MARKUS 13
13
Yesus, ow e Allah cem ajumtiwcesas, atakam atawef
(Mat. 24:1-2; Luk. 21:5-6)
1Barewen. Yesus e Allah cem afisefen. E wun mamkawi ipicam atakam aramat ipic aotawefen. “Guru. A cem ek awutnakut araperey! A cem mamincopam akatnakut araperey!” Inim aeefen.
2E Yesus masirin, “Car a cem awutnakut mamincop apormokomnew? Bare, asep jofay a cem ek amanapor tonapor memames opok cowok aemcemes. Jewew ow nat, e takas ajumnemkurumcemes.” Inim aeefen.
Ow ajurusumcesas
(Mat. 24:3-14; Luk. 21:7-19)
3Barewen. Yesus e sikon juwas Saitun op aemapefen. E Allah cem e poman sikon aemamesefen. Inimas Yesus e cem mimin ajiopefen. Er masirin, Petrusam, Yakobusam, Yohanesam, Andreasam, jonow Yesus arop atowporfesen. 4“E atakam ataweremas, ucim jofay emcow? E aemcowas jofay sotop inim asisienawcow, Allah ucim junum bweas aporomtamcow? Bare, eras atakam da otawcarowey.” Inim aefesen.
5E Yesus masirin, “Bare, car pimicima. Ow tot ca botasin. 6Ow arke aenawcemes, wunam, ‘E Allah Aeremtewef Ipic, bare dor ara,’ inim aetotorcemes. Aram tot ow arke aotcemes. 7Car jewew bamo aporcokom, wunam wun capinmi jewew bamo atakam jen ajicokom, caram omar arapok. Bare, ow jewew aamocemes araman. E nat, e asepnak jofay sotopnak opok aemamescema. 8Wun samat arke jewew e wun samat arke aamoa aecemes. Wun pemerintah arke jewew e wun pemerintah arke aamoa aecemes.
9Ca nat, pimicima. Ow car ban akimomceman, wunam ar e atakam mamsakam ow aotasimemtamceman. Aram e sembahyang cem aman omop car aafceman. Ar car do mamkawi ow aporceman. Inimas car kepala ow bipuam, raja ow bipuam aememcomokom. E nat, car e Atakam Akat e owam aotawcomokom. 10Bare, ow e Atakam Akat e samatin samatin takas bap acacapiomcemes, wunam e asepnak jofay aenawcema. 11Ow car ban akimomcan, wunam ar car e salah atakam basakamtiw ow aotasimemtamcan, bare ca atakam e salah atakam basakamtiw ow aotawcokomas, bi binip jirow arapok. Atakam e ow botaw ememcokom, e Roh Kudus e atakam bi binip car atetamceman. E atakam aotawcokomas carop atakam opok. Er e Roh Kudus car atetamcan atakam ara.
12Wun owam arepcewesnew, arewcewesnew, kawey ow aotasimemtamcemes. E kawey ow masirin, e ow acatiwcemes. Wun ducur owam e ajiwi kawey ow aotasimemtamcemes. E kawey ow masirin, e jiwiam acatiwcemes. E wun atiperesam arisepes afakayomitcemes, wunam acatiwcemes. 13Ow car do mamkawi ow aporcan, ar takas bifan car afayomceman. E nat, ow e asepnak jofay ajiwar, do mamkawi bakorompim opok aemces, aram ajoremcemes.”
E Pwicak Awutnakutas
(Mat. 24:15-28; Luk. 21:20-24)
14“Bare, ‘Pwicak Awutnakutas’ aememcema. Eras, ow daniwis aemtiwcema. (A atakam baca bwem ow, a atakam jen bajikurumces.) E ‘Pwicak Awutnakutas’ e Allah acuw aatef asan aememcema. Car eras aporcokom, e Yudea capinmi aememames ow, e sikon asanpu omar bajisosces. 15E aporsipor cemko aemapces ow, e acem aman pok basarimjiwtawpor arapok. 16E kebun kerja aemces ow, e acem e abaju bofasitew arapok. 17Bare, e jofay e jak epcom cepesam, e jiwi aw anamces cepesam, asan pwicaknakut aememcemes. 18Caram janim Allah mamanimey. ‘E bajurusas jofay, e jufu bwi enemtepcow jofay arapok.’ Inim janim mamanimey. 19E jofay aenawcow, ow bajurusem awutnakut aemcemes. Allah a capinmi akenemtiwef jofayam, wow ajiwaram, ow inim awutnakut bajurusem opok aemames. Asep jofayam ar inim awutnakut bojurusem opok aemcemes. 20E nat, Tuhan atakam asakamtiwef. ‘E ow ajurusemcesas, jirownak arapok.’ Inim aeef. Ar inim atakam basakamtiw opok ayaw, ow takas damir aafcemes. E nat, ar e aereremtawef ow, sawes akat aoworporef. Inimas ar e ow ajurusemcesas, jirow arapok, inim atakam asakamtiwef.”
