MARKUS 8

Yesus, amos, ow empat ribu ajiwar atatamef

(Mat. 15:32-39)

1Barewen. Asep jofay ara, ow arkenakut aojarewsiapfesen. Aram amos opok aemapfesen. Yesusam inimas aporef, wunam atakam e amamkawi ow aotawefen. 2“Dor awapes ow arke sawes akat aoworpormin. Aram bar mamincop dar akac aemapmom. Aram amos opok aemapmes. 3E wun ow damasan opok aenawfes. Inimas dor e ow, amos memen opok jisomosomcey, aram e bowsec mankes aemamescemes.” Inim aeefen.

4E amamkawi ow masirin, “Dar cem opok asan aememamom. Ow, a ow arke jak bapitap amos, ocenak asan atawces?” Inim aefesen.

5E Yesus masirin, “E awomcokom amos bokor ucim inimaram?” Inim aeefen. “Dar amos bokor tujuh ajiwar awomcom.” Inim aefesen.

6Bare, aramat ipic e ow arke cenes baneyap jirmec ajirimefen. Aram e amos bokor tujuh ajiwar atewefen. Aram terima kasih atakam Allah aotawef, wunam e amos akokomefen. Akokomef masirin, ar e amos e amamkawi ow e ow arke sey baseyetam atetamefen. Bare, aram sey aseyetamfesen. 7Aram enam kanim mamincop atowomfesen. Yesusam e enam aporef, wunam terima kasih atakam Allah aotawefen. Aram e amamkawi ow e enam sey baseyetam jirmec ajirimefen. 8-9E ow e pok aanfesen. Aram jak anapitaptotorfesen. Owam empat ribu ajiwar aemapfesen. E Yesus mamkawi owam, e ow arke e anatiwfes amos, ese tujuh ajiwar aowapomfesen. Yesusam e ow arke baysos jirmec ajirimefen. 10Aramat ipicam, amamkawi owam, ci anajuwfesen. Aram Dalmanuta capinmi ajirtayfesen.

Parisi ow, Yesus, junum bweas bwem, janim aanimfes

(Mat. 16:1-4)

11Parisi owam Yesus ameromfesen. Ar Yesus atakam aamtawfesen. Ar aramat ipic bwemporen. “Yesus. Oram junum bweas emey. Dar, e Allah, fakas, or batetam epen bapor.” Inim aefesen. 12Yesus joses awutut afayefen. “A awaniemames ow, junum bweas bapor janim aanimames ucim inimaram? Atakamnak ara, dor junum bweas e ow baporomtam opok.” Inim aeefen. 13Bare, Yesus e Parisi ow bakan ajiosefen. Aram ci anajuwef, wunam e poman ajirefen.

E Parisi ow aemcesasam, e Herodes aemcowasam, pimicima

(Mat. 16:5-12)

14Barewen. E Yesus mamkawi ow amos pok batowomuw, binip aanimfesen. Ar e ci roti bini cowoknakap atowomuwfesen. 15Yesusam jirmec e ow ajirimefen. “Jakaperey. Car e Parisi ow e abibit roti pimicima. Caram e Herodes e abibit roti pimicima.” Inim aeefen. E atawef atakam, bare baposomtew atakam ara.

16E Yesus mamkawi ow, e Yesus atawef atakam, baposomtew atakam opok inim arawen. Inimas ar aramaman atakam aamtawfesen. “Aramat ipic dar amos pok batowomuw opok apormar ara openow. Inimas ar e bibit roti atakam aotawmarow.” Inim aefesen.

17Yesusam e atakam aamtawfesas aporefen. Ar masirin, “Car amos pok batowomuw opok atakam aamtawmokom ucim inimaram? Car wow ajiwar camsom opoknew? Car jen fak ow aranew? 18Car manmok epcom. E nat, car manmok bwemtiw asan opoknew? Caram jenmak epcom. E nat, car jen bwemji asan opoknew? Caram binip emeanimfokomnew? 19Dor e amos bokor lima ajiwar, e ow lima ribu ajiwar akokomtatamof ara, e anatiwfes amos aowapomfokom, ese ucim inimaram?” Inim aeefen.

“Dar e anatiwfes amos, ese dua belas ajiwar aowapomfom.” Inim aefesen.

20“Doram e amos bokor tujuh ajiwar e ow empat ribu ajiwar akokomtatamey ara, e anatiweres amos aowapomorokom, ese ucim inimaram?”

“Dar e anatiweres amos, ese tujuh ajiwar aowapomorom.” Inim aefesen.

