17. balna bitik man mamat yakat kaina karang dawak dunaman karang Papangma Dawan yulni kat dakanaman kidika yulni. 3Ayangma nuhni yamna karang tawan nuhni yakat dawak di dahnin pāni yakat bik. 4Man walamabis balna dawak di minik dahnaman balna kidika bik dawak tumaruh yayal balna walaninabis balna kidika, sīpma dawak didauh balna dutaman kidika bitik yamni diyamna karang. 5Usmalun dawak plawar tiktaman pāni kidika bik yamni yamna karang, 6dawak man ais yamma balna bitik kidika yamni manah awama.
7“Dawan yaklau man namangkauh yaklalauwa balna kidika man tingma yakat āna karang makalbabauwarang mani kat. Man namang yakat kalparwi lapapakna karang, kaunah man kaupak kalrawi kikirana karang.
8“Dawan yaklauwi man di minit yakta putaman ūni balna kidika minityakat dawak di yamma balna kidika bitik yakat, dawak sau mawarang kidika yakat mayamwakat alasna yalahma.
9“Witing lani balna kat yamma kat dawak tani balna yakat usnit uima kat, Papangma Dawan yaklau witing dini mayakna kidika ban maduwarang, pramis mayamna kaput. 10Bahang sau tawanni balna bitik matatalwarang man mamatyakat Dawan ayangni yulwa kidika, dawak bik yamamaduduwarang. 11Dawan yaklau namangkana karang minikun talnin lani duwa kidika walabis mahni, tumaruh balna walaninabis mahni dawak muihmabararak balna yakat sau dianin pramis diyamna kidika yakat, di minik minitbayak mawarang. 12Dawak witing ritsni kidika apahwi mana karang, kidika laih makau kisang kidika, sauma yakat was dukih kalawa kidika kalana atnin; dawak warkma balna bitik mawakat baraknaman karang. Nisan balna mahni yakat wayaki dianin sip awama, kaunah man laih muih as bik yakat wayaki yultas awama. 13Dawan yaklau tatuna malana karang, dawak witni yakat laih awas; ūk balna bitik minitna yakat ban kaput awama, dawak dinit yakat laih awas, warmani yang lawik Papangma Dawan lani balna kidika kat dakanam mayultayang kidika kat dakama kat kamanah ki, dawak bik lan alahwana atnam, 14kidika balna kaupak data naikau alahwa dawan dauh ūk balna yakat usnitna uita prininaias yamtas.
Yul dakawas atnin yulni usnit kat kaiwa kidika
(Lv 26:14-46)
15“Kaunah man Papangma Dawan yulni dakas, warmani yang lawik witing lāni balna yamnin mayultayang kidika lan alahwas awama kat, man mamatyakat aiwarang ki dawak adika la matuhna karang: 16Tawan nuhni yakat dawak di dahnin pāni yakat bik la matuhna karang. 17Usmalun dawak plawar tiktaman pāni kidika bik la dituhna karang. 18Walamabis balna, di minik balna dahnam dawak tumaruh yayal balna walaninabis, sīpma balna walaninabis dawak didauh balna dutamana kidika bitik laih la dituhna karang. 19Dawak man di balna yamma kidika bitik yakat la matuhna karang.
20“Dawan yaklauwi la matuhna karang, tunama balakna karang, dawak di balna yamma kidika bitik yakat la matuhna karang, dawak ma parahni kat bitik palni madaukakalna karang, di dudutni yamta ruhmta danaman kidika yulni. 21Dawan yaklauwi man mamatyakat siknis dutni as sihna karang sau as duma kidika yakat maīpamna atnin yulni. 22Daunin sikninis balna, yamah dudutni, muih muihni bangwa, daihni, was buhlakwa dawak plamawar balna minik minityakat banibil balna dawak siknis balna usmat uhuina karang madaukalpamna atnin yulni. 23Makau kisang kaupak was lauwa kidika lauwas karang; dawak sau akat laih, sau di minik yakwa kidika yakwi mawas karang. 24Dawan yaklau man mamatyakat sau yahamni dawak kauhmak sihna karang was launin pāni yakat, angkat mani dauma kat 25dawak namangkauh yaklalauwa balna yaklau mataihwi lababanwarang kat. Witingna niningna yakat kalparta lapakma, kaunah witingna kaupak kalruhta irama dawak sau kingni balna bitik yakat yamaninaduma. 26Di lawani balna dawak di anyang balna bik muihma kidika kakasna karang muih as bik uswas kat.
