MATIUS 27

Ow, Yesus, Pilatus aotasimemtamfes

(Mrk. 15:1; Luk. 23:1-2; Yoh. 18:28-32)

1Barewen. Tamnakap ara, e Allah atakam mamtaw tugas ow awut takasam, e Yahudi ownucuram, Yesus bacatiw atakam asakamtiwfesen. 2Ar aramat ipic manam ajikapomfes, wunam atowomosfesen. Aram aramat ipic e gubernur ipic juwas Pilatus aotasimemtamfesen.

Yudas damir aafef

(Aem. 1:18-19)

3Barewen. E ow Yesus bacatiw atakam aamsakamfesen. E Yesus, e jokmen ow aotasimemtamef ipic juwas Yudas, inimas aporefen. Aramat ipic masirin, ay bi binip aceceremefen. Ar uang perak tiga puluh ajiwar, e Allah atakam mamtaw tugas ow awutam, e ownucuram, aofasimtamefen. 4E Yudasam, “Dor jipic tarowat, ow a bacatiw aotasimemtamof. Inimas dosa aemof.” Inim aeefen. E ow masirin, “Er oras. Daras opok.” Inim aefesen. 5Bare, e aramat ipic, e uang perak, e Allah cem aman bipar ajiwtitamefen. Ar masirin, aojisosefen. Aram somen e fomak ajikapomef, wunam arma sanaw aeamesefen.

6E Allah atakam mamtaw tugas ow awut, e uang perak atewfesen. Aram, “E uang ow bacatiw uang ara. Inimas dar e uang e derma batewapom karow araman.” Inim aefesen. 7Ar masirin, atakam aamsakamfesen. Wunam ar e uang, capinmi juwas “Piring Batu Bakenem Asan” ajititfesen. Ar e capinmi jewey damir ow se bawuapom asan, akat arawen. 8Inimas wow jofay ajiwar, ow, e capinmi juwas “Es Capinmi” aemes.

9E aemfesas, e Allah atakam botaw ipic juwas Yeremia e atawef atakam jipuas ara. Bap ara, aramat ipic atakam, “E ow e uang perak tiga puluh ajiwar atewfes. E Israel ow, inim uang, e aramat ipic botasimemtam ipic batetam, atakam aamsakamfes. 10Ar masirin, e Piring Batu Bakenem Asan capinmi ajititfes. Er e Tuhan jirmec ajirimfinas jipu ara.” Inim aeefen.

Pilatus jonow Yesus atowef

(Mrk. 15:2-5; Luk. 23:3-5; Yoh. 18:33-38)

11Barewen. Ow, Yesus, e gubernur bipu atowocenfes. E gubernur masirin, jonow aramat ipic atowefen. “Or e Yahudi ow araja ipic aranew?” Inim aeefen. E Yesus masirin, “Bare, e atawmemas atakamnak ara.” Inim aeefen. 12E Allah atakam mamtaw tugas ow awutam, e ownucuram, “E Yesus salah ara,” inim aefesen. Aramat ipic nat, atep bajit opoken. 13E Pilatus masirin, atakam aramat ipic aotawefen. “E ow, or salah arke atakam atwmes. Or e atakam jen baji opoknew.” Inim aeefen. 14Aramat ipic nat, atep bajit opok cowok arawen. Inimas e gubernur junum awut aeefen.

Ow Yesus bacatiw atakam aamsakamfes

(Mrk. 15:6-15; Luk. 23:13-25; Yoh. 18:39–19:16)

15Barewen. E Bakamsow Pokbwiin Pokbwiin, e gubernur, penjara cem bemap ipic cowok afimisimtama ajimepen— er e ow arke e aeremtewa ajimpes ipic jipu arawen. 16E jifayam, ar jipic juwas Barabas penjara cem aman aomopfesen. E ipicam an afufuosefen. 17,18Bare, e ow arke icim afesfesen. Inimas bap ara, ar e Yesus e Pilatus aotasimemtamfesen. E Pilatusam e icim afesfesas aporefen. Inimas e ow arke ajarewsiemfes ara, aramat ipic jonow e ow atowporefen. “Dor ocenak ipic afimisimtamcey? Barabasnew? Yesusnew? Bare, wun ow, ‘E Yesus e Allah Aeremtewef Ipic ara,’ inim aemes.” E Pilatus inim aeefen.