21E Yesus masirin, “Ca nat, e atawmin atakam jen bajikurum opoknew?” Inim aeefen.

Yesus, manmok kapi ipic, Betsaida capinmi, manmok ateremtamef

22Barewen. Aram Betsaida capinmi asetayfesen. Owam manmok kapi ipic Yesuspu atowocenfesen. Aram Yesus janim fak aanimfesen. “Or a manmok kapi ipic dam ban bakurumey.” Inim aefesen. 23Yesus masirin, e manmok kapi ipic e cemapem banfe ajimocenefen. Aram bese e ipic manmok atewapomefen. Aram jonow e ipic atowporefen. “E omanmok baterey open?” Inim aeefen.

24E ipicam jimas asuefen. Aram atakam aotawefen. “Dor ow ajarmes apormin. E ow nat, os inim awcawor ara.” Inim aeefen.

25Yesusam ban e ipic manmokpu aotewapomefen. Bare, e ipic manmok acimakamomefen. E amanmok atereyefen. Aram pok takas manmok akat atiwefen. 26Yesusam jirmec e ipic ajirimefen. “Oram cema. Kawey cemsan batukem arapok.” Inim aeefen.

“Or e Allah Aeremtewef Ipic ara”

(Mat. 16:13-20; Luk. 9:18-21)

27Barewen. Yesusam, e amamkawi owam, e Kaisarea Filipi jamam samatin samatin ajisosfesen. E bowsec ara, Yesus jonow e amamkawi ow atowporefen. “Do ca ipicam? Ow ucim atakam atawmes?” Inim aeefen.

28E amamkawi ow masirin, “Wun ow atakam, or Yohanes Bwi Babwim Ipic ara. Wun ow masirin, or Elia ara. Wun ow masirin, or Allah atakam botaw ipic ara.” Inim aefesen.

29Yesusam, “Car ara nat, ucim bi binip aceceremamokom? Do ca ipicam?” Inim aeefen.

E Petrusam atep ajitefen. “Or e Allah Aeremtewef Ipic ara.” Inim aeefen.

30E Yesus masirin, jirmec fak e ow ajirimefen. “Inim atakam kawey ow botaw arapok.” Inim aeefen.

Yesus e damir aafcowas atakam atawef

(Mat. 16:21-28; Luk. 9:22-27)

31Yesusam atakam e amamkawi ow amememtamefen. “E Asmat Anakat Ajaworemef Ipic bajurusem awutut aemcema. E ownucur owam, e Allah atakam mamtaw tugas ow awutam, e Allah Jirmec mamememtam owam, e aramat ipic aotpemcemes. Owam e aramat ipic acatiwcemes. Acatiwces masirin, bar mamincop aramat ipic aojaworsitcema.” Inim aeefen. 32Bare, Yesus inim atakam umuton cowok aotawefen. Petrus nat, e Yesus dam ajimtewef, wunam atakam e aramat ipic aotawefen. “Or inimas arapok.” Inim aeefen.

33Bare, Yesus afiriefen. Aram e awun mamkawi ow manmok atiwef, wunam atakam Petrus aotawefen. “Iblis. Oram cey. E dobipu memem arapok. E bi binip aceceremamemas, bare asmat desen bi binipas ara. Er Allah bi binip aceceremamaras jipu opok.” Inim aeefen.

34Bare, Yesus e ow arkeam, e amamkawi owam, ajateefen. Aram atakam e ow aotawefen. “Ow dor mamkawi jak aserememces, ar aropas bi binip arapok. Aram arop salib batawtotorces. Wunam dor bajamkawiawarcenes. 35Ow, bajorem jak aserememces, aram bajorem opokut aemcemes. Wun ow nat, kerja dor aemtamcemenes. Aram e Atakam Akat kawey ow amememtamcemes. E ow inim tugas aman damir aafces, aram ajoremcemes. 36Ow awames capinmi pok takas atatkurumcesnew, e nat, aram bajorem opok aemcesnew, bare ar asan akat bwememap asan opok. 37Ow, e ajiwneas aporsipor, pok juw bwemuwumtaw asan opok cowok. 38A awaniemames ow, Alah aotpemames. Ar dosa ow ara. Bare, e ow do namke akayemcesnew, ar doratakam namke akayemcesnew, bare e Asmat Anakat Ajaworemef Ipic e owam namke akayemcema— e aramat ipic aoneycow jofay ara. E jofay, aramat ipic, e aricipic arakatnakutas epcom aneycema. Aram e malaikat tarowat arke akac aneycemes.” Yesus inim aeefen.

Currently Selected:

MARKUS 8: LAICNS

Highlight

Copy