27“Dawan yaklau mayamwakat pilau dalani kidika wauhma, sihm Egipto muihni balna kaput, dawak suru karuk, dawak adika sikninis balna kaupak sip yamni mayamwas karang. 28Mayamwakat di dauh balna manah yulma, makdaih dawak tunama bik balakna karang, 29dawak tulnah karuk likawama, sihm muih as minikpa di talwas kat puksani yakat likkapat. Di yamma balna bitik kidika yamwi makalahwas karang; mataihwi duna kidika ban kaldakama dawak muih as bik ilpma kawas karang. 30Marid alahwanam pramis yamma, kaunah pramis yamnaman yalni kidika muih al ūk karak kalangna karang; ū as yamma kaunah yawa āwas awama; wain panan as dahma, kaunah minik balna kidika kastas awama; 31tumaruh almuk kidika man muhma yakat dinimak dakna karang, kaunah muihni kidika kastas awama; man muhma yakat birimaku almuk kidika madakyayakwarang, dawak nawatwi mamawas karang, sīpma balna kidika laih man namangkauh yaklalauwa balna kidika tingnina yakat bubukna karang, dawak muih as bik ilp mawas karang dakyakta duna atnam. 32Man mamakpa yakat man walamabis ahal dawak yayal balna kidika pa ūk muihni balna tingnina yakat bubukna karang, dawak awar balna bitik yakat talkih mawarang, kaunah di as bik yamnam sipawas awama. 33Sau yakat di minik balna dahnaman dawak warkma balna alahwanaman kidika muhnilau kau muih talasman dai kidika muihni balna kakasna karang, dawak mataihna kidika dawak dutni mayayamwa kidika bik ban wauhna awama. 34Adika dini balna bitik talma mani kat, tunama dutni kalnaman karang. 35Dawan yaklau mayamwakat pilau dudutni wauhma kalasmamak balna yakat dawak barahmamak balna yakat dawak muihma nuhni bitik yakat, yamni mayamwas atnin.
36“Dawan yaklau yamwakat man dawak kingma bik manaduwi uiwarang nisan pāni as kau man dawak papangma balna kat bik amanglalawas dai kidika yakat. Kidika yakat dawan dauh ūk balna yakat dinina yamnaman karang, pan kau dawak kipala kau bik yamna dini balna kidika yakat,#Dt 4:27-28; 2 Re 17:4-6; 25:8-12. 37dawak yamadangni, yulma balna dawak sarahni bik matatalna karang Dawan yaklau tawan balna bitik kau maduwi kiwarang yakat. 38Di minik balna mahni palni dahma kaunah minit kidika bulah palni yakma, kat sisin balna yaklau kakaswarang bahang. 39Wain panan dahta maintalma, kaunah wain wasni kidika ditas awama dawak bik minik balna kidika daktas awama kat babil balna yaklau dahn yayamwarang bahang. 40Sauma bitik yakat olib panan duta awama kaunah salani kidika kahtas awama kat salani balna kidika silp utuhna karang bahang. 41Walabis ahal dawak yayal bik duma, kaunah man karak aslah awas karang kat laihwi sau ūk kau duwi uiwarang bahang. 42Man sauma yakat pan dahnaman balna kidika dawak minik balna kidika bik laih sisin balna yaklau daukakalna karang. 43Pa ūk muihni balna man sauma yakat yalalahwa kidika baisa parasni kakalwarang, dawak man parasma kidika laih baisa witwarang. 44Witingna yaklau di wayaki mamawarang, dawak man laih, nawatkauh, di as bik dis awama wayaki diana atnam; witingna laih tatuna karang, dawak man laih witni yakat awama.
45“Adika di dutni balna bitik laih man mamat yakat aiwarang ki, dawak usmat uiwi malaihwi maihina karang, kat Papangma Dawan yulni dakas dawak witing lāni balna kat yamnin yulna kaput yamtas danaman yulni. 46Adika dini balna laih man dawak sulama balna niningna yakat wauhnin dini as parasni karang, ban kaput atnin, 47alasna karuk dawak alas lani dis karak bik man Papangma Dawan yakat ayangni tanit nuhni yamtas danaman kidika yulni, di yayamni mahni mana dai kidika mani yakat. 48Dawan yaklau man namangkauh yaklalauwa muihni balna sihwarang kidika dinina yamnaman karang; yuh wauhma, was dikih, asna dis dawak pāt balna satni bitik wauhnaman karang. Dawan yaklau mayamwakat muih dinina yamta dalani nuhni wauhma, dauma mani kat. 49Sau akat pa as naikau palni kidika kaupak, Dawan yaklau man namang yakat sihna karang, yakal sirihni yaklauwi bahlwa kidika karak, nisan as yulni amanglatasman kidika; 50muih muhni dutni, kidika laih muihbararak balna yakat rispik dis karang ki dawak muihbinina yakat bik miniknakun dakawas karang ki. 51Tumaruh balna walaninabis kidika dawak sau yakat di minik balna dahnaman kidika balna kasna karang, daukalpamwi kat bik mawarang ki; plawar minik, wain, disala, tumaruh yayal balna walaninabis dawak sīpma balna walaninabis kat bik dawas karang ki, dawak man laih yuh daunaman karang.
