MARKUS 7

Ow e arafas ow atayimirtitamfesas jipu aamcemes

(Mat. 15:1-9)

1Barewen. Parisi ow e Yesus bipu ajarewsiemfesen. Wun Allah Jirmec mamememtam owam Yerusalem ewenawfesen. Aram Yesus bipu ajarewsiemfesen. 2Ar e Yesus mamkawi ow amos aemenfes aporfesen. E wun Yesus mamkawi ow amos aemenfes ara, ar e agama Yahudi atakamas jipu bwem opoken. Ar e aban bwi batakamcicikim opoken. E Yesus bipu ajarewsiemfes ow inimas aporfesen. 3Bare, e Parisi owam, e wun agama Yahudi ow takasam, ban bwi bap atakamcicikimcemes, wunam amos asep aancemes. Ar e arafas ow e tayimirtitamfesas jipu aemcemes. 4Wunam ar e pasar asan ewenawces, aram bwi bap atakambwicemes, wunam amos asep aancemes. Aram wun arafas atayimirtitamfesas jipu aemcemes. Ar mokam, cerekam, panciam, e atakam jipu bwi acicikimcemes.

5E Parisi owam, e Allah Jirmec mamememtam owam, atakam Yesus aotawfesen. “E omamkawi ow, e darafas ow e tayimirtitamforowas, jipu bwem opok. Amos pok aanmes ara, ar e aban bwi batakamcicikim opok aemames. Ar ucim inimaram?” Inim aefesen.

6E Yesus masirin, “Car pir bwe ow ara. Ametnak ara, Yesaya e aemcokomas atakam aotawefen:

‘Allah atakam ara, “A ow ewen picin cowok dor asicimamenes. E nat, e jak aman ar dor mamkawi opokut.

7Aram desen asicimamenes. E atakam amememtamamesas, bare asmat jirmec cowok ara. Er dojirmec opok.” Allah inim aema.’

Yesaya inim aeefen. Bare, er atakamnak ara. 8Car Allah jirmec jen baji opok cimin aememamokom, wunam e asmat atayimirtitamfesas ji cowok aemokom.” Yesus inim aeefen.

9Yesusam wun atakam aotawefen. “Car Allah Jirmec aopowmokom, wunam e carafas ow e tayimirtitamfanas jipu aemokom. 10Ametnak ara, Musa atakam aotawefen. ‘Oricipicam, orosowocam, mamsicimawarey. Ow, cemew atakam, e aricipicnew, arosowocnew, aotawces, e cemew atakam ow mamcatiwey.’ Inim aeefen. 11-12E nat, caratakam ara, ‘Ow atakam e arisepes aotawtotorces, “Dor e or atetamcimin uang, bare Allah emcatetamof,” inim aetotorces, bare aram asan akat e arisepes bom arapok.’ Inim aemokom. 13Inimas car e carafas ow e tayimirtitamfanas jipu aemokom, wunam Allah atakam ajiwosomamokom. Caram wun inimas arke aemamokom.” Yesus inim aeefen.

Ow dosa bwemas

(Mat. 15:10-20)

14Barewen. Yesus e ow arke aojateefen. Aram atakam e ow aotawefen. “A atawmin atakam jen foa. Bare, a atakam jen pajikurumey. 15Memen pok, ow e bweyof afiwcow, e pok e ow, dosa bwemas opok. E nat, e bweyof afiscow atakamam, e ow aemamesasam, bare eras e ow, dosa bwemas ara. [ 16Jen fo ow a atakam jen bajices.]” Inim aeefen.

17Bare, Yesus e ow arke bakan ajiemefen. Aram cem ajiwemefen. Cem ajiwemef masirin, e amamkawi ow e baposomtew atakam jonow aramat ipic atowporfesen. 18E Yesusam, “Caram e atakam jen bajikurum opoknew? Bare, memen pok takas, ow e bweyof afiwcow, e pok, e ow, dosa bwemas opok. Car inimas camsom opoknew? 19Bare, e pok jaknak bafiw opok. Ar jak com aman cowok afiwcema, wunam aofiscema.” Inim aeefen. (Yesus inim atakam atawef ara, ar “memen pok takas akat,” inim atakam atawefen.)

