MARKUS 9

1Yesusam atakam e ow aotawefen. “Allah Pemerintah aenawcema. Aramat ipicam e faknakutas aporomtamcema. Atakamnak ara, wun awamcokom ow, Allah Pemerintah bwenaw aporcomokom. E ow e jofay ajiwar, damir baf opok aemcemes.”

Yesus wun bi ajaworemef

(Mat. 17:1-13; Luk. 9:28-36)

2Barewen. Bar enam ajiwar aemapfesen. Bar enam ajiwar aemapfes masirin, Yesus, e Petrusam, e Yakobusam, e Yohanesam, opnakut sikon arop atowotometefen. Erasan ara, aramat ipic e ow bipu wun bi aojaworemefen. 3E apakaianam den fwesaknakut ajaworemefen. Pakaian bwi bacicikim ow, pakaian inim fwesaknakut, bwi bwemcicikim asan opok. 4Musaam, Eliaam, onam op ewneyfes, wunam e ow bipu ajisomfesen. Aram atakam Yesus aamtawfesen.

5Petrusam atakam Yesus aotawefen. “Guru. Dar arasan aememamom, bare akat ara. Dar puk cem mamincop bweapom. Wun cowok or. Wun cowok Musa. E wun cowok masirin, Elia.” Inim aeefen. 6E Yesus mamkawi ow mamincop omar awutnakut aefesen. Inimas Petrus ucim atakam atawcownew, inim bi binip opoken.

7Jak fwesakam erasan aenawefen. Aram e ow apwirimomefen. Atakamam e jak fwesak aman akoreyisimefen. “Awamec ipic dotiw ara. Dor aramat ipic damos ajiomamin. Caram aratakam jen pajiey.” Inim aeefen. 8E Yesus mamkawi ipic mamincopam, manmok asarimpepemfesen. Ar wun ow bi bapor opoken. Ar Yesus cowok ar akac aememfes aporfesen.

9Barewen. Aram e sikon ewneyfesen. Ewneyfes ara, Yesus atakam e ipic mamincop aotawefen. “Car e apormokomas, atakam kawey ow botaw arapok— e Asmat Anakat Ajaworemef Ipic aojaworsitcow jofay ajiwara.” Inim aeefen. 10Bare, aram e atakam kawey ow botaw opoken. E nat, aramaman atakam aamtawfesen. “E bojaworsit atakam atawmar, ucimasam?” Inim aefesen.

11Aram jonow Yesus atowporfesen. “E Allah Jirmec mamememtam ow atakam, ‘E Elia bap a atakam aenawcema. E Allah Aeremtewef Ipic masirin, asep aenawcema.’ Inim aemes. E nat, e ow inim atakam ucim inimaram?” Inim aefesen.

12E Yesusam, “Bare, e Elia bap a takam araman. Aram atakam takas bafafaytiw bwenaw araman. E nat, e Alkitab atakam, ‘E Asmat Anakat Ajaworemef Ipic bajurusem awutut aemcema. Owam aramat ipic aotpemcemes.’ Inim aema. E Alkitab inim atakam nat, ucim inimaram? 13Bare, Elia emcaenawef. Owam e aramat ipic ajurusumfes. Aram e ajak asinomfesas jipu e aramat ipic aomfes. E Elia aomfesas, bare e Alkitab atakam jipu ara.” Yesus inim aeefen.

Yesus wun dat aotewerisimef

(Mat. 17:14-21; Luk. 9:37-43)

14Barewen. Yesusam, e amamkawi ipic mamincopam, e wun Yesus mamkawi ow aememfes asan, ajaremfesen. Aram ow arkenakut e ow fumi aamwiciremfes aporfesen. Ar Allah Jirmec mamememtam owam, e Yesus mamkawi owam, atakam aatawfes aporfesen. 15E ow arke takas Yesus aporfesen. Aram junum awutnakut asarimefesen. Aram Yesus biamnuk bwemamtew je akukuosfes, wunam selamat atakam e aramat ipic aotawfesen.

16Yesusam jonow e ow atowporefen. “Car ucim atakam e ow aamtawmokom?” Inim aeefen.

