Deuteronomio 27
27
Ebal asangni yakat dinitkahwas atnin kinipala balna kidika
1Moses dawi Israel tawanni muihbararak balna yaklau tawan muihni balna yakat aput yamnin diyuyulna:
“Warmani manna yakat ais yamnin manayulnayang kidika bitik yamtanauh. 2Jordán wasni kidika daklawa Papangmana Dawan yaklau sau manawarang kidika yakat awanama kat, kipala nunuhni balna kidika dulauta di pihni karak kahta pihni yamtanama, 3kidika yakat adika manasumalnayang yulni balna bitik kidika ulna atnin. Kidika sauni tāwas dawak amak karak sihm was kapat kikira kidika yakat awanama kat kaput yamtanama, dawak Papangmana Dawan yaklau manawarang ki, manna muihmanabararak balna yakat amput pramis yamna dai kaput. 4Kaput bahang, Jordán wasni kidika daklawanama usnit kat, Ebal asangni yakat kipala dulaunin manayulnayang kidika dulautanama, dawak di pihni kau kahta pihni yamtanama. 5-6Kidika yakat kipala kau sakripais busnin pāni bik as yamtanama Papangmana Dawan dini. Kipala balna kidika laih nunuhni yakauna atnin sahna atnin awas.#Ex 20:25. Kidika sakripais busnin pāni yakat, Papangmana Dawan yakat sakripais karauni kauna busta kalatanama 7dawak wanaihni karak watwi yamnin kalahnin yulni sakripais bik bustanama; dawak Papangmana Dawan muhni yakat kasnin alasnina yamtanama. 8Kipala balna dulaunamana yakat yamni lāih ultanama adika manasumalnayang yulni balna kidika.”#Jos 8:30-32.
9Kidika usnit kat Moses dawak libait sumalniyang balna karak kalpakwi Israel muihni balna yakat aput diyulna:
“Israel muihni balna manna ap data adika yulni balna dakanauh. Warmani manna Papangmana Dawan tawanni kalnamana. 10Kaput bahang, manna witing yulni dakanamna ki dawak lāni balna kidika bik lan alahwanamna ki warmani yang lawik yamnin manayultayang kidika.”
La tuhna balna kulwi talna kidika
11Sihm kidika mani Moses yaklauwi tawan yakat adika yamnin diyulna:
12“Manna Jordán wasni kidika daklawanama usnit kat, Simeón, Leví, Judá, Isacar, José dawak Benjamín sulani balna kauna Gerizim asangni yakat wattanama tawan muihni balna yakat blis yamna atnin yulni,#Dt 11:29; Jos 8:33-35. 13dawak Rubén, Gad, Aser, Zabulón, Dan dawak Neftalí sulani balna kauna Ebal asangni yakat wattanama la tuhna atnin yulni. 14Libait muihni balna laih Israel muihni balna yakat taninatuna duduwarang, dawak yulnina parasni karak adika yulni yuyulna karang:
15‘Angdika muihni dawan dauh as kidik awaskat ayan buswi wayani dauh as yamwarang kidika laih la kaltuhna karang,#Ex 20:4; 34:17; Lv 19:4; 26:1; Dt 4:15-18; 5:8. di yamyang as yaklau yamna karang kat, dawak puksani yakat lakwarang kidika laih Dawan yaklau dutni talwi.’ Dawak tawan muihni balna bitik laih aput yuyulwarang: ‘Kaput karang.’
16‘Angdika muihni papangni kidik awaskat nanangni yakat dutni kalyamwarang kidika laih, la kaltuhna karang.’#Ex 20:12; Dt 5:16. Dawak tawan muihni balna bitik laih yuyulna karang: ‘Kaput karang.’
17‘Angdika muihni witing ūni yaihnit muihni sauni yakat kalmalnin yulni daklana kidika laihwi satuk yamwarang kat la kaltuhna karang ki.’#Dt 19:14; Job 24:2; Pro 22:28; Os 5:10. Dawak tawan muihni balna bitik laih yuyulna karang: ‘Kaput karang.’
18‘Angdika muihni muih minikpa di talwas kidika tani kaupak pirini yakat yakwarang kidika laih la kaltuhna karang ki.’#Lv 19:14. Dawak tawan muihni balna bitik laih yuyulna karang: ‘Kaput karang.’
19‘Angdika muihni pa ūk muihni, tingmak kidik awaskat papangni dis muihni yakat la awas yamwarang kat la kaltuhna karang ki.’#Ex 22:21; 23:9; Lv 19:33-34; Dt 24:17-18. Dawak muihni balna bitik laih yuyulna karang: ‘Kaput karang.’
20‘Angdika muihni witing papangni yalni karak kalalangwarang kidika laih la kaltuhna karang ki,#Lv 18:8; 20:11; Dt 22:30. bahang kidika karak rispik dis kalyamwi.’ Dawak tawan muihni balna bitik laih yuyulwarang: ‘Kaput karang.’
21‘Angdika muihni didauh balna karak wahni dutwa kidika laih la kaltuhna karang ki.’#Ex 22:19; Lv 18:23; 20:15. Dawak tawan muihni balna bitik laih yuyulwarang: ‘Kaput karang.’
22‘Angdika muihni witing wirahni yal karak kalalangwa kidika laih la kaltuhna karang, papangni niningkauh walanibis karangpa kidik awaskat nanangni niningkauh walanibis karangpa.’#Lv 18:9; 20:17. Dawak tawan muihni balna bitik laih yuyulwarang: ‘Kaput karang.’
23‘Angdika muihni unisah yal karak kalangwarang kidika laih la kaltuhna karang ki.’#Lv 18:17; 20:14. Dawak tawan muihni balna bitik laih yuyulna karang: ‘Kaput karang.’
24‘Angdika muihni witing wanaihni yakat malni kau pāt yakat āwarang kat la kaltuhna karang ki.’#Ex 20:13; 21:12-14. Dawak tawan muihni balna bitik laih yuyulna karang: ‘Kaput karang.’
25‘Angdika muihni witing muih as di talwas kat iwi lalah duwarang kidika laih la kaltuhna karang ki.’ Dawak tawan muihni balna bitik laih yuyulna karang: ‘Kaput karang.’
26‘Angdika muihni adika sumalna yulni balna kidika yakat rispik yamwas karang kat, dawak bik lan kalahwas karang kat la kaltuhna karang ki.’#Jr 11:3; Gal 3:10. Dawak tawan muihni balna bitik laih yuyulna karang: ‘Kaput karang.’
Currently Selected:
Deuteronomio 27: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
