MARKUS 15

Yesus, Pilatus bipu aememef

(Mat. 27:1-2,11-14; Luk. 23:1-5; Yoh. 18:28-38)

1Barewen. Tamnakap ara, e atakam mamsakam ow, atakam asarimsakamfesen. Er e Allah atakam mamtaw tugas ow awutam, e Yahudi ownucur owam, e Allah Jirmec mamememtam owam, inim ow arawen. Ar masirin, e Yesus manam ajikapomfes, wunam atowomosfesen. Ar e aramat ipic e Pilatus aotasimemtamfesen. 2Pilatus masirin, jonow e aramat ipic atowporefen. “Or e Yahudi ow araja ipic aranew?” Inim aeefen. E Yesus araw, “E atawmem atakam, atakamnak ara.” Inim aeefen.

3E Allah atakam mamtaw tugas ow awut masirin, Yesus salah arke, inim atakam aotawfesen. 4E Pilatusam inimas aporefen. Ar masirin, jonow Yesus aotowporefen. “Or atep bajit opoknew? Jakaperey. Awamces ow, or salah arke atakam atawmes.” Inim aeefen.

5E Yesus nat, atep bajit opokut arawen. Inimas e Pilatus junum aeefen.

Pilatus, Yesus damir baf, atakam asakamtiwef

(Mat. 27:15-26; Luk. 23:13-25; Yoh. 18:39–19:16)

6Barewen. Tahunin tahunin, e Bakamsow Pokbwi aman, ow e Pilatus, penjara cem aman aemapef ipic cowok bafimisimtam, janim aanima ajimpesen. E Pilatus masirin, e ipic cowok afimisimtama ajimepen. 7E jofay ara, ow arke penjara cem aman aemapfesen. E wun ipic cowok juwas. Barabas arawen. Bap ara, e Barabasam, e wun owam, pemerintah owec aamofesen. Aram ow acatiwfesen. 8Bare, e pokbwi aman, ow arke e Pilatus bipu ajarewsiemfesen. Aram e Pilatus e aema ajimepas jipu bwemtam, janim aanimfesen. 9-10Bare e Allah atakam mamtaw tugas ow e Yesus icim afesfesen. Inimas bap ara, ar e Yesus e Pilatus aotasimemtamfesen. E Pilatusam e icim afesfesas aporefen. Ar masirin, jonow e abipu ajarewsiemfes ow atowporefen. “Car dor e Yahudi ow araja ipic bafimisimtam akat open?” Inim aeefen.

11E Allah atakam mamtaw tugas ow awut nat, atakam e ow arke aotawfesen. “Car Barabas bafimisim, janim e Pilatus aanimey. Ar Yesus bafimisim arapok.” Inim aefesen. E ow masirin, inimas janim e Pilatus aanimfesen. 12E Pilatus masirin, atakam e ow arke aotawefen. “Car atakam, ‘E Yesus, Yahudi ow araja ipic ara,’ inim aemokom. Do nat, e ipic ucimas emcey?” Inim aeefen.

13E ow masirin, atakam afakaytawfesen. “E ipic salib os op bacatopomey!” Inim aefesen.

14E Pilatus araw, “E ipic ucim pwicakas aemef?” Inim aeefen. E ow nat, atakam awutnakut aofakaytawfesen. “E ipic salib os op bacatopomey!” Inim aefesen.

15Bare, e Pilatus e ow arke jak akat boporemem aemefen. Inimas ar Barabas e ow afimisimtamefen. Aram ow Yesus omop baf jirmec ajirimef, wunam aramat ipic e salib os op bacatopom e ow aotasimemtamefen.