19Barewen, E Pilatus, ow boworpor asan aemapefen. E arem masirin, atakam wun ipic aotawefen. “Oram Pilatus mamotawey: ‘Dor wun e ipic tarowat isi tamwitey. Dor masirin, jak pwicak awut aemapmin. Inimas or e ipic pok bwem arapok.’ Inim eey.” E Pilatus arem inim aeefen. Bare, e ipic e atakam aotawtamefen. 20E nat, e Allah atakam mamtaw tugas ow awutam, e ownucuram, e ow arke acajijimtawfesen. Ar e ow, Pilatus, e Barabas bafimisimtamam, e Yesus bacatitamam, inim janim manim acajijimtawfesen. 21E gubernur masirin, jonow e ow atowporefen. “Awamces jipic jamnuk aman, do ca ipic fimisimtamcen?” Inim aeefen. E ow masirin, “Barabas,” inim ajisawufesen. 22E Pilatus nat, “Wun ow, ‘E Yesus, e Allah Aeremtewef Ipic ara,’ inim aemes. Dor e ipic ucimas emcey?” Inim aeefen. E ow masirin, “E ipic salib os op bacatopomey!” Inim aefesen. 23Pilatus masirin, “Aramat ipic nat, ucim pwicakas aemef?” Inim aeefen. E ow nat, atakam awutut afafakaytawfesen. “E ipic salib os op bacatopomey!” Inim ajisawua aefesen. 24E Pilatus, atakam e ow botaw emporef opoken. E owam jisuwan kayimin kayimin akakayimfesen. Aramat ipicam inimas aporefen. Ar masirin, bwi atewefen. Aram ban bwi e ow arke bipu acicikimefen. “A ipic damir aafcow, e salah doras opok. Caram caras.” Inim aeefen. 25E ow takas masirin, “Owo. E ipic damir aafcowas salah aemamomnew, bare Allah, daram, datiperesam, bajurusumcarow.” Inim aefesen. 26Bare, Pilatus, e Barabas, e ow afimisimtamefen. Aram ow Yesus omop baf jirmec ajirimef, wunam aramat ipic e ow salib os op bacatopom aotasimemtamefen.

Tentara ow uc Yesus aomocfes

(Mrk. 15:16-20; Yoh. 19:2-3)

27Barewen. E gubernur atentara ow, e Yesus gubernur cem aman atowomiwfesen. Ar e wun tentara ow takas, e Yesuspu bwenawom, ajatefesen. 28Ar e aramat ipic pakaian afamtewfesen. Wunam ar baju jirow esakam, e aramat ipic atamwimemfesen. 29Aram fa epcom sinim atewfes, wunam kus bamapom biwnam asiapomfesen. Ar masirin, e biwnam, aramat ipic kus ajimapomfesen. Aram firko e aramat ipic ban bo atowapomfesen. Ar masirin, aramat ipic bipu jine onok aneyotapfesen. Aram aramat ipic uc aomocfesen. “Yahudi ow araja ipic akatenem! Selamato!” Inim aea aefesen. 30Aram bese Yesus dam ajiokopomfesen. Aram os kanim atewfes, wunam Yesus kus omop aaffesen. 31E owam, e aramat ipic uc aomocfesen. Uc aomocfes masirin, e baju aofortewfesen. Aram arop pakaian e Yesus otamwimemfesen. Aram aramat ipic salib os op bacatopom atowomosfesen.

Ow Yesus salib os op atewtopomfes

(Mrk. 15:21-32; Luk. 23:26-43; Yoh. 19:17-27)

32Ajisfes ara, ar kota Kirene ipic juwas Simon aporfesen. Ar aramat ipic Yesus salib batew aneneyfesen. 33Ar asan juwas Golgota ajaremfesen. “Golgota” daratakam juw buwumtew, “Damir Kus Asan” ara. 34Bap ara, ow anggur bwiam, jiram, aartamsemfesen. Ar masirin, e bwi Yesus anamfesen. Yesus e bwi anaporef, wunam ar e bwi ban pwicak aemefen. 35Ar aramat ipic salib os op atewtopomfesen. Aram ek kanim aneyjiwitiwfesen. E ek kanim e aemcesas baporomtamas ara. Inimas ar aramat ipic apakaian, e ek kanim aporomtamefas jipu, aseyamatfesen. 36Aram erasan aramat ipic manmok atiwapfesen. 37Ow e aramat ipic salah aeefas tulis aeapomfesen. “A ipic Yesus ara. Ar e Yahudi ow araja ipic arawen.” Inim tulis aeapomfesen. Aram, e tulis aeapomfes atakam, e Yesus kuspu atometewapomfesen. 38Aram pok ces bwe ow jamnuk salib os op atewtopomfesen. Ar e wun ipic e Yesus bopim jamam arop salib os op atewtopomfesen. Aram e wun ipic e Yesus tamopim jamam salib os op atewtopomfesen.

39E erasan aokorfea aefes ow, kus owkasi owkasi aea aefesen. Aram cemew atakam Yesus aotawa aefesen. 40“Or atakam atawfem, ‘Dor e Allah cem ajumtiwcimin, wunam bar mamincop dor e cem aoeapomcimin,’ inim aefem. O nat, Allah atiw aranew, orma joremey. Or e salib os op inim korneyey.” Inim aefesen. 41E Allah atakam mamtaw tugas ow awutam, e Allah Jirmec mamememtam owam, e ownucuram, e aramat ipic inim uc aomocfesen. 42“E ipic kawey ow ajortewef. E nat, ar arma bwemjorem asan opok. Ar Israel ow araja ipic aranew? Ar wow e salib os op akorneycow, dar aramat ipic asicimcomom. 43Aramat ipic atakam, ‘Dor Allah atiw ara,’ inim aeef. Aram Allah jirey aema. Inimas Allah e ipic damos ajiomamarnew, ar aramat ipic bajortewcow.” Inim aefesen. 44E Yesus salib os op akac aemtepfes pok ces bwe ipic jamnukam, aramat ipic inim inim pwicak atakam aotawfesen.

