MARKUS 14

Ow Yesus bacatiw at aetiwfes

(Mat. 26:1-5; Luk. 22:1-2; Yoh. 11:45-53)

1Barewen. E Bakamsow Pokbwiam, e Bibit Opok Roti Pokbwiam jowan arawen. E Allah atakam mamtaw tugas ow awutam, e Allah Jirmec mamememtam owam, Yesus ban curuw bakimom at aetiwfesen. Aram aramat ipic bacatiw at aetiwfesen. 2Aram, “Dar e ipic pokbwi aman ban bakimom arapok. E mami ow owen da bamoasin.” Inim aefesen.

Cowoc cowok, pinim akat minyak, Yesus kus aokomnemef

(Mat. 26:6-13; Yoh. 12:1-8)

3Bare, Yesus penyakit kusta ipic juwas Simon e acem aemapefen. E cem kota Betania aemamesefen. Yesusam amos memen aemapef ara, cowoc cowokam e cem afiwemefen. Aram ek botol atowomiwefen. E ek juwas “pualam” arawen. Bare, e botol, pinim akat minyak epcom arawen. E minyakam minyak anakat juwas “narwastu” arawen. Bare, e cowoc e botol imwi ajakamefen. Ajakamef masirin, ar e minyak e Yesus kus aokomnemefen. 4E wun aememfes ow jak amop aememfesen. Aram atakam aramaman aamtawfesen. “Ar e minyak aokomosomamar nat, ucimaram? 5Ar e minyak uang buwumtewet emef ayaw, ar uang dinar tiga ratus ajiwar atewetef. E uangam e pok opok ow batetam aememef ayaw, bare akat ara.” Inim aefesen. Bare, aram jokmen atakam e cowoc aotawfesen.

6E Yesus masirin, “Car e cowoc bajurusum arapok. E aemtamamanas, bare akat cowok ara. 7Pok opok ow cadam sotop aatamemapawarcemes. Join aatamfafayawarcow, car pok e ow batatam, bare asan akat ara. Do nat, cadam sotop batamemapawar opok. 8E cowoc aomomamar akatas takas, dor aemtamkurumaman. Ar minyak e dam aokomnemaman. Eras e dosumu ipic asep jofay awerem aman bajiwtatiwas ara. 9Atakamnak ara, ow e Atakm Akat, asanin asanin acacapiomces, ow e cowoc aemtamamanas inim atakam jen ajicemes.”

Yudas, Yesus, jokmen ow botasimemtam aememef

(Mat. 26:14-16; Luk. 22:3-6)

10Barewen. Yudas Iskariot e Yesus mamkawi ow dua belas ajiwar wun ipic cowok ara. Ar e Allah atakam mamtaw tugas ow awut ameromefen. Aram Yesus e ow botasimemtam aememefen. 11E ow, e Yudas atakam jen ajifes, aram jak akat aememfesen. “Bare, daram uang or atetamcemenom.” Inim aefesen. Yudas masirin, Yesus e ow botasimemtam asan akat, apowporefen.

Yesus e Bakamsow Pokbwi pok e amamkawi ow akac aanfes

(Mat. 26:17-25; Luk. 22:7-14,21-23; Yoh. 13:21-30)

12Barewen. E Bibit Opok Roti Pokbwi e bapnak jofay aemapfesen. Er e Bakamsow Pokbwi domba jiwi, Allah bacatitam jofay arawen. E Yesus mamkawi owam, jonow e aramat ipic atowporfesen. “E Bakamsow Pokbwi ocenak asan emencem? Dar e pokbwi pok bakenem.” Inim aefesen.

13Yesus masirin, jirmec e amamkawi ipic jamnuk ajirimefen. “Car e kota jisosey. Erasan ara, car bwis towomcow ipic bi jamnuk aemamtewcomokom. Caram e ipic mamkawiey. 14E ipicam cem afiwcema. Car masirin, e cem aramat ipic atakam mamotawporey. ‘E Guru atakam, “Doram, e domamkawi owam, e Bakamsow Pokbwi memen, ucim kamararam?”’ Inim mameey. 15E cem aramat ipic masirin, op kamar awut car aporomtamceman. Pokbwi pok takasam e kamar awamses. Bare, car daBakamsow Pokbwi pok erasan mamfafaytiwey.” Yesus inim aeefen.

16Bare, e Yesus mamkawi ipic jamnuk e kota ajisosfesen. Erasan ara, ar e pok takas e Yesus atakam atawefas jipu cowok aporfesen. Ar masirin, e Bakamsow Pokbwi pok akenemfesen.

