MARKUS 6

Nasaret ow Yesus bifan afayomfes

(Mat. 13:53-58; Luk. 4:16-30)

1Barewen. Yesus e capinmi aemsowefen. Aram arop capinmi aojisosefen. E amamkawi owam akac ajarfesen. 2Ses Ban Jo aenawef ara, aramat ipic e sembahyang cem aman, atakam amememtamefen. E aratakam jen ajifes owam junum awut aefesen. “E aramat ipic e atawmar atakam jen ocenak asan ajief. E aceceremamar bi binip umutonnakut ucimaram? Aram e junum bweas aemamar ucimaram? 3Awap ipic tukang kayu ipic araman. Aram Maria atiw araman. Ar e Yakobusam, Yosesam, Yudasam, Simonam, arepwec araman. E atarsepesam dar akac aemapmom araman.” Inim aefesen. Bare, aman bifan e Yesus afayomfesen.

4Yesusam atakam e ow aotawefen. “Kawey ow, Allah atakam botaw ipic asicimcemes. E nat, asamat owam, ajowowam, acem owam, Allah atakam botaw ipic basicim opok aemcemes.” Inim aeefen. 5Bare, aramat ipicam, erasan, junum bweas bwemem asan opoken. E nat, ar e aban, dam ow mamincop e dam ton atatiwef, wunam e ow dam ajaworomtawefen. 6E erasan ow Yesus basicim opok aemfesen. Aramat ipicam inimas aporefen. Ar masirin, junum awut aeefen.

Yesus e amamkawi ow dua belas ajiwar atewosomef

(Mat. 10:5-15; Luk. 9:1-6)

Bare, Yesus e jamam samatin samatin aamwicirijaref, wunam atakam e ow amememtamefen. 7Aram amamkawi ow dua belas ajiwar ajateefen. Ajateef masirin, ar e ow atewosomefen. Ar jipic jamnuk wun asan jisosa, jipic jamnuk wun asan jisosa, inim atewosomefen. Aram dat botewerisim fakas e ow atetamtotorefen. 8Aram jirmec e ow ajirimefen. “Ajisoscokom, pok batew arapok. Onok pok cowok batewey. E nat, amos pok batew arapok. Eseam batew arapok. Uangam batew arapok. 9Bwey nat, sandal bajimomey. Baju jamnukam bajimom arapok. Cowoknakapa.” Inim aeefen. 10Wunam, “Car cem afiwapcokom, caram inim mamemapey— e capinmi bakan ajisoscokom jofay ajiwara. 11Wun samat car batowomiw opok aporcokomnew, wunam caratakam ji bwe opok aporcokomnew, e ow bakan mamjiosey, wunam atakam e ow mamotawey. ‘Car daratakam ji bwe opok aemamokom. Inimas dosa aemamokom.’ Inim mameey.” Yesus inim aeefen.

12Barewen. E Yesus mamkawi ow dua belas ajiwar ajisosfesen. Aram ow dosa takas bak bapayem, inim atakam acacapiomfesen. 13Aram dat arke aotewerisimfesen. Aram minyak, dam ow arke e dam ton atatiwfes, wunam e ow ajaworomtawfesen.

Herodes, Yohanes Bwi Babwim Ipic acatiwef

(Mat. 14:1-12; Luk. 9:7-9)

14Bare, Yesus an afufuosefen. Inimas e raja Herodesam e aramat ipic aemefas, atakam jen ajiefen. Wun owam atakam atawfesen. “E Yohanes Bwi Babwim Ipic emeojaworsitef. E Yesus e ipic ara. Inimas ar e junum bweas awut aemama.” Inim aefesen.

15E wun ow nat, “E aramat ipic, bare Elia ara.” Inim aefesen. Wun ow nat, “E aramat ipic, Allah atakam botaw ipicut ara. Ar e ametnak Allah atakam botaw ipic cowok inim awcawor ara.” Inim aefesen.

16E nat, e Herodes e atakam jen ajief ara, aram atakam aotawefen. “Aramat ipic e Yohanes Bwi Babwim Ipic ara. Ametnak ara, dor e Yohanes kus asakamof. E nat, aramat ipic aojaworsitef ara openow.” Inim aeefen. 17-18Bare, ametnak ara, Herodes, e arewec juwas Filipus arem aotewetefen. Cowoc juwas Herodias arawen. E Yohanesam atakam e Herodes aotawa aeefen. “Or e cowoc aotewetmem, bare Allah Jirmec aopowmem.” Inim aea aeefen. Herodesam inimas aporef masirin, ar ow e Yohanes ban bakimomam, ban manam bajikapomam, penjara cem aman bajiwtewapomam, inim jirmec ajirimefen.