21“Ow atakam car aotawcan, ‘Jakaperey. E Allah Aeremtewef Ipic arasan ara,’ wunam ‘Jakaperey. E Allah Aeremtewef Ipic erasan ara,’ inim aecan, caram aratakam jen baji arapok. 22Bare, wun ow, ‘Dor e Allah Aeremtewef Ipic awamcey ara,’ inim suw atakam atawtotorcemes. Suw Allah atakam botaw owam aememcemes. E ow tot e Allah aereremtawef ow aotporcemes. Inimas ar junum bweas aemcemes. 23Bare, caram pimicima. Dor eras takas atakam bap a takam car aotawmin.”
E Asmat Anakat Ajaworemef Ipic aenawcowas atakam
(Mat. 24:29-31; Luk. 21:25-28)
24“E jofay ara, ow ajurusemcemes. Ajurusemces masirin, e jopok jiwic acamtiwcema. E piram baneyseremtiw opok aemcema. 25E bayitam, bayaram, akokoysayneycema. Allaham e onam op sereas akokoromcema. 26Er masirin, ow e Asmat Anakat Ajaworemef Ipic e onam op jak aman aneycow aporcemes. Aramat ipic e fakas epcom aneycema. Aram akatnakutas epcom aneycema. 27Aramat ipic e amalaikat e capinmi asanin asanin takas atewosomcema. E malaikat masirin, e Allah asanin asanin aereremtawef ow, aaramsimapomcemes.”
Os juwas “Arā” atakam
(Mat. 24:32-35; Luk. 21:29-33)
28“Bare, car e os juwas ‘arā’ aemamaras bi binip mamceceremey. E os e jinfas acakuemcow aporcokom. ‘E jusuw bwi sotop ara,’ inim aecomokom. 29Inimasam ara, car e atakam atawminas aenawcow aporcokom, car e Asmat Anakat Ajaworemef Ipic aenawcow jofay sotopnakap aporcomokom. 30Atakamnak ara, a capinmi awamces ow damir baf opok ara, e atakam atawminas bap a takam aemkurumcema. 31Bare, e onam opam, a capinmiam, aanioscema. Doratakam nat, inim aatamemamesawarcema.”
Ow e asepnak jofay aenawcowas amsom opok
(Mat. 24:36-44)
32“Asmat ow nat, e aramat ipic aoenawcow jofayam, jamam, amsom opok. E onam op malaikatam, e Allah atiwam, amsom opok. E doricipic cowok amsom ara. 33Bare, car pimicima. Manmok faka. Car e aemcowas jofay camsom opok. 34E atakam atawminas, jipic cowok wun capinmi ajisoscow inim cimin ara. Ar acem bakan ajioscema. Aram e akerja bwemtam ow, e apok takas manmok batiw jirmec ajirimcema. Aram e ow aporsipor kerja bwem jirmec ajirimcema. Aram atakam e cem manmok batiw ipic aotawcema. ‘E cem manmok faka.’ Inim aecema. 35Bare, caram ara. Caram manmok faka. Car e cem aramat ipic aofasienawcow jofay camsom opok. Ar porow aranew. Iramnak aranew. E ayam atakam akoreycow aranew. Tam aranew. Bare, caram camsom opok. 36Aramat ipic biin aemsucema. Inimas caram manmok faka. Aram car isi inim cowocamescokom, inim baporasin. 37E atakam car aotawminas, doram e ow takas aotawcimin. ‘Ca manmok faka,’ inim aecimin.” Yesus inim aeefen.
Currently Selected:
MARKUS 13: LAICNS
Highlight
Share
Copy
Want to have your highlights saved across all your devices? Sign up or sign in
LAI 1985