17Porownak ara masirin, Yesusam, e amamkawi ow dua belas ajiwaram, e cem aapiwfesen. 18Aram cenes aneyapfes, wunam amos aanfesen. Amos aanfes ara, Yesus atakam e ow aotawefen. “Atakamnak ara, ca wun ipic cowok dor e jokmen ow aotasimemtamceman.” Inim aeefen.

19E Yesus mamkawi ow inim atakam jen ajifes, aram jak pwicak aemaptotorfesen. Ar masirin, jonow e aramat ipic atowportotorfesen. “E atakam atawmem ipic, dor opok openow?” Inim aetotorfesen.

20E Yesus nat, “E ipic, bare ca ow dua belas ajiwar wun ipic cowok ara. E ipic, e amos, bwi, dorcin asotanmom ara. 21Bare, e Asmat Anakat Ajaworemef Ipic damir aafcema. Er e Alkitab atakam jipu ara. E nat, e aramat ipic e jokmen ow aotasimemtamcow ipic, asan pwicaknakut aemapcema. E ipic bajisames opok ayaw, bare ar asan akat ara.” Yesus inim aeefen.

Tuhan Perjamuan

(Mat. 26:26-30; Luk. 22:15-20; 1Kor. 11:23-25)

22Barewen. E ow amos aanfes ara. Yesus wun amos atewefen. Aram terima kasih atakam Allah aotawefen. Terima kasih atakam Allah aotawef masirin, ar e amos akokomef, wunam e amamkawi ow sey aseyetamefen. “A amos bateweney. A dodam das ara.” Inim aeefen.

23Aramat ipic masirin, gelas anggur bwi epcom atewefen. Aram terima kasih atakam Allah aotawefen. Wunam ar e gelas bwi e ow sey aseyetamefen. E ow aporsipor takas e bwi aanfesen. 24Aramat ipicam atakam e ow aotawefen. “A bwi dores ara. Ametnak ara, Allah asmat ow bajortew atayi aeef. E dores, ow arke bajortew, airineycema. E dores, e Allah atayi aeefas, atakamnak aporomtamama. 25Atakamnak ara, wow ajiwar, dor a anggur bwi boan opok— dor ay anggur bwi e Allah Pemerintah Asan aoancey jofay ajiwara.” Yesus inim aeefen.

26Bare, e ow Allah basicim so aefesen. So aefes masirin, e sikon juwas Saitun aapenfesen.

Petrus e Yesus apacincowas atakam

(Mat. 26:31-35; Luk. 22:31-34; Yoh. 13:36-38)

27Yesus atakam e ow aotawefen. “Allah, e Alkitab aman, atakam aotawef. ‘Dor e domba manmok batiw ipic acatiwcimin. E domba masirin, apacayoscemes.’ Inim aeef. Inimas ara, car do mamkawi akorompimcemenokom. Er e Alkitab atakam jipu ara. 28E nat, Allah dor aojaworomsumutumcan, dor Galilea capinmi bap ajisoscimin. Car masirin asep aapenawcomokom.” Inim aeefen.

29E Petrus nat, “E wun ow takas or mamkawi akorompimcenesnew, do nat, opok.” Inim aeefen.

30E Yesus araw, “Atakamnak ara, iram ara, or atakam bar mamincop bap atawescemem, ‘Dor e Yesus nomsom opok,’ inim ajiescemem. E ayam jipic masirin, bar jamnuk atakam asep akoreyescema.” Inim aeefen.

31E Petrus nat, atakam fak aotawefen. “Ow orcin akac acatiwcemarowos openow. Do nat, ‘Dor e Yesus nomsom opok,’ inim baji opok cowok aecimin.” Inim aeefen. E wun ow takasam inim atakam cowok aotawfesen.

Yesus janim Allah e Getsemani aanimef

(Mat. 26:36-46; Luk. 22:39-46)

32Barewen. E ow, asan juwas Getsemani ajaremfesen. Yesus masirin, atakam e amamkawi ow aotawefen. “Car arasan inim a takam emapey. Dor masirin, janim Allah aanimcimin.” Inim aeefen.

33Aramat ipic, e Petrusam, e Yakobusam, e Yohanesam, atowomosefen. Ar masirin, jak pwicaknakut aememefen. Bare, ar jak opok cowok aememefen. 34Aram atakam e ipic mamincop aotawefen. “Do jak pwicaknakut aememamin— dor damir badamirafken inim awcawor ara. Ca nat, arasan inim a takam emapey, wunam manmok batiwapey.” Inim aeefen.