19-20E Herodiasam e Yohanes bic baji bi binip awut aceceremefen. Aram e aramat ipic bacatiw akat arawen. E nat, e Herodes e Yohanes, ow akatam, ow tarowatam, inim aporefen. Inimas ar e aramat ipic omar aeefen. Aram ow e aramat ipic manmok fak batiw jirmec ajirimefen. Wun ow e aramat ipic bajurusumasin. Inimas e Herodias e Yohanes bwemcatiw asan opoken. E Herodesam, e Yohanes atakam jen ajia aeef ara, aram jak pwicak aemapa aeefen. E nat, ar e atakam jen bajikurum akat cowok arawen.

21Asep jofay nat, e Herodias e Yohanes bacatiw asan akat aporefen. Er e Herodes ajispetiwef hari ulang tahun arawen. E Herodes, e apemerintah kerja bwemtam ow awutam, e tentara kepala owam, e Galilea ownucur owam, pokbwi aemtamefen. 22E Herodias aporesam e pokbwi cem afiwemefen. Aram di adiefen. Herodesam, e jaki owam, eras akat cowok aporfesen. Inimas e Herodes atakam e cowoc aotawefen. “Pok janim dor animcan. Dor e pok o batetam.” Inim aeefen. 23E aramat ipicam atayi faknakut e cowoc aeefen. “E janim dor aanimcenem pok or atetamcimin araman. Dor e wun awompey pok awutut or atetamcimin araman.” Inim aeefen.

24Bare, e cowocam afisefen. Aram jonow e arosowoc atowporefen. “Dor ucim pok janim aanimcey.” Inim aeefen. Arosowoc masirin, “Oram Yohanes Bwi Babwim Ipic e kus janim manimey.” Inim aeefen. 25E cowocam e raja bipu aosarimapenefen. Aram janim aanimefen. “E Yohanes Bwi Babwim Ipic e kus piring aman aynam tetamcan.” Inim aeefen.

26Barewen. E raja e cowoc janim aanimefas jen ajiefen. Ar masirin, jak pwicak awut aemapefen. E nat, e atayi faknakut aeefas aporefen. Aram e pokbwi jaki ow aporefen. Inimas ar e cowoc janim aanimefas bwemotpem asan opoken. 27Bare, aramat ipic, tentara cowok, e Yohanes kus basakamtew, jirmec asarimjirimefen. E tentara masirin, e penjara cem ajisosef, wunam e Yohanes kus asakamtewefen. 28Aram e kus piring aman atowotnawef, wunam e cowoc atetamefen. E cowoc masirin, e kus arosowoc aotetamefen. 29E Yohanes ajamkawifes ow inim atakam jen ajifes ara, ar e aramat ipic e bini amertewfesen. Aram e bini awerem aman ajiwtatiwfesen. (Ametnak ara, e ow inimas aemfesen. Inimas e Herodes atakam, “Yesus, e Yohanes Bwi Babwim Ipic ara. Ametnak ara, dor e Yohanes kus asakamof. E nat, aramat ipic aojaworsitef ara openow.” Inim aeefen.)

Yesus, amos, ow lima ribu ajiwar atatamef

(Mat. 14:13-21; Luk. 9:10-17; Yoh. 6:1-14)

30Barewen. E Yesus atakam botaw atewosomef ow, aramat ipicpu aojarewsienawfesen. Ar e aemfesasam, e amememtamfes atakamam, e aramat ipic afafasimfesen. 31Erasanam ow arkenakut juw aucicirifesen. Inimas e Yesus mamkawi owam amos bwememen asan opoken. Aramat ipican inimas aporef, wunam atakam e amamkawi ow aotawefen. “Dey. Cem opok asan darop jisosmoc. Caram erasan ses aaney.” Inim aeefen. 32Bare, ci anajuwfesen. Aram cem opok asan ajisosfesen.

33Anajuwfes ara, ow arkeam e ow manmok atiwfesen. Aram e ow bi amsomen. E ow arkeam e kota takas ewsayenawfesen. Aram je akukufes, wunam ar e Yesusam, e akac dajuwfes owam, e asetayces asan, bap a takam amerapfesen. 34Bare, Yesus asetayef ara, ar e ow arke aporefen. Ar e ow desen domba inim cimin aememfes aporefen. E ow, manmok batiwtam ow opok domba, inim cimin aememfesen. Inimas Yesus e ow sawes akat aoworporefen. Ar masirin, atakam arke e ow amememtamefen.

35Porow ara masirin, e Yesus mamkawi ow aramat ipicpu ameromfesen. “Arasan cem opok asan ara. Joam atima. 36Oram e ow e sotop kebun asanam, e sotop cemsanam, baysos jirmec ajirimey. Erasan amos pok bajitinces.” Inim aefesen.