Yesus damir aafef

(Mrk. 15:33-41; Luk. 23:44-49; Yoh. 19:28-30)

45Bare. Jok jam dua belas aememfes ara, e capinmi takas jiwic acamtiwefen. Jam tiga masirin, sere aoseremefen. 46Jam tiga aranew, Yesus atakam afakaytawefen. “Eli, Eli lama sabaktani?” Inim aeefen. E atakam daratakam juw buwumtew, “DorAllah. DorAllah. Or bakan ucimas ajiosmenem?” Inim aeefen. 47E wun erasan aememfes ow, inim atakam jen ajifesen. Ar masirin, “Aramat ipic Elia ajatema,” inim aefesen. 48E wun ipic cowok masirin, je asarimkukuosefen. Ar bwi basirijiw pok atewef, wunam e pok asesak anggur bwi asotewefen. Aram e pok, wakan bip atamsimapomefen. Ar masirin, e pok Yesus, e bwi bacocomokop e bweyofpu, ajoromtomettemtamefen. 49E wun ow masirin, “Ema. Elia, e aramat ipic bajortew bwenaw epen batakampormoc.” Inim aefesen. 50Bare, Yesus atakam awut aofakaytawef, wunam damir aafefen.

51Bare, e Allah cem jimasap kain op ewkayneyef, wunam e cenes ajiwar akayfisef. Ajowam asimef. Ek awut arkeam atetereyfes. 52Aweremam amumufes. Damir aaffes ow tarowat arke masirin, aojaworsitfes. 53Ar e awerem aewwarimwisfes. Wunam Yesus aojaworsitef ara, e ow, e Akat Kota afiwemfes. Aram ow arke bipu afomisfes.

54Barewen. E tentara komandan ipicam, e ar akac aememfes owam, Yesus manmok atiwemfesen. Ar e ajow asimef aporfesen. Aram e wunam aporfesen. Inimas omar awutut aefesen. “Awamec ipic Allah atiwnak ara.” Inim aefesen. 55Cepesam arke manmok batiw damasan opok inim aememfesen. Bap ara, ar Yesus, Galilea capinmi, akac aewenawfesen. Ar, pok, aramat ipic afafaytamawiris cepes arawen. 56E aememfes cepes aman ara, bare Maria Magdalena ara. Yakobusin Yusuf arosowoc juwas Maria ara. E Sebedeus atiperes arosowoc ara. Inim cepes arawen.

Ow Yesus sumu ipic ek jip awerem ajiwtatiwfes.

(Mrk. 15:42-47; Luk. 23:50-56; Yoh. 19:38-42)

57Porow ara masirin, Arimatea capinmi ipic juwas Yusuf aenawefen. Aramat ipic pok awut aomomefen. Aram Yesus mamkawi ipic aememefen. 58Aramat ipic Pilatus bipu ameromefen. Ar masirin, Yesus e sumu ipic batew janim Pilatus aanimefen. Pilatusam, ow e sumu ipic, aramat ipic batetam, jirmec ajirimefen. 59Yusufam e sumu ipic atewef, wunam ay kain akat, biram ajiktiwefen. 60Ar masirin, e sumu ipic e aray ek jip awerem ajiwtatiwefen. Bap ara, ar e sikon ek jip awerem asiefen. Bare, ar e sumu ipic e awerem ajiwtatiwef masirin, wun ek awut e awerem jip imwipu apwepweremocenef, wunam e ek jip imwi akapimapomefen. 61Maria Magdalenaam, e wun Mariaam, e awerem awumin aemapfesen.

Ow e ek jip awerem manmok atiwfes

62Ajofay ara masirin, e Allah atakam mamtaw tugas ow awutam, e Parisi owam, e Pilatuspu akac aapenfesen. Er Ses Ban Jo arawen. 63Aram atakam atawfesen. “Tuan. Dar binip acomomamom. E tot bot ipic tetakay aememef ara, ar atakam, ‘Dor damir aafcey ara, bar mamincop aojaworsitcimin.’ Inim aeef. 64Inimas ara, or, ow, e awerem, bar mamincop ajiwar manmok batiwem, jirmec bajirimey. E amamkawi ow erasan bwenaw, wunam e sumu ipic osom batewasin. Aram, ‘Aramat ipic aojaworsitor,’ inim suw atakam botawasin. E amamkawi ow inimas aeces, e asep tot botas awutut aemamescema. E bap tot botasam, kanim inim aemamescema.” Inim aefesen. 65Pilatus masirin, “Manmok batiwem ow batewey. Caram cey. E awerem jimasap fak emapomey. Caram camsom ara.” Inim aeefen. 66Bare, e ow ajisosfesen. Aram e manmok batiw owam, pokkari, e awerem jimasap, akac aeapomfesen. E owam e awerem manmok atiwfesen.

Currently Selected:

MATIUS 27: LAICNS

Highlight

Copy