35Yesus masirin, wun asan sotop inim aomeremefen. Aram e ar ajurusemcowas bwenaw arapok, inim janim Allah aanimefen. 36“Diwi! Doricipic akatenem! Or e fakas takas aomomamem. Akat aporcem, dor bajurusem arapok. E nat, e akat aporminas jipu bwem arapok. E akat apormemas jipu cowok emey.” Inim aeefen.

37Yesus masirin, e owpu aofasienawefen. Ar e ow isi aemamesfes aporefen. Aram atakam Petrus aotawefen. “Simon. Or jam cowoknakap manmok bwemtiwap asan opoknew? 38Caram manmok inim mamtiwapawarey. Janim Allah inim mamanimawarey. Iblis car dosa bwem bacajijimtawasin. Car Allah atakam ji bwe, jak aseremapmokom ara. E nat, ca dam kumit ara.” Inim aeefen.

39Yesusam aameremef, wunam janim Allah aoanimefen. Aram e bap janim aanimefas cowok aoanimefen. 40Ar masirin, e owpu aofasienawefen. Aram e ow isi aoemamesfes aporefen. E ow isi manmok awutnakut arawen. Aram ucim atakam Yesus aotawcesnew, inim bi binip opoken.

41Yesus masirin, e owpu aofasienawefen. Aram atakam e ow aotawefen. “Car isi awamsokomnew? Car ses aanmokomnew? Bare. Do wow ara. Jipic cowok, e Asmat Anakat Ajaworemef Ipic, e dosa ow aotasimemtamcema. 42Caram basitey. Bajisosmoc. E dor aotasimemtamcan ipic aenawmar ara.” Inim aeefen.

Ow Yesus ban akimomfes

(Mat. 26:47-56; Luk. 22:47-53; Yoh. 18:3-12)

43Yesus atakam cowocemtawmepaw ara, Yudas akan aakenawefen. Ar e Yesus mamkawi ow dua belas ajiwar wun ipic cowok ara. Ow arkeam ar akac aenawfesen. Ar owec parangam, warim pokam, atowotnawfesen. E Allah atakam mamtaw tugas ow awutam, e Allah Jirmec mamememtam owam, e Yahudi ownucur owam, inimas jirmec ajirimfesen. 44Bap ara, e Yesus aotasimemtamcow ipic, atakam e ow arke aotawefen. “E ak aafopcey ipic, bare e ipic ara. Ar ban mamkimomey. Caram e ipic ban fak mamtowomosey.” Inim aeefen.

45Bare, e Yudas, e Yesuspu akan aakenawefen. “Guru!” Inim aeefen. Ar masirin, e Yesus ak aafopefen. 46E ow masirin, e Yesus ban akimomfesen. Aram aramat ipic ban faknakut aomosomfesen. 47E wun aememef ipic, e owec parang asumtewefen. Ar masirin, e Allah atakam mamtaw tugas ipic awut akerja bwemtam ipic jenmak asakamnemefen. 48Yesus masirin, atakam e aenawfes ow aotawefen. “Car owec parangam, warim pokam, do batew atowotnawmokom ucimaram? Ca nat, dor pok ces bwetaw ipic inim aranew? 49Join join, dor e Allah cem carakac aemapa aefom, wunam atakam amememtama aeof. Ca nat, ban do bakimop opokut aema aefenokom. E nat, ow e Alkitab atakam jipu aemcemenes.” Yesus inim aeefen. 50Bare, e Yesus mamkawi ow takas aramat ipic bakan ajiosfesen. Aram omar ajisosfesen.

51Ay ipic cowokam Yesus fa asoromefen. Ar kainin ajimomefen. E aememfes ow, e ipic ban bakimom emporfes opoken. 52E ipic e kain bakan ajiosefen. Aram dam fi, omar ajisosefen.

Yesus e Yahudi agama atakam mamsakam ow bipu aememef

(Mat. 26:57-68; Luk. 22:54-55,63-71; Yoh. 18:13-14,19-24)

53Barewen. E ow, Yesus, e Allah atakam mamtaw tugas ipic awut acempu atowomosfesen. E wun Allah atakam mamtaw tugas ow awutam, e Yahudi ownucur owam, e Allah Jirmec mamememtam owam, erasan ajarewsiapfesen. 54Petrusam e Allah atakam mamtaw tugas ipic awut acemsanpu, damasan opok Yesus fa asatefen. Ar e Allah cem manmok batiw ow cowkon jisanam baji ajamemapefen. 55E Allah atakam mamtaw tugas ow awutam, e atakam mamsakam ow takasam, Yesus bacatiw, inim atakam mamsakam akat arawen. Inimas Yesus pwicakas aemefnew, inim atemen batam ow janim aanimfesen. E nat, ar inim ow batew opoken. 56Ow arke e Yesus aemefas, suw atemen aatamfesen. E nat, e aratemen, bare awcawor opokut.