37E Yesus nat, “Car amos pok e ow carma tetamey.” Inim aeefen. E ow masirin, “Dar uang dinar dua ratusut ajiwar e ow amos pok bajittam arapen?” Inim aefesen.

38E Yesus araw, “E awomcokom amos bokor ucim inimaram? Caram baporey.” Inim aeefen. Bare, aram aporfesen. “Dar amos bokor lima ajiwar awomcom. Enamam jamnuk awomcom.” Inim aefesen. 39E Yesus masirin, atakam e ow arke aotawefen. “Car fumin ton, asan cowok aniapa, asan cowok aniapa, inim eey.” Inim jirmec ajirimefen. 40Bare, e ow, asan cowok aniapa, asan cowok aniapa, inim aefesen. Ar ow seratus ajiwar asan cowok aniapa, ow lima puluh ajiwar asan cowok aniapa, inim aefesen. 41Yesus e amos bokor lima ajiwaram, e enam jamnukam, atewefen. Aram manmok op atiwtometemefen. “Diwi. Or a amos pok atetamamarowem. Terima Kasih.” Inim aeefen. Ar masirin, e amos bokor akokomef, wunam e amamkawi ow atetamefen. Er e ow takas sey baseyamtamas ara. Aramat ipicam e enam jamnuk e ow takas sey aseyamtamefen. 42Bare, e ow takas e pok aanfesen. Aram jak anapitaptotorfesen. 43E Yesus mamkawi ow e ow arke anaeremtiwfes amosam, enamam, ese dua belas ajiwar aowapomfesen. 44Bare, e amos pok aemenfes ow, ower ow cowok, lima ribu ajiwar arawen.

Yesus bwi ton ajaref

(Mat. 14:22-33; Yoh. 6:15-21)

45Barewen. Yesus jirmec e amamkawi ow asarimjirimefen. “Caram banajuwey. E Betsaida capinmi bap ca takam jirtayey. Dor asep bajinaw.” Inim aeefen. Ar masirin, e ow arke, aporsipor cem baysos, jirmec ajirimefen. 46“Doram bare.” Inim aeefen. Bare aramat ipic, Allah janim manim, sikon asan ajisosefen.

47Barewen. Jo atiefen. Jo atief ara, e ci e jicupum aemseefen. Yesusam e fwikin arop aememefen. 48Bare, foam e amamkawi ow ci cimen aotpemefen. Inimas e ow po jiporfes opoken. Yesusam eras aporefen. Iram fak ara masirin, aramat ipic bwi ton ajarefen. Aram e aemsefespu ajarosefen. E nat, aram akpin cimin aeefen. 49-50E amamkawi ow takas nat, e aramat ipic bwi ton ajaref aporfesen. Ar dat inim arawen. Aram omar aefes, wunam jen ajifesen.

Aramat ipic masirin, atakam e ow asarimotawefen. “Caram jak faka. Do Yesus ara. Omar arapok.” Inim aeefen. 51-52Bare, Yesusam e ci asawuefen. E fo masirin, atayuefen. Bap ara, Yesus amos kanim, amos awutnakut ajaworomtiwefen. E amamkawi ow nat, e Yesus junum bweas aemefas bi binip umuton bacecerem opok aemfesen. Aram jen fak aememfesen. Inimas e fo atayuef ara, aram junum awut aefesen.

Yesus, Genesaret capinmi dam ow ajaworomtawef

(Mat. 14:34-36)

53Bare, aram poman aapirfesen. Poman aapirfes masirin, Genesaret capinmi ajirtayfesen. Aram ci cum amotapomfesen. 54Asowkufes ara, e capinmi owam atakam asarimtawfesen. “E akunawmar ipic Yesus ara.” Inim aefesen. 55E owam e ajawosef samatin samatin takas je akukuosfesen. Aram e dam ow e atepen epcom e Yesuspu atowocena aefesen. Ar, “Yesus inim asan awamec,” inim atakam jen ajifes, ar e dam ow e asan atowocena aefesen. 56Aramat ipicam, samat arke acemsanpu ajara aeefen. Aram kota arkepu ajara aeefen. Cem arke opok capinmipuam ajara aeefen. E ajaref asan takas, ow e dam ow e pasar asanpu atowocenfesen. Aram e dam ow e Yesus baju bip ban bakurum, janim fak e aramat ipic aanimfesen. E abaju bip ban akurumfes ow takas masirin, aojaworsitfesen.

Currently Selected:

MARKUS 6: LAICNS

Highlight

Copy