Tentara ow Yesus uc aomocfes

(Mat. 27:27-31; Yoh. 19:2-3)

16Barewen. Tentara ow, Yesus e gubernur cem aman atowomisfesen. Ar masirin, e wun tentara ow takas ajatefesen. 17E tentaraam baju jirow esakam e Yesus atamwimemfesen. Aram fa epcom sinim atewfes, wunam kus bamapom biwnam asiapomfesen. Ar masirin, e biwnam Yesus kus ajimapomfesen. 18Aram atakam aramat ipic aotawfesen. “Yahudi ow araja ipic akatenem! Selamato!” Inim aea aefesen. 19Aram os kanim Yesus kus omop aaffesen. Beseam aramat ipic dam ajiapomfesen. Aram Yesus basicim pas, e aramat ipic bipu jine onok aneyotapfesen. 20Ar Yesus uc aomocfesen. Uc aomockurumfes masirin, ar e baju jirow esakam aofortewfes, wunam arop pakaian e aramat ipic aotamwimemfesen. Ar masirin, Yesus e salib os op bacatopom atowomosfesen.

Ow Yesus salib os op atewtopomfes

(Mat. 27:32-44; Luk. 23:26-43; Yoh. 19:17-27)

21E bowsec ara, ar Kirene samat ipic juwas Simon biamnuk aemamtewfesen. Aramat ipic, Aleksanderam, Rufusam, aricipic arawen. Ar e kebun asan jepen aewenawefen. Bare, tentara ow, e Simon, e Yesus salib batew aneneyfesen. 22Ar masirin, Yesus, asan juwas Golgota ajisomosfesen. “Golgota” daratakam juw buwumtew, “Damir Kus Asan,” inim ara. 23Bap ara, ow anggur bwiam, os capi juwas muram, aartamsemfesen. Aram e bwi Yesus batetam emporfes opoken. Aramat ipic e bwi ban pwicaken. 24Ar masirin, Yesus e salib os op atewtopomfesen. Aram aramat ipic pakaian atewfesen. Wunam ar ek kanim aneyjiwitiwfesen. E ek kanim e aemcesas baporomtamas ara. Inimas ar aramat ipic apakaian, e ek kanim aporomtamefas jipu, sey aseyamatfesen.

25Bare, jam sembilan tam, Yesus salib os op atewtopomfesen. 26Owam, e Yesus salah aeefas tulis aeapomfesen. E atakam, “A ipic, Yahudi ow araja ipic arawen.” Inim tulis aeapomfesen. 27Aram erasan, pok ces bwetaw ipic jamnuk salib os op atewtopomfesen. Ar wun ipic e Yesus bopim jamam arop salib os op atewtopomfesen. Aram e wun ipic e Yesus tamopim jamam arop salib os op atewtopomfesen. [ 28E aemfesas, e Alkitab atakam jipu ara. E Alkitab atakam, “Ow, aramat ipic, dosa ipic inim arawen,” inim aema.] 29Erasan aokorfea aefes ow, kus owkasi owkasi aetotora aefesen. Aram cemew atakam Yesus aotawa aefesen. “Or atakam atawfem, ‘Dor e Allah cem ajumtiwcimin, wunam bar mamincop dor e cem aoeapomcimin.’ Inim aefem. 30Bare, or inim fakas aomomamemnew, orma joremporey! E salib os op, inim korneyey!” Inim aefesen.

31E Allah atakam mamtaw tugas ow awutam, e Allah Jirmec mamememtam owam, inim cowok aemfesen. Ar aramaman, Yesus uc aomocfesen. “E ipic kawey ow ajortewef. E nat, arma bwemjorem asan opok. 32Ar e Allah Aeremtewef Ipic arawen. Aram e Israel ow araja ipic arawen. Aram inim ipic aememamarnew, ar e salib os op aynam bakorneycow. Ar inimas aemcownew, dar e aramat ipic asicimcomom.” Inim aefesen. E Yesus salib os op akac aemtepfes ipic jamnukam, atakam pwicak aramat ipic aotawfesen.