20E Yesusam, “Bare, e bweyof afiscow atakamam, e ow aemamesasam, e ow dosa bwemas ara. 21E ow e jak amanas, bare pwicak ara. Inimas e ow jursumec bi binip aceceremcemes. Aram jursumecas aemcemes. Osomam aecemes. Dawam, sanawam, aetiwcemes. Cen cemen osomam aecemes. 22Aram kaweyas asinomcemes. Pwicakasam aemcemes. Suw atakamam atawcemes. Jursumecasam aemcemes. Icimam aemcemes. Cemew atakamam atawcemes. Aram arma atawsicimcemes. Aram jen fak aememcemes. 23Inim pwicakas takas, ow jak amanas ara. Eras, ow, dosa bwemas ara.” Inim aeefen.

Yesus dat aotewerisimef

(Mat. 15:21-28)

24Barewen. Yesus e asan bakan ajiosefen. Aram kota Tirus jamam ajisosefen. Erasan cem ajiwapefen. Aram arop bajiwap ememefen. Wun ow a bapor arapoken. E nat, ar bwemcukap asan opoken. 25Cowoc cowokam aememefen. Dat e cowoc apores jak aman aemapawirien. E cowocam, “Yesus e cem awap,” inim atakam jen ajiefen. Inim atakam jen ajief masirin, ar aramat ipicpu asarimmeromefen. Aram aramat ipic bipu bi fop aneyjiapefen. 26Aram, Yesus, e apores jak aman dat botewerisim janim aanimefen. Aramat cowoc aratakam, bare Yunani atakam arawen. Asamat nat, Siro Fenisia samat arawen.

27Bare, Yesus atakam e cowoc aotawefen. “E Yahudi samat ow dosamat ara. Dor asan akat e dosamat batakamom akat ara. Dotiperes amos, juwur bajiwitam, bare pwicak ara.” Inim aeefen.

28E cowoc masirin, “Tuan. E atawmem atakam, bare atakamnak ara. E nat, tiperes amos aances, juwuram e meja aman aemapcemes. Aram e tiperes amos bimis aancemes.” Inim aeefen.

29E Yesus araw, “E atawmem atakam bare akat ara. Oram cem jisosey. E dat e opores jak aman emcafisor.” Inim aeefen. 30Bare, e cowoc cem ajisosefen. Aram e apores tepen ton asan akat aemamesef aporefen. E datam emcajisosef aporefen.

Yesus jen biri ipic ajaworomtewef

31Barewen. Yesus e Tirus capinmi ewjisosefen. Aram Sidon capinmi aokorsakayefen. E Dekapolis capinmiam aokorsakayefen. Ar masirin, e Galilea bwipu ajarapefen. 32Erasan ara, ow, jipic cowok, aramat ipicpu atowocenfesen. E ipic jen biri arawen. Aram okor ipic arawen. E owam janim Yesus aanimfesen. “Oram ban e ipic dam ton batatiwporey.” Inim aefesen.

33Yesus e erasan aememfes ow, arkenakut aporefen. Inimas ar e ipic arop asan atewefen. Aram banek e ipic jen jof jamnuk ajumumefen. Aram bese ajief, wunam ar ban e ipic komen akurumefen. 34Bare, Yesus manmok apemtometemefen. Aram joses afaytewef, wunam atakam e ipic aotawefen. “Efata.” Inim aeefen. “Efata” daratakam juw buwumtew, “Jen jof bafiosey,” inim awcawor ara. 35Bare, e ipic jen jof asarimfiosefen. E komenam akat aemapefen. Aram atakam akat atawefen.

36Yesusam jirmec e ow takas ajirimefen. “Car eras atakam wun ow botaw arapok.” Inim aeefen. Aram e atakam botaw, acuw aata aeefen. E ow nat, atakam aotawa aefesen. 37Owam junum awutnakut aefesen. “E aramat ipic aemamaras takas, bare akat cowok ara. Ar jen biri ow jen akat aemtamama. Aram okor ow, komen akat aemtamama.” Inim aefesen.

Currently Selected:

MARKUS 7: LAICNS

Highlight

Copy