Deuteronomio 26
26
Minitdis dis kalanin dini tatuna di minik kalahwa balna kidika
1“Angdika mani man Papangmana Dawan yaklau sau as man dima manawarang yakat āwama kat, dawak kidika yakat yalahma mani kat, 2sau yakat di minik dahta tatuna yakma kidika duta Papangma Dawan witing ayangni pāni walwi yakna kidika yakat duyawanaman karang.#Ex 23:19. 3Yakat duta yawa, sumalyang wark yamwa sakkidika muhni yakat yawa aput kalyulma: ‘Yang warmani lāih yultayang, Papangki Dawan muhni yakat, Dawan yaklau muihkibararak balna yakat sau yananin pramis yamna dai kidika yakat uman āwanayang.’ 4Sumalyang yaklau tingni yakat duwarang di minik balna duta yawa kalama kidika, dawak sakripais busnin pāni Papangma Dawan dini kidika muhni yakat lakna karang; 5bahang Papangma Dawan muhni yakat aput yulma:
‘Yang muihkibararak balna laih arameo muihni kaluduhna dibin dai, dawak Egipto yakat kawi yalalahna dai, usnit kat nisan as nuhni, parasni dawak muih bik mahni palni kalna dai. 6Kaunah Egipto muihni balna laih yangna yakat dutni yanayayamna, yanatataihna dawak muih dinina yamtik dalani dutni wauhnayangna dai. 7Kaput laih yangna papangkina balna Papangnina Dawan yakat kalyulnayangna dai ilp yanana atnin, dawak witing yanadakana dai kalyulnayangna kidika, dawak witing talna dai wauhnin balna, wark dawak taihna lani yakat bangyangna dai kidika; 8bahang kaput laih witing parasni nuhni duwa kidika ruhmwi lakna, dawak yamadangni nuhni kalalahwa dai kidika paskaupak Egipto sauni kaupak yanayakna dai 9dawak adika pāni akat yanaduaina, dawak sauni adika yanana tāwas dawak amak kidika sihm was kapat murwa kidika. 10Kidika yulni duaitayang sau yakat di minik dahting Dawan yaklau di minik tatuna yana balna kidika.’
“Kidika usnit kat, uslun kau di minik balna duyawanaman kidika Papangma Dawan muhni yakat lakma dawak witing muhni yakat limbabahma. 11Kidika usnit kat man kasnin alasnina as yamma Papangma Dawan yaklau man dawak sulama balna yakat bik di yayamni mana kidika yulni. Alasmana yakat libait muihni balna dawak pa ūk muihni balna manna pasmangna yakat yalalahwa kidika bik kakana karang.
Minitdis kalanin dini 100 kaupak salap dakwi yakwa kidika
12“Kurih bās laihwa kidika kiwi kawarang mani, kidika yakat 100 kaupak salap dakwi yakwa kidika, dawak libait muihni balna dawak pa ūk muihni balna bik sauma pasyakat yalalahwa kidika dinina di minik 100 kaupak salap dakta yakma usnit kat, kaput karak pama balna bitik yakat ais kaskih kidika kasninna,#Dt 14:28-29. 13Papangma Dawan muhni yakat lāih yakta yulnaman karang:
‘Yang laih ūki kaupak uman yaknayang di minik balna Papang dini yaknin kidika, dawak libait muihni balna dawak pa ūk muihni balna bik saukina yakat yalalahwa yakat bik wayahtik dianayangna, dawak papangnina dis dawak tingmak balna yakat bik dianayangna, man lawa amput yamnin yayulnaman kaput yamnayang lama balna as bik datas. 14Kidika balna kaupak di as bik kastasyang kulnik bukna mani kidik awaskat maisihni kalnayang kat, dawak muih dadauna balna kidika bik sakripais yamtasyang. Yang Papangki Dawan, man yulma kat dakanayang dawak man lawa ais yamnin yayulnaman kidika kaput yamnayang. 15Makau kisang balna kidika kaupak talah, ūma nuhni holi kidika kaupak, dawak tawanma Israel kidika dawak sau yananaman kidika bik blis yamtah, kidika yakat tāwas dawak amak kidika sihm was kapat kira kidika, yangna muihkinabararak balna yakat amput pramis yamnaman dai kat kaput.’
Israel, tawan as Papang dini yakna kidika
16“Warmani man Papangma Dawan yaklau adika lāni balna lan alahwanam mayulwi; ismang bitik dawak solma bitik karak bik laihta yamtah. 17Warmani man lawa lāih yulnaman Dawan laih man Papangma, dawak witing tani balna kidika yakat yawanam dawak lāni balna kidika bik dawak ban kaput yulni dakanam pramis yamnaman. 18Dawan bik witing lāih yulna Israel man laih witing tawanni man,#Ex 19:5; Dt 4:20; 7:6; 14:2; Tit 2:14; 1 Pi 2:9. amput pramis mayamna dai kidika kaput, dawak witing lani balna kat yamna atnam. 19Witing yaklauwi man kaupak nisan as nuhni alasnina yaksihni, makau rispik mayamwarang ki nisan balna ūk yamna kidika karak dawakat, dawak witing yaklau yulna kaput awama, tawan as witing Papangni Dawan dini kalahna.”
Currently Selected:
Deuteronomio 26: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