Yesus damir aafef

(Mat. 27:45-46; Luk. 23:44-49; Yoh. 19:28-30)

33Barewen. Jok jam dua belas aememfes ara, e capinmi takas jiwic acamtiwefen. Jam tiga masirin, sere aoseremefen. 34Jam tiga ara, Yesus atakam afakaytawefen. “Eloi, Eloi, lama sabaktani!” Inim aeefen. E atakam, daratakam juw buwumtew, “DorAllah! DorAllah! Or bakan ucimas ajiosmenem?” Inim aeefen.

35E wun aememfes owam, e aramat ipic atawef atakam jen ajifesen. Ar masirin, “E atakam jen pajiey. Ar Elia ajatema.” Inim aefesen. 36Jipic cowokam je akukuosef, wunam bwi basirijiw pok atowotnawefen. Ar e pok, asesak anggur bwi asotewefen. Ar masirin, e pok wakan bip aatamsimapomef, wunam ar Yesus e bwi bacocomokop, bweyofpu ajoromtomettemtamefen. Aram atakam ametemotawefen. “Ema. Dar e Elia e ipic basurumnemtam epen batakampormoc.” Inim aeefen.

37Barewen. Yesus atakam awut afakaytawefen. Atakam awut afakaytawef masirin, damir aafefen. 38E Allah cem jimasap kainam op ewkayneyef, wunam acenes ajiwar akayfisefen. 39Tentara komandan ipic cowokam, Yesus biamnuk ajiemefen. Aram e Yesus damir aafefas aporefen. “E ipic Allah atiw araman.” Inim aeefen.

40Erasan ara, cepes, manmok batiw, damasan opok inim aememfesen. E ememfes cepes aman ara, Maria Magdalena ara. Salome ara. Yakobus Kanimam, Yosesam, arosowoc juwas Maria ara. Inim cepes arawen. 41Ametnak ara, Yesus Galilea capinmi aememawiri, e cepes aramat ipic ajamkawiawirisen. Aram pok aramat ipic afafaytamawirisen. Wun cepes arkeam, Yesus, Yerusalem akac ajamenawfesen. E cepesam e Yesus damir aafef asanpu aememfesen.

Yusuf, Yesus e sumu ipic ek jip aman ajiwtatiwef

(Mat. 27:57-61; Luk. 23:50-56; Yoh. 19:38-42)

42-43Barewen. Jo atiefen. Jo atief ara. Arimatea capinmi ipic juwas Yusuf aenawefen. Aram Yahudi atakam mamsakam ow wun ipic arawen. Ow takasam e aramat ipic asicimfesen. Aramat ipicam e Allah Pemerintah aenawcowas, manmok afeawirien. Bare, e jofay, pok bafafay jofay arawen. Ajofay ara masirin, Ses Ban Jo arawen. Inimas aramat ipic jak fak aememef, wunam Pilatus bipu ameromefen. Ar masirin, Yesus sumu ipic batew, janim Pilatus aanimefen. 44Pilatus e janim aanimefas jen ajief, ar e Yesus damir sarim inim aafefas, junum awut aeefen. Ar masirin, e tentara komandan ipic ajateef, wunam jonow atowporefen. “E Yesus damir aafor, tarey inim open?” Inim aeefen. 45E komandan ipic masirin, “Bare, damir tarey inim emcaafor.” Inim aeefen. Pilatus inim atakam jen ajief ara, ar e Yusuf e Yesus sumu ipic batew, atetamefen. 46Bare, Yusuf, kain akat ajititef, wunam ar Yesus sumu ipic cenes asurumnemefen. Ar masirin, e kain e sumu ipic biram ajiktiwefen. Ametnak ara, ar sikon ek jip awerem asiefen. Yusufam e sumu ipic e ek jip aman ajiwtatiwefen. Ek jip aman ajiwtatiwef masirin, wun ek e ek jip imwipu apwepweremocenef, wunam e ek jip imwi akapimapomefen. 47E Maria Magdalenaam, e Yosias arosowoc juwas Mariaam, e Yesus sumu ipic ajiwtatiwef asan manmok atiwfesen.

Currently Selected:

MARKUS 15: LAICNS

Highlight

Copy