57Wun ow asitfes, wunam inim suw atemen aatamfesen: 58“E Yesus inim atakam atawef. ‘Asmat ow awames Allah cem aeapomfes. Do nat, a cem ajumtiwcimin. Ajumtiwcey masirin, bar mamincop dor wun cem aoeapomcimin. E aoeapomceyas nat, asmat ow bweapomas opok.’ E Yesus inim aeef. Daram e atawef atakam jen darma ajifom.” Inim suw atemen aatamfesen. 59E atemen aatamfes ow aporsipor nat, atakam cawor opokut.

60E Allah atakam mamtaw tugas ipic awut masirin, e ow wasec atereyemefen. Aram jonow Yesus atowporefen. “Awamces ow, or salah atakam atawmes. O nat, e ow atep bajit opoknew?” Inim aeefen.

61E Yesus nat, jokon cowok ajiemefen. Ar atep bajit opoken. E Allah atakam mamtaw tugas ipic awut masirin, “Or e Allah Aeremtewef Ipic aranew? Dar Allah asicimamom. O nat, aramat ipic atiw aranew?” Inim aeefen.

62E Yesus araw, “Dor e ipic awamcey ara. Caram, e Asmat Anakat Ajaworemef Ipic, e Allah ban bo jamam bemap aporcomokom. Caram e ipic e onam op jak aman aneycow aporcomokom.” Inim aeefen.

63Bare, e Allah atakam mamtaw tugas ipic awut inim atakam jen ajief ara, jak amopnakut aememefen. Inimas aram apakaian akamosomefen. “Dar wun atemen batam ow janim manim arapok. 64E ipic Allah awcawor arawen. Inimas ar pwicak atakam awut atawma. Caram inim atakam jen ajimokom. Inimas car ucim atakam aamsakamamokom?” Inim aeefen.

Bare, e ow takas, “E Yesus fasi ipic ara. Ow e ipic bacatiwces,” inim atakam aamsakamfesen. 65Wun ow masirin, bese Yesus dampu ajiapomfesen. E abiam kain apwirimomfes, wunam ban fon aramat ipic aemfesen. “Ban fon ca emfan? Atakam potawey.” Inim aefesen. E manmok batiw owam Yesus atowomfesen. Aram aramat ipic ak aempofesen.

Petrus, Yesus apacinef.

(Mat. 26:69-75; Luk. 22:56-62; Yoh. 18:15-18,25-27)

66Barewen. E Petrus e cemsan aememef ara, e Allah atakam mamtaw tugas ipic awut akerja bwemtam cowoc aenawefen. 67E cowoc Petrus jisanam baji aporefen. Ar masirin, manmok cowok e aramat ipic atiwefen. “Oram e Nasaret ipic juwas Yesus akac aemawirukum.” Inim aeefen.

68E Petrus nat, apacinefen. “Dor e atakam atawmemas nomsom opok.” Inim aeefen. Ar masirin, e cemsan pagar jimasappu ajisemefen. Ajisemef cowok masirin, ayam jipic atakam akoreyefen.

69E kerja bwemtam cowocam Petrus erasan aememef aoporefen. Ar masirin, atakam e wun erasan aememfes ow aotawefen. “Awamec ipic e Yesus akac aemawiri ipic cowok ara.” Inim aeefen. 70E Petrus nat, aopacinefen.

Jepen inim, e aememfes ow, atakam Petrus aotawfesen. “Bare or Galilea capinmi ipic araman. Inimas oram e ow ajowow ipic araman.” Inim aefesen.

71Petrus nat, atakam faknakut aotawefen. “Pate opok cowok. Allah manmok tiwap. Dor e atakam atawmokom ipic nomsom opok.” Inim aeefen.

72Ar inim atakam atawef cowok masirin, e ayam jipic atakam aokoreyefen. Bap ara, Yesus atakam Petrus aotawef, “Or atakam bar mamincop aotawescemem, ‘Dor e Yesus nomsom opok,’ inim ajiescemem. E ayam jipic masirin, bar jamnuk atakam asep akoreyescema.” Inim aeefen. Petrusam e atakam bi binip acomomefen. Ar masirin, bwec abwecefen.

Currently Selected:

MARKUS 14: LAICNS

Highlight

Copy