Deuteronomio 25
25
1“Manna pasmangna kaupak, muih bu karang pa kalahwi kalbibilwarang kat, bupak la muihni yakat uiwarang, lanina yamnin yulni, wais pāt dis kidika yamni kalahwarang, kaunah pāt duwa kidika laih dutni yakat bukwarang. 2Angdika muihni minit yakat la bukna karang kat dawi bik wahkau wisnin karang kat, wiwisna karang 3Wah wisnin kidika bik, muih as yakat sip awas karang, wah 20 wisnin,#2 Kor 11:24. tanka laih man wanaihma tawanma muihni kidika uba muihni yakat dalani dunin awas dawi man muhna yakat minikunni kaldakanin awas yulni.
4“Turuh almuk wark kalahwa lik mani di kaswas atnin yulni nangnitak yakat di utak kauh sitnin awaski.#1 Kor 9:9; 1 Tim 5:18.
Wirahni alni lani kidika
5“Kalwirah bu kidika sihm ū aslah kakawa dai kat, wirahni yal duwa kidika dauwarang, kaunah walanbis as bik yakwas dauwarang kat, tingnimak yal kidika la ūk karak sip awas karang marid kalahnin. Wirahni alni kidika yaklauwi witing yakat yulni dunakarang, bahang kaput laih yal kidika wirahni alni kalkulna lani kat yamnakarang.#25.5 “Levirato lāni” ayangni pakna kidika tanka yulwi, kidika lāni laih muih al as wirahni al kidik awaskat wanaihni dauna yalni tingmak yakarak walanibis dis dauna kat, kidika karak kalduna atninna. 6Adika yalni duwarang usnit kat walanbis tatuna yakwarangkat, maridni tatuna dai kidika ayangni pakna karang, tanka laih maridni tatuna dauna ayangni kidika Israel tawanni pas yakat disnin awas yulni.#Mt 22:24; Mk 12:19; Lc 20:28. 7Kaunah al kidika, wirahni al dauna tingnimak karak dunin kulwas karang kat, yal kidika la muhni yakat kiwarang, dawak muihbararak balna yakat diyulwarang: ‘Alki dauna ayangni kidika, Israel pasyakat ban dunin kidika dukih kalawas ki; yang wirahni yalni yang dai kidika kat yamnin kulwas ki.’ 8Kaput yulwak muihbararak la amanglayang balna kidika, al yakat yuyulwakat kiwak yulbabauna karang, kaput ki kaunah al kidika ban dunin yulwaskarang kat, 9tingnimak yal kidika yaihnit yakat kiwi muihbararak balna muhnina yakat tingnimak al yakat susni āna kidika yakwi dawi, muhni yakat susuih tuhna karang dawi kalyulwarang: ‘¡Kaput kalyayamwi muih al as wirahni al dauna kidika sulani kalanin yulwas kidika!’ 10Bahang kaput laih Israel tawanni bitik pas yakat di kukulna karang, ‘muih yaklauwi susnina dudutna’.#Rt 4:7-8.
La ūk balna
11“Muih ahal bu ting kau kalbabauwarang kat, as kidika yalni, kawi alni yakat ilpni kawi alni waihnila suman'minik yakat laihwarang kat, 12manna yal yakat minikunni talnin awaski, kaunah tingni kidika dakna awanama.
13-14“Manna muih yakat di bakannamna yulni paun ānin satni karak muih yakat taihta alas di yulnamna awaski, 15kaunah muih yakat di kalbakannamna kidika rahm yakat, paun āta bakantanama, kaput laih Dawan Papangmana sau manawarang yakat yamni dawak ma mahni bik yalahtanama. 16Kat Dawan laih adika dini dutni balna bitik dutni talwa bahang, la kat yayamwas kidika.#Lv 19:35-36; Pro 11:1; 20:10; Am 8:5; Mi 6:11.
Amalec kidika iwi dispamnin
17“Manna Egipto kaupak alahwa aiwanamana tapas yakat Amalec ais manayamna kidika ismangna katwang, 18manna ismangna katnin ki, witing papang kau yamaduwas palni tapas yakat manasuhna bangmana kat namangnakauh manakalbauwadai kidika kamanah bik awas ki ismangnakatwang manasuhna bangmana kat dangmatna kaupak manakalbauwadai kidika. 19Kaput bahang, angkat mani, manna Dawan Papangmana yaklauwi waihmanala kaupak bitik manalaihwi yakwarang kat, sau manawarang yulna yaihnit kau awaih balna kidika, Amalec kulnin kidika bitik laih uswi yakna karang, ¡Damatna kahnin awaski!#Ex 17:8-14; 1 Sam 15:2-9.
Currently Selected:
Deuteronomio 25: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998