17E ow arke aman, jipic cowok atep ajitefen. “Guru. Dor e dotiw or atowotnawtamamin. Dat e jiwi jak aman awap. Inimas e jiwi okor ara. 18E dat e jiwi aomomcow, ar e jiwi aneyjiwitiwcema. E jiwiam bwe basep aaramwisimcema. Sisam akekemtewcema. Aram faco afacoma. Doram e omamkawi ow e dat botewerisim janim aanimof. E nat, ar e dat bwemotewerisim asan opok.” Inim aeefen.

19E Yesus masirin, “Car do basicim opok awaniemamokom ow ara. Do car akac ucim jofay ajiwar aoememcey? Do jak jirow ca bom, ucim jofay ajiwaram? Bare, e jiwi arasan towotnawey.” Inim aeefen.

20Bare, ar e jiwi Yesuspu atowocenfesen. E datam Yesus bi aporef ara, ar e jiwi jis awutnakut apimefen. Inimas e jiwi cenes aneyjuamesefen. Aram aamespwepwerejarefen. E bweam besep aarsamwisimefen.

21Yesusam jonow e jiwi aricipic atowporefen. “E jiwi inimas bwem tarey open?” Inim aeefen. Aricipic masirin, “Ar inimas jiwinokoc ewemef. 22E dat e jiwi jismak aramsapimapoma aramsapimapoma aeef. Aram e jiwi bwi aramjupuma aramjupuma aeef. Bare, ar e jiwi acatiwpora aeef. E nat, or fak ipic epen, saw akat dar aoworporcarowey. Oram asan akat e jiwi omey.” Inim aeefen.

23E Yesusam, “‘Or fak ipic epen,’ inim aemenem nat ucimaram? Allah e takas e a basicimnak ow aemtamcema araman.” Inim aeefen.

24E jiwi aricipicam atakam asarimfakaytawefen. “Dor Allah asicimamin. Do nat, Allah basicimkurum opoknew, oram e basicimkurum bi binip tetamcan.” Inim aeefen.

25Bare, Yesus, ow arke erasan je akukuenawfes aporefen. Inimas ar jirmec fak e dat ajirimefen. “Or e jiwi jen biriam, okoram, aemapomfem. Bare, or e jiwi jak aman ewfisey, wunam e ajak aman bofiw arapok.” Inim aeefen.

26Bare, e dat jen ajiefen. Aram e jiwi jis awutnakut apimefen, wunam ar e jiwi jak aman ewfisefen. E jiwiam damir inim cimin aemamesefen. Inimas ow arke atakam atawfes, “A damir ara,” Inim aefesen. 27Yesus nat, e jiwi ban ajimtewef, wunam asumutumefen. Bare, e jiwi asitemefen.

28Bare, Yesus e cem afisefen. Cem afisef masirin, e amamkawi ow, jonow Yesus arop atowfesen. “Dar e dat botewerisim empororom opok, ucim inimaram?” Inim aefesen.

29E Yesusam, “Car janim Allah manim opok aecokom car inim dat bwemotewerisim asan opok.” Inim aeefen.

Yesus e damir aafcowas atakam aotawef

(Mat. 17:22-23; Luk. 9:43-45)

30-31Barewen. Yesusam, e amamkawi owam, erasan ewjisosfesen. Ar masirin, Galilea capinmi aofefesen. Aramat ipicam atakam e amamkawi ow amememtamefen. Inimas ar kawey ow e aemapfes asan bapor pwicaken. Bare, Yesus atakam e amamkawi ow aotawefen. “Jipic cowok, e Asmat Anakat Ajaworemef Ipic, jokmen ow aotasimemtamcema. E owam e aramat ipic acatiwcemes. Acatiwces masirin, bar mamincop e aramat ipic aojaworsitcema.” Inim aeefen. 32E amamkawi ow nat, e atakam jen bajikurum opoken. E nat, ar Yesus jonow botowpor omar aefesen.

Ow awut cam?

(Mat. 18:1-5; Luk. 9:46-48)

33Barewen. Aram Kapernaum ajaremfesen. Cem aman aemapfes ara, Yesus jonow e amamkawi ow atowporefen. “E bowsec ajarorom ara, car ucim atakam aamtaworokom?” Inim aeefen. 34E ow nat, e bowsec, atakam aamtawfesen. “Dar awamcom ow aman, ow awutnak ca owaram?” Inim aefesen. Inimas Yesus jonow e ow atowporef, ar jokon cowok ajiapfesen.