52“Tawanma bitik yakat awaihdakwi kalbauna karang, daklana balna maluihni dawak rahni balna pararasni ānaman dai kidika bik tuklakna karang; agha, awaihdakwi kalbauna karang Papangma Dawan yaklau tawan nunuhni mana kidika balna bitik yakat. 53Man namangkauh yaklauwa muihni kidika tawanma nunuhni balna yakat kalbauwa mani kat, yuh parasni palni dauta walamabis balna, walabis ahal dawak yayal bik Papangma Dawan yaklau mana kidika bik kasnaman karang. 54Manna pasmangna yakat muih al as kulnin yamni kidika kat bik witing wirahni, yalni, dawak walanibis balna yakat bik dutni talna karang, 55witingna karak kalpakwi kasnin awas yulni walanibis muihni kaswarang kidika. Dawak di as bik kasnin dini dis karang tawan nunuhni balna yakat kalbauwarang mani dawak namangkauh yaklauwa muihni mayamwakat kaidinin yamadangni wauhma kidika tawanma nunuhni balna bitik yakat. 56Manna pasmangna yakat yal as yamni kidika kat bik, sau kidika yakat kalpas manah ataknin dukih kalawas dai kidika, witing alni yakat dawak walanibis balna yakat bik dutni talna karang 57walanibis balna yakwakat muihbin uduni kidika kalpakwi kasnin awas yulni;#28.57 kalpakwi kasnin awas yulni. Adika yulni laih hibru wauhnitaya yakat kalahwas ki. Kaunah S.d 55 yakat talah. kidika balna bitik kidika malwi kasna karang,#2 Re 6:28-29; Lm 4:10. bahang man tawanma nunuhni balna yakat kalbauwarang mani di as bik dis karang ki kasnin dini.
58“Adika wauhnitaya akat sumalna yulni balna ulna kidika lan alahwas awama kat, dawak Papangma Dawan ayangni yaksihni dawak nuhni kulna kidika yakat bik rispik yamtas awama kat, 59witing yaklau wah nunuhni dawak yamadadangni sihna karang man dawak sulama balna minitna yakat bik, dawak siknis dudutni sip yamni yamwas balna kidika bik sihna karang. 60Witing yaklau yamwakat Egipto wahni balna bitik kidika man mamat yakat watwi kaina karang, yamadangni bilmalalauna dai kidika, dawak kaput manah ban wauhnaman karang. 61Kidika minit yakat, siknis dawak wah ūk balna bik sihna karang sumalnin wauhnitaya akat ulwas kidika balna, angdika mani man maiwarang kat. 62Dawak man laih, Israel, muih mahni man dai kidika sihm kuma kauhnimak kapat, muih bulah wattanama, Papangma Dawan yulni dakas man dai kidika yulni. 63Dawak Dawan yaklau yamni dawak muih mahni mayamnin bik alasna dai kidika kaput, waralaih madaukalpamnin kidika alasna ki, bahang sirihni palni sau as duma kidika kaupak madutwi yakna karang. 64Dawan yaklau maruhwarang nisan balna bitik pasyakat, sau sutni nakas kaupak sutni nakas ūk kat, dawak kidika yakat muih ūk balna daninawan dauh balna yakat ayangni tanit nuhni yamnamana karang, pan dawak kipala daniwan dauh balna, man dawak muihmabararak balna kat bik amanglalawas dai kidika. 65Dawak kidika nisan balna pasyakat yalahma mani kat alasna dawak bik urupdas awama, kat Dawan yaklau mayamwakat yamaduna manah awama, mamakpa balna kidika kulnam bukna karuk dawak dukih palni karuk bik awama. 66Sangmaka yakat yamadangni kidika laih ban kaput karang; madah dawak pukta yakat yamaduna awama, dawak sangmaka yakat yamni palni awas awama. 67Yamadangni nuhni palni dakama, di balna talma bitik yakat, mapiris yakat aput yulma: ‘¡Bainah palni puklakwang!’, dawak pukta yakat laih yulma: ‘¡Bainah palni payahlawang!’ 68Dawak Dawan yaklau watta Egipto tani munah yawas awamaki matarang bik, kaput kaunah mayamwakat kuma kuring kau kidika pāni yakat nawatta yawanaman karang, dawak man namangkauh yaklalauwa muihni balna yakat muih dinina yamyang kapat mabakanpamna karang; kaunah muih as bik mabakanwi yaknin yulwas karang.”
Currently Selected:
Deuteronomio 28: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