35Bare, Yesus cenes aneyapefen. Aram amamkawi ow dua belas ajiwar e abipu bemap ajateefen. Ar masirin, atakam atawefen. “Car ow awut memem jak aserememcokom, bare ow kanim mamememey. Caram e wun ow takas kerja mamememtamey.” Inim aeefen.

36Bare, Yesus jiwi kanim cowok atewefen. Aram e jiwi e ow wasec atewemefen. Ar masirin, e jiwi becer ajipiropef, wunam atakam e ow aotawefen. 37“Ow damos dor ajiomcenes, wunam ar inim jiwi kanim dor atowomiwtamcenes, bare e ow doram atowomiwcemenes. E dor atowomiwcemenes ow, dorop batowomiw opok. Ar e dor atewenamfan ipicam atowomiwcemes.” Inim aeefen.

Dajowow ucim owaram?

(Luk. 9:45-50)

38Bare, Yohanesam atakam Yesus aotawefen. “Guru. Dar jipic cowok aporfom. Aramat ipic e ojuwas ajitewef, wunam ow jak aman dat aotewerisimef. Dat nat, e ipic dar mamkawi opok aporfom. Inimas dar aramat ipic eras bwem acuw aatfom.” Inim aeefen. 39E Yesus masirin, “Car e ipic eras bwem acuw bat arapok. Ow dojuwas ajitewces, wunam junum bweas aemces, bare aram cemew atakam dor bwemotaw asan opok. 40E owen da bamo opok ow, bare dajowow ara. 41Atakamnak ara, ow car Kristus mamkawi ow aporcan, inimas aram bwi car atetamcan, bare Allah asan akat e ow aomcema araman.”

Ow Yesus bakorompim bajijimtawas

(Mat. 18:6-9; Luk. 17:1-2)

42“Wun jiwi kanim asicimamenes. Ow inim jiwi cowoknakap dosa bwem ajijimtawces, bare e ow asan pwicaknakut aemapcemes. Wun ow, ek awut e ow fomak manam ajikapomfes, wunam e ow e jicupum bwi ajupumfes, bare inimas bap a takam aemfes ayaw, e ow asan akat inim aemapfes. 43Wunam, e oban or dosa bwem aomcannew, bare e ban mamsakamosomey. Or poman ban cowok aememcemnew, bare asan akat aememcemem. E nat, or ban jamnuk takas aememcemnew, wunam neraka afiwemcemnew, bare asan pwicaknakut aememcemem. E neraka, bare jismak basapi opokut asan ara. [ 44E neraka e ow dam das aancemar afin, bare damir opokut ara. E jismakam basapi opokut ara.] 45Wunam, e obwey or dosa bwem aomcannew, bare e bwey mamsakamosomey. Or poman bwey cowok aememcemnew, wunam jiwnenak aatamemawarcemnew, bare asan akat aememcemem. E nat, or bwey jamnuk takas aememcemnew, wunam Allah or neraka aman ajiwimcannew, bare asan pwicaknakut aememcemem.” [ 46E neraka, e ow dam das aancemar afin, bare damir opokut ara. E jismakam basai opokut ara.] 47E omanmok or dosa bwem aomcannew, bare e manmok mamweremtewey. Or poman manmok cowok aememcemnew, wunam e Allah Pemerintah Asan afiwemcemnew, bare asan akat aememcemem. E nat, or manmok jamnuk takas aememcemnew, wunam Allah or neraka ajiwimcannew, bare asan pwicaknakut aememcemem. 48E neraka, e ow dam das aancemar afin, bare damir opokut ara. E jismakam basapi opokut ara.

49“Bare, Allah e amamkawi ow takas ajurusumcema. Eras, e ow, akat ow bemapomas ara. E Allah bajurusumas, bare, ow, pok Allah acatitamcemes inim cimin ara. E ow, garam, e pok ton atakamtatiwcemes. E garam, e pok, akat pok aemapomcema. 50Garam, bare akat ara. Garam epcom pokam of bwemem asan opok. E nat, garam jema opok aemamescownew, ow e garam jemaas bwemokenemapom asan opok. Bare, caram e akat garam jipuas mamemey. Car pwicak ow mememasin. Inimas caram caramaman damos aamjiomey.” Yesus inim aeefen.

Currently Selected:

MARKUS 9: LAICNS

Highlight

Copy